Ol i Bungim ‘Ol Gutpela Samting’ Long Polan

OL MAN i tok, Polan em i kantri Katolik. Inap olsem 93 pesen bilong olgeta man i stap long Polan ol i bilong lotu Katolik. Ol bikpela senis i bin kamap long gavman na sindaun bilong ol man long Polan long dispela taim, na dispela i bin senisim tru tingting bilong ol man long planti samting, na long lotu bilong ol tu. Ol i bin skelim tingting bilong planti man na inap olsem 50 pesen tasol i tok, ol i Katolik na ol i save go long lotu.

Long Me 1989, gavman bilong Polan i orait long wok bilong ol Witnes Bilong Jehova na rejistaim dispela lotu. Bihain long dispela taim inap olsem 11,000 nupela man i bin kirap long autim gutpela tok bilong Kingdom. Nau winim 106,000 man bilong autim tok i bung wantaim insait long 1,300 samting kongrigesen, na inap olsem 200,422 manmeri i bin i go long Memorial long 1991. Olsem na long Polan tu ol i wok long bungim ‘ol gutpela samting bilong ol lain man,’ olsem Baibel i tok profet long en. (Hagai 2:⁠7) I no longtaim i go pinis na ol Witnes Bilong Jehova i mekim ol kibung intenesel long Polan na ol niuspepa samting i bin stori long dispela. Tasol yumi ken skelim wok ol Witnes i mekim long ol liklik taun long bus, na dispela bai kamapim klia olsem wok bilong bungim ol man long Polan i kamap gutpela.

Ol Painia i Opim Rot

Sustam em wanpela taun i gat olsem 10,000 manmeri long en na i stap klostu long maus bilong Wara Vistula. I hatwok long autim tok long dispela taun. Long 1987 i gat 8-pela pablisa tasol i stap, tasol bihain sampela painia i kam, em ol i save autim tok bilong Kingdom long olgeta de, na senis i kamap. Long namba 5 miting bilong ol, long wanpela haus piksa, inap olsem 100 manmeri i laik harim tok ol i kam bung! Ol painia i wok strong inap tupela yia na wanpela kongrigesen i kamap. Nau ol i gat Haus Kingdom bilong ol yet, na i gat 90 pablisa, na olgeta taim inap olsem 150 man i save go long ol miting.

I no longtaim na Misin Katolik i kirap long birua long ol Witnes. Wanpela sister Katolik “i gat save” em i toknogutim ol. Em i tok, ol Witnes i save lainim ol man long ol tok giaman. Tasol dispela pasin birua i kikbek long ol, olsem i save mekim planti taim. Ol tok dispela sister i mekim i kirapim tingting bilong ol man na ol i laik save, tok bilong ol Witnes i giaman o nogat. Planti ol i kisim save long tok i tru, na nau ol i mekim wok painia oltaim! Ol i tok: ‘Taim mipela kisim save long tok i tru, mipela ting olgeta man i laik kamap Witnes ol i mas bihainim pasin bilong tisa bilong ol, olsem na mipela i mas kamap painia.’ Dispela tingting i kirapim planti long kongrigesen long mekim wok painia.

Long dispela rot ol i bin kirapim planti Baibel-stadi, inap olsem 180. Ol i bin mekim wok long buk Yu Inap i Stap Oltaim Long Paradais Long Graun bilong lainim sampela long kaunim tok, na long dispela rot ol i bin lainim ol tu long tok i tru. Ol i mekim Baibel-stadi inap 10 minit 10 minit wantaim sampela kalabusman taim ol i kam ausait bilong klinim ol rot. Wanpela meri i wokabaut long rot em i toknogutim wanpela Witnes na wanpela kalabusman i kam helpim Witnes. Em i ran i kam kisim buk Stap Oltaim Long Graun long han bilong Witnes na em i holim i go antap, na em i tokim dispela meri: “Yu no inap kaunim tok, a? Wanem tok i stap hia? Em i tok, yu inap i stap oltaim long Paradais long graun! Bipo yu harim tok long kain samting olsem? I gat wanem as na yu kirap toknogutim God na ol man i lotuim em?”

Bikpela Tok i Kamap

Lotu Katolik i strong long taun Krusvetsa long Polan. Olsem na long 1990 wan wan Witnes tasol i stap namel long ol 9,300 manmeri bilong dispela taun. Tasol Jehova i blesim wok bilong ol dispela man i autim tok bilong Kingdom.

