Stap Wanbel Wantaim

WELKAM long Betel! Dispela nem Betel long tok Hibru i makim “Haus Bilong God.” (Stt. 28:17-19) Dispela singaut i go long yu bilong kamap memba bilong famili Betel em i olsem rot i op long yu inap mekim planti gutpela wok. Mipela i amamas long yu bin bihainim dispela singaut long i kam mekim wok long hia. (Ais. 6:8) Yu bin dediketim laip olgeta bilong yu long Jehova na yu stap gut long Kingdom bilong em long han bilong Krais Jisas, olsem na mipela i bilip olsem yu bai amamas long mekim wok long Betel. Bikpela senis bai kamap long i stap bilong yu taim yu kam long Betel. Mipela i laik helpim yu na bai ol dispela senis i no ken givim hatwok long yu. Orait, wanem rot i gutpela tru bilong mekim olsem?

² Yumi ken stori long ol samting em pastaim yu bin mekim. Taim yu kisim save long tok i tru long namba wan taim, yu bin kirap long mekim tingting bilong yu i kamap nupela. Yu kirap long kisim ol stretpela tingting. Yu kisim ol dispela tingting taim yu ritim Tok Bilong God, em Baibel, na ol buk na nius bilong “gutpela wokboi i gat savetingting.” (Mat. 24:45) Yu bin amamas long ol dispela nupela tok i tru. Yu no wokabaut moa wankain olsem ol man bilong dispela graun, na taim yu mekim tingting bilong yu i kamap nupela, yu kirap bihainim ol nupela pasin i mekim yu amamas. Na tu, yu gat laik long i stap long nupela taim. Olsem na yu wok long kisim save long Jehova na Pikinini bilong em, long wanem, yu save em rot bilong kisim “laip oltaim.”—Jon 17:3; Rom 12:2.

³ Sapos yu bin mekim ol dispela senis long pasin bilong yu paslain long yu kam long Betel, bai i no hatwok long yu senisim sampela samting moa na bai i stret wantaim ol sediul bilong Betel. Tru, i stap bilong yu long Betel i no wankain olsem yu stap long haus bilong yu yet wantaim famili bilong yu, nogat. Tasol nau long dispela taim, Betel i wanpela gutpela ples tru bilong i stap long en. Hia long Betel, yu stap na wok wantaim lain em ol i brata na sista, papa na mama bilong yu long ol samting bilong spirit. (Mak 10:29, 30) Ol i laikim yu tru, long wanem, yu bin volantia long kam na wok wantaim ol, na ol i laik mekim ol samting ol inap mekim bilong helpim yu long stap gut na lain long stap long Betel.

⁴ Long sampela kantri famili Betel i liklik, na em i isi long save long narapela narapela; mipela i laik kirapim yu long mekim olsem. Tasol long sampela hap bilong graun, ol famili Betel i bikpela moa na i gat planti handret brata na sista bilong kain kain lain na sindaun ol i stap wanbel wantaim na mekim wok. Long ol kain famili Betel olsem, ating i luk olsem mipela i no gat taim long tok gude long yu, long wanem, mipela i bisi tru long sediul bilong mipela long mekim wok long hom dipatmen, faktori, na long ol ofis o wok autim tok na go long ol miting bilong kongrigesen. Tasol kirap long namba wan de yu kam long Betel, yu mas tokim ol arapela long yu husat. Mipela tu bai traim long mekim olsem, long wanem, yumi olgeta i memba bilong wanpela famili. Em i gutpela pasin long tok gude long ol arapela long olgeta de taim yu bungim ol.

⁵ Tingim, mipela husat i bin stap hia paslain long yu kam, mipela i amamas long i stap bilong mipela na amamas long bihainim pasin bilong God. (1 Tim. 6:6-8) Mipela i bin kisim sampela pasin i helpim mipela long mekim gut wok bilong mipela. Tok Bilong God i as bilong ol dispela pasin, olsem na wok bilong mipela inap karim planti gutpela kaikai. Mipela i ting ol dispela pasin i gutpela long bihainim, na gutpela sapos yu tu i ting olsem. Yu nupela memba, olsem na yu no ken ting famili Betel bai senisim ol pasin bilong en long mekim ol samting bilong amamasim ol nupela memba i kam long Betel, nogat. Olsem na yu yet i mas mekim sampela senis, tasol mipela i laik bai yu pilim olsem Betel em i ples bilong yu. Mipela i laik bai yu stap amamas na belgut na mekim gut ol wok bilong yu long Betel.

⁶ Betel i no olsem ol narapela ples. Yumi mekim wok hia na wok gut wantaim ‘ol wanbilip bilong yumi i stap long olgeta hap bilong graun.’ (1 Pita 5:9) Yu bai pilim moa yet dispela gutpela wok taim yu save gut long olsem wanem asainmen bilong yu i helpim wok bilong autim gutnius em ol bratasista bilong yu i mekim long olgeta hap. Yumi olgeta wan wan i gat asainmen, na yumi gat wanpela tingting tasol na yumi givim bel tru long mekim wok. Yu bai gat planti wok bilong mekim, tasol yu bai kisim bikpela amamas na stap belgut, long wanem, ‘yu save, wok yu mekim bilong Bikpela i no inap lus nating.’—1 Kor. 15:58.

⁷ Olgeta husat i kam wok long Betel ol bai kisim planti samting bilong helpim ol. Tasol olsem wanem? I stret dispela i nambawan as bilong yumi kam mekim wok hia? Nogat tru. Ol samting yumi inap givim, dispela i mas i stap olsem nambawan samting i kirapim yumi long kamap memba bilong famili Betel, na i no ol samting yumi inap kisim. Pasin bilong yumi long laikim Jehova na laik long mekim wok bilong Kingdom i go bikpela, dispela i mas kirapim yumi long mekim wok long Betel. (Mat. 6:33) As na yumi mekim wok long Betel, em bilong ‘Jehova i ken kisim biknem na glori.’—Efe. 1:12.

⁸ Bilong i stap wanbel wantaim, yumi mas pas gut wantaim God Jehova na Jisas Krais na wantaim ol bratasista i insait long famili Betel. (Sng. 133:1; 1 Kor. 1:10; Kol. 3:12-17) Dispela bai mekim na yumi pas gut wantaim ol wanlain Betelait—ol ovasia na olgeta arapela long famili.—Rut 2:4; Efe. 6:5-9.

⁹ Dispela buklet i kamapim ol tok bilong helpim olgeta memba bilong famili Betel. Taim ol i ritim, olgeta wan wan inap save long ol spesel samting i kamap long Betel na ol lo i stiaim famili long mekim wok bilong ol long pasin i stret. Dispela buklet i no inap bekim olgeta askim bilong yu, tasol ol stiatok i stap long Tok Bilong Jehova i as bilong ol tok bilong en, olsem na em inap stiaim yu. (Sng. 19:7-10; 2 Tim. 3:16, 17) Ol tok bilong dispela buklet bai helpim yu long i stap wanbel na amamas long ol gutpela wok yu mekim long i stap bilong yu.

¹⁰ Nau mipela i laik stori liklik long ol samting mipela i save mekim long olgeta de. Sampela bilong mipela i wok long ol ofis; sampela i klinim ol rum samting, o wok long londri, o kukim ol gutpela kaikai. Planti ol i mekim wok long ol faktori, ol i prinim na salim ol buk na nius samting, na sampela i mekim wok long ol fam, ol i planim na kisim kaikai. Na tu, mipela i sumatin bilong Baibel na mipela i save wok wantaim ol kongrigesen mipela i go long en. Mipela olgeta i dediket na mekim wok bilong God fultaim, na oltaim mipela i save insait long wok bilong autim tok na skulim ol man, na go long ol miting bilong kongrigesen. Na tu, mipela i gat program bilong mekim lotu olsem famili Betel, na dispela em i bikpela samting. Mipela i laik bai yu kisim ol dispela gutpela samting bilong spirit wantaim mipela.

Stap Memba Bilong Famili Betel i Bikpela Samting

¹¹ Olsem wanpela memba bilong famili Betel, yu gat wok long bihainim wanpela tok promis bilong ol spesel fultaim sevan. Olgeta husat i insait long spesel fultaim sevis, olsem ol wasman raun, ol misineri, ol intenesenel sevan, ol lain i save kam oltaim long helpim wok bilong Betel, ol lain i save lukautim Haus Kibung, ol sevan bilong wokim Haus Kingdom, na ol painia salim, olgeta i stap aninit long dispela tok promis.

¹² Plis tingim, maski yu wanpela memba bilong dispela famili na yu insait long wanpela lain bilong mekim wok lotu, dispela i no makim olsem yu gat biknem na yu winim ol brata bilong yu, nogat. Ol memba bilong famili Betel na ol arapela i insait long spesel fultaim sevis ol i save olsem tok promis ol i mekim, ol narapela wok ol i mas mekim, na ol laik bilong ol yet ol i lusim bilong mekim asainmen bilong ol, olgeta i bikpela samting tru.

Tingim Ol Samting Bilong Spirit

¹³ Ol nambawan gutpela samting bilong Betel, em ol manmeri i bikpela pinis na i save tingim ol samting bilong spirit na ol inap “lainim gut tingting bilong ol long kliagut long wanem samting i stret na wanem samting i no stret.” (Hib. 5:14) Betel inap helpim man long kamap bikpela long ol samting bilong spirit. Olsem na taim man i stap longpela taim long Betel, ol man bai inap luksave olsem em i wok long kamap bikpela long ol samting bilong spirit. (1 Tim. 4:15) Wanem sampela samting bilong helpim man long mekim olsem? I gat moning wosip long Mande i go Fraide long olgeta wik. Long olgeta moning inap 15 minit, dispela program i save kirapim de wantaim ol gutpela tok long rot bilong skelim teks bilong de, na beten. Olgeta memba bilong famili i mas i stap long moning wosip, tasol sapos ol i sik o kisim holide o ol i gat narapela sediul bilong mekim wok bilong ol, ol dispela samting tasol inap mekim na ol i no kam long moning wosip. Na tu, olgeta i mas i stap long famili Wastaua Stadi long olgeta Mande nait. Dispela stadi i save strongim tru yumi na i kamapim ol gutpela poin em yumi inap yusim long stadi bilong kongrigesen. Na long sampela Mande nait, i gat ol narapela program bilong helpim famili Betel long ol samting bilong spirit.

¹⁴ Ol man i no memba bilong famili Betel ol i no inap stap long moning wosip o Mande nait Wastaua Stadi, tasol sapos ol i gest long Haus Betel, orait ol inap stap.

