Me

Bihain long Jon i lukim dispela grup em ol bai kisim laip long heven, em i lukim “bikpela lain manmeri” tru. Ol i no wankain long lain 144,000, dispela bikpela lain manmeri ol i planti tru na i no gat man inap kaunim namba bilong ol. Yumi inap kisim wanem save long dispela lain? Jon i kisim tok olsem: “Ol dispela manmeri i bin winim dispela traipela hevi tru, na ol i wasim longpela klos bilong ol long blut bilong Pikinini Sipsip na klos bilong ol i kamap waitpela.” (Rev. 7:14) Bihain long ol i abrusim taim bilong traipela hevi tru, dispela “bikpela lain manmeri” bai stap laip hia long graun na ol bai kisim planti gutpela blesing. (Sng. 37:9-11, 27-29; Prov. 2:21, 22; Rev. 7:16, 17) Maski yumi bai kisim laip long heven o kisim laip hia long graun, yumi ken bilip tru olsem yumi bai insait long truim bilong ol tok i stap long Revelesen sapta 7! Tru tumas, em bai wanpela gutpela taim tru bilong ol manmeri long dispela tupela grup wantaim—em ol wokman bilong God! Yumi bai amamas tru olsem yumi bin wokim disisen long sapotim wok bos bilong Jehova. w22.05 16 par. 6-7

Ating i bin gat wanpela taim we yu mas mekim wanpela bikpela disisen, na yu bin beten long kisim savetingting na i gutpela yu mekim olsem. (Jems 1:5) King Solomon i tok: “Savetingting em i bikpela samting tru.” (Prov. 4:7) Solomon i no stori long kain kain savetingting bilong dispela graun, nogat. Em i stori long savetingting i kam long God Jehova. Tasol yu ting savetingting bilong God inap helpim yumi long karim olgeta kain hevi yumi feisim long nau? Yes, em inap helpim yumi. Wanpela rot yumi inap stap olsem man i gat gutpela savetingting tru em long stadim na bihainim ol tok bilong 2-pela man em planti man i rispektim ol bikos ol i gat bikpela savetingting. Namba 1, yumi bai stori long Solomon. Baibel i tok “God i givim Solomon bikpela savetingting na pasin bilong skelim gut ol samting.” (1 Kin. 4:29) Namba 2, yumi bai stori long Jisas, em man i gat bikpela savetingting tru winim olgeta narapela man long graun. (Mat. 12:42) Baibel i tok profet long Jisas olsem: “Spirit bilong Jehova bai kam stap long em, olsem na em bai i gat savetingting na pasin bilong kliagut tru long ol samting.”—Ais. 11:2. w22.05 20 par. 1-2

Maski yumi gat hamas krismas, yumi ken putim na winim ol mak bilong bilip. Tingim eksampel bilong Sista Beverley, em i gat 75 krismas. Em i gat bikpela sik na dispela i mekim na i hatwok long em i wokabaut. Tasol em i laik tru long sapotim kempein bilong tilim ol invatesen bilong Memorial. Olsem na em i putim ol mak em i ken winim. Taim Beverley i winim ol mak bilong insait long dispela kempein, em i amamas tru. Gutpela wok em i mekim i kirapim ol narapela long givim bel tru long autim tok. Jehova i tingim tru gutpela wok ol lapun bratasista bilong yumi i mekim, maski ol i no inap mekim bikpela wok olsem ol narapela i mekim. (Sng. 71:17) Putim ol mak yu inap winim. Kisim ol pasin we bai mekim yu dia tumas long ai bilong Jehova. Lain long mekim ol wok na dispela bai opim rot long God bilong yumi na oganaisesen bilong em i ken yusim yu long mekim planti moa wok. Painim ol rot bilong helpim gut ol bratasista bilong yu. Olsem Timoti, Jehova bai blesim yu na “bai olgeta manmeri i ken lukim klia olsem yu wok long kamap strong moa.”—1 Tim. 4:15. w22.04 27 par. 18-19

Olsem wanem sapos yu wok strong long skulim ol pikinini, tasol wanpela bilong ol i tok em i no laik mekim wok bilong Jehova? No ken givap na ting olsem yu no mekim gut wok olsem papa o mama. Jehova i givim yumi olgeta—na pikinini bilong yu tu—presen bilong i stap fri, na yumi yet inap makim olsem yumi laik mekim wok bilong God o nogat. No ken givap, yu ken bilip olsem wanpela taim em bai kam bek. Tingim tok piksa bilong pikinini i lusim papa. (Luk 15:11-19, 22-24) Dispela yangpela man i mekim planti pasin nogut tru, tasol bihain em i kam bek. Ol papamama, yupela i kisim gutpela blesing tru, em long helpim ol pikinini bilong yupela long lotuim Jehova. (Sng. 78:4-6) Dispela em i no liklik wok, na mipela i tok amamas long yupela long ol hatwok bilong yupela long helpim ol pikinini bilong yupela long laikim Jehova na long skulim ol long bihainim tok bilong em. Yu ken save tru olsem Papa bilong yumi long heven, em God i gat pasin laikim, em bai amamas.—Efe. 6:4. w22.05 30-31 par. 16-18

