Inap Yu Bilip Olsem Tok Bilong Baibel i Tru?
WANPELA man bilong saiens, nem bilong em Richard Dawkins, em i tok: “Sapos yu bungim wanpela man i tok em i no bilip olsem yumi bin kamap nating, orait yu ken save, dispela man i no gat save liklik o em i longlong.” Yu ting olsem wanem long tok Bilong dispela man? Sapos yu bilipim tok bilong Baibel, yu bilip olsem God i bin wokim yumi na yumi no bin kamap nating, a? Tasol sapos yu bilipim ol tok bilong Baibel, yu ting dispela i mekim olsem yu no gat save liklik o yu longlong?
Tingim tu dispela tok i stap long wanpela nius (The Weekend Australian), olsem: “Ol saveman bilong Nupela Testamen ol i kisim save pinis olsem dispela Jisas ol rait Kristen bilong pastaim i stori long em, em i stori nating tasol bilong ol Kristen.” Em tok bilong wanpela profesa bilong lotu, nem bilong em Dr. Robert W. Funk, em man bilong raitim planti buk bilong kamapim insait bilong ol tok bilong lotu.
Em yet i bin bungim 100 samting saveman bilong Baibel na ol i bin wok wantaim long skelim ol tok bilong Jisas long Baibel. Bihain ol i tok ol i kisim save pinis olsem Jisas i no bin kamapim ol tok bilong Beten Bilong Bikpela; na Jisas i no bin tok ol man bilong pasin daun bai kisim dispela graun, o ol man i save mekim dai ol kros na pait bai God i kolim ol olsem pikinini bilong em. Na ol i tok, Jisas i no bin tok: “Kirap bek, em mi yet. Na laip, em mi yet. Na man i bilip long mi, . . . bai ol i no i dai.”—Jon 11:25, 26; Matyu 5:5, 9; 6:9, 10.
Ating yu kirap nogut long tok bilong ol dispela man, tasol planti man i save mekim kain tok olsem, long wanem long nau ol man i save sutim tok long Baibel. Na inap planti yia pinis long ol skul bilong lainim ol man long kamap pris, ol i bin lainim ol long ol kain tok olsem. Taim yu harim ol saveman bilong saiens i sutim tok long Baibel, ating yu no tingim tumas. Tasol taim ol bikman bilong lotu i tok, ol tok bilong Baibel i no tru, ating yu tingting planti na yu laik skelim gen tingting bilong yu yet long ol tok bilong Baibel. Planti saveman bilong lotu i no bilipim ol tok bilong Baibel, olsem na i stret sapos yu bilipim o olsem wanem?