¹⁵ Mipela i laik kirapim yu long tingting strong long ritim sampela hap bilong Baibel long olgeta de long i stap bilong yu. (Sng. 1:1, 2; Apo. 17:11) Em i bikpela samting tru long yu mas wok long kamap strong long ol samting bilong spirit, na “skelim gut wanem ol samting i bikpela samting moa.” (Fili. 1:10) Taim yu mekim olsem, i stap bilong yu long Betel bai i gat as bilong en, na yu bai amamas long mekim wok bilong Kingdom Bilong Jehova i go bikpela.—Jon 13:17.

¹⁶ Na tu, bai yu gat rot bilong bung wantaim wanpela kongrigesen. Yu inap helpim ol arapela taim yu go na insait long ol miting na helpim wok autim tok wankain olsem yu bin mekim paslain long yu kam long Betel. Yu mas insait tru long ol dispela samting na bai yu inap kamap bikpela na strong moa long ol samting bilong spirit, na yu bai inap helpim ol arapela.—Sng. 22:22; Hib. 13:15.

Oganaisesen Tiokratik

¹⁷ Orait nau yumi ken stori long sampela samting em yu mas save gut long en, em ol samting bilong oganaisesen tiokratik bilong Jehova long graun. Gavening Bodi bilong ol Witnes Bilong Jehova, em mausman bilong lain wokboi i gat savetingting, em i bosim wok bilong Kingdom long olgeta hap bilong graun. (Mat. 24:45-47; Rev. 12:17) Ol memba bilong Gavening Bodi i mekim wok long ol narapela narapela komiti. Wan wan komiti i lukautim wanpela hap bilong wok, olsem: (1) Komiti Bilong Ol Kodineta i lukautim wok bilong stretim ol samting taim ol bikpela hevi i painim lain bilong Jehova long olgeta hap bilong graun. Dispela komiti i lukautim tu wok bilong kot samting na Ofis Bilong Pablik Infomesen. (2) Komiti Bilong Lukautim Ol Wokman i save makim ol memba bilong famili Betel, na ol Betelait i kam long narapela kantri, ol lain i save kam oltaim o sampela taim long helpim wok bilong Betel, ol sevan bilong wokim Haus Kingdom, na ol intenesenel sevan, na em i lukautim tu ol long ol samting bilong spirit na bilong skin. (3) Komiti Bilong Wokim Ol Buk Samting i lukautim mani na ol narapela samting long wok bilong prinim ol buk na nius na wok bilong salim ol buk samting. Na tu, em i lukautim wok bilong sanapim ol Haus Kingdom samting. (4) Komiti Bilong Wok Autim Tok i lukautim wok autim tok long olgeta hap bilong graun, na i stretim ol samting long wok autim tok bilong ol painia oltaim, ol painia salim, ol misineri, ol kongrigesen, ol sekit, na ol wasman raun i olsem mausman bilong Gavening Bodi. Dispela komiti i lukautim wok bilong sanapim ol Haus Kingdom, na em i mekim olsem long rot bilong ol Komiti Bilong Wokim Ol Haus Kingdom. Dispela komiti i helpim tu ol brens long bekim ol askim i kamap long wok bilong harim kot insait long kongrigesen. (5) Komiti Bilong Wok Tisa i lukautim wok bilong skulim ol brata long Betel na long ol narapela narapela skul tiokratik long olgeta hap. Dispela komiti i redim ol program bilong ol kibung distrik, ol kibung sekit, na ol spesel de kibung. Em i lukautim tu wok bilong kamapim ol vidio. (6) Komiti Bilong Raitim Tok i lukautim wok bilong kamapim ol kaikai bilong spirit long rot bilong ol buk na nius bilong helpim ‘ol wanbilip i stap long olgeta hap bilong graun.’ (1 Pita 5:9) Na tu, dispela komiti i lukautim wok bilong bekim ol askim long ol tok bilong Baibel, em ol askim ol man i givim long rot bilong pas o telefon, na em i lukautim wok bilong tanim tok long olgeta hap bilong graun.

¹⁸ Long ol kantri i gat brens ofis, Gavening Bodi i makim wanpela Brens Komiti. Dispela komiti i lukautim wok autim tok na haus brens na ol narapela wok i kamap long hap brens i bosim. Taim ol i no kliagut long sampela samting, Brens Komiti i save raitim pas bilong kisim helpim long wanpela komiti bilong Gavening Bodi i lukautim ol samting ol i gat askim long en. Long sampela kantri, ol i save makim Kantri Komiti. Dispela komiti i save mekim wok aninit long lukaut bilong Brens Komiti bilong narapela kantri.

¹⁹ Bilong lukautim wok bilong autim tok bilong Kingdom na kamapim ol disaipel, Gavening Bodi i gat sampela koporesen long olgeta hap bilong graun. Sosaiti Was Taua Bilong Pennsylvania i wanpela koporesen i no mekim wok bilong kisim mani, em i mekim wok bilong helpim wok bilong Kingdom i go bikpela long olgeta hap. Gavening Bodi i mekim wok tu long koporesen Intenesenel Baibel Stiudens Asosiesen na sampela arapela koporesen.

²⁰ Nau yu gat sampela save long dispela oganaisesen i stap long olgeta hap em Jehova i yusim bilong mekim wok autim tok bilong Kingdom i go bikpela nau long taim bilong yumi. Em wok bilong yumi olgeta long sapotim gut ol wok tiokratik (God i bosim), na stap wanbel wantaim na mekim wok. Sapos yumi mekim olsem, yumi ken bilip tru olsem Jehova bai orait long yumi na bai yumi kisim planti blesing.

²¹ Jehova i bin blesim oganaisesen bilong em na ol i gat planti samting—em ol samting ol i mas i gat bilong kamapim ol tok long rot bilong ol buk na nius, na long ol narapela rot tu bilong helpim lain brata long olgeta hap em ol i save autim tok bilong Kingdom. Yumi ol lain em ol i bin singautim bilong i kam stap na mekim wok long Betel, yumi no ken westim ol dispela samting, yumi mas yusim ol dispela samting long gutpela rot i litimapim nem bilong Jehova. Maski yumi mekim wok long hom dipatmen, long faktori, o ofis, yumi mekim wanpela gutpela wok tru em planti pablisa i no inap mekim; yumi mekim wok bilong helpim ol brata bilong yumi na yumi givim ol samting em ol i mas i gat bilong autim tok. Yumi mas pilim tru dispela gutpela wok yumi inap mekim insait long oganaisesen bilong Jehova.

²² Tasol dispela gutpela samting yumi gat olsem yumi memba bilong famili Betel na asainmen yumi kisim i no ken mekim na yumi gat pasin antap na ting yumi winim ol arapela, nogat. Yumi mas i gat pasin daun. (Sng. 138:6; Fili. 2:1-4) Yumi mas tingim olsem oganaisesen bilong Jehova i bikpela tru na luksave long liklik hap wok yumi inap mekim insait long en. Wok olgeta wan wan hap bilong bodi i mekim em i bikpela samting. Olsem tasol, wanem wanem asainmen yu kisim em i helpim wok bilong Kingdom i go bikpela aninit long wok king bilong Jisas Krais.—1 Kor. 12:20-26.

Ol Asainmen na Sediul

²³ Ol ovasia i save givim asainmen long ol memba bilong famili Betel. Mipela i no askim olgeta wan wan long makim asainmen bilong ol, nogat. Mipela i pilim olsem tingting bilong Aisaia i stret taim em i tok: “Mi stap! Salim mi.” (Ais. 6:8, NW ) Taim ol i givim wanpela asainmen long yu, yu mas amamas—na mipela i laik bai yu amamas—long mekim wok bilong Jehova. Wanem wanem wok ol i tokim yu long mekim long Betel em i wok holi yu mekim long Jehova, na em i wanpela gutpela samting tru.—Sng. 84:10; Rom 12:1, 2; Kol. 3:23, 24.

²⁴ Bilong inapim sampela wok, ating ol bai senisim yu i go long narapela dipatmen. Ol bai mekim olsem sapos i no gat man bilong mekim wanpela wok insait long wanpela haptaim. Tasol ol brata bai givim yu ol wok em yu inap long mekim. (1 Pita 4:10) Ol asainmen i no inap senis nating. Tasol taim ol i senisim ol asainmen, dispela i no makim olsem ol ovasia i no amamas long wok bilong yu, nogat. Tru, sapos yu lesman o yu no mekim gut ol wok bilong yu o sampela hevi i kamap, orait wanpela elda o brata i lukautim dipatmen bai givim sampela tok bilong helpim yu. (Snd. 13:4) Taim em i mekim olsem, putim gut yau, na stretim ol samting yu mas stretim.

²⁵ Ol ovasia bilong ol dipatmen ol i save gut long mekim wok. Ol inap skulim yu sapos yu amamas long kisim save. Ating yu gat tingting bilong yu yet long olsem wanem yu inap mekim gut moa wok bilong yu long Betel. Tasol maski yu gat planti ekspiriens long mekim sampela wok, em i savetingting long bihainim pastaim pasin bilong Betel long mekim ol wok samting, na bihain long gutpela pasin isi yu ken kamapim tingting bilong yu. Ating i gat narapela narapela pasin bilong mekim wanpela wok, olsem na ating mipela i traim pinis ol narapela pasin na lukim olsem pasin mipela bihainim i gutpela moa. Taim yu daunim yu yet na bihainim tok na mekim wok, bai yu kisim bikpela amamas moa. Givim bel long mekim gut asainmen bilong yu, na amamas long stap olsem memba bilong famili Betel em ol i stap wanbel.—Snd. 10:4; 21:5.

²⁶ Yu mas kirap mekim wok long taim stret na no ken lusim ples wok paslain long taim bilong pinis long wok. (Luk 16:10) Em i bikpela samting long bihainim pasin bilong mekim ol samting long taim stret. Wan wan de bilong wok em inap 8-pela aua. Wanem kain wok wan wan i mekim, longpela bilong rot i go long ples wok, na ol samting i kamap long wan wan hap bai mekim na taim bilong kirapim na pinisim wok i no wankain long olgeta hap. Ol brata i winim 70 krismas na ol sista i winim 50 krismas, ol i ken pinis long wok paslain long taim bilong Betel long pinis long wok, sapos ol i laik mekim olsem. O ating ol i laik malolo liklik bihain long belo kaikai paslain long ol i go bek long wok.

²⁷ Ating sampela taim yu mas wok sampela aua moa bilong inapim sampela wok. Na tu, yu bai mekim ol kain wok olsem dis diuti, des diuti, sekiuriti raun, na ating sampela arapela wok. Haptaim yu lusim bilong mekim ol dispela diuti, yu no inap kisim wankain haptaim bilong malolo bihain long en. Yumi mas amamas long mekim ol dispela ekstra wok.

