Save Bilong God—Yu Lukim
TINGIM wanpela haus king bilong bipo. Lukim! King i sindaun i stap. Em i pasim bilas bilong king na em i sindaun long gutpela sia king bilong em. Dispela king i gat nem olsem man i gat planti samting na man i gat bikpela save. Ol wokboi bilong em tu i stap; em i bosim gut ol. Yumi kirap nogut long ol dispela gutpela samting yumi lukim. Yes, lukim King Solomon!—1 King 10:1-9, 18-20.
Orait, nau yumi ken tingim tok bilong Krais Jisas, em Bikpela Tisa, em i tok: “Bilong wanem yupela i tingting tumas long klos samting? Yupela lukim ol plaua long gaden, ol i kamap olsem wanem. Ol i no save hatwok. Ol i no save wokim laplap. Tasol mi tokim yupela: Bipo Solomon i putim olgeta bilas bilong en, tasol em i no gat gutpela bilas olsem dispela plaua.”—Matyu 6:28, 29.
Wanem insait bilong dispela tok bilong Jisas? Tru, em i givim dispela tok long yumi olsem tok piksa bambai yumi no ken tingting tumas long ol samting bilong skin. Tasol em i no tok piksa tasol. Taim Jisas i mekim tok piksa, planti taim em i stori long samting tru i save kamap. Olsem na ating em i stori long samting tru bilong Solomon. Olsem: Bilas bilong Solomon i gutpela, long wanem ol man i wokim ol i gat save na ol i wokim gut, tasol Solomon i no gat gutpela bilas olsem “ol plaua long gaden.” Kala na mak bilong ol plaua i stap long gaden i gutpela tru bilong lukim.
Save Bilong Jehova i Kamap Ples Klia
Sapos yu lukim nating tasol ol plaua, ating bai yu wanbel wantaim tok bilong Jisas. Yumi no save wanem kain plaua Jisas i tingim na em i mekim dispela tok, tasol long olgeta hap bilong graun i gat kain kain plaua i stap. Lukim gut wanpela plaua—wanpela okit o hibiskit. Lukim gutpela kala bilong en na mak bilong ol liklik hap bilong en. Yu lukim gutpela save na tingting bilong Bikpela Man em i bin tingim na wokim dispela gutpela samting? Ai bilong yumi i amamas long lukim ol plaua na nus bilong yumi i amamas long harim gutpela smel bilong ol plaua.
Aposel Pol i tok, “Bipo tru God [Jehova] i wokim olgeta samting, long dispela taim na i kam inap long nau, ol man ol i lukim samting em i bin wokim. Long dispela ol inap save long sampela pasin bilong God ol man i no inap lukim.” (Rom 1:20) God i wokim ol plaua bilong bilasim graun, na em i wokim tu kain kain purpur na ol diwai i gat grinpela lip ol i pulap long graun. Sapos yu inap i go long Kalifonia, long Amerika, long wanpela hap bus ol i kolim Hambol Nesenel Fores, bai yu lukim wanpela draipela diwai i stap, em diwai retwut. Ol man i ting dispela diwai i go antap moa winim olgeta narapela diwai long olgeta hap bilong graun. Sapos yu inap sanap aninit long dispela diwai na lukluk i go antap long het bilong en, i go antap winim 110 mita, long bel bilong yu bai yu litimapim nem bilong dispela Man em i gat save inap long wokim kain diwai olsem, a?
Hap Save i Stap long Skin Bilong Ol Animal
Long graun na long solwara i gat ol animal i stap, sampela i liklik na sampela i bikpela tru, em ol i kamapim long ples klia save bilong God. Olgeta wan wan i gat wok bilong en; God i givim dispela wok long en. Saveman King Solomon i tok: “Yupela ol lesman, mi gat tok long yupela olsem. Yupela i go lukim gut pasin bilong ol anis na bai yupela kamap saveman.” (Provep 6:6) Ol man i bin lukim gut pasin bilong anis ol i kirap nogut long pasin bilong ol long wok gut wantaim. Ol anis i no save stap wanpela tasol; nogat; ol i save bung wantaim, olsem wanpela lain. Sampela ol i mekim wok olsem fama na ol i bungim ol pikinini kaikai. Long ol ples hat yu inap lukim sampela anis i wok strong long brukbrukim lip na karim ol liklik hap bilong en i go long haus bilong ol. Olsem wanem ol i gat save long mekim dispela wok? Agur, em wanpela man i bin raitim sampela tok bilong Ol Provep, em i tok ol anis “i gat gutpela tingting tru.” Ol i kisim we dispela save o gutpela tingting? Jehova, em i Man bilong wokim heven na graun, em i givim long o1.—Provep 30:24, 25.
