Wanem Samting i Nambawan Bikpela Samting Long Tingting Bilong Yu?
EM I wanpela maniman tru. Em i gat bikpela mani tru, winim olgeta narapela man. Planti man i litimapim nem bilong em, long wanem ol i ting wok bilong em i kamap gutpela. Tasol tupela yia paslain long taim em i dai, dispela maniman, em J. Paul Getty, em i tok: ‘Mani i no as bilong amamas. Em inap givim bikpela hevi long man.’
Long tingting bilong planti man, mani em i nambawan bikpela samting. Dispela maniman em i bin mekim bikpela wok bisnis na em i bungim bikpela mani tru, tasol yu ting em i tingim dispela em i rot bilong i stap amamas? Nogat, a? Yumi tingim dispela tok em i bin mekim na yumi save em i wok strong long kisim mani, tasol em i save dispela samting i no bikpela samting tru; i no as bilong amamas.
Samting Ol i Tingting long En, na Samting Tru i Kamap
Olsem wanem long yu? Wanem samting i nambawan bikpela samting long tingting bilong yu? Sampela man i tok, ol i laik i stap fri, em nambawan bikpela samting. Na sampela i tok, ol i laik bai wok bilong ol i kamap gutpela. Na sampela i tok, ol i laik bai ol i ken i stap belgut na amamas, em nambawan bikpela samting.
Tasol sapos yumi skelim ol samting planti manmeri i mekim, ol dispela samting i kamapim long ples klia olsem ol i save tingim mani na amamas bilong bodi i nambawan bikpela samting. Ol i tingting strong long kisim planti samting, olsem bikpela mani kago, o bel bilong ol i skirap long painim amamas, olsem na ol i no tingim tumas famili bilong ol o skin bilong ol o ol samting bilong spirit. Na Baibel i tok profet pinis olsem long “las taim” bai ol manmeri “i laikim ol yet tasol, na bai ol i laikim tumas mani,” na bai “ol i laikim tumas kain kain amamas bilong bodi, na ol i no laikim God.”—2 Timoti 3:1, 2, 4.
Samting i Bikpela Samting Moa
Krais Jisas, em i as bilong lotu Kristen, em i kamapim wanpela askim i kirapim tingting bilong ol man, em i tok: “Sapos wanpela man i kisim olgeta samting bilong graun, tasol laip bilong em yet i lus, bai olgeta samting i helpim em olsem wanem?” (Mak 8:36) Tingim dispela askim. Sapos yumi no gat laip, yumi no inap mekim wanpela samting, a?—Eklisiastis 9:5, 10.
Ating yu stap yangpela yet na yu ting yu gat bikpela hap taim bilong mekim ol samting yu laik mekim. Tasol tru yu gat bikpela hap taim? Wantu tasol pait inap kamap o raskol o sik o birua inap painim yu na bai yu dai. Kain samting olsem i bin bagarapim planti man na meri long taim ol i no tingim. Ol i dai pinis na olsem wanem long ol samting ol i bin tingting long mekim?
Ating yu marit na yu gat pikinini o yu lapun. Olsem na yu pilim olsem yu mas givim olgeta hap taim na strong bilong yu long bungim mani samting bambai yu wantaim famili bilong yu inap i stap gutpela long nau na long bihain. Ating em nambawan tingting bilong yu. Tasol pe bilong ol samting i save go antap na mani ol man i bin bungim long beng i no gat strong moa. O planti wok bisnis i bagarap na ol man i no gat wok moa na ol i stap rabis na i no gat haus. Na kain kain samting nogut i save kamap long graun, olsem na wanpela samting inap kamap wantu tasol na pinisim olgeta samting yu bin wok strong long kisim.
Olsem na ating yu save yu mas skelim gut ol samting yu tingting long mekim. Orait, wanem samting i nambawan samting tru long tingting bilong yu?