²⁸ Long taim bilong wok, em i bikpela samting long olgeta wan wan i mas save olsem ol i no ken lusim ples wok sapos ol i no kisim tok orait long ovasia. Taim yumi kisim wok, yumi no ken yusim haptaim bilong en long mekim sampela samting bilong yumi yet o bilong kongrigesen. Dispela i makim tu olsem yumi no ken salim ol mesis bilong yumi yet long kompiuta o salim ol teks mesis. Yumi ken bilip tru olsem Jehova bai blesim wok bilong olgeta husat i givim bel tru long mekim wok.—Snd. 22:29.

²⁹ Brens Komiti i save stretim ol asainmen na sediul long ol brens.

Holide

³⁰ Olgeta memba bilong famili Betel bai kisim 12-pela de bilong holide, olsem vekesen de, long Septemba 1 bilong nupela sevis yia. Ol sevis yia i save kirap long Septemba 1 na i pinis long Ogas 31 long yia antap. Ol bratasista em pastaim ol i no insait long spesel fultaim sevis na ol i kam long Betel bihain long Septemba 1, ol bai kisim ol vekesen de inap long namba bilong hamas mun i stap yet insait long dispela sevis yia. Ol bai kaunim vekesen de bilong dispela brata o sista kirap long taim em i stat long mekim wok long Betel. Olsem: Sapos wanpela i kirap mekim wok long Betel long Mas 1, em bai kisim 6-pela vekesen de—wanpela de bilong olgeta wan wan mun i stap yet—kirap long Mas i go inap long Ogas. Sapos wanpela i kirap mekim wok long Betel long Jun 5, em bai kisim 2-pela vekesen de bilong Julai na Ogas. Sapos wanpela i lusim narapela spesel fultaim sevis na em i kam wok long Betel, em bai holim yet ol vekesen de em i gat pinis.

³¹ Na tu, ol i save givim ekstra vekesen de bilong olgeta sevis yia i go inap long taim man i kisim 30 vekesen de long olgeta yia. I gat 3-pela rot bilong kisim ekstra vekesen de em mipela bai stori long en long daunbilo. Olgeta husat i insait long spesel fultaim sevis ol bai kisim ekstra vekesen de long Septemba 1. Sapos wanpela i kirap mekim spesel fultaim sevis bihain long Septemba 1, em i no inap kisim ekstra vekesen de bilong dispela sevis yia.

³² Sinioriti kredit em samting man inap kisim long hamas yia em i bin mekim fultaim sevis. Long olgeta tupela tupela yia bilong man i stap long fultaim sevis, em bai kisim wanpela ekstra vekesen de. Olsem: Taim man i insait long fultaim sevis inap 2-pela yia pinis, orait long Septemba 1 em bai kisim 12-pela vekesen de na 1-pela ekstra vekesen de bilong sinioriti, olsem na em bai kisim 13 vekesen de. Man i insait long fultaim sevis inap 15 yia em bai kisim 12-pela vekesen de na 7-pela ekstra vekesen de bilong sinioriti, olsem na em bai kisim 19 vekesen de. Sapos wanpela i bin lusim fultaim sevis na bihain em i kirap mekim gen, ol bai kaunim hamas de olgeta em i bin insait long fultaim sevis na dispela bai makim sinioriti bilong em.

Krismas Long Ekstra

Septemba 1 Vekesen (de)

45-46 6

47-48 7

49-50 8

51-52 9

53-54 10

55-56 11

57-58 12

59-60 13

61-62 14

63-64 15

winim 65 18

³³ Narapela rot bilong kisim ekstra vekesen de em krismas kredit, em bilong ol man i gat bikpela krismas. Sampela memba bilong famili Betel ol i no bin mekim fultaim sevis inap planti yia, olsem na ol i no gat bikpela sinioriti inap long ol i ken kisim planti ekstra vekesen de. Olsem sat long dispela pes i kamapim, dispela rot i bilong helpim ol bratasista i winim 45 krismas. Olsem: Ol lain i winim 45 krismas paslain long ol i inapim 12-pela yia long fultaim sevis, ol bai kisim 6-pela ekstra vekesen de long olgeta yia—em wankain namba bilong ol ekstra vekesen de ol inap kisim sapos ol i bin inapim 12-pela yia long fultaim sevis. Ol bratasista i winim 65 krismas paslain long ol i inapim 36 yia long fultaim sevis, ol bai kisim 18 ekstra vekesen de long olgeta yia. Olsem long sinioriti kredit, krismas kredit bai go antap long olgeta tupela tupela yia i go inap long man i kisim 30 vekesen de long wanpela yia. Man bai kisim sinioriti kredit o krismas kredit long Septemba 1—em bai kisim kredit i givim planti moa vekesen de.

³⁴ Long sampela brens, ol i save makim sampela memba bilong famili Betel long i go mekim wok long narapela kantri. Ol dispela spesel fultaim sevan ol inap kisim foren-sevis kredit, ol bai kisim 7-pela ekstra vekesen de long Septemba 1. Ol i kisim ol dispela ekstra vekesen de, long wanem, ol i mekim wok long narapela kantri. Ol bai kisim 12-pela vekesen de bilong wanpela yia na ol ekstra vekesen de bilong sinioriti kredit o krismas kredit, na antap long dispela ol bai kisim 7-pela ekstra vekesen de. Ol lain i save kisim foren-sevis kredit ol inap kisim 30 vekesen de insait long wanpela sevis yia. Sapos sampela i mas kisim dispela foren-sevis kredit, orait ol i mas kisim tok orait pastaim long komiti bilong Gavening Bodi i lukautim dispela samting. Ol Betelait i kam long narapela kantri ol i save kisim dispela kredit, olsem na sapos ol i laik, orait ol yet i ken baim rot bilong ol na raun i go long ples bilong ol o sampela narapela ples.

³⁵ Ol memba bilong famili Betel inap makim taim bilong ol long holide long laik bilong ol yet, tasol ol inap mekim olsem taim ol i kisim pinis ol vekesen de. Ol inap skelim hamas vekesen de ol i laik yusim, sapos i stret wantaim wok bilong ol long Betel, tasol vekesen i no ken aninit long hap de. Paslain long ol i tingting long kisim holide, ol i mas save gut long ol i gat hamas vekesen de.

³⁶ Ol memba bilong famili Betel inap bungim ol vekesen de bilong wanpela yia wantaim ol vekesen de bilong narapela yia. I gutpela long larim sampela vekesen de i stap yet bambai yu ken yusim taim sampela bikpela samting i kamap wantu tasol.

³⁷ Olgeta wan wan i mas putim pepa bilong kisim tok orait long yusim ol vekesen de. I gutpela long mekim dispela samting wanpela wik paslain long taim bilong kisim holide. Sapos wanpela samting i kamap long taim bilong holide na man i mas kisim sampela vekesen de moa, orait em i mas ringim Betel Ofis na stretim tok long dispela samting. Taim em i kam bek long Betel, em i mas raitim pepa bilong hamas ekstra de em i bin yusim. Sapos wanpela i laik kisim sampela haptaim bilong mekim sampela pesenel samting, orait em i mas raitim pas na salim long Brens Komiti long skelim. Sapos yu gat sampela askim long ol samting bilong vekesen de, kam lukim ol brata long Betel Ofis i save lukautim dispela samting.

De-Of Bilong i Go Long Kibung Distrik

³⁸ Olgeta husat i insait long spesel fultaim sevis long Betel inap kisim 1 na hap de-of bilong i go long kibung distrik. Sapos kibung distrik i kamap long Fraide i go inap long Sande, orait ol inap kisim de-of long Fraide. Ol inap yusim hap de-of long Fonde apinun paslain long kibung o yusim dispela hap de-of long Mande moning bihain long kibung bilong kam bek long Betel o bilong malolo. Maski ples bilong mekim kibung i stap klostu long Betel, ol Betelait i ken kisim yet dispela 1 na hap de-of.

Taim Bikpela Hevi i Kamap

³⁹ Taim wanpela brata o sista i bin insait long fultaim sevis inap planti yia pinis, ating sampela bikpela hevi inap kamap long em o em i mas mekim wok em Baibel i makim long Kristen i mas mekim bilong helpim famili. Dispela inap mekim na em i mas kisim sampela de o wik bilong i go helpim famili bilong em. Long kain taim olsem, em inap askim long kisim sampela de-of bilong i go stretim dispela hevi. Ol brata bai skelim ol samting long i stap bilong em taim ol i wokim tingting olsem ol bai givim ol dispela de-of o tokim em long lusim Betel na i go stretim dispela hevi. Bihain em i ken putim gen aplikesen bilong i kam wok long Betel.

Wok Mani Taim Yu Stap Long Betel

⁴⁰ Ol bratasista i volantia long kam long Betel ol i mas tingim olsem as na ol i stap long Betel em long mekim wok bilong Kingdom i go bikpela. Ol i mas tingim tok bilong aposel Pol long pas em i bin salim i go long kongrigesen bilong ol Kristen long Filipai: “Mi lain pinis olsem maski mi stap olsem wanem, samting mi gat em inap long mi. Maski mi stap rabis o mi gat planti samting, mi lain pinis long stap olsem. Long olgeta samting na long olgeta kain sindaun, mi lain pinis long pasin bilong pulap na pasin bilong i stap hangre. Na long pasin bilong holim planti samting na long pasin bilong sot long ol samting. God i givim pawa long mi, na long dispela rot mi gat strong long mekim olgeta samting.”—Fili. 4:11-13.

⁴¹ Bilong helpim yu long i stap gut long ol samting bilong spirit, i gat sampela lo bilong wok long Betel na sampela lo long sait bilong wok mani. Ol lain i insait long spesel fultaim sevis i mas mekim wanpela tok promis bilong ol spesel fultaim sevan. Olsem na taim yu stap aninit yet long dispela tok promis, yu no ken mekim wok mani sapos yu no bin kisim tok orait long mekim olsem. Long taim yu stap long holide, long dispela taim tasol yu no stap aninit long dispela tok promis long sait bilong wok mani. Tasol taim yu mekim wok long Betel, long ol apinun na wiken yu stap yet aninit long dispela promis. Sapos yu laik mekim wok mani long wanpela apinun o wiken, yu mas kisim wanpela hap de vekesen. Yu mas tingim olsem ol samting bilong skin i no inap helpim yu long i stap amamas oltaim. Pasin bilong pas gut wantaim Jehova i winim tru ol samting bilong skin, olsem Jisas i tok piksa long en long Luk 12:19-21.

⁴² Sapos wanpela bikpela hevi i kamap, na i mas i gat mani bilong stretim dispela hevi, orait dispela Betelait i mas toktok wantaim Brens Komiti bilong painimaut rot bilong helpim em.

Mekim Wok Bilong Betel na Ol Arapela Wok

⁴³ Oltaim yumi mas skelim gut ol samting na bai yumi inap mekim gut wok bilong yumi long Betel na wok bilong yumi long kongrigesen. Yumi laik mekim ol wok insait long kongrigesen, go long ol miting na insait long wok autim tok, long wanem, dispela tu em wok holi yumi mekim long Jehova. Yumi olgeta i mas kisim kaikai bilong spirit long tebol bilong Jehova, long Betel na long kongrigesen.

