Nius i Kam Long Olgeta Hap
“Long ol kantri i stap rabis, planti meri moa inap i dai taim ol i gat bel o taim ol i karim bebi, winim 300 taim ol meri i stap long ol kantri i gat planti mani.”—BUSINESSWORLD, FILIPINS.
“Long Kenya, ol i pinisim inap olsem 1,000 tisa long wok, bikos ol i mekim pasin sem long ol skulmeri insait long tupela yia i go pinis. . . . Wanpela lain we ol sumatin i ken ring bilong kisim helpim na nem bilong ol bai stap hait . . . i kamapim klia olsem dispela hevi i bikpela tru, ol i no bin ting em bikpela olsem.”—DAILY NATION, KENYA.
Samting Nogut Em Doti Wara Inap Kamapim
Ripot bilong Yunaitet Nesen i tok, “planti man moa i dai long doti wara winim ol man i dai long olkain pasin bilong pait na bagarapim man, na ol woa.” Dispela ripot i tok olsem long olgeta de, inap olsem 2 milion ton pipia—bilong ol fam na faktori na ol paip bilong rausim pekpek samting—i go long ol wara na solwara, na dispela i kamapim ol sik na i bagarapim ol samting i stap long wara na graun. Na tu, long olgeta 20 seken, wanpela pikinini i no winim 5-pela krismas i dai long sik em i kisim long wara. Dairekta bilong lain UN Environment Programme, Achim Steiner, i tok: “Bilong dispela graun i ken stap gut, . . . yumi mas wok strong long painim rot na yumi no kamapim planti pipia na yumi mas rausim pipia long pasin i stret.”
Ol Nupela Tokples
Taim ol saveman bilong tokples i skelim tokples Aka na Miji em planti man i no save long en, ol i painim namba 3 tokples, em Koro. Em ol tokples bilong ol man long not is India long provins Arunachal Pradesh, klostu long boda bilong Butan na Saina. Saveman Gregory Anderson, em dairekta bilong lain Living Tongues Institute for Endangered Languages, em i tok: “Dispela em wanpela tokples we ol man i no bin raitim stori bilong en, luksave long en, o putim long rekod.” Ol man i no bin save olsem tokples Koro i stap, bikos 800 manmeri tasol i save mekim dispela tokples, na tu, ol man i no inap raun long dispela hap. Long 2009, ol i painim 24 tokples long wanpela hap long Saina we bipo ol i bin ting i gat wanpela tokples tasol i stap long en.
Danis i Stap Pinis Long Blut?
Wanpela ripot em ol saveman bilong ol yunivesiti bilong York, Inglan, na Jyväskylä, Finlan, i kamapim, em i tok: “Ol man inap muvim bodi wantaim musik ol i harim, dispela i kamap klia taim man i muvim lek bilong em wantaim bit bilong musik.” Ol saveman i painimaut olsem paslain long ol pikinini i lain long toktok, ol i pilim bit bilong musik na dispela i kirapim ol long muv wantaim musik. Taim ol i muv gut wantaim musik, ol i smail longpela taim moa. Dispela i soim olsem pasin bilong bihainim musik na laik bilong muv wantaim bit bilong musik, em i no samting yumi lainim, nogat, em samting i stap pinis long blut.