Narapela Kain Bung!
Ripot i kam long Englan
LONG pinis bilong Septemba, 1983, planti brata i lusim hetkwota bilong ol Witnes Bilong Jehova long Bruklin, Nu Yok, na ol i go long Englan. Inap 13 memba olgeta bilong Lain Bilong Bosim dispela lotu i stap long olgeta hap bilong graun, ol i go long wanpela narapela kain bung.
Dispela bung em i bung bilong ol memba bilong Sosaiti Was Taua, ol i save mekim long olgeta yia, long Oktoba. Tasol nau, long namba wan taim, ol i mekim dispela bung long Englan. Ol i bung long Sarere, Oktoba 1 long wanpela haus bung (De Montfort Hall) long biktaun Lesta (Leicester). Wanpela kibung bilong ol Witnes i bin kamap long dispela haus bung long 1941, na nau ol Witnes i bin i stap long dispela kibung, ol i tingim. Wanem ol bikpela samting i bin kamap long yia 1941?
Ol i Tingting Bek
Long dispela taim Namba Tu Pait Bilong Olgeta Hap i stap. Ol manmeri i stap nogut, na ol i kisim kaikai long skel, na long san na long nait ol birua i kam tromoi bom long ol. Ol i no gat gutpela sindaun na i hatwok long ol i raun. Tasol long dispela taim ol Witnes Bilong Jehova i mekim kibung inap faipela de long dispela haus bung (De Montfort Hall) long Lesta. Ol i bung long kirap bilong Septemba, long yia 1941.
Long dispela taim wanpela yangpela man bilong Amerika, nem bilong em Albert D. Schroeder, em i lukautim ofis bilong Sosaiti long Englan. Nau, long 1983, em i wanpela memba bilong Lain Bilong Bosim Ol Witnes na em i kam long dispela bung. Ol memba bilong 28 kantri ol i kam bung! Inap 3,671 ol i pulap long dispela haus bung na sampela i sindaun insait long wanpela haus sel klostu na harim ol tok. Na inap 1,504 ol i bung long wanpela haus kibung long Datli (Dudley) na ol i harim ol tok long rot bilong telefon. Olgeta i amamas long harim ol tok Brata Schroeder i mekim taim em i stori long dispela kibung ol i bin mekim 42 yia bipo, olsem long 1941. Long 1941 i gat 11,000 Witnes tasol long Englan.
Brata Schroeder i stori long kibung bilong 1941 na em i tok: “Husat husat i stap nau long dispela bung na ol i stap long dispela kibung long 1941?” Planti brata sista tru ol i putim han i go antap. Brata Schroeder i kirap nogut na em i tok: “Olaman! Ating inap hap ol i bin i stap long dispela kibung. Gutpela tru nau yupela olgeta gutpela wokman bilong God i kam bung wantaim gen!”
Planti brata sista long dispela bung ol i stap yet mekim wok misineri long ol narapela narapela hap bilong graun. Inap 700 brata sista ol i bilong lain bilong heven. Brata Schroeder i tok: “Ating bipo i no gat planti bilong dispela lain ol i bung wantaim olsem long nau.” Taim ol brata i tingting pastaim long putim dispela bung long Englan, ol i save planti brata sista tru bai ol i laik long i kam bung, olsem na pastaim ol i singautim ol brata sista ol i bin i stap longtaim long tok i tru. Ol i bin i stap gut long wok bilong Jehova winim 40 yia. Planti tru ol i kam bung.
Nem bilong tok bilong Brata Schroeder em olsem: “Bilip long Jehova na No Ken Les.” Long pinis bilong tok bilong em, em i tok: “Ol Witnes Bilong Jehova i no save tingim tasol ol samting i bin kamap long bipo. Nogat. Ol i tingting long ol samting tru i kamap long nau. Ol i tingting long autim gutpela tok bilong Kingdom i go inap long taim Jehova i tok, ‘Dispela wok i pinis.’”