⁴⁴ Long Betel i gat planti samting bilong helpim yumi, olsem na yumi inap makim taim bilong autim gutnius bilong Kingdom long olgeta taim wantaim ol pablisa bilong kongrigesen bilong yumi. Tasol sapos sampela wok bilong kongrigesen i kamap long seim taim we yumi gat wok long mekim long Betel, orait yumi mas putim wok bilong Betel i stap namba wan. Bilong helpim yu long tingim gen, ol dispela tok i bin stap long aplikesen bilong yu long kamap memba bilong Wanpela Lain Bilong Ol Witnes Bilong Jehova i Mekim Spesel Fultaim Sevis Long Olgeta Hap:

“Dispela aplikesen i kamapim laik bilong mi long kamap memba bilong famili Betel em ol i insait long Wanpela Lain Bilong Ol Witnes Bilong Jehova i Mekim Spesel Fultaim Sevis Long Olgeta Hap. Sapos yupela i orait long dispela aplikesen, mi bai putim dispela wok i stap namba wan, winim olgeta narapela wok. Mi bai givim bel tru long insait long ol program bilong famili Betel long stadi na skelim Tok Bilong God, na stap long moning wosip na Mande nait Wastaua Stadi. Na tu, oltaim mi bai autim tok na go long ol miting bilong kongrigesen bilong mi. Long olgeta taim mi bai bihainim ol lo em famili Betel i mas bihainim—olsem long sait bilong wok mani, na long sait bilong klos na bilas—na tu, mi bai bihainim tok kaunsel bilong Baibel em olgeta Kristen i mas bihainim. Mi bai amamas na belgut long liklik helpim mi kisim long dispela Lain long taim mi inap mekim dispela gutpela wok long Betel. Sapos mi laik lusim dispela Lain o sapos Betel i skelim olsem mi no inapim moa ol mak bilong wok insait long dispela Lain, orait mi bai i no ting long ol i mas givim sampela mani long mi. (Mat. 6:30-33; 1 Tim. 6:6-8; Hib. 13:5) Mi save olsem Betel i gat rait long makim sapos mi no ken i stap moa long Betel na wanem taim stret mi no ken i stap moa olsem memba bilong famili Betel.”

Tok Promis Bilong Ol Spesel Fultaim Sevan

⁴⁵ Olgeta nupela memba bilong dispela Lain i save mekim Tok Promis Bilong Ol Spesel Fultaim Sevan, em tok promis bilong Wanpela Lain Bilong Ol Witnes Bilong Jehova i Mekim Spesel Fultaim Sevis Long Olgeta Hap, na dispela tok promis i olsem:

Mi wanpela wokman i dediket tru long God Jehova, na mi laik kamapim strongpela laik bilong mi long stap memba bilong Wanpela Lain Bilong Ol Witnes Bilong Jehova i Mekim Spesel Fultaim Sevis Long Olgeta Hap (“Lain”). Mi tok promis olsem:

1. Taim mi stap olsem memba bilong dispela Lain, mi bai bihainim pasin bilong ol na bai mi no tingting long kisim planti samting bilong skin;

2. Mi bai bihainim tok bilong profet Aisaia (Ais. 6:8) na tok profet bilong man bilong raitim song (Sng. 110:3), na mi bai volantia long mekim wanem wanem wok dispela Lain i makim mi long mekim bilong helpim wok bilong Kingdom i go bikpela long wanem wanem hap ol i makim mi long mekim wok long en;

3. Mi bai daun long pasin tiokratik i bosim ol memba bilong dispela Lain (Hib. 13:17);

4. Mi bai wok strong inap tru long skel bilong mi long mekim asainmen bilong mi;

5. Mi no inap mekim wok mani sapos mi no bin kisim tok orait long dispela Lain;

6. Sapos mi mekim wok mani o narapela wok bilong mi yet na mi kisim mani long dispela na mani i winim mak bilong mani mi mas i gat bilong helpim i stap bilong mi, orait mi bai givim dispela mani i go long dispela Lain, tasol mi inap holim dispela mani taim mi no stap aninit long dispela tok promis;

7. Mi bai orait long kisim ol samting bilong helpim ol memba bilong dispela Lain (olsem kaikai, ples slip, alauens, na ol narapela samting) em ol samting ol i givim long kantri mi mekim wok long en, maski mi mekim bikpela o liklik wok;

8. Mi amamas na belgut long liklik mani samting mi kisim taim mi mekim gutpela wok insait long dispela Lain. Sapos mi laik lusim dispela Lain o sapos mi no inapim moa ol mak bilong mekim wok insait long dispela Lain, mi no ken ting olsem ol i mas givim sampela mani long mi (Mat. 6:30-33; 1 Tim. 6:6-8; Hib. 13:5);

9. Mi bai bihainim ol stiatok i stap long Baibel, long ol buk na nius bilong ol Witnes Bilong Jehova, na long ol lo bilong dispela Lain, na mi bai bihainim tok bilong Gavening Bodi bilong ol Witnes Bilong Jehova; na

10. Mi bai orait long olgeta tok dispela Lain i mekim long i stap bilong mi olsem wanpela memba bilong ol.

⁴⁶ Ol dispela samting inap mekim na ating sampela taim yu mas stretim sampela tingting o pasin bilong yu. Sampela memba bilong famili ol i yangpela na ol i no gat wankain save olsem ol lain i bin mekim wok inap planti yia pinis. Ating sampela i mas lusim sampela pasin ol i mekim bipo na bai ol inap bihainim stretpela tingting na pasin bilong Betel long mekim ol samting.—Efe. 4:22-24; 1 Pita 4:3-5.

⁴⁷ Yumi mas bihainim stretpela tingting long ol narapela samting tu. Olsem: Ol hevi inap painim yumi sapos yumi larim ol bung bilong amamas i stap namba wan, winim wok bilong yumi long Betel. Long ol wiken na long ol apinun yumi inap mekim wok bilong kongrigesen—na ating yumi mekim sampela samting bilong kisim amamas—tasol yumi mas bihainim stretpela tingting na malolo gut bambai long neks de yumi inap mekim asainmen bilong yumi. Ol wok yumi mekim long wiken i no ken pinisim strong bilong yumi, tasol em i mas givim nupela strong long yumi na mekim tingting na bel bilong yumi i stap isi, na bai yumi redi long stap long moning wosip long Mande na kamap long ples wok long taim stret. Ol dispela tok i bilong helpim yu long bihainim stretpela tingting taim yu mekim wok hia long Betel na long kongrigesen, na dispela bai helpim yu long stap yet olsem memba bilong famili Betel.

⁴⁸ Yu nupela memba bilong famili Betel, olsem na i gat planti samting bilong Betel na pasin bilong en long mekim ol samting em yu mas kisim save long en, na ating yu mas mekim sampela senis. Ating yu mas lain long stap wantaim ol wanlain Kristen long wanpela haus i gat ol lo. Long namba wan yia bilong yu long kisim trening, ol arapela bai strongim yu na helpim yu long kisim stretpela tingting long ol wok tiokratik bilong yu na bai yu inap stap yet long Betel. (Rom 15:1-3) Tasol sapos yu no wok strong o sampela samting i mekim na yu no inapim ol mak, ating mipela bai tokim yu long lusim Betel na yu ken mekim yet wok bilong autim tok.

⁴⁹ Em i wanpela gutpela samting tru bilong i stap memba bilong famili Betel. Yu mas bilip tru olsem Jehova i bin stretim rot bilong yu ken i stap long hia na oganaisesen bilong em i singautim yu i kam. Em i no gutpela tingting long skelim wok holi yu mekim long Betel wantaim wok mani. Tasol sapos wanpela hevi i kamap na yu tingting long lusim Betel, i gutpela yu toktok wantaim ol elda i stap long Betel paslain long yu makim samting yu bai mekim. Yu mas save tru olsem i gat gutpela as na yu laik lusim Betel. Holimpas strong pasin bilong yu long laikim tru Betel, long rot bilong tingim tru ol samting bilong spirit na wok strong long mekim wok bilong yu long Betel na long kongrigesen.—1 Kor. 15:58.

⁵⁰ Sapos yu mas lusim Betel, orait 30 de paslain long taim yu laik lusim Betel, yu mas raitim pas i go long Brens Komiti.

Ol Masin Samting

⁵¹ I tambu long wanpela man i baim ol samting bilong brens sapos brens i no bin givim tok orait long em. I tambu long wanpela man i kisim sampela samting long nem bilong brens na brens i mas baim dispela samting sapos brens i no bin givim pepa i tok orait long em i ken mekim olsem.

⁵² I tambu long kisim ol samting bilong Betel olsem ol buk, magasin, vidio, kaset, na ol tok i stap long ol kompiuta, maski ol dispela samting i stap long ol rabis-bin, long tebol, printa, kompiuta, o long wanpela dipatmen na kisim i go ausait long Betel, sapos ovasia bilong dipatmen i no bin givim tok orait long mekim olsem. Olgeta dispela samting i bilong oganaisesen. Long taim i stret long mekim, mipela bai bringim ol Wastaua, Kirap!, Wok Kingdom, pas, na ol narapela samting bilong ol memba bilong famili Betel i go long rum bilong ol.

⁵³ I tambu long wanpela man i yusim masin bilong narapela o senisim ol samting bilong en sapos em i no bin kisim tok orait long mekim olsem. Ol tul na masin i bilong ol man i bin kisim tok orait long mekim wok long ol. Ol masin samting bilong brens i no bilong mekim wok bilong yumi yet sapos yumi no bin kisim tok orait long ovasia. Olgeta i mas lukaut gut olsem ol i no ken kisim nating ol tul samting sapos ol i no bin kisim tok orait long ol dipatmen bilong Betel o long ol brata. Pasin bilong kisim nating samting em i bikpela rong na i wankain olsem pasin bilong stil. Mipela inap rausim man long Betel sapos em i mekim olsem.

Telefon na Kompiuta

⁵⁴ Telefon em i wanpela gutpela samting bilong helpim yumi. Sapos yu laik ringim wanpela na stori long ol samting bilong yu yet, yu mas mekim dispela bihain long taim bilong wok. Sapos wanpela i ringim yu long taim bilong wok, plis sotim toktok bilong yu. Bihainim dispela stiatok taim yu yusim autluk, Intenet, na mobail fon. Tokim ol pren na famili long ringim yu long taim yu no wok.