Bilong strongim pasin wanbel na bel isi insait long kongrigesen, yumi wan wan i mas givim bel long mekim ol wok. Tingim ol Kristen long taim bilong ol aposel. Ol i gat kain kain presen na asainmen. (1 Kor. 12:4, 7-11) Tasol dispela i no mekim na ol i resis wantaim narapela narapela na brukim lain namel long ol yet, nogat. Pol i kirapim olgeta wan wan bilong ol long mekim ol samting ol inap mekim bilong “strongim bodi bilong Krais.” Pol i tokim ol Kristen long Efesus olsem: “Bodi olgeta i helpim bodi yet long gro na kamap strong long pasin laikim. . . . Olgeta wan wan hap bilong bodi i mekim wok bilong ol inap long skel bilong ol.” (Efe. 4:1-3, 11, 12) Ol Kristen husat i bihainim tok bilong Pol i strongim pasin wanbel na bel isi—em ol pasin yumi lukim insait long ol kongrigesen bilong yumi long nau. Yumi mas tingting strong long sakim pasin bilong skelim yumi yet wantaim ol narapela. Lain long eksampel bilong Jisas na wok strong long bihainim ol pasin bilong em. Yumi ken bilip tru olsem Em “i no man bilong mekim pasin i no stret na bai em i lusim tingting long ol wok [yumi] bin mekim.” (Hib. 6:10) Jehova i amamas tru taim em i lukim olsem yumi givim bel olgeta long amamasim em. w22.04 14 par. 15-16

Yumi amamas long save olsem yumi no gat wok long mekim disisen long Jehova bai fogivim man i mekim rong o nogat! Tasol i gat wanpela disisen em yumi mas mekim. Em wanem disisen? Sampela taim, wanpela inap rongim yumi—ating em bikpela rong—tasol bihain em i tok sori na em i askim yumi long fogivim em. Long ol narapela taim, ating man i rongim yumi i no mekim olsem. Maski i olsem, yumi ken mekim disisen long fogivim em. Taim yumi fogivim em, dispela i makim olsem yumi no holim yet pasin bilong kros na bel nogut long em. Tasol tru tru, sampela haptaim i mas lus na yumi mas wok hat tru long mekim olsem, moa yet sapos em i mekim pasin we i bagarapim tru bel bilong yumi. Wastaua bilong Septemba 15, 1994, i tok: “Yu mas save tu, taim yu lusim rong bilong man, i no olsem yu orait long dispela rong. Nogat. Taim Kristen i lusim rong bilong man, i olsem em i putim dispela hevi long han bilong Jehova na wet long em. Jehova em i stretpela Jas bilong heven na graun, na em bai stretim ol rong long taim stret.” w22.06 9 par. 6-7

Jehova i promis olsem long taim bilong yumi, em bai bringim ol manmeri bilong olgeta kantri na traib na tokples, na bungim ol wantaim long mekim lotu i tru. Long nau, Baibel i kolim dispela lain olsem “bikpela lain manmeri.” (Rev. 7:9, 10) Insait long dispela lain, i gat ol man, ol meri, na ol pikinini bilong kain kain bekgraun, em ol i stap bel isi na wanbel olsem wanpela lain brata long olgeta hap bilong graun. (Sng. 133:1; Jon 10:16) Oltaim ol i redi long tokaut long bilip bilong ol long ol man husat i laik harim tok olsem bai i gat gutpela sindaun long bihain. (Mat. 28:19, 20; Rev. 14:6, 7; 22:17) Sapos yu insait long dispela bikpela lain manmeri, orait tru tumas bilip bilong yu long ol gutpela samting bai kamap bihain i dia tumas long yu. Satan i laik bagarapim pasin bilong yu long bilip na wet. Em i laik bai yu ting olsem Jehova i no inap truim ol tok promis bilong em. Sapos Satan i bagarapim pasin bilong yumi long bilip na wet, orait yumi bai pret, na tu, yumi inap stop long mekim wok bilong Jehova. w22.06 20-21 par. 2-3

Strongpela bilip i helpim yumi long karim wanem ol hevi i painim yumi, long wanem, yumi save tru olsem klostu nau gutpela taim bai kamap. Tingim, Jisas i bin givim tok lukaut olsem ol man bai mekim nogut long yumi. (Jon 15:20) So taim yumi tingim tingim long bel ol gutpela samting yumi bai kisim long bihain, dispela bai helpim yumi long stap strong yet na mekim wok bilong Jehova. Skelim hau bilip i bin helpim Jisas long stap strong taim em i save olsem dai i laik painim em. Long Pentikos 33 C.E., aposel Pita i kolim wanpela tok profet i stap long Buk Song we i stori long hau Jisas bai stap bel isi na holimpas bilip, em i tok: “Mi bai bilip na wet i stap. Long wanem, bai yu no lusim mi i stap long Matmat, na bai yu no larim dispela man i stap gut long yu i sting na bagarap. . . . Yu amamas long mi na dispela bai mekim mi belgut.” (Apo. 2:25-28; Sng. 16:8-11) Jisas i holimpas bilip olsem God bai kirapim bek em na em bai amamas tru long go bek long heven na stap wantaim Papa bilong em.—Hib. 12:2, 3.

