God i Mekim Wanem Samting Moa Bilong Helpim Yu?

YU SAVE amamas long lukim ol gutpela plaua, na harim gutpela smel bilong en, na harim krai bilong ol pisin? Yu gat pikinini? Taim pikinini bilong yu i lukluk long yu na lap long yu long namba wan taim, yu amamas? Taim yu harim gutpela smel bilong kaikai, yu laikim? Yumi olgeta, taim yumi lukim renbo, o gutpela kala long skai taim san i go daun, o ol sta long nait, yumi save amamas, a? God i wokim planti planti samting bilong amamasim yumi na helpim yumi, a?

Tasol long nau i gat planti hevi. Graun inap kamapim planti kaikai inap long olgeta man, tasol planti milion man i sot long kaikai. Planti milion moa ol i stap nogut, long wanem ol man i bin tromoi marasin nogut long win na wara na ol i bagarapim graun. Pasin nogut, na pasin bilong mangalim planti samting, na pasin bilong ol man long tingim ol yet tasol, dispela i putim hevi long planti bilion man moa. Na ol i pret tu long ol samting i laik kamap long bihain.

Man bilong wokim olgeta samting em i givim planti gutpela samting long yumi, orait bilong wanem ol man i no i stap amamas? Dispela graun em i gutpela ples—God i bin putim planti samting long en bilong yumi ken amamas long en. Tasol ol man i stap nogut. Planti man i no gat gutpela samting bilong wetim i kamap; ol i lukim ol samting i laik kamap na i olsem ol i stap long bikpela tudak na ol i pret. Bilong wanem i olsem? Wanem samting i mekim na ol samting i go nogut? Ating God i wokim ol man na bihain em i lusim ol? Olsem wanem? I gat sampela samting bilong givim lait o save long yumi long dispela samting? I gat sampela gutpela samting yumi ken wetim i kamap long bihain?

Lait i Kamap

Klostu 2,000 yia bipo wanpela pikinini man i kamap long graun em i narapela kain. Em i narapela kain, long wanem mama bilong em, Maria, em i meri bilong graun, na papa bilong em, em God yet! Ating sampela man bai kirap nogut na tok: ‘Samting olsem i no inap kamap.’ Tasol God em i As bilong laip na em i Man bilong wokim olgeta kain kain samting i gat laip, olsem na em inap mekim dispela samting i kamap. Dispela pikinini man i gutpela olgeta, “em dispela man Krais Jisas.”—1 Timoti 2:5; Matyu 1:18-25.

Taim dispela pikinini i kamap long graun, nupela taim i kirap. Olsem na ol man i save makim ol yia olsem “paslain long taim bilong Krais” (B.C.) o ‘kirap long taim bilong Krais i kam inap long nau’ (A.D.). Tasol taim em i stap manki yet, em i stap tasol long haus bilong waspapa bilong em long Nasaret na mekim wok kamda wantaim waspapa. Tripela ten yia i kamap i go pinis na nau Jisas i go long Wara Jodan na givim em yet bilong mekim laik bilong God, na em i kisim baptais, na spirit holi bilong God Jehova i kam daun long em. (Matyu 3:13-17) Long dispela taim em i kirap long autim tok na lainim ol man. Na olsem Aisaia i tok profet pinis, “ol manmeri i sindaun long tudak, ol i lukim pinis bikpela lait.”—Matyu 4:14-17; Aisaia 9:2, NW.

Jisas i kisim bikpela nem olsem Tisa. Olgeta man i litimapim nem bilong em, winim olgeta narapela tisa long olgeta taim bipo. No gat narapela tisa long dispela graun em i bin tanim tingting bilong planti man na givim bikpela lait bilong spirit long ol na kirapim ol long wetim gutpela samting i kamap long bihain. Jisas i lainim ol man long wanem buk? Em i lainim ol long ol tok bilong Baibel ol i bin raitim pastaim long tok Hibru, olsem Olpela Testamen. Jisas i helpim ol man long save long as bilong ol dispela tok. Planti tok profet bilong bipo i kamap tru long Jisas. (Skelim Maika 5:2 na Matyu 2:3-6.) Tok bilong Jisas i makim olsem tok bilong Jenesis long man i bin kamap olsem wanem, dispela tok i tru. (Jenesis 2:24; Matyu 19:3-6) Jisas i autim bikpela as tok bilong Baibel, em olsem: Kingdom bilong God bai stretim bek nem bilong Jehova. Em i autim moa yet dispela tok long planti hap. (Matyu 4:23; 6:10) Stori bilong ol wok na tok bilong Jisas em bikpela hap bilong Nupela Testamen. Tru tumas, Baibel em i wanpela gutpela samting God i bin givim long yumi; Baibel i givim lait long yumi long dispela taim bilong tudak na planti hevi.—Sam 119:105.

Bilong Wanem Ol Man i Stap Nogut?