⁵⁵ Yu ken mekim wok long telefon bilong mekim wok bilong Betel, tasol no ken yusim nating nating. Long taim bilong wok, ol telefon i no bilong yusim long mekim wok bilong yu yet o bilong kongrigesen. Taim yu yusim telefon, sotim toktok na toktok stret long ol samting yu mas toktok long en. Kirap long 9 klok long nait na i go inap 8 klok long moningtaim, no ken yusim ol telefon long ol ples wokabaut; ol i bilong yusim long taim bilong bikpela hevi tasol. Olgeta bai amamas sapos yu bihainim pasin bilong tingim gut ol narapela. Na tu, yu mas tingim rum-meit bilong yu na no ken yusim telefon bilong rum o mobail fon taim em i slip pinis.

Lukautim na Klinim Rum

⁵⁶ Sapos yu laik bringim wanpela masin, o bilas samting i go long rum o ofis bilong yu na yu gat tupela tingting long en, orait yu mas kisim tok orait pastaim. Yu no inap mekim ol bikpela senis long rum sapos yu no bin kisim tok orait. No ken rausim ol samting i bilong i stap oltaim long rum, olsem lait na kabot samting.

⁵⁷ Taim yu stap long Betel, yu mas pilim olsem rum em i haus bilong yu—em ples we yu inap i stap isi, malolo, stadi, na amamas long mekim ol samting long taim bilong yu yet. Rum i mas stap olsem gutpela ples yu amamas long i go long en bihain long wok, na yu na rum-meit bilong yu i mas tingting long mekim rum i stap klin, na i gutpela bilong i stap long en, na i stret long sindaun bilong yupela long Betel. Yu ken bilasim gut rum na putim ol sia na tebol samting long pasin i helpim yu long pilim olsem em haus bilong yu, tasol yu mas abrusim stail bilong bilas i kamapim pasin bilong ol man bilong graun. Na tu, yu mas tingting long mekim ol samting i helpim hauskipa long mekim gut wok bilong em. Hauskipa bai amamas sapos yu mekim olsem. I gutpela sapos pasin laikim i stiaim pasin yu bihainim bilong lukautim rum.—Rom 13:8.

⁵⁸ Olgeta wan wan i mas stretim bet bilong ol paslain long ol i go long wok, na long wanpela de long wik ol i mas wokim bet long klinpela betsit na pilo keis.

⁵⁹ Bilong i stap long Betel, man i mas i stap klin long skin, long pasin, na long ol samting bilong spirit. Olgeta long Betel i mas tingting long mekim ol yet na rum bilong ol i stap klin. Dispela bai helpim ol na bai ol i gat gutpela helt. I no gat as long wanpela i stap doti. Betel i gat ol ples waswas, olsem na em gutpela pasin long waswas long olgeta de. Olgeta i mas waswas o wasim han paslain long taim bilong kaikai. Bilong tingim gut rum-meit na hauskipa, i gutpela sapos yu klinim sink samting taim yu yusim pinis.

⁶⁰ Yu ken putim ol bilas samting long rum, tasol yu no ken larim ol pepa, magasin, buk na ol kain samting olsem i stap nabaut. Sapos ol klos i stap nabaut, dispela bai nogutim stail bilong rum. Em bai givim bikpela wok moa long hauskipa. Yu no ken ting em wok bilong hauskipa long putim ol samting bilong yu long ples stret bilong en. Yu mas putim gut ol kaikai na bai dispela i no ken pulim ol binatang. Na tu, stov na frits i mas i stap klin.

⁶¹ Long ples wok bilong yu, des, tebol, na masin yu yusim i mas i stap klin. Yu mas stretim gut ol samting long pinis bilong olgeta de. Olsem na ol pepa na tul samting i no ken stap nabaut long des o tebol, yu mas putim ol long ples stret bilong ol.

⁶² Ol klos bilong wok i mas i stap long rum bilong senis ol i bin makim bilong yu long yusim. Ol rum bilong senis na batrum na toilet i mas i stap klin.

Bilong Lukautim Famili

⁶³ Taim wanpela brata i putim aplikesen na ol i orait long em i ken kam long Betel, ol i mekim olsem long wanem ol i ting em i gat strongpela skin na gutpela helt na em i no gat bikpela sik. Bilong helpim famili long lukautim helt bilong ol, Betel i givim ol klinpela rum, gutpela ples slip, gutpela kaikai, na gutpela ples bilong i stap na mekim wok holi bilong yumi. Tasol long sait bilong i stap klin, olgeta i mas wok gut wantaim. Em i bikpela samting long kisim gutpela malolo na slip. Bihainim stretpela tingting long painim amamas na long pasin bilong yu long kaikai na dring. Abrusim pasin bilong tromoi bikpela haptaim bilong painim amamas, na kaikai na dring planti tumas.—Snd. 21:17; 23:20, 21; Luk 21:34.

⁶⁴ I gutpela sapos ol memba bilong famili husat i sik ol i toksave long brata i lukautim ol samting bilong helt. Ol brata bai toksave long dispela brata o sista i sik long ol samting em i ken mekim bilong kamap orait insait long sotpela haptaim. Sapos i gat wok long singautim dokta, orait brata i lukautim ol samting bilong helt bai mekim olsem.

⁶⁵ Sapos paslain long yu kam long Betel yu bin i gat bikpela sik na nau yu mas kisim operesen o ol i mas stretim tit bilong yu o sampela samting olsem, orait em i no wok bilong brens long stretim ol dispela samting. Yu mas stretim ol dispela samting paslain long yu tok orait long i kam mekim wok long Betel.

⁶⁶ Sapos yu kamap pinis long Betel na nau yu kisim bikpela sik na yu no inap bihainim sediul na pasin bilong mekim wok bilong Betel na ol arapela wok bilong yu, em bai gutpela moa sapos yu go bek long ples na mekim ol samting bilong stretim sik bilong yu.

⁶⁷ Sampela brens i gat dokta na nes na dentis, na tu, ol i gat lain bilong katim na stretim gras na ol narapela samting bilong helpim famili. Olgeta wan wan brens i stretim ol samting na bai i stret long sindaun bilong hap bilong ol.

Ol Eksiden

⁶⁸ Betel i gat ol samting bilong fest eid i stret long sais bilong famili. Sapos inap, ol i makim wanpela brata husat i save pilim tru hevi bilong narapela na i gat save long mekim dispela wok bilong lukautim fest eid. Na tu, i gat narapela bilong helpim em taim wanpela i kisim bikpela bagarap o bikpela sik. Sapos wanpela i kisim bikpela bagarap, ol bai kisim tingting bilong dokta o kisim dispela man i go long haus sik. Bihain ol bai raitim ripot i stori stret long dispela bagarap na givim long Brens Komiti. Ol ovasia i mas mekim ol senis i stret long sait bilong seifti na givim gutpela tok kaunsel na bai ol kain bagarap olsem i no ken kamap bihain.

⁶⁹ Em i bikpela samting long olgeta i mas tingim gut seifti bilong ol, maski ol i mekim wok long hom dipatmen, ofis, faktori, o narapela hap. Tingim gut olsem birua inap painim yu sapos yu go klostu long wanpela masin i wok i stap. Olsem na olgeta husat i save klinim na mekim wok long ol masin, ol i mas was gut. No ken mekim nating ol samting na ting olsem hevi i no inap painim yu. Oltaim yu mas bihainim ol tok ol i givim yu taim yu klinim o stretim ol samting bilong masin. Taim yu laik klinim masin o yusim hap laplap long en, mekim olsem taim masin i no wok moa na yu ofim pinis pawa. Yumi inap baim ol speapat bilong masin, tasol yumi no gat speapat bilong pinga na han.

⁷⁰ I stret long yumi mekim ol samting bilong kisim amamas na malolo, tasol sampela taim planti brata i save kisim bagarap taim ol i insait long ol spot, winim taim ol i mekim wok bilong ol long Betel. Olsem na taim yu mekim ol samting bilong kisim amamas, abrusim pasin bilong resis long winim pilai maski wanem samting i kamap.—Gal. 5:26.

Daining Rum

⁷¹ Taim bilong kaikai em i gutpela taim olgeta i ken amamas long en. Bilong soim olsem yumi tingim ol narapela na yumi rispektim pasin Betel i makim bilong mekim ol samting, yumi mas sindaun pinis long sia bilong yumi paslain long taim bilong kaikai. Sapos wanpela i mas lusim tebol paslain long beten bilong pinisim kaikai, em i mas kisim tok orait long tebol het. Na tu, sapos inap, yumi mas toksave long tebol het sapos yumi no inap i stap long taim bilong kaikai.

⁷² I gutpela yumi bihainim stretpela pasin long taim bilong kaikai. Sapos yu no klia tumas long ol stretpela pasin bilong bihainim long taim bilong kaikai, toktok wantaim wanpela elda long ol askim bilong yu. Ol elda i mas makim gutpela pasin ol arapela i ken bihainim long tebol na kirapim olgeta long mekim pasin pren. Long gutpela pasin ol i mas toksave long ol arapela long ol samting ol i mas mekim na bai pasin bilong ol long tebol i ken kamap gutpela moa. I gutpela sapos elda i toktok long dispela brata taim ol narapela i no i stap.

⁷³ I stret long ol bratasista i ken stori long taim bilong kaikai, tasol nek bilong yumi i no ken antap tumas na distebim ol arapela. Yu mas tingim ol arapela na mekim gutpela pasin long taim bilong salim kaikai long tebol. Ol arapela bai amamas sapos yu skelim gut na kisim liklik hap kaikai. No ken putim planti kaikai tumas long plet winim skel bilong yu long kaikai. Yumi bai westim kontribiusen bilong ol brata sapos yumi no pinisim kaikai i stap long plet bilong yumi. Jisas i tok yumi no ken westim kaikai. (Jon 6:12) Sapos sampela kaikai i stap yet bihain long beten bilong pinisim kaikai, yu ken kisim hap kaikai i go. Tasol i tambu long kisim plet o spun samting bilong Betel long daining rum.

⁷⁴ Oltaim yumi mas pasim klos i stret na bilas gut taim yumi kam long daining rum. Long taim bilong kaikai, em i no pasin rispek long werim ol klos i doti, klos bilong wok long faktori o gaden, o ol klos i no stret.

No Ken Westim Ol Samting

⁷⁵ Long laik bilong ol yet ol brata long olgeta hap ol i save givim kontribiusen na dispela i sapotim famili Betel, olsem na olgeta memba bilong famili i mas yusim gut ol samting na no ken westim. Dispela i makim olsem olgeta i mas tingting long yusim gut ol samting. Yumi no ken westim wanpela samting, maski em kaikai, wara, pawa, pepa, na ol narapela samting. Ol lain i redim kaikai ol i mas tingting gut na no ken westim kaikai ol i bin tromoi mani bilong baim. Pasim ol lait sapos i no gat wok long yusim. Pasim gut ol tep wara. Em sampela rot we yu ken bihainim na bai yu no westim ol samting.

