Ol Spen i Mekim Wanpela Samting Ol i Ting Ol i No Inap Mekim

OL WITNES BILONG JEHOVA i kirap autim tok long Spen long yia 1919. Tasol long 1936, pait i kamap namel long ol man bilong Spen na klostu wok bilong ol Witnes i pinis long dispela hap. Gavman i kisim liklik brens-ofis bilong Sosaiti Was Taua long Madrid, na ol i kisim ol masin Sosaiti i mekim wok long en bilong wokim ol buk samting. Ol painia bilong ol narapela hap ol i autim tok long Spen ol i mas ranawe, nogut ol i kalabus. Long kirap bilong yia 1939, Janeral Franko i winim pait. Em i wanpela Katolik na em i bosim strong olgeta samting long Spen. Gavman bilong em i orait long wanpela lotu tasol, em Lotu Katolik. Olsem na ating ol Witnes Bilong Jehova inap kamap strong gen long Spen o nogat?

Long dispela taim ol liklik lain Witnes stap long ol narapela narapela hap long Spen, ol i pilim olsem bai ol i no Inap. Inap 34 yia ol i wok hait, tasol long 1970, gavman bilong Spen i orait long ol Witnes Bilong Jehova i mekim wok long Ol i painim wanpela liklik haus long Baselona, na dispela haus i kamap ofis na haus Betel bilong ol. Inap 12-pela brata sista i wok long Betel dispela taim. Ol i stretim dispela haus long 1972, Brata N. H. Knorr (em i presiden bilong Sosaiti Was Taua long dispela taim) em i dediketim dispela haus. Long 1972, inap olsem 15,668 pablisa i save autim tok long olgeta mun long Spen. Tasol fopela yia bihain, dispela lain i go bikpela inap dabol, na winim 36,000 ol i autim tok! Haus Betel long Baselona i liklik tumas, na ol i no inap mekim wok bilong helpim ol dispela pablisa. Tasol ol bai painim we bikpela haus inap long ol?

Ol i hatwok long painim graun, long wanem gavman i putim lo na makim sampela hap graun bilong wokim haus na sampela hap graun bilong putim woksop o haus faktori samting. I hatwok long painim hap graun bilong mekim tupela wok wantaim. Ol brata i laik painim wanpela hap graun bilong wokim faktori na haus slip tu bilong ol brata i wok long faktori na ofis. Ol i painim painim long olgeta hap bilong Spen. Ol i laik painim wanpela hap graun o wanpela haus ol inap mekim wok long en inap longtaim. Tasol planti mun na yia i kamap i go pinis na ol i no painim wanpela hap graun o wanpela haus.

Tasol long 1980 ol i painim pinis wanpela haus faktori. Em i bikpela haus na i stap klostu long taun Ajalvir, em longwe long Madrid inap 24 kilomita. Dispela haus faktori em i nupela na ol i no pinisim yet na kaunsil i orait long Sosaiti i ken kisim dispela haus na wokim i kamap haus faktori na haus slip. Tasol i gat wanpela bikpela hevi—bai ol brata i kisim mani we?

Ol Brata Bai Helpim Ol?

Winim 30 yia Sosaiti Was Taua bilong Pensilvenia, long Amerika, i bin givim mani bilong helpim ol brata long Spen long autim tok na ol i no bin askim ol brata long bekim dispela mani. Tasol nau Sosaiti i skruim namba wan ofis long Amerika i go bikpela na ol i bin tromoi bikpela mani, olsem na ol i no inap helpim ol brata long Spen. Sapos ol brata long Spen i laik wokim nupela Brens-ofis, orait ol yet i mas painim mani bilong wokim. Em bikpela hatwok tru winim ol narapela samting i bin givim hatwok long ol long bipo. Ol brata long Spen i pilim olsem bai ol i no inap mekim dispela samting. Ol i no save kisim bikpela pe long wok mani bilong ol, olsem na bai ol inap kisim mani we bilong helpim dispela wok?

Ating yu tingim ol samting i bin kamap long taim bilong Moses, taim Jehova i tokim ol Isrel long wokim wanpela haus lotu bilong Em. Moses i bin tokim ol Isrel olsem: Jehova i tok: “Nau yupela mas givim sampela samting long em. Olgeta manmeri i laik givim ol samting long em, ol i mas bringim…ol samting bilong God.” Long laik bilong ol yet ol i givim gol na silva na ston i dia tumas na planti narapela samting tu. (Eksodas 35:5-9) Na ol brata i givim wankain tok long ol brata sista i stap long ol 751 kongrigesen long Spen. Na taim ol i mekim ol kibung distrik long Spen long 1980, ol i givim wankain tok long ol brata sista. Wanem samting i bin kamap?