Wanpela taim, tupela aposel em Jems na Jon, ol i tokim mama bilong ol long askim Jisas long givim ol wok i gat namba long Kingdom. (Mat. 20:20, 21) Pasin bilong Jems na Jon i soim olsem tupela i gat pasin antap na ol i laik winim ol narapela. (Prov. 16:18) Long dispela taim, i no Jems na Jon tasol i soim olsem ol i gat ol pasin kranki. Lukim pasin ol arapela aposel i mekim, Baibel i tok: “Taim 10-pela arapela disaipel i harim tok long dispela samting, ol i no amamas long dispela tupela brata.” (Mat. 20:24) Yumi ken piksaim long tingting olsem kros i kamap namel long Jems, Jon, na ol arapela aposel. Jisas i mekim wanem long hevi i kamap? Em i no belhat long ol. Na em i no tok em bai lusim ol na go painim ol gutpela aposel, em ol man i gat pasin daun tru na oltaim ol i save mekim pasin laikim long narapela narapela, nogat. Jisas i no les kwik long ol na em i toktok gut long ol. (Mat. 20:25-28) Em i wok yet long mekim pasin laikim long ol. w23.03 28-29 par. 10-13

Yu bin mekim planti gutpela samting. Yu bin givim bel tru long stadi long Baibel, na ating yu mekim olsem insait long sampela yia. Yu bin stadi na dispela i helpim yu long bilip tru olsem Baibel em i Tok Bilong God. Bikpela samting moa em olsem, yu kisim save long Man Bilong Kamapim ol tok bilong Baibel na yu laikim em tru. Pasin laikim bilong yu long Jehova i kamap strong moa na dispela i kirapim yu long dediketim laip bilong yu na kisim baptais olsem wanpela wokman bilong Em. Yu bin mekim nambawan disisen tru! Ating planti samting i bin kamap bilong traim bilip bilong yu taim yu wok long winim ol mak bilong kisim baptais. Tasol taim yu kamap strong long bilip, yu bai bungim ol nupela traim. Satan bai traim long daunim pasin bilong yu long laikim Jehova na em bai traim long pulim yu long lusim wok bilong Em. (Efe. 4:14) Yu no ken tru larim dispela samting i kamap. Wanem samting i ken helpim yu long stap gut yet long Jehova na inapim tok promis yu mekim taim yu dediket long Em? Yu mas wok yet long kamap strong long bilip—yu mas “taitim bun” na kamap wanpela strongpela Kristen.—Hib. 6:1. w22.08 2 par. 1-2

Insait long famili, wan wan i gat wok long no ken tokaut long sampela pesenel samting bilong famili. Olsem, ating wanpela meri Kristen i gat wanpela pasin em man bilong em i tingim olsem em pani. Olsem wanem? Em bai tokim ol narapela long dispela samting na semim meri bilong em? Nogat, em i no inap mekim olsem! Em i laikim meri bilong em, na em i no inap mekim wanpela samting bilong mekim meri i bel hevi. (Efe. 5:33) Ol tineja i laik bai ol narapela i rispektim tingting na filings bilong ol tu. Em i bikpela samting long ol papamama i tingim dispela. Ol i no inap semim ol pikinini bilong ol na tokaut long ol popaia bilong ol long ol narapela. (Kol. 3:21) Ol pikinini tu i mas lain long bihainim gutpela tingting, na ol i no ken tokim ol narapela long ol samting we inap semim ol wanfamili bilong ol. Taim wan wan insait long famili i no tokim ol narapela long ol pesenel samting bilong famili, dispela i save helpim famili long pas gut wantaim. w22.09 10 par. 9

Jehova i toktok long Jop na em i kirapim em long tingim bikpela savetingting bilong Em na pasin bilong Em long lukautim ol samting Em i wokim. Em i stori long planti ol strongpela animal. (Jop 38:1, 2; 39:9, 13, 19, 27; 40:15; 41:1, 2) Na tu, Jehova i yusim wanpela yangpela man nem bilong em Elihu long strongim na mekim gut bel bilong Jop. Elihu i mekim ol gutpela tok long Jop olsem oltaim Jehova i save givim gutpela pe long ol wokman bilong em taim ol i sanap strong na karim hevi. Tasol Jehova i kirapim Elihu tu long givim sampela tok bilong stretim Jop. Elihu i helpim Jop long em i no ken tingting tumas long em yet tasol, long wanem, yumi ol man i olsem liklik samting tasol long ai bilong Jehova, em Man Bilong Wokim heven na graun. Na tu, Jehova i givim wanpela wok long Jop, long em i mas beten bilong helpim 3-pela pren bilong em husat i bin mekim sin. (Jop 42:8-10) Jehova i mekim wanem bilong sapotim yumi long nau taim yumi karim ol bikpela hevi? Jehova i no save toktok stret long yumi olsem em i mekim long Jop, tasol Em i save toktok wantaim yumi long rot bilong Baibel.—Rom 15:4. w22.08 11 par. 10-11