Baibel i bekim dispela askim. Baibel i tok, i no olsem God i lusim ol man; nogat; ol man i lusim God. God i no wokim yumi ol man olsem masin na yumi mas bihainim tok, no gat narapela rot. Nogat. God i wokim yumi i gat tingting na laik. Yumi ken tingim wanem samting yumi laik mekim—yumi laik bihainim tok o nogat.

Taim God i wokim nambawan man na meri na putim tupela long gutpela ples Paradais long Iden, tupela i stap amamas na i stap gutpela tru! No gat sik, no gat pret, no gat hevi. Ol gutpela pisin na animal i stap, na planti gutpela kaikai. (Jenesis 1:26; 2:7-9) Tasol bihain wanpela birua i kamap, em ol man i no inap lukim em. Em wanpela strongpela spirit o ensel na em i laik kisim bikpela nem na namba; em i laik bosim ol man. Em i mekim namba wan tok giaman na pulim Iv, na Iv i pulim Adam, na tupela i brukim lo bilong God i tok tupela i no ken kisim kaikai long diwai tambu. (Jenesis 3:1-7) Namba wan man na meri i bihainim pasin bilong planti man long nau—tupela i bihainim laik bilong ol yet. Long dispela rot ol i putim ol yet i stap aninit long strong bilong Seten, em god bilong dispela pasin nogut nau i stap long graun.—2 Korin 4:4.

Orait, tupela i mekim olsem na nau wanpela bikpela askim i kamap, olsem: Ol man inap sakim God na bosim gut ol yet o nogat? I no inap stretim dispela bikpela tok insait long liklik hap taim tasol. I mas i gat bikpela hap taim bilong stretim. Tasol pastaim Adam tupela Iv i mas kisim strafe God i tok bai painim ol sapos ol i brukim lo bilong em—tupela i mas i dai. Tupela i sakim tok bilong God na mekim sin, olsem na tupela yet na ol lain bilong tupela i no inap kisim laip i stap oltaim.—Rom 5:12;1 Korin 15:21, 22.

Gutpela Taim Bihain

Kirap long taim bilong Adam na i kam inap long nau, narapela lain i bin kamap long graun na narapela lain i pinis long graun. Na i gat kain kain gavman i bin kamap, olsem ol gavman i gat king, na ol gavman ol man i bin vot na kamapim, na ol gavman komyunis, na kain kain narapela gavman. Tasol ol dispela gavman ol man i bin kamapim, ol i no bin helpim ol man. Planti hevi tru i kamap long wok politik na long sindaun bilong ol man na long olgeta hap; na ol man i hipim planti planti bom nogut ol inap bagarapim olgeta man meri pikinini long graun. Long taim bilong Namba Tu Pait Bilong Olgeta Hap, ol bikpela man bilong gavman long hap bilong Wes ol i tok promis olsem sapos ol i winim pait bai ol man i no ken sot moa long ol samting na ol i no ken pret moa; tasol long nau ol man i sot moa yet na ol i pret moa yet.

Wanem rot bilong stretim ol dispela hevi? Ol dispela hevi i bikpela tru, olsem na wok bilong stretim i bikpela tru. Ol i mas pinisim olgeta samting nogut na kamapim nupela taim na nupela pasin long graun. Tasol husat inap mekim olsem? Yunaitet Nesen i no inap mekim, na ol bikpela gavman i bung wantaim, ol tu i no inap mekim, long wanem planti taim ol i no mekim ol samting ol i pasim tok long mekim. Ol i mekim tok promis na sainim pepa na wantu tasol ol i kirap na brukim dispela promis! Ol i no inap mekim wanpela samting, long wanem Seten i stap het bilong ol. (1 Jon 5:19) Jehova, em God I Gat Olgeta Strong, em tasol inap rausim Seten wantaim ol narapela spirit nogut, na pinisim pasin nogut nau i stap long graun, na kamapim gutpela nupela taim aninit long Kingdom bilong heven, em Pikinini bilong em, Krais Jisas, i bosim. Krais Jisas em i King i winim ol narapela king.—Matyu 6:9, 10; Danyel 2:44; Revelesen 20:1-3.

Dispela Kingdom bai mekim wanem wok? Taim God i pinisim olgeta samting nogut long Amagedon, husat bai ol i abrusim bagarap? Nau planti man i kisim save olsem dispela Kingdom o gavman bilong heven i kirap pinis long mekim wok, na em i helpim ol manmeri long redi bambai ol inap abrusim bagarap long taim bilong Amagedon! (Revelesen 16:14-16) Ol dispela manmeri ol bai abrusim bagarap, ol i wanem kain man? Ol i save bihainim wanem kain pasin? Krais Jisas i tok: “Ol man i no save hambak na bikhet, em ol i ken amamas. Bai God i givim olgeta graun long ol.” (Matyu 5:5) Dispela tok bilong em i strongim wanpela tok profet bilong bipo, i tok: “Taim de bilong kros bilong Jehova i no painim yet yupela, yupela i mas painim Jehova, em yupela olgeta man bilong graun i gat pasin daun na i save bihainim tok bilong Em. Bihainim stretpela pasin na pasin daun. Na olsem ating bai yupela i gat ples hait long de bilong kros bilong Jehova.”—Sefanaia 2:2, 3, NW.