⁷⁶ Taim ol i givim yu wanpela masin o tul bilong yusim long wok, yu mas lukautim gut ol dispela samting. Bihainim sediul em ovasia i bin putim bilong welim na klinim masin. Sapos wanpela tul o masin i lus o i bruk, kwiktaim yu mas toksave. Sapos i gat wok long stretim ol samting i bruk, raitim pepa bilong toksave long dispela samting. Insait na ausait bilong haus brens i mas i stap gut.

⁷⁷ Long ol haus brens i gat lift, ol lain em rum bilong ol i stap long namba 4 plua na i go antap, ol i ken yusim lift. Ol lain i gat sik, skin i no strong, o i winim 35 krismas, ol i ken yusim lift long wanem wanem taim ol i laik yusim.

⁷⁸ Pasim masin bilong hatim rum na eakon sapos i no gat man i stap long rum. Sapos yu stap long rum na rum i kamap hat, orait pasim masin bilong hatim rum. No ken larim ol windo i op i stap taim yu onim masin bilong hatim rum na eakon. Taim rum i kamap kol, yu inap putim kol siot samting bilong helpim bodi long stap hat yet. Yumi olgeta i mas bihainim pasin bilong yusim gut ol samting na abrusim pasin bilong westim ol gutpela samting Jehova i bin givim yumi long rot bilong ol kontribiusen bilong ol brata.

Pasin, Klos, na Bilas

⁷⁹ Kristen i mas bihainim ol stretpela pasin. Jehova i nolaik tru long pasin nogut, na yumi tu i mas mekim olsem. (Sng. 97:10; Efe. 5:1) Em i nolaik tru long man i save mekim tok giaman, stil, mekim pasin nogut, o man em oltaim i laik save long ol samting i kamap long i stap bilong ol arapela man. (Snd. 6:16-19; 26:17; 1 Pita 4:15) Olgeta husat i kamap memba bilong famili Betel, ol i bin lusim pinis ol pasin doti o ol pasin Baibel i tambuim—em ol pasin ol i bin mekim paslain long ol i kisim tok i tru—na ol i save mekim tok tru tasol na bihainim stretpela pasin long olgeta samting ol i mekim. (2 Kor. 7:1; Rev. 22:11) Wanpela i no ken mekim ol tok doti bilong kamapim sampela tingting. (Mat. 12:35-37; Kol. 3:8, 9) Na tu, i tambu long wanpela long famili Betel i mekim ol stori na tok pilai nogut. Ol tok yumi mekim i mas gutpela na i strongim ol arapela. Sapos yumi mekim olsem, yumi bihainim pasin bilong kongrigesen Kristen long mekim ol samting. (Snd. 26:18, 19; Efe. 5:4, 5; 1 Tim. 4:12; Jems 3:10, 11) Sapos wanpela i holim, o mekim wok long, o bringim long Betel ol buk samting i stori long pasin sem, musik i stori long ol pasin nogut, o vidio i soim pasin bilong kros pait, wok bilong ol spirit nogut, o pasin pamuk, o sapos em i lukim ponografi long Intenet, orait mipela bai skelim sapos em i inapim ol mak bilong stap yet long Betel o nogat.

⁸⁰ I orait long kisim bia na wain samting i kam long Betel, tasol man i mas dring liklik tasol na bihainim lo bilong gavman long ol samting bilong dring. Jehova i tambuim pasin bilong dring planti na spak, na man i mekim kain pasin olsem i no inap stap long Betel. (Snd. 23:29-34; Efe. 5:17-19) Sapos man i dring planti tumas, ating em i no inapim ol mak bilong Kristen na dispela inap mekim na em i mas lusim Betel. (Rom 14:16-18) Sapos em i no pasin bilong yu long dring alkohol paslain long yu kam long Betel, orait i no gat wok long yu kirap nau long kisim alkohol taim yu lukim ol arapela i mekim olsem.

⁸¹ Oltaim yumi mas holimpas pasin bilong rispek long narapela narapela. Jehova i tambuim pasin pamuk, pasin bilong bagarapim marit, na pasin sodom. (Rom 1:26-28, 32; 1 Kor. 6:9, 10) Yu mas larim dua bilong rum i op bikpela na ol man i wokabaut ausait inap lukim yu sapos yu brata na yu stap wantaim wanpela sista o yu sista na yu stap wantaim wanpela brata husat i no poroman marit bilong yu, papa o mama, o brata o susa bilong yu, o narapela wanblut tru. Dispela stiatok i stret tu taim yu stap long ofis.—1 Tim. 5:2.

⁸² Yumi laik tingim tru ol brata, olsem na yumi mas was gut na bai pasin bilong yumi i no ken bagarapim pasin bilong yumi long pas gut wantaim olsem wanpela famili. Taim ol arapela i kam long rum bilong yumi, yumi no ken mekim bikpela nois olsem pasim dua strong, putim volium bilong redio o televisen i go antap tru, o pilaim strong gita samting, o toktok bikpela tumas. Nogut ol arapela long famili i laik rit, stadi, o slip. Sapos rum-meit bilong yu i laik slip, em i gutpela pasin long pasim redio o televisen. Bilong kamapim pasin Kristen, man i mas bihainim gutpela tingting na pilim tingting bilong narapela. Abrusim ol pasin i save distebim ol arapela. Olgeta i mas wok gut wantaim long dispela samting.—1 Kor. 10:23, 24.

⁸³ I no stret long go insait long rum bilong narapela sapos yu no bin nok pastaim na ol lain bilong rum i no singautim yu long i go insait. Na tu, sapos yumi no bin kisim tok orait pastaim, orait yumi no ken i go insait long rum bilong narapela taim em i no stap long rum. Hauskipa na ol brata i gat namba bilong mekim olsem, ol tasol inap i go insait long rum bilong ol narapela.

⁸⁴ Sapos wanpela i save olsem wanpela Betelait i bin mekim pasin i no stret long Kristen i mekim, orait kwiktaim em i mas tokim dispela Betelait olsem em wok bilong em yet long tokim wanpela elda long Betel long dispela samting. Ating dispela Betelait i mekim rong em i laik kamapim o em i no laik kamapim long wanpela memba bilong Brens Komiti. Ating em i laik toktok wantaim wanpela elda i stap long Betel na tokim dispela elda long kamapim long Brens Komiti. Tasol brata husat i save long dispela rong, em i mas toksave tu long Brens Komiti na bai oganaisesen i ken i stap klin.—Wkp. 5:1.

⁸⁵ Ol elda bai givim tok kaunsel long brata husat i wok yet long kamapim ol hevi, i les long bihainim ol lo, o em i stap olsem bikman na bosim ol brata. (1 Pita 5:1-3, 5) Ol elda bai mekim gutpela pasin, pasin laikim, na pilim gut tingting bilong dispela brata taim ol i toktok wantaim em, tasol ol bai kamapim sampela strongpela tok tu. Sapos ol brata i mekim rong ol i senisim pasin na tanim bel, orait ol elda bai marimari long ol. (Snd. 28:13) Tasol ol brata husat i no laik larim spirit bilong God na gutpela tok kaunsel i stiaim na stretim pasin bilong ol, ol i no inapim mak bilong i stap memba bilong famili Betel na ol brata bai tokim ol long lusim Betel.

⁸⁶ Ol man husat i bin dediket long Jehova, ol i no ken mekim samting i givim rot long ol man long sutim tok long oganaisesen bilong Jehova; ol i no ken tru mekim pasin i no stret long ai bilong ol man o long taim ol yet i stap. Ol narapela i save lukluk long ol samting yu mekim, na sapos yu mekim pasin i no stret, dispela inap kirapim ol long ting olsem olgeta long famili i save mekim wankain pasin. Larim pasin i tru na stretpela pasin i stiaim ol samting yu mekim. Laikim tru ol arapela olsem yu laikim yu yet. Sapos yu mekim olsem, yu bai mekim pasin i stret long ol brata na long ol arapela manmeri tu.—Gal. 5:19-26; Efe. 5:15-18; 1 Pita 4:1, 2.

⁸⁷ Long dispela taim nogut, yumi mas putim yau moa yet long ol tok bilong Baibel na bai yumi no kirap bihainim pasin na tingting bilong dispela graun. (1 Kor. 2:12; Hib. 2:1-3) Klos na pasin bilong yumi long bilasim skin i mas stret na kamapim klia biknem bilong God yumi lotuim. (1 Tim. 2:9, 10) Long olgeta samting yumi mekim, yumi mas “litimapim tok bilong Seivia bilong yumi, God.” (Tai. 2:10) Long olgeta taim yumi ol brata na sista i mas werim klos i stret na i klin long taim bilong kaikai, long taim bilong kaikai long wiken, long taim yumi go i kam long ples wok, na long taim yumi go long Mande nait Wastaua Stadi. Yumi no laik pundaunim ol arapela, olsem na yumi no ken werim ol klos i narapela kain olgeta, o klos bilong werim long taim bilong malolo, o yumi no bisi tumas long wanem kain klos yumi werim. (2 Kor. 6:3, 4) Yumi mas werim klos i stret long ol wokman Kristen, long taim bilong malolo tu. Dispela i makim olsem yumi no ken pasim ol jins o trausis i pas tumas long skin o tret i lus long sampela hap, na tu, ol klos i kamapim pasin bilong graun o i kirapim bel bilong man. Long Betel i no stret long werim ol T-siot i gat rait long en. Klos yumi werim i mas stret long wok yumi mekim, tasol klos i mas klin na i no bruk na stail bilong en i mas givim biknem long yumi na long famili Betel.

⁸⁸ Olsem wanpela memba bilong famili Betel, yu mas helpim ol gest bilong yu long bihainim dispela pasin bilong werim klos i stret taim ol i kam long Betel.

⁸⁹ I stret long ol elda i givim tok kaunsel long wanpela memba bilong famili sapos klos na pasin bilong em long bilas i no bihainim lo bilong Betel. Sapos sampela i gat ol askim long dispela samting, ol brata i stap olsem ol ovasia bai bekim ol dispela askim. Famili Betel i mas stap olsem gutpela piksa long ol man i kam raun long Betel. Ol samting ol i lukim long hia i save stiaim tingting, pasin, na i stap bilong ol.

Stretim Ol Hevi

⁹⁰ Yumi ol sinman, olsem na sampela taim ol hevi bai kamap, ating em hevi bilong yumi yet o long asainmen bilong yumi long Betel. Sapos hevi i kamap, tok bilong Baibel i kirapim yumi long stretim kwik na mekim long pasin isi. Sapos inap, ol bratasista i gat hevi, ol i mas stretim namel long ol yet. Baibel i kirapim yumi long mekim olsem. (Mat. 5:23, 24) Pastaim yu yet i mas i go long brata bilong yu. Sapos yutupela i no inap long stretim hevi, orait yu ken toktok wantaim wanpela elda long Betel. Em bai helpim yu na bai pasin wanbel i ken i stap insait long Haus Betel.—Rom 14:19.

