Insait Bilong Ol Tok i Kam long Olgeta Hap
Bai Olgeta i Gat Kaikai?
Yu ting graun inap kamapim kaikai inap long olgeta manmeri nau ol i stap long graun? Wanpela man bilong raitim tok long nius (Jack Cahill long nius Toronto Star) em i tok, graun inap kamapim kaikai olsem, na em inap kamapim kaikai bilong planti manmeri moa tu. Em i tok: ‘Wanpela lain bilong Yunaitet Nesen (FAO) ol i tok, long olgeta hap graun ol man i save kamapim bikpela wit na rais samting long ol gaden inap tru long olgeta manmeri.’ Na olsem wanem long bihain? Dispela man i tok, ol manmeri i stap long graun long nau, sapos lain bilong ol i go bikpela inap dabol, tasol bai kaikai inap long ol.
Ating yu kirap nogut long dispela tok, long wanem yu save, planti milion manmeri long graun ol i hangre na ol i lus olgeta long kaikai. Tasol dispela man i tok: ‘Planti man i hangre, tasol as bilong dispela hevi i no olsem kaikai i sot. Nogat. As bilong en i olsem: Planti man i stap rabis; ol wok gavman o wok politik bilong graun; mani na wok bisnis; ol man i no tilim stret kaikai long olgeta manmeri.’ Ol lain i save helpim ol man long kaikai ol i save, sapos ol i givim nating kaikai long ol man, dispela samting tasol i no inap stretim dispela hevi. Ol i mas helpim ol man “bambai ol i lain long kisim kaikai bilong ol yet.”
Wanem samting inap senisim ol gavman bilong dispela graun na bosim wok bilong tilim stret kaikai long olgeta man na lainim olgeta manmeri? Kingdom bilong God tasol inap mekim. Taim God i bosim graun, dispela samting bai helpim tru ol manmeri, olsem Sam 146:7 i tok: “Bikpela i save helpim ol manmeri, ol i stap nogut aninit long ol birua. Na em i save givim kaikai long ol manmeri i hangre.”
Stretim Man—Em Gutpela Pasin
Sampela man i gat tok long pasin bilong Ol Witnes Bilong Jehova em ol i save rausim man i mekim rong. Ol i tok dispela pasin em i hatpela pasin. Wanpela nius (Times bilong Sen Pitasbeg long Florida, Amerika) i putim sampela tok long dispela samting na wanpela man i kaunim ol dispela tok em i raitim pas na ol i putim long nius. Em i raitim dispela pas i go long ol man “i ting dispela pasin bilong Ol Witnes i hatpela pasin.” Dispela man i tok: “Ol i rausim mi long lain bilong ol long dispela yia [Epril, 1981] … mi mekim sampela pasin mi save Baibel i tambuim na i brukim lo bilong gavman tu. Mi giaman na mi tok mi no bin mekim ol dispela samting. Mi no tanim bel.”
Dispela man i tok long Ol Witnes Bilong Jehova, olsem: “Ol i save rausim ol man i no bihainim lo bilong God olsem Baibel i kolim. Em asua bilong ol dispela man yet.” Em i tok, em yet i gat rong na ol i rausim em. Em i tok: “Sapos ol narapela misin i gat strongpela lo olsem, bai i no gat planti man i bihainim laik bilong ol yet na brukim lo, na bai i no gat planti pen na hevi i kamap long dispela graun.”
Tasol ol misin i pret long mekim ol samting Baibel i tok ol i mas mekim long man i mekim rong na em i no tanim bel, em Baibel i tok: “Yupela i mas rausim dispela man nogut namel long yupela.” (1 Korin 5:13) Dispela pasin i save stretim bek nem bilong God, long wanem pasin dispela man i mekim i bin semim nem bilong God. Na dispela pasin bilong rausim man i lukautim kongrigesen na bai ol i no ken bung wantaim man nogut. Na dispela pasin inap helpim dispela man nogut tu, ating bai em i tanim bel. Sapos yumi larim kain man olsem, yumi no sori tru long em. Yumi no bihainim pasin sori bilong Krais, long wanem Krais Jisas yet i tok, sapos man i gat rong na em i no tanim bel ol i mas ‘rausim’ em long kongrigesen.—Matyu 18:15-17, The Living Bible.
Pasin bilong rausim man long kongrigesen em inap helpim dispela man. Em i helpim dispela man i bin raitim pas long nius. Dispela man i tanim bel na nau em i stap gen long lain bilong Ol Witnes Bilong Jehova.