Taim kibung i pinis, planti brata sista i kam givim ol ston i dia tumas na ol ring gol na silva na ol paspas bilong han. Ol i laik bai ol brata i baim i go na kisim mani bilong wokim nupela Brens-ofis. Long wanpela kibung long San Sebastian, wanpela lapun sista i kam givim wanpela paspas gol i dia tumas. Brata i askim tru em i laik givim dispela samting na sista i tok: “Brata, taim dispela paspas stap long han bilong mi em i no inap mekim gutpela wok. Tasol sapos em i ol brata long wokim nupela haus brens bai em i mekim gutpela wok.”

Yangpela man na meri, tupela i bin bungim sampela mani bambai tupela i ken raun lukim ol narapela hap taim ol i marit, ol i givim dispela mani long ol brata. Wanpela lapun sista i kisim planti mani i kam em i bin haitim aninit long plua long haus bilong em inap planti yia.

Insait long sampela wik, ol man na meri, ol yangpela na lapun, ol maniman na rabisman, bel bilong ol i kirapim ol na ol i givim mani samting bambai ol brata sista long Spen inap kisim nupela Brens-ofis. Ol painia spesel, em ol i save kisim liklik mani tasol long olgeta mun, ol tu i bin givim sampela mani bilong helpim dispela wok. Tupela marit, ol i bin bungim mani bilong baim balus i go raun long Amerika, tupela i givim dispela mani bilong helpim dispela wok. Ol pikinini tu i bin salim mani i kam long brens-ofis. Wanpela pikinini i gat 10-pela krismas em i raitim pas na i tok: “Mi namba wan bilong 5-pela pikinini long famili bilong mipela, na mipela harim tok long salim mani bilong helpim wok bilong nupela Betel. Olsem na mipela laik salim dispela liklik mani em mipela i bin bungim. Em liklik mani, tasol ating yupela inap mekim wok long en na baim sampela samting.”

Na ol yangpela i bin mekim sampela wok bambai ol inap kisim mani bilong salim i go long Sosaiti. Sampela i wokim ol liklik doli na baim i go long narapela man. Wanpela yangpela i go long somil na bungim ol pipia bilong plang, na baim i go long man. Na narapela yangpela em i bin bungim mani bilong baim wanpela gita, em i givim dispela mani long Sosaiti bilong helpim wok bilong nupela Brens-ofis.

Ol Narapela Hatwok

Ol brata long Spen i givim planti samting, olsem na dispela samting pastaim ol i ting ol i no inap mekim, nau ol inap mekim. Ol i baim dispela haus faktori long Oktoba 1980. Tasol i gat sampela hatwok moa i kamap. Ol i mas pinisim wok bilong wokim dispela haus na stretim sampela samting long en. Ol i mas wokim haus slip bilong ol brata i kam wok. Ol i mas painim ol volantia bilong mekim dispela wok. I mas i gat sampela brata ol i gat save long wokim plan bilong haus, na bosim wok bilong sanapim haus na mekim wok kamda na plama na bilong putim paua samting. Pastaim ol i pilim olsem bai ol i no inap long ol dispela wok. Tasol ol i tingim Moses long taim bilong wokim haus lotu sel bilong Jehova na ol i salim tok long ol brata olsem: “Olgeta man namel long yupela ol i save pinis long wokim ol samting, i mas i kam na wokim olgeta samting Bikpela i bin tok long yupela i mas wokim.” (Eksodas 35:10) Ol i singautim tu ol brata bilong i kam wokim haus Betel.

Wanpela brata i mekim wok painia spesel, em i wanpela ensinia, em wantaim meri pikinini bilong em ol i kam na brata i mekim wok inap sampela yia. Wanpela brata long Madrid, em i gat save long wok em i tok em bai kam na skelim haus, ol i wokim gut o nogat. Wanpela akitek long Baselona, em i no wanpela Witnes, em i harim tok long dispela bikpela wok ol brata i laik mekim, na em i tok em i laik i kam helpim dispela wok long Sarere Sande. Tasol i no gat planti brata long Spen, em ol i gat save long mekim ol dispela wok. Tasol sampela Witnes long ol narapela hap, em ol i gat save long ol dispela wok, ol i tok ol i laik i kam helpim ol brata long Spen. Ol i kam long Grik na Jemani na Swiden na Englan na Amerika na sampela kantri moa.

