Wok Bilong Kingdom i Go Bikpela Long Denmak
LONG 1891 presiden bilong Sosaiti Was Taua, em C. T. Russell, em i go long Denmak. Em i lukim rot i op bilong autim gutpela tok bilong Kingdom bilong God long dispela hap. Olsem na long 1894 ol i salim wanpela brata bilong Amerika i go long Denmak. Ol tumbuna bilong em i bilong Denmak. Kirap long 1897 ol i wokim Wastaua olsem wanpela liklik buklet, na kirap long 1900 ol i wokim nius Wastaua long tok Denmak. Brata Russell i go long Denmak na nau 93 yia i lus pinis. Insait long dispela hap taim wok bilong autim tok bilong Kingdom i go bikpela long Denmak. Long nau i gat 14,000 samting manmeri ol i autim tok bilong Kingdom bilong God long dispela hap.
Long 1957 Sosaiti i wokim wanpela brens-ofis long Virum, klostu liklik long Kopenhagen, long hap bilong not. Dispela haus i gat rum slip inap long 40 manmeri na wanpela haus faktori. Kirap long dispela taim brens i wokim ol magasin bilong ol yet. Tasol wok i go bikpela na bihain dispela haus brens na faktori i liklik tumas. Olsem na long 1978 samting ol i kirap long tingting long wokim nupela brens-ofis i bikpela liklik. Ol i laik wokim long wanpela hap graun long Holbaek, em wanpela liklik taun i stap longwe long Kopenhagen inap 64 kilomita, long hap bilong san i go daun. Ol plua bilong dispela nupela haus bai bikpela tru, inap olsem 14,000 skwea mita. Na ol bai wokim olsem wanem? Ol Witnes Bilong Jehova yet bai wokim. Wanpela man long ofis bilong saveya (surveyor) em i harim tok olsem ol Witnes yet i laik wokim na em i tingting planti. Em i tok gutpela sapos ol i no ken mekim, tasol ol i tok ol bai mekim.
Taim dispela wok i kirap i gat sampela Witnes bilong mekim olgeta wok bilong sanapim dispela nupela haus brens, olsem ol akitek na ensinia na saveya na teknisan na draftsman na supavaisa na ol man i gat save tru long wokim haus, na sampela man bilong wok leba nating na draiva na kuskus na sampela ol inap kukim kaikai, na planti man na meri ol i laik helpim dispela wok, olgeta ol i kam. Ol dispela manmeri i kain kain, tasol olgeta wantaim i laikim tumas God na wok bilong Em.
Long olgeta de i gat inap olsem 200 samting ol i wok i stap. Na ol i wok i go inap 100 wik. Ol i no malolo long Sande o long taim bilong holide. Ol i wokim ol dispela nupela haus long taim bilong kol na sampela taim i kol nogut tru na i gat ais. Ol brata i wok long olgeta de na ol brata i kam helpim ol long Sarere Sande, olgeta i wok strong na insait long liklik hap taim tasol ol i sanapim ol dispela haus. Dispela wok i pinis long Me 20, 1983.
Ol i Go Lukim
Ol i makim Me 19 bilong singautim ol man bilong gavman na ol manmeri i stap klostu na ol bisnisman i kam lukim ol dispela nupela haus. Nambawan kaunsil, olsem meya, em i kam wantaim sampela hetman moa bilong dispela taun. Inap olsem 125 manmeri ol i kam lukim dispela haus, na ol brata inap autim tok long ol na tokim ol long ol wok ol bai mekim long ol dispela nupela haus, na tokim ol ol Witnes bilong Denmak ol i bin givim mani bilong mekim dispela wok na ol wanlotu bilong ol long Denmak na Swiden na Netelan ol i bin givim dinau long ol bilong helpim ol long wokim.
Taim ol i raun lukim ol dispela nupela haus ol saveman bilong dipatmen bilong bilding ol i tok, ol brata i bin kisim ol gutpela samting bilong wokim ol dispela haus na ol i wokim gut tru. Na dispela man bilong ofis bilong saveya, em pastaim em i tingting planti, nau em i lap na em i tok: ‘Bipo mi no save yupela i wanem kain lain!’ Ol i givim ti na kofi samting long ol dispela manmeri i kam lukim ol dispela haus, na ol i givim presen long olgeta wan wan, em sampela buk bilong Sosaiti.
Na ol i tok ol narapela manmeri tu i ken i kam lukim sapos ol i laik na 75 ol i kam. Ol i kisim ol dispela manmeri i go raun lukim ol dispela haus, na ol inap autim tok long ol. Dispela samting i litimapim nem bilong Jehova.
Ol i Dediketim Haus
Me 21, 1983 em i de bilong dediketim ol dispela haus. Ol brata i bin wokim ol dispela nupela haus, ol konstraksen, wantaim ol brata sista i wok long Betel, na ol kongrigesen i stap klostu, ol i kam bung. Na ol i singautim tu 90 brata sista ol i bin i stap longtaim long tok i tru. I gat sampela brata sista bilong ol 240 kongrigesen long Denmak na Grinlan na Ol Ailan Fero. Ol i singautim 700 manmeri olgeta i kam long taim bilong dediketim ol dispela haus. Ol i amamas na ol i kam bung. Wanpela brata bilong Lain Bilong Bosim Ol Witnes, em Brata Daniel Sydlik, em i lusim Bruklin long Amerika na em i kam mekim tok bilong dediketim ol dispela haus.
Taim em i mekim dispela tok, planti taim em i kolim tok bilong 2 Samuel 24:21-24, NW. Ol dispela ves i stori long wanpela man i laik givim nating wanpela hap graun na paiawut na ol bulmakau long King Devit bambai Devit i mekim ofa, tasol Devit i no laik kisim nating. Em i tok: “Mi no ken kisim nating wanpela samting i no kamap long hatwok bilong mi yet na givim long Bikpela olsem ofa. Olsem na mi mas baim ol dispela samting bilong yu.” As bilong dispela tok i olsem: Ofa yumi mekim long God i mas kamap long hatwok bilong yumi yet. Na tru tumas, ol brata i insait long wok bilong sanapim dispela nupela haus brens ol i bin hatwok. Ol i bin givim bikpela hap taim na strong bilong ol bilong mekim dispela wok, na sampela ol i bin lusim haus bilong ol o wok mani bilong ol o bisnis bilong ol bambai ol inap insait long dispela wok. Ol i no tingim sindaun bilong ol taim ol i mekim dispela wok.
Ol dispela brata i hatwok pinis na nau ol i laik givim ol dispela haus long Jehova olsem ofa. Taim ol i dediketim ol dispela haus, ol i givim long Jehova long mekim wok bilong em. Ol dispela haus i bilong God Jehova. Ol i beten wantaim na ol i amamas long givim ol dispela haus long Jehova. Hatwok bilong ol i kamapim ol dispela haus na nau ol i givim long Jehova olsem ofa.
Long apinun ol i kaikai wantaim na harim sampela tok na sampela gutpela musik. Na bihain, olsem ol Isrel taim ol i dediketim haus lotu bilong Solomon, ol i go bek long haus na “ol i amamas tru, long wanem, ol i tingting long olgeta gutpela samting Bikpela i bin mekim.”—1 King 8:66.
Ol dispela nupela haus bai helpim tru ol brata long Denmak, na bai wok bilong autim tok bilong Kingdom long hap bilong Denmak i go bikpela moa.
[Piksa long pes 29]
Rum buk long Betel (laibreri)
Ples bilong wokim ol buk
[Piksa long pes 30]
Tok bilong dediketim haus i kirapim ol brata sista long mekim bikpela hatwok long wok bilong Jehova