Marit i No Bagarap

Wanpela man marit long Niu Kaledonia, em i tok: “Wanpela yia bipo mitupela i pilim olsem mipela i mas katim marit.” Bilong wanem tupela i pilim olsem? Long wanem tupela i no save toktok gut wantaim na pasin bilong tupela i no wankain na meri i gat sik. Tupela i marit inap 10-pela yia, tasol tupela wantaim i pilim olsem marit bilong ol i no wok gut.

Wanpela moningtaim, meri bilong dispela man i toktok wantaim wanpela meri i stap klostu, em wanpela Witnes Bilong Jehova. Em i tokim dispela meri long ol dispela hevi bilong em. Dispela meri i tokim em, ol gutpela tok bilong Baibel inap helpim em long stretim ol hevi i kamap insait long famili. Tasol taim em i tokim man bilong em long dispela samting, man i no amamas. Em i pilim olsem i no gat wanpela samting inap kirapim meri bilong em long senisim pasin bilong em, em i meri bilong kros kwik. Tasol meri i kirap long lainim tok bilong Baibel wantaim ol Witnes. Em i harim gut ol tok na em i kirap long bihainim ol lo bilong Baibel ol i lainim em long en.

Man bilong em i tok: “Kwiktaim pasin bilong em i senis.” Em i kirap nogut long dispela samting na em i go long wanpela kibung distrik. Em i pilim tru ol tok em i harim. Em kirap na lainim tok bilong Baibel wantaim meri bilong em. Em i tok: “Nau mipela i save long as bilong kamapim amamas insait long famili, Nau mitupela i stap amamas tru, na mitupela i laik tokim ol narapela man long dispela rot bilong stretim ol hevi i kamap insait long famili—em rot bilong stretim olgeta hevi i painim ol man long nau.”