Kongrigesen long Rom i gat ol Kristen bilong lain Juda na bilong ol narapela lain. Taim Lo Bilong Moses i pinis, i no gat wok moa long ol Kristen i bihainim ol lo long sait bilong wanem kaikai i klin na wanem kaikai i no klin. (Mak 7:19) Kirap long dispela taim na i go, sampela Kristen bilong lain Juda i orait long kisim olgeta kain kaikai. Tasol ol narapela Kristen bilong lain Juda i pilim olsem i no stret long mekim olsem. Dispela i mekim na kongrigesen i bruk. Aposel Pol i kamapim klia olsem em i bikpela samting long stap wanbel wantaim. Long dispela rot, Pol i helpim ol wanbilip long luksave olsem ol kain tok pait olsem inap bagarapim bilip bilong ol Kristen na pinisim bel isi insait long kongrigesen. (Rom 14:19, 20) Na tu, Pol i redi long senisim pasin em i bihainim bambai em i no ken pundaunim ol narapela. (1 Kor. 9:19-22) Yumi tu i ken strongim ol narapela na holimpas pasin wanbel taim yumi no toktok planti long ol samting em wan wan man yet i gat rait long mekim disisen long en. w22.08 22 par. 7

Sapos yumi putim wanpela mak long mekim wok bilong Jehova, orait oltaim yumi mas wok strong long winim dispela mak. Olsem tasol, oltaim yumi mas mekim ol samting bilong wok strong long bihainim stretpela pasin. Na Jehova bai i no les kwik long helpim yumi, em bai wok yet long strongim yumi long kisim pasin bilong laikim stretpela pasin. (Sng. 84:5, 7) Jehova i kirapim yumi long tingim olsem taim yumi bihainim ol stretpela lo bilong em, dispela i no givim hevi long yumi. (1 Jon 5:3) Ol dispela lo i lukautim yumi long olgeta wan wan de. Tingim ol klos pait bilong bilip em aposel Pol i stori long en. (Efe. 6:14-18) Wanem hap bilong klos pait i lukautim bel bilong soldia? Em “siot kapa” bilong “stretpela pasin,” we i makim ol stretpela lo bilong Jehova. Wankain olsem siot kapa i save lukautim bel bilong soldia, ol stretpela lo bilong Jehova i ken lukautim bel na tingting bilong yumi, em ol tingting tru i stap long bel bilong yumi. Olsem na em i bikpela samting tru long yumi mas pasim tu siot kapa bilong stretpela pasin wantaim olgeta narapela klos pait bilong bilip!—Prov. 4:23. w22.08 29 par. 13-14

Tok Bilong God i bin stiaim rot bilong ol bilipman na meri inap planti tausen yia. Olsem wanem dispela samting i kamap? Jehova i kirapim ol man long raitim planti kopi bilong dispela Ol Rait Holi. Ol dispela man bilong raitim ol kopi ol i no gutpela olgeta, tasol ol i was gut tru na raitim gut ol kopi. Wanpela saveman i tok long Ol Skripsa Hibru olsem: “I no gat wanpela buk bilong bipo em ol i bin raitim stret olgeta tok bilong en na ol wankain tok i stap i kam inap long nau.” So yumi ken bilip tru olsem ol tok yumi ritim long Baibel i kamapim tingting bilong Jehova, em Man i As bilong ol tok bilong en. Jehova em i As bilong “olgeta gutpela presen na olgeta presen i nambawan tru.” (Jems 1:17) Baibel em nambawan gutpela presen tru Jehova i bin givim long yumi. Taim wanpela i givim presen long yumi, dispela i kamapim klia olsem em i save gut long yumi na em i save long ol samting yumi nidim. Dispela em i wankain tu long Man i givim Baibel long yumi. Taim yumi skelim gut dispela presen, yumi save gut moa long Jehova. Yumi lainim olsem em i save gut long yumi na em i save long ol samting yumi nidim. w23.02 2-3 par. 3-4