Ol Wokman Tru Bilong God
Taim ol i kirapim dispela bung, pastaim ol i mekim ol samting olsem lo bilong gavman i makim bilong ol sosaiti, na bihain, presiden bilong Sosaiti Was Taua em Frederick W. Franz, i mekim as tok bilong dispela bung. Em i stori long wok bilong ol Witnes Bilong Jehova kirap long taim bilong namba wan presiden bilong Sosaiti Was Taua, em Charles T. Russell. Em i tok, Russell “i mekim bikpela wok bilong lukautim ol sipsip bilong God, olsem na i stret ol i kolim em ‘pasto,’ long wanem insait bilong dispela tok ‘pasto’ i olsem ‘wasman bilong sipsip’ Tasol oltaim ol man i save sutim tok long ol wokman bilong God na tok ol i no gat namba bilong holim dispela wok. Ol i mekim olsem long Pasto Russell tu.”
Bihain Brata Franz i stori long Moses na Krais Jisas na ol gutpela aposel bilong em na em i tok, God yet i bin makim ol bilong mekim wok bilong em, tasol ol man i sakim ol. Em i tok: “Ol i sutim tok long dispela olgeta wokman bilong God na tok ol i no gat namba bilong mekim dispela wok. Ol man bilong ol lotu i birua long Pasto Russell na ol i birua long yumi long nau. Tasol Jehova yet i soim ol yumi wokman tru bilong Em.” Brata Franz i kolim tok bilong Revelesen 7:9 na 2 Korin 3:1-3 na em i tok: ‘“Bikpela lain manmeri’ namel long ol 2 milion hap Witnes Bilong Jehova long nau ol i olsem ‘pas’ bilong yumi bilong soim ol man God i gat ol witnes bilong em na yumi wokman tru bilong God.”
Stap Gut long Jehova
Long belo bek, pastaim Brata Lloyd Barry i beten na bihain siaman, em Leo K. Greenlees, i kaunim sampela telegram na tok ol Witnes bilong ol narapela narapela hap i bin salim i kam. Ol brata i amamas tru long harim tok bilong wanpela telegram i kam long Brata Grant Suiter, em i Sekreteri bilong Sosaiti Was Taua. Em i gat bikpela sik na em i stap long Betel long Bruklin, tasol em i salim tok i kam, olsem: “Jehova i mas blesim yupela long dispela gutpela taim bilong kisim strong long spirit. Sori tumas mi no inap i kam bung wantaim yupela, tasol mi tingim yupela na salim sori bilong mi na tenkyu bilong mi i go long yupela.” Ol i pasim tok long bekim wankain gutpela tok long em.
Bihain, Brata John E. Barr i mekim wanpela tok. Brata Barr i bin wok planti yia long ofis bilong Sosaiti long London. Em i stori long olgeta liklik hap bilong Sam 27 ves 4. Nem bilong tok bilong em i olsem: “Dispela Wanpela Samting Tasol Yumi Askim Jehova long En.” Em i toktok wantaim sampela brata ol i bin i stap longtaim long ‘haus bilong Jehova.’ Wanpela em Brata Edwin Skinner. Brata Skinner i gat 89 krismas. Em i kisim baptais long yia 1919 na em i kirap mekim wok painia long yia 1921. Brata Skinner i stori long Sosaiti i singautim en long 1926 bilong i go long India na opim nupela brens-ofis bilong Sosaiti. Em i tok: “Mi stap yet long India. Em ples bilong mi.”
Kisim Stretpela Tingting
Tupela laspela tok i stori long yumi mas kisim stretpela tingting na tingim gut ol samting bilong bihain. Dan Sydlik i tok: “Yumi amamas long harim ol lapun i stori long ol wok yumi bin mekim long bipo, tasol yumi mas tingim ol samting God i laik mekim long bihain. Em laik bilong God.” Sydlik i kamapim tok bilong aposel Pol long 1 Korin 15:19: ‘Sapos yumi wetim samting bilong laip bilong dispela graun tasol, orait ol man i mas sori long yumi.’ Em i tok: ‘“Yumi wetim Jehova; yumi no wetim ol man. Tok promis bilong Jehova i no inap lus nating. Maski ol man i tok wanen o mekim wanem, tasol oganaisesen bilong Jehova i stap na em i bilong i stap oltaim. Liklik taim tasol na bai ol gutpela samting moa yet i kamap!”
