Autim Tok Long ‘Olgeta Kain Manmeri’ Long Beljam

APOSEL Pol i tokim ol wanlain Kristen, God “i laik kisim bek olgeta [kain] manmeri, bai ol i ken save long as bilong tok tru.” Ol i mas beten long ol i ken “sindaun gut na i stap bel isi,” bambai ol inap autim gutpela tok bilong Kingdom long olgeta man i laik harim.​—⁠1 Timoti 2:​1-4.

Long nau ol Witnes Bilong Jehova i tingim tru wok bilong autim tok long ‘olgeta kain manmeri’ long Beljam. Bihain long Namba 2 Pait, i gat sampela bikpela senis i kamap long dispela liklik kantri. Tripela lain bilong longtaim i stap long dispela hap, em ol Holan na Frans na Jeman, tasol nau i gat ol kain kain lain i stap, em ol man bilong Arebia, Turki, India, Saina, Filipin, Afrika, Amerika, na sampela moa. Ol i tok, long olgeta 10-pela manmeri long Beljam, wanpela i bilong narapela kantri.

Olsem na ol Witnes long Beljam i wankain olsem ol narapela wanwok Kristen i stap long ol narapela hap​—⁠ol i gat bikpela wok long autim gutnius long ‘olgeta kain manmeri.’ Tasol olsem wanem ol i ken autim tok long ol manmeri i gat narapela narapela tok ples na sindaun na lotu? Na taim ol i harim tok bilong Baibel, ol i ting olsem wanem long en?

Sampela i Harim Gut

Wok bilong toktok wantaim ‘olgeta kain manmeri’ long gutpela tok bilong Kingdom em i wok bilong amamas tru. Long ol rot nabaut, long ol ples maket, long ol bas samting, long ol haus, ol Witnes inap painim ol man bilong ol narapela narapela kantri. Sapos Witnes i wok long painim rot, i no hatwok long kirapim tok wantaim wanpela man, na sampela taim dispela inap kamapim gutpela samting tru.

Long ples bilong wetim bas, wanpela meri Witnes i mekim pasin pren long wanpela meri Afrika na nau i no hatwok long kirap toktok wantaim em. Meri i tok, em i amamas long harim tok bilong Kingdom bilong God, na em i laik harim sampela tok moa bilong Baibel. Em i kisim nius Wastaua na Kirap! na em i givim atres bilong em long Witnes. Witnes i tok, liklik taim bihain bai em i kam lukim em long haus bilong em, tasol meri i tok, “Nogat! Yumi mas stretim tok na makim wanpela de stret na bai mi ken i stap long haus na wetim yu.”

Tripela de bihain, Witnes i laik i go lukim dispela meri, tasol atres bilong em i lus. Em i tingim nem bilong rot na em i go long olgeta haus long dispela rot bilong painim wanpela nem i olsem nem bilong ol Afrika, tasol nogat. Em i bel hevi stret! Em i laik lusim dispela hap, na wantu em i lukim dispela meri Afrika i sanap klostu, na em i taim stret olsem tupela i bin makim! Witnes i kirapim stadi wantaim em long Baibel.

Olsem wanem long ol kain kain sindaun na pasin na lotu na bilip bilong ol dispela manmeri? Olsem wanem long ol bilip bilong lotu Hindu? Wanpela painia i tingim sampela tok em i bin kaunim long buk Reasoning From the Scriptures, em i tok: “Yumi no ken kamapim tumas ol strongpela tok bilong lotu Hindu na ol samting ol i bilip long en. Kamapim ol tok i tru i stap long Baibel Holi. Ol dispela tok i klia tru na em bai go daun long bel bilong ol man i save laikim tumas stretpela pasin.”

Orait, bihain painia i bungim wanpela meri India, nem bilong em Kasi, na painia i kirap stadi wantaim em long Baibel. Painia i mekim olsem dispela buk i tok, na Kasi i wok long kisim save na kamap strong. I no longtaim na em i kirap toktok wantaim olgeta poroman bilong em long ol tok em i lainim. Wanpela taim dispela painia i bungim meri bilong wanpela bikman bilong gavman, na meri i askim em, “Yu dispela meri i save skulim Kasi long Baibel, a?” Na em i tok, “Kasi em i gutpela tisa tru! Em i bin helpim mi na nau mi klia tru long planti tok. Em i wanpela Hindu na mi wanpela Katolik, tasol em i skulim mi long Baibel! Mi kirap nogut long dispela!”

