Sprim-Kot Bilong Naijiria i Orait Long Man i Bihainim Wanem Lotu Em i Laikim
OL MAN bilong ples i stilim ol kaikai long gaden bilong wanpela man. Sampela i go insait long haus bilong wanpela man bilong wokim haus brik na ol i stilim ol tul bilong em. Na sampela i pasim wanpela meri na em i no inap maket long ol samting bilong em o baim ol samting. Bilong wanem ol i mekim olsem? Long wanem, ol dispela manmeri ol i mekim nogut long ol, ol i Witnes Bilong Jehova, na ol i no laik insait long wanpela lain.
Dispela lain em ol man—ating i no gat meri long en, na ol i olsem wankrismas, na ol i kolim olsem asosiesen Wankrismas. I gat planti lain olsem long Naijiria. Ol i save kirapim sampela wok bilong helpim ples, tasol ol i save mekim lotu long ol god giaman, na ol i mekim sampela pasin lotu bilong ol spirit nogut, bilong makim olsem man i winim pinis krismas bilong kamap memba bilong dispela lain. Baibel i tambuim ol Kristen long mekim ol dispela kain pasin, olsem na ol Witnes Bilong Jehova i no save go insait long ol kain lain olsem.—1 Korin 10:20, 21; 1 Jon 5:21.
Wanpela man, em Samuel Okogbue, em i wok long taun Aba long Naijiria na em i save samapim klos bilong ol man. Long yia 1978, dispela lain Wankrismas long Alaye i tok, em i mas tromoi “takis” bilong helpim ol long wokim wanpela etpos olsem klinik. Samuel em i wanpela Kristen tru, na em i save wok strong long helpim ol man, tasol em i no laik insait long ol wok bilong dispela lain. Long Epril 22, 1978, 6-pela man bilong dispela lain i brukim stua bilong em na ol i go insait na kisim masin samap bilong em, na ol i tokim em, ol bai holim masin inap long taim em bai givim mani takis long ol. Em i tokim ol, em i no wanpela memba bilong asosiesen bilong ol, olsem na em i no gat wok long givim mani long ol olsem takis. Tasol ol i no bekim masin long em, olsem na em i putim ol long kot.
Ol Narapela Narapela Kot
Long Kot Bilong Nambawan Majistret, dispela lain Wankrismas i tok, Samuel i olsem wankrismas bilong ol, olsem na em i wanpela memba bilong dispela lain na em i mas tromoi takis olsem ol yet i save mekim; na lo bilong ples i tok, sapos wanpela memba i no laik tromoi takis, ol i mas kisim ol samting bilong em na holim i stap inap long taim em i givim dispela mani long ol.
Tasol kot i no wanbel long dispela tok. Long Februeri 28, 1980, kot i tok, ol i no inap subim Samuel long kamap memba bilong wanpela lain sapos em yet i no laik. Nambawan Majistret i tok, ‘Sapos wanpela pasin olsem lo bilong ples i pasim wanpela man bilong dispela ples na em i no inap i go insait long wanem lain em yet i laikim, dispela i brukim Hap Namba 37 bilong As Lo bilong Federal Ripablik bilong Naijiria, olsem na Lo bilong gavman i no inap helpim dispela pasin bilong ples.’
Orait, nau dispela lain i go long Nambawan Kot na ol i winim kot. Jas i tok, Samuel i mas tromoi dispela takis, long wanem, dispela mani i bilong wokim ol samting bilong helpim ples.
Samuel i go long Kot bilong Apil, na ol i senisim tok bilong Nambawan Kot, na Samuel i winim kot. Tasol lain Wankrismas i no amamas. Olsem na ol i go long Sprim-Kot bilong Naijiria.
Orait, insait long dispela taim, sampela bilong dispela lain long ples bilong Samuel i wok long sutim sampela tok giaman long ol Witnes, na ol i tok, ol Witnes i birua long olgeta gutpela wok bung bilong helpim ples. Olsem na hetman bilong ples i kirap tambuim wok bilong ol Witnes Bilong Jehova long dispela hap. Man bilong mekim ol toksave bilong ples em i tokaut olsem, sapos wanpela man i bung wantaim ol Witnes, em i mas baim kot. Orait, sampela Witnes bilong ol taun i stap klostu ol i go lukim bikman bilong dispela ples na toktok wantaim ol. Ol i tok, lain bilong God i no birua long ol wok bilong helpim ples, na Samuel i gat ol pepa i makim olsem em i bin givim mani bilong helpim sampela wok bilong ples em ol lain Wankrismas i no kirapim. Ol bikman bilong ples i harim dispela na ol i senisim tok bilong ol long tambuim ol Witnes.
Man Inap Bihainim Wanem Lotu Em i Laikim
Long Oktoba 21, 1991, 5-pela jas long Sprim-Kot bilong Naijiria ol i wanbel long tokaut olsem Samuel i no gat rong. Jas Abubakar Wali i helpim tok bilong Jas Pol Nwokedi na em i tok, ‘Samuel i no bikhet long tromoi takis—tasol em i insait pinis long lain Witnes Bilong Jehova na sapos em i go insait long narapela lain o asosiesen, dispela i no stret long bilip bilong em.’
Na jas i tok moa olsem, ‘Hap Namba 24(1) bilong As Lo bilong 1963 i tok, olgeta manmeri bilong Naijiria ol inap bihainim maus bilong bel bilong ol na wanem tingting o lotu ol yet i laikim. Dispela man [Samuel] em inap bihainim wanem wanem tok bilong lotu o tingting o maus bilong bel i tambuim em long go insait long wanpela lain Wankrismas. Sapos wanpela pasin bilong ples i narapela kain long As Lo bilong gavman, dispela pasin i no gat strong.’
Kot i tok, ol i no ken subim wanpela man long go insait long wanpela lain Wankrismas, maski em i wanpela pasin bilong ples. Na kot i tok, sapos man i no memba bilong wanpela asosiesen samting, ol i no ken subim em long givim takis long dispela lain, maski dispela mani i bilong mekim sampela wok bilong helpim ples. Olsem na kot i helpim olgeta manmeri bilong Naijiria na ol inap bihainim wanem lotu ol yet i laikim.