Bihain Brata Milton G. Henschel i kirapim olgeta long “Bihainin Gut Tingting Kristen Bilong Yumi.” Em i stori long hevi i save painim ol wokman bilong God i go lapun, “tasol ol i no tingim tumas hevi na pen bilong skin i painim ol, ol i wok i go yet. Ol i makim gutpela pasin ol yangpela i ken bihainim. Long taim bilong ren o bikpeia kol na win, husat i stap long miting? Em ol waitpela gras, ol lapun brata sista. Yumi olgeta i ken tingim dispela samting.”
Sampela brata sista bilong 37 brens bilong Sosaiti ol i kam long dispela bung. Long pinis bilong dispela bung, Brata Martin Poetzinger, wanpela bilong Lain Bilong Bosim Ol Witnes, em i mekim gutpela beten na tenkyu long Jehova.
I Go long Brens-Ofis long London!
Long tumora, em Sande Oktoba 2, i gat gutpela san. Kwiktaim Haus Kingdom long haus brens long London i pulap. Ol i putim sampela sia long rum antap long haus faktori tu na sampela brata sista i sindaun long dispela hap. I gat televisen, olsem na olgeta inap lukim na harim ol samting i kamap. Klostu 400 ol i kam bung. Na long haus kibung bilong Not London narapela 1,250 i stap, ol tu inap lukim na harim ol samting i kamap. Ol brata i wok strong inap tupela yia na ol i skruim haus brens long London i go bikpela na nau ol i laik dediketim.
Nupela hap bilong dispela haus i gat 41 rum slip long en, olgeta wan wan rum em inap long tupela i slip long en. Nau long haus brens long London i gat rum slip bilong 204 manmeri. Ol i wokim haus kuk na haus kaikai tu i go bikpela na ol i kisim ol nupela samting bilong wokim kaikai. Ol i wokim nupela hap bilong wasim laplap na samap na i gat gutpela ples bilong sindaun na malolo tu. Haus brens i gat laibreri na i gat 2,300 buk long en, tasol long namba wan plua bilong dispela nupela hap ol i putim narapela liklik rum buk na ol brata bilong Betel i amamas long dispela.
Ol i Dediketim Haus
Long 10 klok moningtaim ol i kirapim program. Pastaim wanpela brata i stori long wok bilong ol Witnes long Englan inap 100 yia pinis. Ol i stori long sampela samting i bin kamap em i pani na ol brata i harim na ol i lap. Ol yangpela long Betel i amamas long harim kain stori olsem.
Bihain Karl Klein i mekim wanpela tok, nem bilong en: “Stap Gut long Wok Kristen.” Em i kolim tok bilong Provep 2:8 na em i tok, taim traim i painim ol gutpela wokman bilong God, God i save givim strong long ol na helpim ol. Em i tok, “Ol samting i no gat laip ol inap litimapim nem bilong God, tasol ol manmeri i gat tingting, ol tasol inap i stap gut long God.”
Carey Barber i stap longtaim long tok i tru na em i stori long Jehova i bin kisim wanpela lain bilong holim nem bilong Em nau long “las taim.” Em i tok, wok bilong autim tok i stap yet. Yumi gat bikpela wok yumi mas mekim. “Kirap long yia 1919 lain bilong Jehova i insait long bikpela wok tru bilong autim tok, winim olgeta taim bipo!”
Brata Fred Franz i mekim laspela tok bilong moningtaim, em tok bilong dediketim dispela haus. Em i stori long Brata Charles T. Russell, em ol tumbuna bilong em i bilong Skotlan na Ailan, em i kamapim namba wan brens-ofis bilong Sosaiti long London. Kirap long taim dispela ofis i op long 1900 inap long nau dispela ofis i bin wok gut wantaim namba wan ofis bilong Sosaiti long Bruklin, Nu Yok, na em bai stap gut yet long wok bilong God Jehova, olsem na ol i dediketim long Jehova.