Wanpela em Bogdan, em i gat 23 krismas. Famili bilong em ol i strongpela Katolik. Em i tok: “Bipo mi save dring na smok na pamuk. Mi man nogut, na mi laik daunim olgeta gavman, na i olsem ol narapela i no tingim ol samting mi mekim. Tasol taim mi kirap long stadi long Baibel, mama i tok em bai dring marasin nogut na kilim i dai em yet sapos mi no lusim stadi. Mi no inap karim dispela hevi, olsem na mi lusim stadi, na mi no bung moa wantaim ol Witnes. Bihain sampela painia salim i helpim mi, na mi lusim olgeta pasin nogut bilong mi. Mi kisim baptais long kibung distrik long 1991, na mi laik mekim wok bilong Jehova long olgeta taim, olsem na kirap long taim mi kisim baptais mi bin mekim wok painia haptaim long olgeta mun.”

Wanpela man i gat 21 krismas, em Swavome, em i save mekim olkain pasin marila na pasin bilong lotuim Satan. Tasol taim em i kisim save olsem Baibel i tambuim ol dispela kain pasin, em lusim olgeta. Em i tok: “Tasol Satan i wok strong yet long bosim mi. Mi bin rausim long haus olgeta samting bilong lotuim Satan, tasol wanpela nait pikap yet i kirap long wok na mi harim sampela musik bilong Satan. Mi beten long Jehova na em i helpim mi long kisim stretpela tingting na kamap strong long spirit. Papamama i bin strong long mi mas i go lukim wanpela dokta bilong stretim tingting bilong man, na nau dispela dokta i lukim olsem tingting bilong mi i senis olgeta na i kamap gutpela, olsem na em i tok, mi no gat sik moa. Long kat bilong mi em i raitim tok olsem: “Ol Witnes Bilong Jehova i bin stretim sik bilong em.”

Abrusim Spirit Bilong Dispela Graun

Klostu long taun Krusvetsa, long hap bilong saut-wes, liklik taun Sroda Slonska i stap, i gat olsem 9,000 manmeri long en. Long dispela taun tu ‘ol gutpela samting’ i wok long kam insait. Fopela yia bipo wanpela Witnes tasol i stap long dispela taun, em wanpela sista, tasol nau i gat 47 ol i save autim tok bilong Kingdom. Bipo planti bilong ol dispela Witnes i bin kalabus long ol wok marila samting, na long pasin bilong kisim drak, na pasin pamuk. Ol i ting em hap asua bilong misin, long wanem, misin i bagarapim tasol ol man long samting bilong spirit, i no helpim ol. Tasol ol Witnes i helpim ol tru.

Ol yangpela long kongrigesen i autim tok long skul, olsem hap teritori bilong ol yet. Kasia i gat 18 krismas na em i tok: “Planti taim ol wanskul i save tokim mi olsem, mi lusim nating yangpela bilong mi, tasol mi bin abrusim planti hevi, na mi stap amamas, long wanem, i stap bilong mi i gat as bilong en. Mi save stadi Baibel wantaim sampela long skul, tasol mi no lusim ol wok bilong skul mi mas mekim long haus o wok bilong mi yet long stadi long Baibel. Sampela yangpela i tok mi lusim nating yangpela bilong mi, ol i gat pikinini pinis na ol i karim planti hevi moa.”

Planti skul i laikim ol buk na nius bilong Sosaiti. Olsem: Wanpela tisa bilong lainim ol skulmanki long tok Polan i tokim ol, taim ol i raitim stori ol i mas bihainim pasin bilong nius bilong yumi Kirap!, long wanem, i no hatwok long save long ol tok bilong dispela nius. Wanpela painia haptaim, em Eva, em i tok, liklik buk Skul na Ol Witnes Bilong Jehova i helpim gut em. Em i tok: “Mi laikim tru dispela liklik buk. Ol tisa bilong mi i save gut long en. Ol i no save givim hevi long mi taim mi askim ol long tok orait long mi lusim skul na go long ol bikpela kibung.” Gutpela pasin bilong ol yangpela i mekim bel bilong Jehova i amamas.​—⁠Sindaun 27:11.

Ol Kalabusman i Senisim Pasin

Taun Seltsa Opolskie i stap klostu long taun Sroda Slonska long hap bilong sankamap, na long dispela taun i gat tupela haus kalabus i stap. Wanpela em haus kalabus bilong ol man nogut tru. Ol Witnes i save go long dispela haus kalabus bilong lainim ol kalabusman long tok i tru, em planti ol i kalabus tu long Bikpela Babilon, em olgeta lotu giaman.​—⁠Kamapim Tok Hait 18:​1-5.