⁹¹ Sapos wanpela hevi i kamap long asainmen bilong yu, i gutpela long toktok wantaim ovasia bilong yu long dispela dipatmen, ating em i wanpela elda. Em inap kliagut long ol samting bilong dispela hevi na helpim yu long stretim. Tasol sapos dispela hevi i samting bilong yu yet, yu ken i go long wanpela elda em yu pilim olsem yu inap toktok long em na kamapim hevi bilong yu. Sapos dispela hevi i bikpela samting we yu mas stretim kwik na yu laik lusim ples wok na go toktok wantaim wanpela elda long Betel, orait yu mas toksave long ovasia bilong yu na kisim tok orait bilong mekim olsem. Sapos yu mas stretim kwik dispela hevi, orait elda bai mekim wanem wanem samting em inap mekim bilong stretim dispela hevi. O ating em bai stretim tok long toktok wantaim yu long narapela taim na bai dispela i no pasim wok bilong yupela.

⁹² Sapos wanpela marit sista i gat hevi, orait pastaim em i mas toktok wantaim man bilong em. (Efe. 5:22-24) Sapos dispela hevi em samting bilong ples wok, ating man bilong em bai tokim em long toktok wantaim ovasia bilong em long stretim hevi o ating man bilong em bai go wantaim meri taim em i go toktok wantaim ovasia. Sapos i gat wok long mekim olsem, tupela marit i ken kamapim dispela hevi long Brens Komiti bilong kisim helpim long stretim hevi. Ol singel sista i mas bihainim wankain pasin olsem ol singel brata taim ol i gat sampela hevi. Ol singel sista i ken i go long wanpela elda long Betel bilong kisim helpim. Ol yangpela sista inap kisim stretpela tingting long ol samting taim ol i toktok wantaim sampela sista i lapun liklik. (Tai. 2:3-5) Tasol sapos bikpela hevi i kamap na i stret long ol elda i stretim, orait ol singel sista i no ken pret long go long ol bilong kisim helpim.

⁹³ Sapos yumi no stretim hevi na narapela i gat tingting nogut long narapela, dispela bai mekim hevi i go bikpela na em bai nogutim wok bilong yumi long Betel. Dispela bai mekim na yumi no amamas na belgut long wok bilong yumi. Ating i gat planti samting inap mekim na ol hevi i kamap, tasol i no gat as na yumi larim ol dispela hevi i stap na yumi no stretim. (Jems 3:2, 14-18) Olsem na go long ol elda bilong kisim helpim long stretim ol hevi bilong yu. Ol i laik helpim famili long i stap gut na ol bai amamas long helpim yu long winim ol hevi na bai olgeta long famili i ken i stap wanbel wantaim.

Alauens na Pesenel Ekspens Akaun

⁹⁴ Olgeta memba bilong famili i save kisim alauens long olgeta mun bilong baim ol samting bilong ol yet. Komiti Bilong Wokim Ol Buk Samting i save makim hamas mani olgeta i wok long ol brens ofis ol inap kisim.

⁹⁵ Mipela i stretim tu rot na olgeta wan wan memba bilong famili Betel i gat wanpela akaun ol i kolim Pesenel Ekspens Akaun (PEA). Dispela akaun i bilong wan wan i ken baim ol samting bilong em yet, olsem marasin na dokta samting. Ol i save putim mani i go long dispela akaun wanpela taim long olgeta yia, long Janueri 1, olsem na ol bratasista i no inap kisim dispela mani paslain long Janueri 1. Tasol ol bratasista husat i go long Gileat o husat i lusim spesel fultaim sevis, ol tasol i ken kisim dispela mani paslain long Janueri 1. Komiti Bilong Wokim Ol Buk Samting i makim hamas mani ol bai givim long olgeta wan wan Betelait long olgeta mun ol i wok long Betel, na ol bai bungim dispela mani bilong olgeta mun bilong wanpela yia na long Janueri 1 long yia antap ol bai givim dispela mani. Long Janueri 1 o bihain long en, yu inap kisim mani long PEA bilong yu inap long mak bilong hamas mani yu gat long dispela akaun. Sapos sampela i go long Gileat o lusim spesel fultaim sevis paslain long kirap bilong nupela yia, ol i ken askim long kisim mani bilong PEA inap long mak bilong hamas mun ol i bin mekim wok insait long dispela yia.

Sekiuriti na Ol Ki

⁹⁶ Mipela i bilip olsem yu save olsem em i bikpela samting tru long lukaut gut na bai i no gat wanpela samting i bagarapim famili Betel, long wanem, yumi stap long taim nogut bilong planti hevi. Ol ki yu kisim taim yu kamap memba bilong famili Betel, yu mas tingim dispela em samting brens i givim yu bilong lukautim gut. Sapos yu lusim o yu no lukautim gut ol ki bilong yu, brens bai skelim olsem ol bai inap givim ki long yu o nogat. Ol ki i no bilong givim long narapela. Ol i samting bilong brens. Yu no ken givim long ol arapela i ken yusim. I tambu long wokim kopi bilong ol ki. Sapos wanpela ki bilong yu i lus, kwiktaim yu mas toksave long Betel Ofis o hom ovasia.

⁹⁷ Long olgeta taim yu kam insait o go ausait long haus Betel, em wok bilong yu long sekim olsem dua i pas gut, sapos i no gat man bilong mekim dispela wok.

⁹⁸ Yumi olgeta i mas tingting long lukautim gut ol samting long haus brens. Sapos yumi ting dispela em i samting nating, dispela i soim olsem yumi no laikim na tingim gut ol arapela. Long sampela haus Betel, i mas i gat ol brata i mekim wok sekiuriti long nait. Long sait bilong sekiuriti, olgeta wan wan brens i skelim ol samting long hap bilong ol na i makim samting i stret long ol.

⁹⁹ Taim yumi lusim haus brens o kam insait, yumi mas yusim ol dua o geit ol i bin makim bilong yusim. Long sampela haus Betel, sampela dua i gat alam bilong ol man nogut i no ken kam insait. Taim ol memba bilong famili Betel i yusim nating ol kain dua olsem, ol brata i wok sekiuriti bai tingting planti na ol i mas painim man i bin kirapim alam na stretim gen alam. Sapos wanpela i mekim pasin i soim olsem em i no wari sapos birua i painim Betel na em i sakim ol lo, ol inap tokim em long lusim Betel. Pasin bilong yu long laikim ol brata, na bilong ol i ken bilip long yu, dispela i mas kirapim yu long mekim ol samting bilong lukautim gut famili Betel.

¹⁰⁰ Yumi olgeta i no ken surik long askim ol man husat i kam insait long hap bilong brens long kolim nem bilong ol sapos yumi no save long ol o sapos sampela samting i mekim na yumi gat tupela tingting long ol. Yumi olgeta i laik bai samting nogut i no ken kamap long brens, olsem na yumi no ken bel hevi sapos wanpela i askim yumi long kolim nem bilong yumi. Pasin bilong bihainim ol dispela lo i soim olsem yumi luksave long wok yumi wan wan i mas mekim bilong lukautim haus Betel.

¹⁰¹ Long sampela brens, olsem long Amerika, famili Betel i bikpela tru. Ol i save givim wanpela ID kat long olgeta wan wan memba bilong famili na ol i mas karim dispela kat i go wantaim ol long olgeta taim, na ol i mas soim dispela kat taim ol i kam bek long haus Betel, sapos i gat wok long mekim olsem.

¹⁰² Sapos yu lusim Betel, orait yu mas givim bek olgeta ki bilong Betel, Betel ID kat bilong yu, na dispela buklet Stap Wanbel Wantaim i go long Betel Ofis. Plis no ken kisim ol dispela samting i go wantaim yu taim yu lusim Betel.

Ol Visita

¹⁰³ Yumi olgeta i save amamas long singautim ol lain i kam lukim yumi—ating ol famili bilong yumi o ol pren long kongrigesen. Bilong ol samting i ken wok gut, i gat sampela lo yumi mas bihainim. Mipela i laik kamapim sampela bilong ol dispela lo bilong stiaim yumi.

¹⁰⁴ Ol visita em Betel Ofis i orait long ol i ken slip sampela nait long Betel, wanpela brata em Betel Ofis i makim em bai putim nem bilong ol long buk samting. I tambu long kisim ol visita olsem i kam insait long haus Betel sapos Betel Ofis i no bin putim nem bilong ol long buk. Taim ol visita i kam raun lukim Betel, brata o sista i kisim ol long tua i mas bihainim stret rot ol i makim bilong mekim ol tua. Yumi gat ol tua gaid bilong mekim dispela wok.

¹⁰⁵ Mipela i laik bai yu pilim olsem Betel em haus bilong yu, olsem na mipela i stretim rot na sapos inap, ol pren na wanblut bilong yu i ken slip sampela nait long Betel. Sapos yu laik bai papamama o sampela wanblut o pren long tok i tru i kam slip sampela nait long Betel, orait yu mas toktok wantaim brata i lukautim dispela samting bilong painimaut sapos i orait long ol i ken kam long dispela taim yu laikim. Sapos ol i orait long ol gest bilong yu i ken kam, orait ol i ken slip inap 2-pela nait long gest rum.

¹⁰⁶ Ol gest long Betel i ken i stap long moning wosip na kaikai long moningtaim na long ol narapela taim tu, na kam long ol miting taim ol i stap long Betel. Pastaim yu mas toksave long ol gest bilong yu olsem taim ol i stap long Betel, oltaim ol i mas werim klos i stret long ol lo bilong Betel, na i no long taim bilong kaikai o miting tasol.

¹⁰⁷ Sapos yu laik singautim gest bilong yu i kam long kaikai long belo o long apinun na ol i no inap slip long Betel, yu ken askim brata i lukautim ol samting bilong ol gest sapos i gat spes long daining rum. I tambu long bringim ol gest i kam kaikai long daining rum sapos yu no bin kisim tok orait long mekim olsem. Tasol sapos yu mekim olsem, dispela i soim olsem yu no gat rispek long pasin Betel i makim. I tambu long bringim ol gest i no slip long Betel i kam long moning wosip long taim bilong kaikai long moningtaim o long kaikai bilong wiken.

¹⁰⁸ Taim yu gat ol gest, em wok bilong yu long lukautim ol. Yu no ken larim ol yet i raun long haus Betel; tasol ol inap mekim olsem sapos ol i slip long Betel.

¹⁰⁹ Tingim: Olsem mipela i tok pinis long dispela buklet, sapos yu man na yu stap wantaim wanpela meri o yu meri na yu stap wantaim wanpela man husat i no poroman marit bilong yu, papa o mama, o brata o susa bilong yu, o wanblut tru bilong yu, orait yu mas larim dua bilong rum i op olgeta.