Ol man i bihainim pasin daun, ol inap abrusim bagarap long taim bilong Amagedon; na sapos ol i stap gut long God, bai ol inap kisim laip i stap oltaim. Olsem wanem ol inap kisim? Olsem yumi stori pinis, olgeta lain tumbuna pikinini bilong Adam i lus long kisim laip i stap oltaim, long wanem Adam i no bihainim tok na em i mekim sin. Long rot bilong Adam, dai i painim olgeta man. Taim God i wokim Adam, Adam i gutpela olgeta, olsem na i mas i gat wanpela man i gutpela olgeta na em i ken baim bek ol samting Adam i lusim. Krais Jisas em i dispela man; em i lusim laip bilong em bambai “olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:16.

God i givim Pikinini bilong em bilong baim bek ol man. Dispela em i nambawan gutpela presen God i bin givim long ol man. Dispela samting inap helpim ol man i abrusim bagarap, na em bai helpim tu ol man ol bai kirap bek long matmat. Ating yu tingting olsem: Dispela gutpela samting inap kamap tru, o ․․․ ? Tasol Jisas i tok: “Yupela i no ken tingting planti long dispela. Taim i laik kamap na olgeta man i stap long matmat bai ol i harim maus bilong em, na bai ol i lusim matmat na i kam ausait. Ol man i bin mekim gutpela pasin, bai ol i kirap bek na i stap laip. Na ol man i bin mekim pasin nogut, bai ol i kirap bek na i kamap long kot.” Gutpela tru! Ol manmeri i abrusim bagarap long taim bilong Amagedon, bai ol i amamas tru—bai ol i lukim ol lain ol i laikim tumas ol, ol i kirap bek long matmat!—Jon 5:28, 29.

Em gutpela samting tru yumi ken wetim i kamap long bihain! God Jehova, em Man bilong wokim olgeta samting, em i gat bikpela sori long yumi na long rot bilong Pikinini bilong em, Jisas, em i mekim ol dispela samting bilong helpim yumi. Tru, planti man long nau i tingim ol samting i laik kamap long graun na ol i pret na ol i pilim olsem ol i stap long bikpela tudak. Tasol ol man i lainim ol tok bilong Baibel na bihainim ol dispela tok, ol dispela man i stap olsem long lait na ol i wetim ol gutpela samting i kamap long bihain. Nau em taim bilong amamas, long wanem Kingdom bilong God i klostu pinis. (Matyu 24:33, 34) Litimapim nem bilong Jehova, em i Man bilong givim “olgeta presen i gutpela tru”!—Jems 1:17.

Taim yu tingim ol dispela planti planti samting God i mekim bilong helpim yumi, ating yu pilim tru na yu laik tenkyu long God. Tasol sapos nau tasol yu wok long kisim save long ol dispela gutpela samting yumi ken wetim i kamap tru long bihain, orait ating yu laik kisim sampela save moa pastaim. Mipela laik strongim yu long mekim olsem. Wok yet long kisim save long ol tok bilong Baibel. Ol buk na nius bilong Baibel, olsem dispela nius, inap helpim yu long kisim sampela save moa long ol gutpela samting God i laik mekim, na bai yu pilim tru.

Ol manmeri i bilip pinis olsem Kingdom bilong God tasol inap stretim hevi bilong ol man, ating ol i laik mekim tok wankain olsem man bilong raitim sam, em i tok: “Bikpela i bin gutpela tru long mi. Olsem na bai mi givim wanem samting long em?” (Sam 116:12) Ol dispela man i save tokim ol narapela man long ol samting God i bin mekim na long ol gutpela samting God i laik mekim bilong helpim ol man i laikim tumas em na ol i mekim wok bilong em. Dispela i mekim ol i stap belgut tru na amamas tru. Bilong wanem? Long wanem, olsem Jisas i tok: “Amamas bilong man i givim samting long arapela man, dispela i winim amamas bilong man i kisim samting bilong em yet.”—Aposel 20:35.

[Box on page 5]

KRAIS JISAS—

◆ Planti tok profet i kamap tru long em, olsem tok profet bilong Maika 5:2; Matyu 2:3-6

◆ Tok bilong em i makim olsem tok bilong Jenesis long man i bin kamap olsem wanem, dispela tok i tru—Matyu 19:3-6

◆ Em i autim moa yet bikpela as tok bilong Baibel, em olsem: Kingdom bai stretim bek nem bilong Jehova—Matyu 4:23; 6:9, 10; Luk 8:1

◆ Em i givim gutpela laip bilong em olsem man bilong graun bilong baim bek ol samting Adam i lusim, bambai ol man i bilip long em ol i ken kisim laip i stap oltaim—Jon 3:16

[Picture on page 7]

‘Jehova i bin mekim gutpela tru long yu, olsem na bai yu givim wanem samting long em?’