Yumi bai amamas tru long lukim ol man i stat long kirap bek hia long graun insait long Wan Tausen Yia Bilong Krais i Stap King! Olgeta manmeri i laik tru long lukim gen ol pren na ol wanfamili bilong ol husat i bin dai. Jehova tu i gat bikpela laik tru long lukim ol dispela lain i kirap bek. (Jop 14:15) Piksaim long tingting bikpela amamas ol manmeri long graun bai pilim taim ol i lukim ol pren na ol wanfamili bilong ol i kirap bek. “Ol stretpela man” em ol man em nem bilong ol i stap long buk bilong laip na “kirap bek bilong ol em bilong kisim laip.” (Apo. 24:15; Jon 5:29) Ating planti bilong ol pren na ol wanfamili bilong yumi bai insait long ol fes lain em ol bai kirap bek bihain liklik long pait bilong Armagedon i pinis. Na tu, “ol man nogut” em ol man husat i no bin gat rot long kisim save long Jehova o long lotuim em paslain long ol i dai, “kirap bek bilong ol em bilong kisim kot.” Yumi mas skulim olgeta manmeri em ol i kirap bek. (Ais. 26:9; 61:11) Olsem na bai i gat bikpela wok tru bilong skulim ol manmeri i kamap long graun winim olgeta narapela taim bipo.—Ais. 11:10. w22.09 20-21 par. 1-2

Jehova i kamapim klia olsem em i gat bikpela strong moa winim ol king em ol i bung wantaim na kam pait long lain Israel. Em i mekim pait bilong helpim lain Israel, na ol i kisim bikpela hap graun long Graun Bilong Promis. (Jos. 11:4-6, 20; 12:1, 7, 24) Inap planti taim, Jehova i kamapim klia olsem em wanpela tasol em i Nambawan God Antap Tru! Taim King Nebukatnesar bilong Babilon i apim nem bilong em yet long ‘strong, glori, na biknem bilong em,’ na em i no daunim em yet na tok olsem Jehova wanpela tasol i gat rait long kisim biknem, God i mekim save long em long rot bilong mekim em i kamap longlong. Bihain long Nebukatnesar i kamap orait, em i “preisim God Antap Tru,” na em i tokaut klia olsem “wok king bilong [Jehova] i bilong i stap oltaim oltaim.” Em i tok moa olsem: “I no gat wanpela man inap pasim em.” (Dan. 4:30, 33-35) Man bilong raitim song i tok: “Lain manmeri God bilong ol em Jehova, ol i ken amamas, ol dispela manmeri em i bin makim bilong em yet.” (Sng. 33:12) Tru tumas, i gat gutpela risen na yumi ken holimpas pasin bilong yumi long stap gut long Jehova! w22.10 15-16 par. 13-15

Planti tok profet bilong Baibel em ol i bin kamap tru i strongim bilip bilong yumi long ol tok promis bilong God long ol samting bai kamap bihain. Yumi pilim wankain olsem man bilong raitim song husat i bin beten long Jehova olsem: “Mi laikim tumas bai yu kisim bek mi, tok bilong yu i mekim mi i bilip na wetim gutpela samting i kamap bihain.” (Sng. 119:81) Long rot bilong ol tok i stap long Baibel, Jehova i promis olsem em bai givim “gutpela sindaun long [yumi] em [yumi] ken bilip na wet long en.” (Jer. 29:11) Ol gutpela samting yumi bilip na wet long en, ol i no inap kamap long strong bilong ol man, nogat. Ol bai kamap long rot bilong ol tok promis bilong Jehova. Yumi ken wok yet long strongim pasin bilong yumi long trastim Tok Bilong God long rot bilong stadi gut long ol tok profet bilong Baibel. Wanpela moa evidens i soim olsem yumi ken trastim ol tok bilong Baibel em taim yumi luksave long gutpela samting i kamap taim ol manmeri i bihainim tok bilong en. (Sng. 119:​66, 138) Olsem, ol marit em ol i bin gat hevi na klostu ol i bin divos, nau ol i stap amamas na stap wanbel. Ol pikinini bilong ol i amamas long kamap bikpela insait long famili Kristen we ol i pilim olsem ol i stap gut, na papamama i laikim ol.—Efe. 5:22-29. w23.01 5 par. 12-13

Tingim hau yu bin kisim helpim taim yu lukim ol tok promis bilong God long Baibel i bin kamap tru long laip bilong yu yet. Olsem, Jisas i bin tok promis olsem Papa bilong em bai givim yu ol samting yu nidim long laip. (Mat. 6:32, 33) Na tu, Jisas i tok olsem Jehova bai givim yu holi spirit taim yu askim long en. (Luk 11:13) Jehova i bin truim ol dispela promis. Ating yu ken tingim tu ol narapela tok promis em i bin truim long laip bilong yu. Olsem, em i promis long fogivim yu, long mekim gut bel bilong yu, na long givim ol tok bilong strongim bilip bilong yu. (Mat. 6:14; 24:45; 2 Kor. 1:3) Taim yu tingim tingim long bel ol samting God i mekim pinis bilong helpim yu, dispela bai strongim bilip bilong yu long ol samting em i promis long mekim long helpim yu long bihain. Yumi bilip olsem Jehova bai truim ol tok promis bilong em. Olsem man bilong raitim song i tok: “Man . . . i ken amamas. Em i bilip na wet long Jehova, em God bilong em, . . . [em] Man i save bihainim tru olgeta tok bilong em.”—Sng. 146:​5, 6. w22.10 27 par. 15; 28 par. 17