Ol Witnes i mekim Baibel-stadi wantaim sampela kalabusman olsem liklik grup o ol yet wan wan, na sampela bilong ol i bin kisim baptais. Maski ol i mas i stap yet long kalabus inap long ol i pinisim kalabus bilong ol, ol i strong long autim tok bilong Kingdom long ol narapela kalabusman. Wanpela kalabusman i senisim tru pasin bilong em na redi long kisim baptais, na bos bilong kalabus i larim em i lusim kalabus na i go long haus bilong em inap wanpela de long olgeta wik. Ol narapela i raitim pas i go long ol famili bilong ol na tokim ol, ol i wok strong long kamap Witnes Bilong Jehova na taim ol i lusim kalabus bai ol i no stap man nogut moa.

Bos bilong wanpela haus kalabus i gat tok long ol pris Katolik. Em i tok, ol i save kam oltaim long haus kalabus, tasol wok bilong ol i no karim kaikai liklik. Em i askim ol Witnes: “Olsem wanem yupela inap helpim ol kalabusman long senisim tru pasin bilong ol?” Pas wanpela kalabusman i raitim long famili bilong em i bekim dispela askim, em i tok: “Long dispela haus kalabus ol Witnes Bilong Jehova i bin tokim mi long gutpela tok promis bilong God long nupela gavman bai kamap, em Kingdom bilong Jehova, na klostu nau bai dispela gavman i bosim dispela graun. Mi bin tingim tingim pasin bilong mi long bipo na skelim wantaim Baibel, na mi no amamas liklik long ol pasin mi bin mekim. Mi laik tru long lusim kalabus na i stap fri, na mi laik i stap aninit long Kingdom bilong God. Nau mi baptais pinis na mi stap wanpela Witnes Bilong Jehova.”

Long narapela haus kalabus planti kalabusman i bin kilim man i dai na kot i makim ol bilong kalabus inap 25 yia. Twelpela ol i stadi long Baibel long olgeta wik. Wanpela bilong ol i dediket long Jehova na kisim baptais, na ol narapela i tingting long mekim olsem. Bos bilong dispela haus kalabus i lukim gutpela wok i kamap long skul ol Witnes i givim long ol man long Baibel na em i tokim ol Witnes: “Long dispela haus kalabus mi bosim, i no gat 12-pela kalabusman tasol; i gat 600. Plis, helpim mi bambai mi ken helpim ol na taim ol i lusim kalabus bai ol inap sindaun gut na kisim wok samting. Mi bai givim olgeta samting long yupela bilong helpim yupela, tasol yupela yet i mas redim ol tok samting bilong helpim ol. Yupela mas lukautim ol!”

Na ol brata i bin mekim olsem. Ol i mekim ol tok long Baibel i stori long as bilong i stap bilong yumi, na long ol gutpela samting yumi ken wetim i kamap, na bilong wanem i bikpela samting long yumi mas lusim ol pasin nogut. Na ol i stori tu long wanpela man bipo em i stap kalabus, tasol em i bin kamap wanpela Witnes Bilong Jehova na bihain em i bin kamap wanpela elda bilong kongrigesen. Na ol i stori long wanpela man bipo em i bin stilim ol ston i dia tumas, ol i kolim daimon, na narapela i bin kisim ol drak, na tupela i bin kisim save long tok i tru na senisim pasin bilong ol.a Inap 20 kalabusman i kam harim ol dispela tok na ol i laikim tru na kamapim planti askim, na sampela i laik stadi na lainim tok bilong Baibel.

Traim i Painim Ol, Tasol Ol i Bilip na Sanap Strong

Lubasuf em i wanpela liklik taun i stap long boda bilong Polan na Yukren, na i gat olsem 12,000 manmeri i stap long dispela taun. Taim ol painia i kam long dispela taun long 1988 bilong helpim 12-pela pablisa, wok autim tok i go bikpela. Nau i gat 72 manmeri i autim strong tok bilong Kingdom, na inap olsem 150 manmeri i bin go long Memorial long 1991 long nupela Haus Kingdom bilong ol.

Long mun Jun 1991, Pop John Paul Namba 2 i go raun long dispela taun. Tasol dispela i no strongim bilip bilong ol man. Planti ol i paul tru long i gat wanem as bilong i stap bilong ol na long gutpela samting ol i ken wetim. Taim ol pris i no inap bekim gut askim bilong ol, ol i go lukim ol Witnes. Ating pastaim bel bilong ol i kotim ol long ol i givim baksait long lotu bilong ol bilong pastaim, tasol ol tok i tru bilong Baibel ol i lainim i helpim ol long save, nau ol i bihainim stretpela rot.

