Buk Bilong Baibel Namba 32—Jona
Man Bilong Raitim: Jona
Raitim Pinis: 844 B.C.E. samting
1. Buk Jona i bekim wanem ol askim? Buk i soim yumi olsem wanem long marimari bilong Jehova?
JONA—em misineri long narapela kantri olsem 800 yia samting paslain long Krais. Em i ting olsem wanem long wok Jehova i givim long em? Wanem ol nupela samting i bin painim em? Ol man i putim yau long tok em i autim? Wok bilong em i karim kaikai? Stori bilong Buk Jona i bekim ol dispela askim. Jona i raitim long taim lain bilong Jehova i brukim pinis kontrak bilong Em na ol i lotuim ol god giaman bilong ol haiden. Tok profet bilong dispela buk i kamapim klia olsem Jehova i no save marimari long wanpela lain tasol, olsem lain Israel. Nogat. Na buk i litimapim tru bikpela marimari na sori bilong Jehova, em i narapela kain tru long pasin bilong ol sinman, em ol i sot long marimari, na pasin bilong isi long ol man, na bilip.
2. Yumi gat wanem save long Jona? Em i kirap mekim wok profet long wanem yia?
2 Insait bilong nem Jona (tok Hibru, Yoh·nahʹ) i olsem “Balus,” em wanpela kain pisin. Jona em i pikinini bilong profet Amitai bilong Gathefer long Galili long graun bilong Sebulun. Long 2 King 14:23-25, Baibel i tok King Jeroboam bilong Israel i bin surikim mak bilong graun bilong Israel i go moa, olsem Jehova i bin tok long maus bilong Jona. Olsem na yumi save Jona i bin mekim wok profet long 844 B.C.E. samting, em yia Jeroboam Namba 2 i kamap king bilong Israel, na em planti yia paslain long taim ol Asiria, em Ninive i nambawan biktaun bilong ol, i kirap bosim Israel.
3. Olsem wanem yumi save ol tok bilong Jona i tru?
3 Yumi inap bilip tru olsem olgeta tok bilong Jona i tru. “Jisas, em i as bilong bilip bilong yumi,” em i stori long Jona olsem em i wanpela man tru i stap long bipo, na em i kamapim insait bilong tupela samting i bin kamap long Buk Jona na i makim ol samting bai kamap bihain. Olsem na yumi save, Buk Jona i gat ol trupela tok profet long en. (Hi. 12:2; Mt. 12:39-41; 16:4; Lu. 11:29-32) Ol Juda i save bungim Buk Jona wantaim ol narapela buk bilong Baibel, na ol i bilip olsem em i stori tru bilong samting i bin kamap long bipo. Na Jona i no haitim ol popaia na pasin kranki bilong em, na dispela tu i makim olsem tok bilong Jona i tru.
4. Wanem kain pis inap daunim Jona? Tasol wanem save em inap long yumi?
4 Olsem wanem long dispela “traipela pis” i bin daunim Jona? Ol man i gat kain kain tingting long em i wanem kain pis. Spem-weil na bikpela waitpela sak inap daunim wanpela man olgeta. Tasol Baibel i tok tasol: “Bikpela i salim wanpela traipela pis, na dispela pis i daunim Jona.” (Jna. 1:17) Baibel i no tok em i wanem kain pis. Yumi no save em i spem-weil o bikpela waitpela sak, o narapela kain pis.a Baibel i tok tasol olsem em i “wanpela traipela pis,” na dispela save em inap long yumi.
HELPIM YUMI OLSEM WANEM?
9. Wanem tingting na pasin bilong Jona i mas givim tingting long yumi na bai yumi no ken bihainim dispela pasin?
9 Pasin Jona i bihainim na ol samting i kamap long dispela pasin i mas givim tingting long yumi na bai yumi no ken bihainim dispela pasin. Jona i ranawe long wok God i givim long em; mobeta em i kirap long mekim na wetim God i helpim em. (Jna. 1:3; Lu. 9:62; Snd. 14:26; Ais. 6:8) Taim em i kirap i go long rot Jehova i no bin makim, em i kamapim klia tingting kranki bilong em—em i no bin tokaut long ol boskru olsem em i man bilong lotuim Jehova, “God bilong heven.” Em i pret long ol man—em i no gat strongpela bel moa. (Jna. 1:7-9; Ef. 6:19, 20) Jona i tingim em yet tasol na taim Jehova i marimari long ol Ninive, Jona i ting Jehova i mekim olsem bilong semim em. Em i laik haitim rong bilong em na em i tok, em i save pinis olsem Jehova bai marimari long ol—olsem na bilong wanem Jehova i salim em i go long ol olsem wanpela profet? Jehova i krosim na stretim Jona, long wanem, em i bikhet na em i bel nogut na toktok planti. Dispela i mas givim save long yumi na yumi no ken kros o toktok planti long pasin marimari Jehova i mekim o long pasin bilong em long mekim ol samting.—Jna. 4:1-4, 7-9; Fl. 2:13, 14; 1 Ko. 10:10.