Yu ting tok profet bilong stretim bek lotu i tru i stret long yumi long nau tu? Yes, ol dispela tok i stret long yumi long nau tu! Long wanem rot? Kirap long 1919 na i kam, planti milion manmeri i bin lusim kalabus bilong Bikpela Babilon, em olgeta lotu giaman. God i bin stiaim ol i go long wanpela naispela ples winim Graun Bilong Promis bilong lain Israel. God i stiaim ol i go long paradais bilong bilip. (Ais. 51:3; 66:8) Kirap long yia 1919 C.E. na i kam, ol Kristen God i bin makim i amamas long stap long paradais bilong bilip. Long ol yia i kam bihain, ol Kristen em ol i bilip long kisim laip long graun, em “ol arapela sipsip,” ol tu i bin kam sindaun long dispela paradais bilong bilip na ol i bin amamas tru long kisim planti blesing i kam long Jehova. (Jon 10:16; Ais. 25:6; 65:13) Dispela paradais bilong bilip em ol i stap insait long en, em i stap long olgeta hap bilong graun. So maski yumi stap long wanem hap bilong graun long nau, yumi inap stap insait long dispela paradais bilong bilip taim yumi wok strong long sapotim lotu i tru. w22.11 11-12 par. 12-15

Olsem wanem? Yu pilim hatwok long kliagut olsem Jehova i save stap “oltaim oltaim”? (Ais. 40:28) Planti narapela manmeri tu i hatwok long kliagut long dispela. Elihu i tok long God olsem: “Yumi no inap save em i stap laip hamas yia.” (Jop 36:26) Sapos yumi no kliagut long wanpela samting, dispela i no makim olsem dispela samting i no stap tru. Olsem, maski yumi no kliagut long hau pawa i wok, dispela i no makim olsem pawa i no stap, a? Olsem tasol, yumi ol man i no inap kliagut tru long hau Jehova i bin stap long bipo na oltaim em bai stap. Tasol dispela i no makim olsem God i no save stap oltaim oltaim. Maski yumi kliagut long dispela o nogat, dispela i no makim olsem God i no stap tru. (Rom 11:33-36) Na em i bin stap paslain long ol samting long yunives i kamap, olsem san na ol sta samting. Yes, em i bin stap paslain long em i “pulim na opim skai i go bikpela olsem laplap.”—Jer. 51:15. w22.12 2-3 par. 3-4

Sampela taim ol narapela inap askim yumi long makim maus bilong ol long beten. Olsem, wanpela sista husat i mekim Baibel stadi inap askim narapela sista husat i sindaun long stadi bilong em long mekim beten. Ating dispela narapela sista i no save gut long sumatin, so em inap redi long mekim beten long pinis bilong stadi. Long dispela rot, em bai save long wanem tok em i ken mekim long beten bilong helpim sumatin. Ating ol i askim wanpela brata long beten long bung bilong autim tok o long miting bilong kongrigesen. Ol brata i kisim dispela asainmen i mas tingim gut wanem wok bilong ol dispela miting. Taim brata i beten, em i no ken mekim ol tok bilong stretim kongrigesen o mekim ol toksave. Long planti miting bilong kongrigesen, ol i makim 5-pela minit bilong mekim singsing na beten, so brata i beten i no ken kolim “planti tok,” na moa yet long kirap bilong miting.—Mat. 6:7. w22.07 24-25 par. 17-18

Jisas i tok profet olsem long taim bilong las de bai i gat ol bikpela sik o ol sik we i spred i go “long narapela narapela hap.” (Luk 21:11) Taim yumi save long dispela, olsem wanem dispela i ken mekim yumi stap bel isi? Yumi no kirap nogut long ol bikpela sik i kamap long olgeta hap. Yumi luksave olsem ol samting i kamap olsem Jisas i bin tok long en. Olsem na i gat as long yumi bihainim tok Jisas i mekim long ol manmeri i stap long taim bilong pinis olsem: “Yupela i no ken pret.” Taim wanpela bikpela sik i kamap, dispela inap mekim na i hatwok long yu mekim ol samting em yu save mekim, tasol no ken larim dispela i pasim yu long mekim pesenel stadi bilong yu o go long ol miting. Ol ekspiriens bilong ol bratasista we i stap long ol pablikesen na ol vidio bilong yumi bai kirapim yu long tingim olsem ol bratasista bilong yu i holimpas pasin bilong ol long stap gut long God maski ol i bungim ol wankain hevi. w22.12 17 par. 4, 6