¹¹⁰ Sapos yu gat ol gest long rum, yu mas toksave long ol long bihainim stretpela pasin na no ken mekim bikpela nois tumas. Oltaim yumi mas tingim olsem yumi stap wantaim ol arapela long Haus Betel, olsem na yumi no laik mekim ol samting i distebim ol arapela, olsem putim volium bilong musik i go antap, lap bikpela, na toktok strong. Ol samting yumi mekim long rum bilong yumi yet (maski yumi gat ol gest o nogat), yumi no ken mekim bikpela nois na nois i go ausait long rum o long rum bilong ol arapela.

¹¹¹ Mipela i bilip olsem i no gat wanpela memba bilong famili bai mekim nabaut long dispela pasin bilong bringim ol gest i kam long Betel. Sapos sampela i mekim olsem, ovasia i lukautim ol samting bilong ol gest em i gat rait long makim sapos i gat wok long putim mak long hamas gest ol i ken bringim i kam long Betel.

¹¹² Plis tingim olsem i gat ol lo i bosim pasin bilong bringim ol gest i kam slip long Betel. Na tu, i no stret long wanpela memba bilong Betel famili husat i no rum-meit bilong yu i slip wanpela nait long rum bilong yu. Sapos sampela i laik mekim olsem, ol i mas kisim tok orait pastaim long Betel Ofis.

Marit

¹¹³ Taim ol i singautim ol lain i kam long Betel, ol i mas skelim olsem ol bai singautim ol marit o singel, brata o sista. Brens Komiti bai makim husat ol i laik singautim i kam long Betel, na ol bai salim tok long dispela samting i go long Komiti Bilong Lukautim Ol Wokman. Bilong mekim ol wok long Betel, ol bratasista i mas i gat gutpela helt, na strongpela skin, na planti taim Betel i save singautim ol singel bratasista bilong i kam mekim wok. Sampela taim ol i singautim ol marit, tasol planti wok long Betel i gutpela moa long ol singel brata i mekim.

¹¹⁴ Ating bihain long sampela yia, wanpela singel brata o sista i laik marit. (1 Kor. 7:36-38) Olsem na ating yu laik save long wanem rot i stap long ol singel bratasista husat i laik marit na i laik wok yet long Betel.

¹¹⁵ Taim wanpela brata o sista i wok long Betel inap wanpela yia o sampela yia pinis, ating em bai tingting long maritim wanpela husat i gat laik tu long wok long Betel. Em i ken askim sapos em inap wok yet long Betel o nogat taim em i marit pinis. Tasol sapos em i bin i stap inap wanpela yia tasol, orait em i mas tingim olsem em i nupela yet long Betel na ating ol bai i no orait long em i wok yet long Betel wantaim poroman marit bilong em.

¹¹⁶ Taim wanpela i laik marit na em i putim aplikesen bilong wok yet long Betel, Komiti Bilong Lukautim Ol Wokman bai makim olsem em inap wok yet o nogat. Dispela komiti bai skelim ol tok i kam long ol Brens Komiti em ol i save lukautim wok bilong Betel, na tu, ol bai skelim sapos Betel i sot long ol wokman o nogat. Namba wan tingting bilong ol em long mekim ol samting bilong helpim wok bilong Kingdom. (Mat. 6:33) Olsem ol i save mekim long olgeta aplikesen bilong ol lain i laik wok long Betel, namba wan lain ol i save givim tok orait long ol em ol painia oltaim.

¹¹⁷ Olgeta bratasista em brens i singautim ol long i kam long Betel, ol i mas putim aplikesen bilong mekim dispela wok na ol i mas redi long bihainim olgeta lo bilong ol memba bilong famili Betel. Sapos wanpela memba bilong famili Betel i pasim tok long maritim wanpela husat i no memba bilong famili Betel na ol i laik wok long Betel, orait tupela wantaim i mas putim Betel aplikesen na Brens Komiti bai skelim. Olsem tasol, sapos singel brata na sista long famili Betel i pasim tok long marit na tupela i laik wok yet long Betel, tupela wantaim i mas putim gen ol nupela aplikesen. Ol i mas mekim olsem, long wanem, i stap bilong ol olsem singel brata na singel sista bai senis na ol bai kamap tupela marit.

¹¹⁸ Sapos wanpela memba bilong famili Betel em i wok inap wanpela yia pinis na em i laik marit na lusim famili Betel, mipela i laik bai Jehova i ken blesim em. Mipela i kirapim em long wok strong long stap yet long fultaim sevis.

¹¹⁹ Taim wanpela i kam long Betel, em i mas tingting long mekim dispela wok i kamap olsem wok em bai mekim long laip olgeta bilong em, sapos inap. Yumi no laik daunim o tingim gutpela wok bilong yumi long Betel i liklik samting. Sapos i gat sampela as na wanpela i laik lusim Betel, orait em i mas wok yet long mekim ol samting na bai Jehova i ken orait long em. Oltaim em i mas i gat tingting olsem bilong Jisas, em i tok: “No ken bihainim laik bilong mi. Nogat. Bihainim laik bilong yu tasol.” (Mat. 26:39) Gutpela trening em i bin kisim taim em i wok long Betel, dispela inap helpim em tru taim em i wok wantaim ol kongrigesen bilong lain bilong Jehova.

Sampela Tok i Tambu Long Kamapim Long Ol Arapela

¹²⁰ Tingim, yu memba bilong wanpela famili, olsem na yu no ken kamapim sampela samting bilong famili na oganaisesen, em ol samting ol arapela i no ken save long en. I gat planti tok ol i kamapim long famili, ating siaman bilong moning wosip o ol arapela i givim sampela tok, na ol dispela tok i bilong famili tasol. I no stret long tokim ol brata ausait long Betel long ol samting bilong famili Betel; ol nupela buk samting ol i laik kamapim, o ol i tanim tok bilong en, o wokim; ol pas ol i prinim; o ol samting yumi harim long moning wosip em i bilong famili tasol. Ol i no kamapim nem bilong ol man i raitim ol buk na nius bilong lain wokboi i gat savetingting, na i tambu long wanpela i mekim olsem. Tasol i no gat rong long yu raitim pas o ringim ol famili bilong yu, na moa yet papamama bilong yu maski ol i insait long tok i tru o nogat, long wanem, dispela em wanpela rot bilong givim ona long ol. (Efe. 6:2) Sapos papa na mama bilong yu ol i Witnes Bilong Jehova, ol bai laik save long yu stap olsem wanem, na i gat planti samting yu inap stori long en long pas yu raitim long ol. Tasol yu no ken stori long ol samting em famili Betel tasol i mas save long en, na yu no ken tok baksait long ol arapela Betelait.—Snd. 11:13; 20:19; 26:20-22.

¹²¹ Yu no ken tokim ol arapela long ol samting long dipatmen bilong yu em ol arapela i no ken save long en, na yu no ken tokim tu ol arapela memba bilong famili Betel. Sapos long asainmen bilong yu long Betel i gat sampela hevi i kamap long ol samting em ol arapela i no ken save long en na yu pilim olsem yu mas toktok wantaim wanpela, orait i stret long toktok wantaim ovasia bilong yu o narapela elda long Betel. I no stret long toktok long ol kain samting olsem wantaim ol arapela long famili em ol i no inap save long olgeta samting bilong dispela hevi na ol i no inap mekim wanpela samting bilong stretim. (Snd. 15:22; 25:9) Man i gat savetingting em i no inap tokaut long ol samting ol arapela i no ken save long en. Dispela pasin em i wanpela mak bilong man i bikpela pinis.

Givim Bel Tru Long God na Amamas Long Ol Liklik Samting Yu Holim

¹²² Betel i opim rot bilong yumi ken i stap amamas na mekim gutpela wok bilong Jehova na helpim ol arapela man. Long hia yumi mekim bikpela wok bilong helpim wok bilong autim tok na skulim ol man long olgeta hap, em wok Krais Jisas i bin kirapim klostu 2,000 yia i go pinis. (Mat. 28:19, 20) Taim yumi amamas na yumi laik mekim wok bilong helpim ol arapela, dispela bai kamapim ol gutpela blesing. Wok bilong yumi long Betel i no olsem wok mani we ol man i save resis, na ol i save painim rot bilong daunim ol arapela bilong helpim ol yet. Taim yumi wok na mekim lotu, yumi stap olsem mausman bilong Papa bilong yumi, Jehova, na gutpela Pikinini bilong em, Jisas Krais.

¹²³ Sampela taim yu bai wari na tingim ples o yu bai bel hevi, tasol no ken kisim tingting kranki na ting olsem Betel i no gutpela ples bilong yu i stap long en. Sapos yu bel hevi, toktok wantaim sampela brata na sista i strong long ol samting bilong spirit na ol i wok long Betel inap planti yia pinis. Mipela i save olsem taim yu kam long Betel, ol pren na famili bilong yu ol i amamas long lukim yu mekim bikpela wok moa bilong Jehova. Olsem na no ken givap, wok strong yet, na larim Jehova i stiaim na mekim gut long yu. Tingim olsem long Betel, winim ol narapela hap, yu inap mekim wok i helpim planti manmeri.

¹²⁴ Mipela i laik kirapim yu long tingting long wok long Betel inap longpela taim moa na bai yu inap kisim gutpela save i helpim yu long mekim wok bilong Kingdom i go bikpela. Amamas tru i save kamap long ol wok bilong samting bilong spirit, lotuim God, na truim bilong ol tok promis bilong God, olsem na yu bai amamas, long wanem, yu save olsem yu amamasim Jehova na ol samting yu mekim long nau bai helpim yu long kisim laip oltaim long nupela taim God bai kamapim.

¹²⁵ Nau yu stap pinis long Betel na mipela i laik bai yu bihainim yet lo bilong Jehova long ol samting bilong pasin laikim, pasin i tru, na stretpela pasin. Oltaim “yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”—Snd. 3:5, 6.

¹²⁶ Mipela i amamas tru long yu kam long Betel. Mekim Betel i kamap olsem ples bilong yu. Stap long hia na wok yet i go, na putim mak long kisim pasin bilong givim bel bilong yu long God, long wanem, dispela bai helpim yu long kisim laip oltaim aninit long Kingdom Bilong God. Na bikpela samting moa, pasin bilong givim bel tru long God bai kamapim klia olsem i stret Jehova i stap nambawan bos, na i mekim nem bilong em i stap holi.—1 Tim. 4:7.

¹²⁷ Mipela i laikim yu tru na mipela i laik bai yu ken i stap gut.

Mipela ol brata bilong yu,

Gavening Bodi Bilong Ol Witnes Bilong Jehova