Rot Bilong Pinisim Olgeta

Planti milion manmeri i bin bihainim ol stiatok long ol atikol i kamap paslain na ol i wok strong long rausim long bel pasin bilong bel nogut long ol narapela lain. Tru tru, yumi yet i no inap rausim olgeta dispela pasin bilong bel nogut long narapela lain. So yu ting dispela pasin inap pinis olgeta?

Wanpela Gutpela Gavman

Ol gavman bilong ol man i no bin pinisim pasin bilong ol man long bel nogut long narapela lain. Tasol yu ting dispela i makim olsem i no gat wanpela gavman inap long pinisim tru pasin bilong bel nogut long narapela lain?

Gavman we inap pinisim pasin bilong bel nogut long narapela lain em bai

1. 1. Kirapim ol man na ol i laik senisim tingting na filings ol i gat long narapela lain.

2. 2. Stretim bel hevi we i mekim na i hatwok long mekim pasin fea long ol narapela.

3. 3. I gat ol gutpela lida we ol i mekim pasin i fea long olgeta man i stap aninit long ol.

4. 4. Bungim ol man bilong olgeta kain lain.

Baibel i tokim yumi olsem God i bin kamapim kain gavman olsem. Na kolim olsem “Kingdom Bilong God.”—Luk 4:43.

Skelim samting dispela gavman bai mekim.

1. Nambawan Skul

“Ol manmeri bilong graun bai kisim save long stretpela pasin.”—AISAIA 26:9.

“Na stretpela pasin bai kamapim bel isi, na samting em stretpela pasin bai kamapim em gutpela sindaun inap oltaim oltaim.”—AISAIA 32:17.

Dispela i makim wanem? Kingdom Bilong God bai skulim ol man long stretpela pasin. Taim ol man i save long wanem pasin i stret na wanem pasin i no stret—tingting ol i gat long narapela narapela bai senis. Olgeta bai save olsem pasin i stret ol i mas mekim em long laikim ol man bilong olgeta kain lain.

2. Pinisim

God “bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—REVELESEN 21:4.

Dispela i makim wanem? Kingdom Bilong God bai pinisim pen em pasin bilong bel nogut long narapela lain i kamapim. Ol man bipo ol i karim hevi long dispela pasin bai no gat risen moa long ol i heitim ol man i mekim nogut long ol.

3. Gutpela Wok Bos

“Em bai no jasim man long samting em i lukim tasol long ai, o stretim man long samting em i harim tasol long yau. Em bai jasim ol taranguman long pasin i fea, na long stretpela pasin, em bai givim tok bilong stretim ol man i gat pasin daun, em tok we inap helpim ol.”—AISAIA 11:3, 4.

Dispela i makim wanem? Jisas Krais, em King Bilong Kingdom bilong heven, bai bosim ol man long olgeta hap bilong graun long pasin i fea na mekim wankain pasin long olgeta lain. Jisas i no laikim tasol wanpela lain winim narapela lain, na em bai strong long ol man i bihainim ol stretpela lo bilong em long graun olgeta.

4. Pasin Wanbel

Kingdom Bilong God bai skulim ol man na bai ol i gat “wankain tingting na wankain pasin laikim, na [ol] i stap wanbel tru na holim wanpela tingting tasol.”—FILIPAI 2:2.

Dispela i makim wanem? Pasin wanbel namel long ol man bai stap aninit long Kingdom Bilong God em pasin wanbel tru na i no giaman tasol. Ol bai “stap wanbel tru,” long wanem, ol bai laikim tru narapela narapela.