Taim Bilong Yumi i Narapela Kain Tru?

WANPELA man bilong Amerika em i save long mani, em Peter F. Drucker, em i tok, ‘Bagarap inap painim yumi olgeta manmeri long nau. Bikpela askim i no olsem: “Wanem samting bai painim yumi long bihain?” Nogat. Em olsem: “Bai mi stap long bihain?”

Orait, i gat wanem ol samting nogut long nau, em inap bagarapim yumi, na i narapela kain long bipo?

Pipia

Win long hap bilong planti biktaun em i bagarap. Pipia bilong ol haus faktori i go insait long ol wara na long solwara na i bagarapim ol pis. Smok nogut i go insait long win bilong antap na i bagarapim. Olgeta lain man i tingting planti long dispela samting. Wanpela nius bilong Frans (Le Monde) i stori long bung bilong wanpela lain bilong helpim ol man long wok gut wantaim na kamapim wok bisnis (Organization for Economic Cooperation and Development), na nius i tok: ‘Namel long 1965 na 1975 pipia na marasin nogut na smok nogut i bagarapim tru win na wara na dispela graun. Maski nau ol man i sot long mani na ating ol i no ken kamapim planti nupela wok bisnis, tasol sapos ol i no wok strong moa long lukautim dispela graun na ol samting i stap long en, bai em i wok yet long bagarap.’

Sampela man i tok, bipo tu i gat pipia na smok nogut samting. Tasol nau i narapela kain. Nau sampela samting i bin i stap inap planti tausen yia, olsem piksa ol i bin sapim long ston mabel na ol narapela kain ston, ol dispela samting i laik bagarap. ‘Win nogut long Atens i laik bagarapim ol samting em ol soldia bilong Teki i no inap bagarapim insait long 400 yia ol i go sindaun long hap bilong ol Grik. Smok nogut na marasin nogut i stap long win, em i wok long kaikai ston mabel.’—Nius Le Figaro bilong Paris, Frans.

Planti Tumas Manmeri

I gat sampela samting moa em tu i laik bagarapim ol manmeri long olgeta hap bilong graun. Wanpela nius bilong saiens long Frans (Science et Vie) i stori long ol manmeri i kamap planti na ol ples wesan nating i go bikpela. Dispela nius i tok: ‘Ol manmeri i stap long graun long nau ol inap olsem 4 bilion. Lain bilong ol bai i go bikpela, na long yia 2000 bai i gat 6 bilion manmeri i stap long graun. Tasol graun bilong wokim ol gaden na kamapim kaikai bai go liklik inap 30 pesen, long wanem ol man i save kamapim kaikai planti taim long ol dispela hap graun na pinisim gris bilong graun … na bai ol i wokim planti haus moa long ol hap graun ol man inap wokim gaden long en. Dispela tupela samting inap bagarapim tru yumi.’

Tru, long sampela hap bilong graun long nau, olsem long sampela hap bilong Wes na sampela hap i no gat planti wok bisnis long en, lain bilong ol i no i go bikpela. Tasol long sampela hap, lain bilong ol man i wok long i go bikpela yet. Olsem na ol saveman i tok, dispela hevi, olsem ol man i kamap planti tumas, em bai wok long givim hevi yet long ol man inap long yia 2050 samting. Long ol hap i no gat planti wok bisnis long en na planti manmeri i stap rabis, long ol dispela hap i gat bikpela lain manmeri tru ol i stap. Dispela samting, olsem planti tumas manmeri i kamap long graun, em i makim taim bilong yumi i narapela kain tru, i no olsem bipo.

Ol Samting Bilong Pait

Ating yu save pinis, planti manmeri ol i tingting planti long ol lain man i resis long bungim planti samting bilong pait. Planti milion manmeri long hap bilong Yurop ol i pret, long wanem ol i stap klostu long ol hap komyunis, em ol i gat planti roket-bom i redi i stap. Na ol dispela man bilong Yurop i no laik bai ol roket-bom bilong ol Amerika i stap long dispela hap bilong ol. Tasol maski yu stap long wanem wanem hap bilong graun, ol dispela samting bilong pait ol i wokim long nau em inap bagarapim yu. Na sampela saveman i tok, ol dispela nupela samting ol i wokim em inap kirapim pait. Long wanem olgeta lain i save, ol dispela samting inap bagarapim ol, olsem na ating bai ol i ting olsem: Sapos ol yet i kirapim pait bai ol narapela lain i no inap bekim na ol i no ken bagarap.

Askim skin bilong yu yet: Yu ting bipo ol lain man i gat ol samting bilong pait em inap bagarapim klostu olgeta manmeri long graun insait long tupela o tripela minit tasol? Nogat, a? Olsem na taim bilong yumi i narapela kain tru.

Ol samting em inap bagarapim yumi na nau yumi stori long en, ol dispela samting i kirapim ol man long mekim ol narapela narapela samting. Long ol hap i gat planti wok bisnis long en, sampela man i save bung wantaim bilong pasim ol man long tromoi pipia samting na bagarapim graun na win na wara; na sampela ol i wok long kisim planti samting bilong pait, o ol i go i stap longwe long ol narapela man, ol i ting ol dispela samting ol i mekim inap lukautim ol na bai ol i no ken bagarap. Wanpela nius (International Herald Tribune) i stori long dispela samting na i tok: ‘Planti manmeri long Amerika ol i bung wantaim olsem ol liklik lain na ol i kisim ol gan samting na ol i lain long mekim pait na kilim man i dai. Ol i ting liklik taim bai ol man i no bihainim moa ol lo na bai ol i mas mekim pait bilong lukautim skin bilong ol bambai ol i no ken bagarap.’ Sampela man na meri long ol narapela hap, ol tu i lain long holim gan samting na mekim pait.

Tasol i gat narapela samting i laik bagarapim yumi na i hatwok long yumi abrusim, em olsem: Hevi bilong mani. Long nau planti wok bisnis i bagarap na ol man i no gat wok na pe bilong ol samting i go antap. Long hap bilong Wes planti milion manmeri i no gat wok, na long ol narapela hap ol narapela hevi bilong mani i painim ol. Ating long hap bilong yu, yu lukim dispela hevi i kamap? Long 1980 Raymond Barre, bipo em i stap praim-minista long Frans, em i stori long hevi bilong mani na ol wok bisnis na em i tok: ‘Dispela hevi . . . i kamap long olgeta hap. I no bilong i stap liklik taim tasol, na i no liklik hevi tasol. Nogat. Em bilong i stap longtaim na em i bikpela hevi tru.’ Man bilong save long mani, em Samuel Pisar, em i tok: ‘Olgeta samting i makim olsem nupela hevi i laik kamap. Ol hevi bilong yumi long nau i no wankain olsem ol hevi bilong 40 yia bipo. Nogat. Na dispela samting tu i save mekim yumi pret na tingting planti.’ Tru tumas, taim bilong yumi i narapela kain. Tasol husat inap helpim yumi long dispela taim bilong planti hevi?

Longtaim bipo Krais Jisas i tok long wanpela taim bai kamap na “bel bilong olgeta lain man bai i bagarap tru na ol i pret.” (Luk 21:25) Yumi tingim ol narapela kain samting i bin kamap nau long taim bilong yumi na yumi mas tok, tok bilong Jisas i makim stret taim bilong yumi. Tasol sapos tru Jisas i makim taim bilong yumi, orait, yumi mas mekim wanem? Tru bikpela senis i laik kamap? Tok i kamap bihain bai bekim dispela tupela askim.

[Piksa long pes 4]

Pipia

Planti Tumas Manmeri

Ol Samting Bilong Pait