Tru, i mas i gat ol brata i gat save long wok, tasol i mas i gat planti handet narapela brata tu, em ol i wok leba long han bilong ol na mekim ol wok bilong kukim kaikai na wasim laplap na klinim haus. Olsem wanem? Sampela brata sista i volantia bilong mekim ol dispela wok? Ol i bihainim pasin bilong ol Isrel long bipo, na bel bilong ol i kirapim ol na ol i kam mekim wok.—Eksodas 35:20-35.

Dispela wok i kisim 3-pela yia na insait long dispela hap taim planti tausen Witnes bilong olgeta hap bilong Spen ol i kam helpim dispela wok. Sampela i kam mekim wok long Sarere Sande tasol, na sampela i kam mekim wok taim ol i lip, na sampela i kam mekim wok i go inap long dispela wok i pinis. Ol samting ol i bin mekim na gutpela pasim bilong ol i litimapim nem bilong Jehova. Bilong wanem mipela tok olsem? Long wanem, taim ol i baim dispela haus faktori, papa bilong dispela haus i wok bisnis yet long tupela hap bilong en inap tenpela mun na ol Witnes i mekim wok long ol narapela hap bilong en. Ol papa bilong dispela haus ol i lukim gutpela pasin bilong ol brata, em ol i givim bel tru long mekim dispela wok, na ol i tok, sapos bihain ol i laik kisim sampela man bilong wok long kampani bilong ol, bai ol i kisim ol Witnes tasol! Na ol i bihainim dispela tok promis bilong ol!

Ol Samting Ol i Ting Ol i No Inap Mekim Em Ol i Mekim Pinis

Long 1982, ol i makim de bilong pinisim wok long nupela Betel. Ol i makim Oktoba 9, 1983. Ol mun i kamap i go pinis kwiktaim tru na ol brata i ting bai ol i no inap pinisim dispela wok long taim stret olsem ol i bin makim. Ol i wokim pinis ol haus, olsem haus faktori na haus ofis na haus slip, tasol i gat planti liklik samting ol i mas wokim insait long ol dispela haus bilong pinisim dispela wok. Long Sarere, Oktoba 8, ol brata i wok i go inap biknait bambai ol inap stretim gut plua na glas long rup insait long nambawan rum man i go insait long en. Tasol long Oktoba 9, long moningtaim, em de ol i bin makim bilong dediketim dispela haus, olgeta wok i pinis. Dispela gutpela haus Betel i sanap i stap antap long liklik maunten namel long ol gutpela plaua ol i bin planim long banis bilong en.

Planti handet manmeri bilong olgeta hap bilong Spen na ol narapela kantri tu ol i kam lukim dispela nupela haus Betel na ol i kirap nogut tru. Ol Witnes i bin mekim wok hait inap planti yia, na long 1970 tasol gavman i orait long ol, nau 13 yia bihain ol i gat wanpela gutpela Brens-ofis bilong ol! Yumi save, tok Jehova i mekim long maus bilong profet Aisaia i stret tru, em i tok: “Man nating em bai kamap planti olsem wan tausen, na man i liklik em bai kamap olsem wanpela bikpela lain. Mi Jehova, mi yet bai mi hariapim dispela wok long taim stret bilong en.”—Aisaia 60:22, NW.

Program i kirap, na ol brata i bin i stap long Spen taim hevi i painim ol long 1930 na ol misineri i bin i stap long Spen long bipo, ol i stori long sampela ekspiriens bilong ol. Bihain F. W. Franz, em presiden bilong Sosaiti Was Taua, em i mekim wanpela tok long dediket. Inap 956 brata sista stap long nupela Betel na harim dispela tok, na winim 62,000 brata sista moa i stap long 12-pela stediam long ol narapela hap bilong Spen na harim dispela tok long rot bilong telefon. Ol dispela brata sista ol i bin givim mani samting na mekim ol wok bilong helpim wok bilong sanapim dispela nupela Betel. Inap planti yia ol i bin mekim bikpela wok, tasol ol i save tingim tok bilong saveman King Solomon, em i tok: “Sapos Bikpela i no wokim haus, ol kamda i wok nating.” (Sam 127:1) Jehova i blesim wok bilong ol na ol inap mekim dispela samting, em pastaim ol i pilim olsem bai ol i no inap mekim.

[Piksa long pes 10]

Piksa bilong haus Betel long Spen

[Piksa long pes 11]

Em namba wan Kirap! long tok Spen ol i wokim long dispela masin