Yu Save Pilim Tru Ol Samting God i Bin Mekim Bilong Helpim Yu?

WANPELA meri i laik autim gutpela tok bilong Baibel long wanpela meri Saina i gat tupela pikinini na i save stap klostu long em. Meri i wok long autim tok long em, tasol em i tok: “Mi no ken tru kamap Kristen olsem yu!”

Tasol dispela meri Kristen i no les long helpim meri Saina. Taim em i gat rot em i mekim gutpela pasin long dispela meri, na taim em i gat sampela hevi o sik samting, dispela meri Kristen i save go helpim em. Em i mekim olsem i go i go na bel bilong meri i wok long pilim tru dispela pasin meri Kristen i mekim long em, na em i laik kisim save long dispela God em lain bilong em i save sori tru long ol man na mekim gut long ol. Olsem na em i orait long meri Kristen i stadi wantaim em long Baibel. Bihain dispela meri Saina i kirap na lotuim Jehova, em God bilong Baibel, na maski man bilong em i mekim nogut long em na i laik pasim em, tasol em i sanap strong.

Olsem na yumi save, olgeta man i gat tingting ol i save amamas taim man i mekim gut long ol na i tingim ol. Na sapos wanpela man i bin mekim gut long yumi na helpim yumi olsem, orait i stret yumi mas tok tenkyu long em na bai em i save yumi pilim tru dispela gutpela pasin bilong em. Sapos wanpela pren bilong yu i singautim yu i kam long haus bilong em na em i kukim sampela gutpela kaikai tru bilong yu na em i lusim bikpela taim na mani long dispela kaikai. Orait yu kaikai pinis na yu mekim wanem? Bai yu kirap tasol na yu go na yu no tok tenkyu long man i bin wokim dispela bikpela kaikai? Nogat, a? Yu no ken mekim olsem. Orait, olsem wanem long Bikpela Man i bin wokim yumi? Yu save pilim tru ol gutpela samting em i bin mekim bilong helpim yumi olgeta?