Bilipman Jekop i soim klia olsem em i laikim tru pikinini man bilong em Josep. (Stt. 37:​3, 4) Dispela i mekim na ol bikpela pikinini man bilong Jekop i jeles long brata bilong ol. Taim ol i lukim rot i op, ol i salim Josep long sampela bisnisman bilong lain Midian. Ol dispela bisnisman i kisim Josep inap planti handret kilomita i go long Isip, long dispela hap ol i salim Josep gen—ol i salim em long Potifar, em ofisa bilong Fero na kepten bilong ol gad. Wantu tasol laip bilong Josep i senis, pastaim em i stap olsem pikinini em papa i laikim tru, tasol nau em i stap olsem wokboi nating bilong wanpela man Isip! (Stt. 39:1) Sampela taim yumi save bungim ol hevi “i save kamap long olgeta man”—em ol kain hevi we olgeta man i save karim. (1 Kor. 10:13) O yumi inap karim hevi bikos yumi ol disaipel bilong Jisas. Olsem, ol man inap tok bilas long yumi, birua long yumi, o mekim nogut long yumi bikos long bilip bilong yumi. (2 Tim. 3:12) Maski wanem hevi yu karim, Jehova inap mekim yu sanap strong na karim dispela hevi. w23.01 14-15 par. 3-4

Sampela taim, ating bai yumi laik i go stret na toktok wantaim wanpela wanbilip husat i mekim yumi bel hevi. Tasol pastaim, i gutpela yumi askim yumi yet ol kain askim olsem: ‘Mi save long olgeta samting i bin kamap?’ (Prov. 18:13) ‘Nogut em no min long bagarapim bel bilong mi?’ (Ekl. 7:20) ‘Mi tu bin mekim wankain popaia bipo?’ (Ekl. 7:21, 22) ‘Taim mi go toktok long em, bai mi mekim hevi i go bikpela moa winim hevi i kamap pinis?’ Taim yumi lusim haptaim long skelim ol kain askim olsem, dispela bai helpim yumi long tingim olsem pasin laikim i ken kirapim yumi long no ken tingim popaia bilong em. Yumi wan wan i soim olsem yumi ol disaipel tru bilong Jisas taim yumi mekim pasin laikim long ol bratasista bilong yumi maski ol i mekim ol popaia. Taim yumi mekim olsem, dispela inap kirapim ol narapela long luksave long lotu i tru na ol i ken joinim yumi long lotuim Jehova. Yumi ken tingting strong long wok yet long mekim pasin laikim we i stap olsem mak bilong ol Kristen tru. w23.03 31 par. 18-19

Baibel i kamapim klia olsem pasin laikim em i nambawan bikpela pasin bilong God. Jehova i laikim yumi, olsem na em i no putim planti liklik liklik tok we yumi no nid long save long en. (Jon 21:25) Narapela rot Jehova i soim olsem em i laikim yumi em long rot bilong toktok long yumi long pasin rispek. Long Baibel, em i no kamapim lista bilong ol lo em yumi mas bihainim na stiaim olgeta samting long laip bilong yumi, nogat. Em i larim yumi yet i wokim tingting na em i helpim yumi long rot bilong ol laip stori, ol tok profet, na ol edvais. Long ol dispela rot, Tok Bilong God i kirapim yumi long laikim em na bihainim tok bilong em. Baibel i kamapim klia olsem Jehova i tingim tru yumi. Hau yumi save long dispela? Tok bilong em i gat stori bilong planti man em ol i kamapim tru bel na tingting bilong ol. Yumi ken kliagut long bel na tingting bilong ol man em Baibel i stori long ol bikos ol i man “wankain olsem yumi.” (Jem 5:17) Bikpela samting moa, taim yumi ritim stori long pasin em i mekim long ol man olsem yumi, yumi inap kliagut moa olsem “Jehova i gat pasin bilong sori tru na marimari.”—Jem 5:11. w23.02 6 par. 13-15

Laspela buk bilong Baibel i kirap wantaim ol dispela tok olsem: “Jisas Krais i kamapim wanpela tok hait em God i bin givim long em bilong soim ol wokboi bilong em long ol samting i no longtaim bai kamap.” (Rev. 1:1) So yumi gat laik tru long save long ol samting i wok long kamap long graun long nau na hau ol i wok long truim ol tok profet bilong Baibel. Na ating yumi laik tru long stori wantaim ol narapela long ol dispela samting. Taim yumi stori wantaim ol narapela long ol tok profet bilong Baibel, yumi no laik kamapim nabaut ol tingting bilong yumi yet long hau truim bilong en bai kamap. Bilong wanem? Long wanem, yumi no laik mekim ol tok we bai brukim lain insait long kongrigesen. Olsem, ating yumi harim ol lida bilong graun i toktok long hau ol i ken pinisim wanpela pait na kamapim bel isi na gutpela sindaun. Tasol yumi no laik kamapim nabaut ol tingting bilong yumi yet olsem tok bilong ol i truim tok profet bilong 1 Tesalonaika 5:3. Yumi mas kisim ol nupela infomesen i kam stret long oganaisesen bilong Jehova. Taim yumi stori long ol tok i kam long rot bilong dispela oganaisesen, yumi helpim kongrigesen long stap wanbel na “holim wankain tingting.”—1 Kor. 1:10; 4:6. w23.02 16 par. 4-5