Dispela i bin painim wanpela meri, em Onorata, nau em i mekim wok painia oltaim. Wanpela yia samting bipo em i bin go bilong kamapim rong bilong em long pris na em i askim pris, ‘Nem bilong God husat?’ Pris i bekim tok olsem: “God em i Man bilong sori​—⁠dispela em naispela nem tru bilong em.” Bihain liklik em i tok moa olsem: “Yu olsem wanpela baket i gat klinpela wara long en, na wanpela man i kapsaitim hap ing long en. Yu no inap senisim samting nogut i bin kamap long dispela rot.” Em pris i bekim tok olsem. Onorata i tok: “Long dispela taim stret mi pasim tok long bel long kamap wanpela Witnes Bilong Jehova. Dispela samting tu mi no inap senisim.”

Ol manmeri bilong Lubasuf i bin kisim save long tok i tru, klostu olgeta i bin kisim hevi long ol man i strong tumas long birua long lotu bilong ol. Tasol dispela i no pasim ol​—⁠ol i sanap strong na holimpas tok i tru na kam insait long lain bilong Jehova.

Wanpela sista, em Elsbieta, i stori olsem: “Pastaim papamama i paitim mi long haus. Bihain ol i kam insait long Haus Kingdom. . . . Ol i kisim mi i go bek long haus na paitim mi long stik i gat buk long en. Ol i tok em bilong ‘stretim’ mi. Ol i paitim na kikim olgeta hap bilong skin bilong mi, kirap long het i go daun long lek, long wanem, mi bung wantaim ol Witnes. Ol i paitim mi nogut tru na kwiktaim ol i mas kisim mi i go long haus sik. Jehova i helpim mi na mi kamap orait gen. Famili i givim baksait long mi. Taim mi tokim pris long dispela, em i daunim mi na em i tok: “Yu kisim liklik strafe na yu kam toktok planti long dispela.”

Narapela sista i stori olsem: “Olgeta yia mi save go long Sestosowa long wokabaut long skru long Rot bilong Kruse; mi ting olsem em wok bilong olgeta gutpela Katolik. Ol mak bilong sua i stap yet long skru bilong lek bilong mi.” Taim dispela sista i gat 18 krismas em i bin kisim save long tok i tru, na em i tokim pris na famili bilong em, em i no ken i go moa long lotu Katolik. Ol i paitim em nogut tru na em i ai raun na hap i dai. Em i tok: “Mi stap long haus sik, tasol mi kamap orait liklik na mi inap i go long ‘Ol Man Bilong Laikim Pasin Bilong i Stap Fri’ Kibung Distrik. Mi amamas tru na mi krai taim mi lukim gutpela pasin sori na pasin wanbel i stap namel long ol dispela man i givim bel long lotu, tasol ol i no mekim nabaut​—⁠mi no lukim kain pasin olsem long Sestosowa. Mi amamas long mi pilim pinis gutpela pasin bilong Jehova na mi lain long wetim em i helpim mi.” Jehova i save helpim na strongim ol man i putim hevi bilong ol long han bilong em.​—⁠Buk Song 55⁠:22.

Planti man long dispela kantri Katolik ol i kalabus long Bikpela Babilon, tasol ol i bihainim singaut olsem: “Lusim dispela ples na i kam ausait.” Long ol narapela kantri tu ol man i mekim olsem. Lain bilong Jehova i no save pret, na sapos em i laik bilong Jehova, bai ol i bungim yet planti moa ‘gutpela samting’ long Polan. Yumi save, planti moa bai bihainim singaut olsem: “ ‘Yu kam.’ Na wanem man nek bilong en i drai, em i mas kam. Man i laik dring, em i mas kam na kisim wara bilong givim laip, em i olsem presen bilong God.”​—⁠Kamapim Tok Hait 18⁠:​4; 22⁠:17.

[Ol Futnot]

[Mep long pes 24]

(Bilong save ol dispela rait i stap we long pes, lukim buk o magasin.)

POLAN

Sustam

Krusvetsa

Posnan

Woso

Sroda Slonska

Sestosowa

Seltsa Opolskie

Lubasuf

[Piksa long pes 26]

Autim tok bilong Kingdom long hap bilong Krusvetsa, long Polan