Yes, hap save God yet i putim long skin bilong ol animal, dispela i bosim ol samting ol i mekim. Yumi inap lukim dispela samting long pasin bilong ol pisin, em ol i save lusim ples long taim bilong kol na i go long ples hat. I gat wanpela kain pisin ol i kolim Kapistrano-swalo. Long wankain taim long olgeta yia, ol dispela pisin i save lusim hap bilong Saut Amerika, ol i bin i go long en long taim bilong kol, na ol i flai inap planti tausen mail i go bek long Kalifonia, long Amerika, long wanpela tesen bilong misin, ol i kolim San Yuan Kapistrano. Hap save i stap long skin bilong ol i soim rot long ol na ol i no popaia liklik. Long olgeta yia, long wankain taim, olsem long mun Mas, ol i kam bek long dispela ples.
Na olsem wanem long biksolwara? Man bilong raitim sam em i tok: “Bikpela, yu bin wokim planti samting. Yu gat bikpela save na yu wokim olgeta dispela samting. Graun i pulap tru long olgeta samting yu bin wokim. Solwara i bikpela tru, na planti bikpela pis na liklik pis na ol arapela samting i stap long en. Mipela i no inap kaunim.” (Sam 104:24, 25) God i wokim ol liklik pis talai na ol draipela bulmakau bilong solwara, na yumi inap lukim bikpela save bilong Em.
Na nambawan gutpela samting God i bin wokim long graun, em man yet. Man em i no olsem ol animal, em ol i no gat tingting. God i wokim man i kain olsem Em yet na ol i gat save na tingting. Tru tumas, God i wokim man “i nambawan tru”! Yumi no dokta, tasol yumi inap kaunim buk bilong ol dokta i bin glasim gut skin bilong man na kisim bikpela save long en, na bai yumi tu i tok, God i wokim skin bilong man “i nambawan tru.” Gutpela skin bilong man i kamapim long ples klia bikpela save bilong Man i bin wokim em.—Sam 139:14.
Save Bilong God long Heven
Sam 19:1 i tok, skai o heven i litimapim nem bilong God, na tru tumas ol samting bilong antap i soim yumi gutpela wok bilong Em. Devit, em i man bilong raitim dispela sam, em i no gat strongpela glas, ol i kolim teleskop, o narapela samting bilong lukim ol samting bilong antap, tasol taim em i lukim ol sta na ol narapela samting bilong antap, em i pilim tru na em i litimapim nem bilong God. Long nau ol man i kisim pinis bikpela save moa long ol samting bilong antap, winim long taim bilong Devit. Nau yumi save i gat planti bilion bilion sta na draipela lain sta. Taim yu tingim bikpela save bilong Man i bin wokim ol dispela samting, yu pilim olsem wanem? Ating yu tu yu pilim olsem yu laik litimapim nem bilong Em na tok: ‘Jehova, yu mekim “bikpela wok ol man i no inap tru long painim as bilong en”; yu mekim “ol gutpela wok i moa moa yet na ol man i no inap kaunim.”’ Yu mas pilim olsem.—Jop 9:10, NW.
Long bipo bipo yet Jehova i kirap long wokim ol samting. Pastaim em i wokim dispela wanpela Pikinini bilong em, na bihain em i wokim ol narapela ensel. Em i wokim pinis ol dispela samting yumi no inap lukim, na bihain em i kirap long wokim ol samting yumi inap lukim. Olgeta samting i stap isi na i no paul nabaut. Taim ol ensel, olsem ol pikinini bilong God long heven, ol i lukim em i wokim graun, ol i amamas na singaut wantaim! (Jop 38:4-7) God i wokim namba wan man na meri na putim tupela long gutpela ples long graun. Tasol nau wanpela samting nogut tru i kamap. Wanpela maus i kamap, em i bilong wanpela man ol i no inap lukim em, na long rot bilong wanpela snek dispela maus i toknogutim Bikpela Man bilong wokim olgeta samting. Em i tok Jehova i no mekim gut wok bos bilong em; em i tok God i giaman. Dispela maus em i maus bilong man nogut, Seten. Orait, Man I Gat Olgeta Save em bai mekim wanem nau? Em i mas mekim wanem? Em i mas mekim wanpela nupela wok long save bilong em, na dispela bai winim tru ol wok em i bin mekim bipo bilong wokim ol plaua samting, em Solomon i no gat gutpela bilas olsem bilong ol.—Jenesis 3:1-5.
[Rait long pes 4]
God i wokim ol liklik pis talai na ol draipela bulmakau bilong solwara, na yumi inap lukim bikpela save bilong Em