Bilong wanem yu laikim Jisas Krais? Jisas i laikim tok i tru, pasin daun, na stretpela pasin. Sapos yu laikim tok i tru na stretpela pasin, em i klia olsem yu laikim Jisas Krais tu. Tingim hau Jisas i strongim bel na sambai long tok i tru na stretpela pasin. (Jon 18:37) Tasol olsem wanem Jisas i skulim yumi long mekim pasin daun? Jisas i skulim yumi long mekim pasin daun long rot bilong ol samting em i mekim. Olsem, em i save givim glori i go long Papa bilong em long olgeta samting em i mekim, na i no long em yet. (Mak 10:17, 18; Jon 5:19) Yu pilim olsem wanem long pasin daun bilong Jisas? Tru tumas, dispela i kirapim yu long laikim Pikinini Bilong God na bihainim pasin bilong em! Bilong wanem Jisas i gat pasin daun? Jisas i gat pasin daun, long wanem, em i laikim Papa bilong em na em i bihainim pasin bilong Em, em Man husat i gat pasin daun. (Sng. 18:35; Hib. 1:3) Olsem wanem? Dispela i kirapim yu long laikim Jisas, em man i bihainim gut tru ol pasin bilong Jehova? w23.03 3-4 par. 6-7

Baibel i stori long 2-pela grup bilong ol manmeri em ol bai kirap bek na i gat rot bilong kisim laip oltaim long graun, em “ol stretpela man” na “ol man nogut.” “Ol stretpela man” em ol man i bin stap gut long Jehova na mekim wok bilong em taim ol i bin stap laip. Tasol “ol man nogut” em ol man i no bin mekim olsem. God bai kirapim bek dispela tupela grup wantaim, so yu ting dispela i makim olsem nem bilong ol i stap long buk bilong laip? Paslain long ol i dai, God i bin raitim nem bilong “ol stretpela man” long buk bilong laip. Yu ting God i rausim nem bilong ol long buk bilong laip taim ol i dai? Nogat, bikos i olsem ol i “stap laip” yet long memori bilong Jehova. Jehova “em i no God bilong ol man i dai pinis, nogat, em i God bilong ol man i stap laip, long wanem, long tingting bilong em olgeta i stap laip.” (Luk 20:38) Dispela i makim olsem taim ol stretpela man i kirap bek na kisim laip long graun, nem bilong ol bai i stap yet long buk bilong laip, tasol i olsem God i bin raitim long pensil.—Luk 14:14. w22.09 16-17 par. 9-10

Jehova i laik bai tupela fes man na meri i amamas long ol samting em i wokim. Taim God i wokim Adam, Em i givim em naispela ples paradais bilong em i ken i stap long en, na God i givim wok long em long surikim dispela paradais i go long olgeta hap bilong graun. (Stt. 2:8, 9) Piksaim long tingting Adam i amamas tru taim em i lukim ol sid i kru na karim plaua. Em naispela wok tru God i givim long Adam bilong lukautim gaden Iden! Na tu, God i tokim Adam long givim nem long olgeta kain kain animal. (Stt. 2:19, 20) Jehova yet inap givim nem long ol animal, tasol nogat, em i givim dispela wok long Adam long mekim. Ating paslain long Adam i givim nem long ol, em i skelim gut lukluk na pasin bilong olgeta wan wan animal. Ating Adam i amamas tru long mekim dispela wok. Tru tumas, dispela i helpim em long kliagut long bikpela savetingting bilong Jehova na luksave long ol narakain samting God i wokim, em ol i naispela tru. w23.03 15-16 par. 3

Olsem tupela fut bilong wanpela bikpela imis i makim, Gavman Inglan-Amerika em laspela gavman Baibel i tok profet long en. (Dan. 2:31-33) I no gat narapela gavman bai kisim ples bilong em. Tasol Kingdom Bilong God bai bagarapim dispela gavman wantaim olgeta narapela gavman bilong ol man long taim bilong Armagedon. (Rev. 16:13, 14, 16; 19:19, 20) Olsem wanem dispela tok profet inap helpim yumi? Tok profet bilong Daniel i kamapim narapela samting tu i soim olsem yumi stap long taim bilong pinis. Winim 2,500 yia i go pinis, Daniel i tok profet olsem bihain long Babilon, 4-pela narapela gavman bai bosim lain bilong God. Em i tok moa olsem Gavman Inglan-Amerika em laspela bilong ol dispela gavman. Dispela i mekim isi bel bilong yumi na i helpim yumi long bilip na wet olsem klostu nau Kingdom Bilong God bai bagarapim na pinisim olgeta gavman bilong ol man na em tasol bai bosim graun olgeta. w22.07 4-5 par. 9, 11-12