10. Olsem wanem Buk Jona i kamapim klia pasin sori na marimari bilong Jehova?
10 Bikpela samting Buk Jona i kamapim, em pasin sori na marimari bilong Jehova. Jehova i sori long ol Ninive na em i salim profet bilong em i go toksave long ol long bagarap i laik painim ol. Na taim ol i tanim bel, em i redi long marimari long ol—long marimari bilong em taun Ninive i stap 200 yia moa, inap long taim ol Midia na Babilon i bagarapim long yia 632 B.C.E. samting. Em i marimari long Jona na kisim em bek long bikpela si, na Em i mekim na rop bilong bus i kamap bambai Jona “i ken i stap gut.” Taim Jehova i kamapim rop bilong haitim Jona long bikpela san na bihain em i mekim rop i drai, Jehova i helpim Jona long save, sapos Em i laik sori na marimari long man, orait em bai mekim long laik bilong em.—Jna. 1:2; 3:2-4, 10; 2:10; 4:6, 10, 11.
11. Wanem dispela “mak bilong profet Jona”?
11 Long Matyu 12:38-41, Jisas i tokim ol hetman bilong lotu olsem ol bai lukim wanpela mak tasol, em “mak bilong profet Jona.” Jona i stap tripela san na tripela nait long “ples nogut bilong ol man i dai pinis,” na bihain long dispela, em i go autim tok long ol Ninive, na long dispela rot em i kamap olsem “mak” bilong ol i ken lukim. (Jna. 1:17; 2:2; 3:1-4) Olsem tasol Jisas i stap sampela hap taim bilong tripela de long matmat na God i kirapim em bek. Taim ol disaipel i tokaut long dispela samting i kamap, Jisas i kamap olsem wanpela mak bilong ol manmeri bilong dispela taim. Long pasin bilong ol Juda long makim de, na long truim i kamap long Jisas, dispela tok “tripela de na tripela nait” inap makim hap taim em i no tripela de olgeta.b
12. (a) Jisas i mekim wanem sampela tok moa long ol Ninive na ol Juda i stap long taim bilong em? (b) Olsem wanem ‘wanpela man i winim tru Jona’ i bin kamap? Em i gat wanem wok long Kingdom bilong Jehova na long kisim bek ol man?
12 Taim Jisas i stori long mak bilong profet Jona, em i skelim pasin bilong ol Ninive long tanim bel wantaim pasin bilong ol Juda long taim bilong em, em ol i pasim strong bel bilong ol na sakim em. Olsem na Jisas i tok: “Long de God i makim bilong kotim ol manmeri, ol man bilong Ninive bai i sanap long kot na tokaut long pasin nogut bilong ol manmeri bilong dispela taim nau. Long wanem, ol Ninive i bin harim tok Jona i autim, na ol i tanim bel. Tasol i gat wanpela man i stap namel long yupela, em i winim tru Jona.” (Lukim tu Matyu 16:4 na Luk 11:30, 32.) Wanem insait bilong tok bilong Jisas olsem “i gat wanpela man i stap namel long yupela, em i winim tru Jona”? Em i makim olsem em yet em nambawan profet i winim olgeta narapela profet, em Man Jehova i salim bilong autim tok olsem: “Yupela i mas tanim bel, long wanem, kingdom bilong heven em i kam klostu pinis.” (Mt. 4:17) Tasol planti Juda tru long taim bilong em ol i givim baksait long “mak bilong profet Jona.” Olsem wanem long nau? Tru, planti ol i no putim yau long tok lukaut bilong Jehova, tasol planti tausen long olgeta hap ol i gat rot long harim gutpela tok bilong Kingdom bilong God, em Jisas, “Pikinini Bilong Man,” i bin autim long pastaim. Olsem ol Ninive i bin tanim bel na kisim blesing long wok autim tok bilong Jona, ol dispela lain tu ol inap kisim blesing long marimari bilong Jehova. Bai ol inap i stap longtaim moa, long wanem, Jehova tasol ‘i save kisim bek ol man.’—Jna. 2:9.
[Ol Futnot]
a Buk Insight on the Scriptures, Vol. 2, pes 99-100.
b Buk Insight on the Scriptures, Vol. 1, pes 593.