Hau Bai Ol Miting Bilong Ol Witnes Bilong Jehova i Helpim Yu?

Wanpela i bin singautim yu long go long wanpela miting bilong ol Witnes Bilong Jehova? Sapos yu no bin kam yet, ating fes taim yu kam bai yu tingting planti. Ating yu laik save: ‘Wanem samting i save kamap long ol dispela miting? Wai na ol miting i bikpela samting? Wai na mi mas go?’ Long dispela lesen, yu bai kisim save long hau pasin bilong bung wantaim ol narapela inap mekim yu go klostu long God na helpim yu yet.

1. Wai na em i bikpela samting long bung wantaim long ol miting?

Lukim tok wanpela man bilong raitim Baibel i mekim long nambawan risen na yumi mas bung wantaim ol narapela long ol miting: “Jehova, bai mi litimapim nem bilong yu namel long bikpela lain manmeri i bung.” (Buk Song 26:12) Olsem tasol, ol Witnes Bilong Jehova i save kisim bikpela amamas long bung wantaim. Long olgeta hap, ol i save bung long olgeta wik bilong lotu long God, singsing, na beten. Long olgeta yia, ol i save mekim tu sampela bikpela bung bilong lotu.

2. Bai yu lainim wanem ol samting long ol dispela miting?

Long ol dispela miting, mipela i save stadi long Tok Bilong God, na “kamapim klia ol tok bilong en na mining bilong en.” (Ritim Nehemia 8:8.) Taim yu kam long ol miting, yu bai kisim save long Jehova na ol gutpela pasin bilong em. Taim yu kisim sampela save moa long pasin laikim bilong em long yu, yu bai pas gut wantaim em. Na tu, yu bai kisim save long hau em i ken helpim yu long stap amamas.—Aisaia 48:17, 18.

3. Taim yu bung wantaim ol narapela long ol miting, hau bai dispela inap helpim yu?

Jehova i stiaim yumi long “tingim narapela narapela, na kirapim ol long mekim pasin laikim na mekim ol gutpela wok. Yumi no ken lusim pasin bilong bung wantaim.” (Hibru 10:24, 25) Long ol miting bilong mipela, yu bai bungim ol manmeri em ol i tingim gut narapela narapela, na olsem yu, ol i laik kisim sampela save moa long God. Yu bai harim ol i kamapim ol tok bilong Baibel bilong strongim narapela narapela. (Ritim Rom 1:11, 12.) Na tu, yu bai toktok wantaim ol narapela, em ol singel na ol marit, em ol i sanap strong na winim ol hevi. Em sampela bilong ol risen na Jehova i laik bai yumi bung wantaim long olgeta taim!

KISIM SAMPELA SAVE MOA

4. Ol miting bilong Ol Witnes Bilong Jehova

Long taim bilong ol aposel, ol Kristen i save bung wantaim long lotuim Jehova. (Rom 16:3-5) Ritim Kolosi 3:16, na stori long dispela askim:

• Ol Kristen long taim bilong ol aposel i save lotuim Jehova olsem wanem?

VIDIO: Wanem Samting i Save Kamap Long Haus Kingdom? (2:12)

• Yu lukim wanem ol samting i kamap long Haus Kingdom i wankain long samting yu ritim long Kolosi 3:16?

• Long vidio o long piksa, yu luksave long wanem samting moa long ol miting em yu laikim?

Ritim 2 Korin 9:7, na stori long dispela askim:

• Wai na long ol miting bilong ol Witnes Bilong Jehova ol i no save kisim mani?

Yu na tisa bilong yu i ken lukim wanem tok bai kamap long wanpela miting bilong dispela wik.

• Wanem hap bilong miting em yu amamas long en o yu laik bihainim?

Yu save long dispela?

Long jw.org, yu inap painimaut long ples na taim bilong mekim ol miting long olgeta hap bilong graun.

1. Long ol miting bilong mipela i gat ol tok, ol soim, na ol vidio. Ol miting i save kirap na pinis wantaim singsing na beten

2. Long sampela hap bilong program, ol odiens bai bekim ol askim

3. Olgeta man i welkam—ol famili, singel, lapun, na ol pikinini

4. Ol miting bilong mipela em fri. Ol Witnes Bilong Jehova i no save kisim mani long man i kam long ol miting o salim plet bilong kisim mani

5. Wok strong long go long olgeta miting

Skelim eksampel bilong famili bilong Jisas. Bilong go long ol bikpela bung i save kamap long olgeta yia, ol i save lusim Nasaret na wokabaut klostu 100 kilomita samting namel long ol maunten i go long Jerusalem. Ritim Luk 2:39-42, na stori long ol dispela askim:

• Yu ting dispela rot i go long Jerusalem i gat hatwok?

• Wai na yu mas wok strong long go long ol miting?

• Yu ting em i gutpela samting? Bilong wanem?

• Wai na yumi mas go long ol miting long olgeta taim?

OL BIKPELA POIN

Taim yu kam long ol miting dispela bai helpim yu long kisim sampela save moa long Jehova, strongim pasin pren bilong yu wantaim em, na yu wantaim ol narapela bai lotuim em.

Riviu

• Wai na Jehova i kirapim yumi long bung wantaim?

• Bai yu lainim wanem ol samting long ol miting bilong ol Witnes Bilong Jehova?

• Yu ting ol miting inap helpim yu long wanem ol narapela rot?

MEKIM WOK PAINIMAUT

Olsem wanem sapos yu pret long kam long miting? Lukim wanpela man husat i bin pilim olsem na nau em i laikim ol miting.

Mipela i Tingim Tru Gutpela Pasin Bilong Ol (4:16)

Lukim wanpela yangpela man i amamas long ol miting na em i mekim wanem samting bilong kam long ol miting.

Mi Laikim Tru Ol Miting! (4:33)

Kisim save long sampela i pilim olsem wanem taim ol i kam long ol miting.

“Wai na Mi Mas Go Long Ol Miting Long Haus Kingdom?” (Atikol long websait)

Kisim save long hau wanpela geng memba i senisim pasin bihain long em i go long wanpela miting bilong ol Witnes Bilong Jehova.

“Mi Karim Gan Long Olgeta Hap” (Wastaua, Julai 1, 2014)