Taim yu bungim ol Filipin, kwiktaim bai yu save, ol i laikim tumas Baibel. Ol i save mekim gut long ol man, na i no hatwok long kirapim tok wantaim ol. Wanpela meri Filipin i kisim tupela nius, tasol em i wanpela Katolik, olsem na em i tromoi ol dispela nius. Sampela wik bihain em i kisim gen tupela nius, na em i pulimapim long hanpaus bilong em. Wanpela taim long nait em i gat laik long kaunim buk samting. Em i wok long painim wanpela samting bilong kaunim, na nau em i lukim dispela tupela nius. Em i tingting planti, tasol em i kirap kaunim. Em i kaunim i go na nau bel bilong em i kirap tru long ol tok bilong en, na em i laik kaunim moa. Bihain liklik wanpela Witnes i kam long haus bilong em na em i givim planti askim long Witnes. Dispela i namba wan taim em i bin skelim ol bilip Katolik bilong em wantaim ol tok bilong Baibel. Em i lukim tok bilong Baibel i klia tru na tok bilong en i stret, na nau em i save, em i painim pinis tok i tru.

“Mekim Wok Long Planti Hap”

Planti man bilong ol narapela hap em ol i sindaun long Beljam, ol i gat bisnis o ol i mekim wok long ol haus embasi samting. Planti ol i save stap inap sampela yia tasol na ol i lusim Beljam, na i olsem wok bilong ol Witnes long autim tok na stadi wantaim ol long Baibel i lus nating. Tasol Baibel i tok: “Yu mas mekim wok long planti hap, na bihain bai yu kisim gutpela pe.” (Saveman 11:⁠1) Olsem na planti taim ol Witnes i lukim ol gutpela samting i kamap long wok bilong ol.

Wanpela meri bilong Amerika em i save kisim ol nius long wanpela Witnes. Bihain Witnes i tokim em long gutpela save em inap kisim sapos em i stadi long Baibel, na Witnes i tok, em i laik stadi wantaim em. Meri i orait long dispela na kwiktaim em i kisim save na em i wok long kamap strong. I no longtaim na em i kisim save olsem lotu i tru na lotu giaman i narapela narapela kain. Olsem na em i rausim ol piksa bilong lotu i stap long haus bilong em. Tasol bihain em i mas i go bek long Amerika. Olsem wanem? Em i lusim stadi na i no wok moa long kamap strong? Dispela Witnes i kirap nogut taim wanpela Witnes long Amerika i telefon long em na i tok, dispela meri i wok yet long stadi taim em i lusim Beljam, na em i dediket long God Jehova na em i kisim baptais pinis! Na tu, em i mekim wok autim tok olsem painia haptaim.

Na i olsem tu long dispela meri India, em Kasi, na meri Filipin, em yumi stori pinis long tupela. Taim Kasi i go bek long India, em wantaim man bilong em i kirap stadi gen long Baibel. Bihain tupela i dediket long God Jehova na ol i autim tok. Long hap bilong ol i no gat sampela Witnes Bilong Jehova moa, olsem na ol i wokim miting olsem Buk-Stadi bilong Kongrigesen long haus bilong ol. Kasi i gat sik, tasol em i mekim wok painia haptaim na em i mekim 6-pela Baibel-stadi; i gat 31 manmeri i insait long ol dispela stadi. Na dispela meri Filipin tu, bihain em i go long Amerika na em i wok long stadi, na bihain em i dediket long God Jehova na em i kisim baptais, na em i kamap wanpela painia oltaim. Planti gutpela samting olsem i wok long painim ol manmeri i autim tok bilong Kingdom long hap bilong Beljam.