Long belo bek, pastaim Brata Lyman Swingle i mekim tok. Em i tok, oltaim yumi mas was gut na mekim ol samting bilong litimapim nem bilong Jehova. Em i tok: “Olsem wanem? Yumi tromoi nating taim na strong na save bilong yumi long ol samting i liklik samting nating na i no litimapim nem bilong God Jehova?” Bihain Theodore Jaracz i mekim wanpela tok, nem bilong en: “Mekim Ol Samting Bilong Helpim Yu long Bihain.” Em i tok piksa long nupela haus ol i bin wokim na em i tok bilip bilong yumi tu i olsem haus na yumi mas wokim gut na sanapim strong bambai yumi inap holimpas ol lo Kristen.
Bihain Brata Franz i mekim laspela tok na Brata John Booth i mekim beten. Dispela bung bilong tupela de i pinis.
Strongim Ol Bilong Mekim Bikpela Wok Moa
Ol i go lukim nupela haus ol brata i bin skruim long olpela haus brens na ol i harim tok olsem pastaim ol i tingting long kontrak wantaim wanpela bisnis na bai dispela kampani i wokim dispela nupela haus. Ol i bin mekim olsem long 1958 taim ol i wokim haus brens long pastaim. Tasol ol brata i toktok wantaim Lain Bilong Bosim Ol Witnes na ol i senisim tingting. Ol i pilim olsem ol yet ol inap mekim dispela wok. Ol i singautim 1,000 samting Witnes bilong ol narapela narapela hap bilong Englan long i kam helpim dispela wok.
Ol i wokim sampela ples slip bilong ol na sampela ol i slip long haus bilong ol i stap klostu long haus brens (insait 10-pela mail). Ol i stretim rot olsem na 70-100 brata ol inap wok wantaim. Maski bikpela kol na bikpela ren, tasol ol inapim pinis dispela wok long taim ol i bin makim. Ol i wokim nupela haus na ol i stretim tu olpela haus, olsem penim samting.
Taim ol brata i raun lukim olpela na nupela hap bilong haus brens, ol i lukim olgeta samting i stap gutpela. Banis bilong haus tu i gutpela na i gat ol plaua. Ol 147 brata sista i wok long Betel i amamas ol dispela brata sista i kam bung wantaim ol na lukim dispela gutpela haus brens. Wanpela i tok: ‘Em gutpela taim tru!’ Ol i amamas long wanem planti lapun brata sista i kam, em ol i bin i stap gut long wok bilong Jehova inap planti yia. Na ol i amamas long wanem planti memba bilong Lain Bilong Bosim Ol Witnes i kam, inap 13 olgeta. Ol i amamas long harim ol gutpela tok ol dispela brata i mekim.
Dispela bung bilong tupela de bai helpim wok bilong Kingdom long Englan. Ol brata bilong Englan i wok long sanapim sampela haus moa. Ol i bin wokim kwik wanpela Haus Kingdom insait long tupela o tripela de samting na ol i tingting long wokim 15 moa olsem. Na ol i stretim rot bilong sanapim tupela haus kibung moa. Wok bilong Kingdom long Englan i kamap bikpela. Lain pablisa i go bikpela na nau i gat 92,000 ol i autim tok bilong Kingdom long Englan. Yumi amamas, long wanem lain bilong Jehova long olgeta hap bilong graun ol i wok strong long mekim dispela wok God i bin givim long yumi, em wok bilong autim tok. Ol bai mekim i go yet inap long taim dispela pasin bilong nau i pinis.—Matyu 24:14.
[Piksa long pes 9]
Oktoba 1,1983, De Montfort Hall, Leicester
Oktoba 2, 1983, Watch tower House, Mill Hill, London
[Piksa long pes 11]
Winim 3,000 brata sista bilong ol narapela narapela hap ol i pulap long haus bung (De Montfort Hall) bilong mekim miting bilong Sosaiti Was Taua long Oktoba 1, 1983
[Piksa long pes 12]
Albert Schroeder i toktok wantaim sampela brata i bin i stap longtaim long tok i tru
[Piksa long pes 14]
BRENS-OFIS BILONG SOSAITI WAS TAUA LONG LONDON, ENGLAN
Olpela haus i gat raunpela rot i stap paslain long en, em ol i bin wokim long 1958. Nupela hap ol i bin skruim long olpela haus, em rup bilong en i no tudak na i stap long han kais. Nau inap 204 brata sista inap i stap long dispela haus brens na mekim wok