“Dispela Bai Bagarapim Tru Bilip Bilong Ol”
NAMBA WAN PAIT BILONG OLGETA HAP i bagarapim planti man na planti samting. Tasol planti man i no save, dispela bikpela pait i bin bagarapim tu nem bilong ol misineri long Afrika, em ol misineri bilong ol misin ol i kolim Kristen. Wanpela misineri Katolik, nem bilong em Francis Schimlek i raitim wanpela buk (Medicine Versus Witchcraft) na em i tok, dispela bikpela pait “i olsem wanpela guria i sakim graun i go inap long laspela tesen bilong misin long bus long Afrika. . . . Ol wailis bilong Krais i sem, na ol Asples Kristen i tingting planti.”
Bilong wanem ol i tingting planti? Schimlek i kamapim tok bilong misineri Albert Schweitzer, em i tok: “Yumi olgeta i save, planti Asples i tingting planti na askim olsem: ‘Ol waitskin i bin kisim Gutnius Bilong Pasin Sori i kam long mipela—olsem wanem na nau ol i lusim ol lo bilong Bikpela Jisas, na narapela i kirap kilim i dai narapela?’ Taim ol i givim dispela askim long mipela, mipela i no inap bekim. . . . Mi ting dispela bai bagarapim tru bilip bilong ol.”
Ating Ol i Mas Tambuim Ol Pikinini long Ol Miting?
‘OL i no ken kisim ol bebi na ol pikinini i kam long haus bilong God.’ Em tingting bilong Adam Clarke, em wanpela man i gat biknem long stori long as bilong ol tok bilong Baibel. Tasol em i tok, sapos wanpela meri i stap rabis na i no gat wanpela man o meri bilong lukautim ol pikinini bilong em taim em i go long lotu, orait, meri i ken kisim ol pikinini i go wantaim em. Em i tok, ol dispela kain meri i ken kisim pikinini bilong ol i go long haus lotu “maski dispela i nogutim kongrigesen, na sampela pasto, taim ol i harim pikinini i krai.”
Clarke i tingim tok bilong Baibel long Niemaia 8:2 (NW) na em i laik tambuim ol pikinini. Dispela ves i tok: “Olsem na Esra, em i pris, em i kaunim lo long ol lain i kam bung, em ol man na ol meri tu na olgeta i gat save inap long harim tok.” Tasol sapos yumi tok dispela tok i tambuim ol pikinini, dispela i no stret wantaim tok bilong Diuteronomi 31:12 (NW): “Bungim ol man na ol meri na ol liklik pikinini . . . bambai ol i ken harim na ol i ken kisim save.”—Lukim tu 2 Timoti 3:15.
Olsem na taim Niemaia i singautim ol lain i kam bung, ating em i no tingting long tambuim sampela. Nogat. Em i laik bai “olgeta i gat save inap long harim tok” ol i ken i kam bung! I no stret sapos ol papamama i lusim ol pikinini bilong ol i stap nating, no gat man bilong lukautim ol, na ol yet i go bung!
Olsem na long nau ol Witnes Bilong Jehova i save kisim ol bebi na ol liklik pikinini bilong ol i go long ol miting Kristen. Tru dispela inap bagarapim miting liklik, olsem sapos pikinini i krai samting, na i putim hevi liklik long papamama, tasol ol papamama Kristen i wok strong long lainim gut ol pikinini bambai ol i sindaun isi long ol miting. Bihain bai ol dispela liklik pikinini bilong ol “i gat save inap long harim tok” na bai ol inap kisim save long ol dispela tok em inap helpim ol long kisim laip.—Hibru 10:24, 25.
Ol Liklik Pikinini i Litimapim Nem Bilong God
PAPAMAMA bilong Mia, em liklik pikinini meri i gat 3-pela krismas, ol i wok long painim wanpela meri bilong lukautim Mia taim ol i go long wok. Wanpela Witnes i orait long lukautim Mia, tasol em i tokim papamama bilong Mia olsem long olgeta de em i save lainim ol pikinini bilong em yet long sampela tok bilong Baibel. Papamama i orait long Mia tu i ken sindaun na harim tok. Mia i kisim save long gutpela ples Paradais Jehova i laik kamapim na em i laikim tru ol tok em i kisim save long en. Taim em i gat 4-pela krismas, em i no laik i go insait long wanpela haus lotu bilong lukim marit. Em i tokim papa bilong em, “Dispela em Bikpela Babilon.”
Taim em i gat 6-pela krismas, pasto i tokim em: “Yu bilong wanem misin?” Mia i tok: “Mi wanpela Witnes Bilong Jehova.” Pasto i tok: “Na olsem wanem long papamama bilong yu?” Mia i tok: “Ol i stap yet long misin Dats Rifom, tasol liklik taim bai ol i kamap Witnes Bilong Jehova.” Pasto i kros na em i tok: ‘Yu no ken pulim lain bilong mi.’
Nau Mia i gat 7-pela krismas na em i amamas long wanem em i bin kisim save long tok i tru taim em i gat 3-pela krismas tasol. Papamama bilong em i tokaut pinis olsem ol i laik kisim baptais.