Planti Tok Ples

Bilong inapim dispela wok bilong autim tok long ‘olgeta kain man’ long Beljam, brens-ofis i mas i gat ol buk samting bilong Baibel long kain kain tok ples, winim wan handet. Long nau long Beljam i gat ol kongrigesen long 10-pela tok ples. I gat 341 kongrigesen, na 61 i bilong ol narapela narapela tok ples. I gat 26,000 i autim tok bilong Kingdom, na 5,000 bilong ol i bilong ol narapela kantri. Wanpela kongrigesen i gat ol man na meri bilong 25 kantri. I gat kain kain lain i save go long ol dispela miting, na ol i gat kain kain skin na pasin na sindaun. Tasol ol i pas gut wantaim olsem brata brata na narapela i laikim tumas narapela, na dispela i kamapim klia olsem ol i disaipel Kristen tru.​—⁠Jon 13:​34, 35.

I gat bikpela wok tru long autim tok long ol dispela planti lain long Beljam ol i gat kain kain tok ples, olsem na sampela Witnes i kirap lainim ol strongpela tok ples olsem tok ples Turki, Arebia, Saina, na sampela moa. Dispela hatwok bilong ol i kamapim gutpela samting tru.

Taim ol Witnes i laik autim tok long ol lain Arebia, ol i save kamapim sampela tok bilong Baibel i save helpim sindaun bilong man o stretim sampela hevi, na long dispela rot ol inap harim gut tok bilong Baibel. Wanpela Witnes i toktok wantaim wanpela profesa bilong Arebia, tasol Witnes i no inap painim em moa inap 3-pela yia. Witnes i no les​—⁠em i wokim liklik pas bilong dispela profesa na em i raitim sampela askim long ol tok bilong Baibel. Profesa i kirap nogut long dispela pas na nau em i kirap skelim ol tok bilong Baibel. Ol dispela tok i kirapim tru bel bilong em, olsem na em wantaim meri bilong em (em tupela i bilong lotu Muslim) ol i makim hap taim long sampela nait bilong kaunim Baibel wantaim.

I gat bikpela lain Saina i save stap long ol biktaun bilong Beljam. Planti ol i no bilip olsem God i bin wokim olgeta samting, na ol i no bilip olsem Baibel em i Tok bilong God. Tasol ol i laik save long tok bilong en. Na tu, ol i save laik tru long kaunim buk. Insait long sampela de tasol ol bai pinisim ol buk na nius bilong Baibel em ol i kisim long ol Witnes, o ol bai pinisim bikpela hap bilong Baibel. Sapos bel bilong ol i stret, orait strong bilong tok bilong God bai kirapim ol long stadi na kamap strong.

Wanpela meri Saina i hatwok long bilip olsem wanpela Man i bin wokim olgeta samting. Tasol long namba tu taim bilong em long stadi, aiwara i kamap long ai bilong em na em i tok: “Nau mi bilip tru long God Jehova, long wanem, inap 40 man i bin raitim Baibel na ol i bin mekim insait long 1,600 yia, tasol narapela tok i no pait wantaim narapela tok​—⁠olgeta i stret wantaim, na i gat wanpela bikpela as tok bilong en; olsem na mi save, God Jehova tasol i bosim wok bilong raitim Baibel!”

Wanpela Witnes i bungim narapela meri Saina long bas, na meri i askim em: “Yu wanpela Kristen?” Nau em i tokim Witnes, planti lain i tok ol i Kristen, tasol bilip bilong ol i narapela narapela kain, na em i no amamas long dispela. Witnes i tok, em i wanbel long dispela tok, tasol olgeta tok bilong Baibel i stret wantaim, na narapela tok i no pait wantaim narapela tok. Orait, nau meri i mas lusim bas, tasol em i givim atres bilong em long Witnes. Bihain Witnes i go lukim em, na meri i tok: “Em i namba wan taim mi bin kisim bas bilong i go long yunivesiti! Sori tru! Wanpela yia olgeta i lus!” Em i amamas tru long stadi long Baibel, maski sampela mun bihain bai em i go bek long Saina.

Ol dispela gutpela samting i kamap i lainim ol Witnes long Beljam long wanpela samting, olsem: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut, o tupela lain wantaim bai i kamap gut.” (Saveman 11:⁠6) Tru tumas, ol Witnes i mekim bikpela wok tru bilong lainim ol dispela strongpela tok ples, na kisim save long pasin na tingting na sindaun bilong ol dispela kain kain lain bilong helpim ol long kisim gut ol tok bilong Baibel, tasol gutpela samting tru i kamap long dispela wok bilong ol. Olsem na yumi save tru, “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”​—⁠Aposel 10:​34, 35.