Ripot Long Wok Bilong Kingdom
Nau i Stap Bilong Em i Gat As Bilong En
JISAS i tok em i save long ol sipsip bilong em. (Jon 10:14) Sapos man i gat gutpela bel na em i laikim tru bel isi na stretpela pasin, em bai pilim tru ol tok em lain bilong Jisas i autim long em. Nau i stap bilong em bai i gat gutpela as bilong en. Dispela samting i bin painim wanpela meri long Beljam. Em i stori olsem:
“Taim ol Witnes Bilong Jehova i kam long haus bilong mi na paitim dua, mi stap bel hevi tru na mi tingting long bagarapim skin bilong mi. Orait, ol Witnes i tokim mi long rot bilong stretim ol hevi bilong dispela graun na mi laikim dispela tok. Tasol ol i tok, God yet bai insait long dispela wok, na mi no amamas long dispela tok. Mi bin lusim lotu inap 8-pela yia pinis, long wanem, mi lukim olsem ol i man bilong tupela maus. Tasol taim mi harim tok bilong ol Witnes, mi save em tok i tru, na bihain mi save tu, sapos yumi no bilip long God, i stap bilong yumi bai i nogut.
“Tasol sori tru, ol Witnes i kam tupela o tripela taim na mi no lukim ol gen. Bel bilong mi i bagarap stret. Long olgeta de mi pinisim tupela karamap smok, na mi kirap kisim ol drak. Mi laik toktok wantaim bubu i dai pinis, olsem na mi kirap mekim wok bilong ol spirit nogut. Tasol wanpela taim long nait ol spirit nogut i mekim nogut long mi. Mi stap wanpis na mi pret nogut tru! Ol i mekim olsem inap sampela mun. Long nait mi pret tru long i stap wanpis.
“Orait, wanpela taim mi laik wokabaut liklik, tasol long dispela taim mi bihainim narapela rot. Mi kamap long wanpela hap ol i wok long sanapim wanpela traipela haus. Mi kirap nogut long lukim wanpela bikpela lain tru i stap. Mi go klostu na mi save, em ol Witnes i wokim wanpela Haus Kingdom. Mi tingim dispela taim ol i bin kam lukim mi na mi ting, sapos olgeta man bilong graun i stap wankain olsem dispela lain, em bai gutpela tru.
“Mi laik tru bai ol Witnes i kam lukim mi gen, olsem na mi toktok wantaim sampela i mekim wok long dispela haus. Mi beten long God, na tenpela de bihain dispela man pastaim em i bin kam lukim mi, nau em i sanap long dua. Em i tok em i laik stadi gen wantaim mi, na mi amamas long dispela. Em i tokim mi long i go long ol miting long Haus Kingdom, na mi orait long en. Mi go long miting na mi kirap nogut! Mi bin wok long painim kain lain olsem, em narapela i laikim tru narapela na ol i stap amamas. Nau mi painim ol pinis!
“Kirap long dispela taim mi go long olgeta miting. Tripela wik bihain mi lusim smok. Mi tromoi olgeta buk bilong ol spirit nogut na ol musik nogut bilong Satan, na nau mi pilim olsem ol spirit nogut i no bosim mi strong olsem bipo. Mi stretim i stap bilong mi na bai em i wankain olsem lo bilong Baibel i makim, na tripela mun bihain mi kirap autim tok. Sikspela mun bihain mi kisim baptais. Tupela de bihain mi kirap mekim wok painia haptaim.
“Mi tenkyu tru long Jehova long olgeta gutpela samting em i bin mekim long mi. Tru tumas, nem bilong Jehova i olsem strongpela haus, na mi bin ran i go long en na em i lukautim mi. (Sindaun 18:10) Nau mi gat wankain tingting olsem man bilong raitim Song 84:10, em i tok: ‘Sapos mi stap wanpela de tasol long haus bilong yu, em i winim tru 1000 de long narapela ples. . . . Mi no laik i stap long haus bilong ol man nogut.’ ”
Em nau, dispela meri i painim pinis gutpela as bilong i stap bilong em. Ol narapela tu inap mekim olsem sapos ol i gat gutpela bel na ol i wok long painim Jehova.