Lotu na Gavman Bai Poroman Inap Oltaim?
WANPELA TAIM king bilong Rasia, em Vladimir Namba 1 em i kisim tingting olsem olgeta lain haiden bilong em ol i mas kamap “Kristen.” Em yet i bin lusim lotu haiden na kamap “Kristen” long 987 C.E. taim em i maritim wanpela meri bilong lotu Grik Otodoks. Nau em i putim tok long olgeta manmeri i stap long kantri bilong em ol i mas kisim baptais—sapos nogat bai ol i kilim ol i dai long bainat. Isi isi Sios bilong Rasia em i bruk long “mama” bilong en, em Sios bilong Grik, na gavman i kirap long bosim dispela lotu. Gavman bilong Rasia long nau i tok ol i no bilip long God, tasol Gavman na Lotu i poroman yet wantaim maski ol i no wanbel tumas.
Planti handet yia bihain King Henri Namba 8 bilong Englan em i mekim sampela samting na Lotu na Gavman long Englan i pas wantaim. Long yia 1532 King Henri i tingting planti, long wanem, meri bilong em Katarin bilong Aragon em i no bin karim wanpela pikinini man bilong kamap king taim Henri i dai. Bilong stretim dispela samting, long pasin hait Henri i maritim An Bolin. Asbisop bilong Kanteberi i helpim dispela pasin nogut Henri i mekim—em i pinisim namba wan marit bilong Henri. Long 1534 dispela king, em i hatpela man na man bilong bagarapim marit, em i putim em yet i stap het bilong Sios bilong Englan (em Misin Angliken). Kirap long dispela taim bipo na i kam inap long nau, ol king na kwin bilong Englan i stap het bilong Sios. Ol tok Sios i pasim, em gavman i mas orait long en; ol bisop bilong Sios bilong Englan ol i wanpela hap lain bilong gavman (House of Lords) na ol i gat wok long bosim Englan. Long dispela rot, long Englan, Lotu na Gavman i pas wantaim o ‘marit,’ winim 450 yia pinis.
Ol Lotu na Gavman i Pas Wantaim long Nau
Long 1936 sampela man long Spen i kirapim pait bilong daunim gavman Ripablik; ol Spen yet i pait na Jeneral Franko i kamap gavman. Sampela man i tingting planti, long wanem Franko i givim bikpela strong na namba long ol pris. Tasol Franko i laik mekim gut long ol pris long wanem ol i bin wok strong long helpim em i kamap gavman.
Long 1983 Kaunsil Bilong Ol Misin long Olgeta Hap i bung long Vankuva, long Kanada. Long dispela taim Jeneral-Sekreteri bilong dispela Kaunsil, em Philip Potter, em i tokim ol, ol i mas insait yet long ol wok politik. Lain bilong planti misin ol i tingting planti, long wanem dispela Kaunsil i save givim mani bilong helpim ol lain politik i pait wantaim ol gavman.
Tru tumas, lotu i save insait long ol wok politik. Tasol bikpela askim em olsem: I stret lotu i mekim olsem o nogat? Taim lotu i insait long wok politik, yu ting dispela i helpim ol lain politik long mekim pasin i stret, o i bagarapim pasin bilong ol lotu? Na olsem wanem long bihain? Lotu na Gavman bai ‘pren’ yet wantaim o bihain bai ol i birua na pait?
[Piksa long pes 3]
Namba wan het bilong Sios bilong Englan