Askim

Long Rom 9:​3, aposel Pol i tok: “Sapos Krais inap bihainim laik bilong mi, mi ken [beten] . . . askim em long rausim mi long lain manmeri bilong en, bai ol brata bilong mi i ken kisim ples bilong mi.” Olsem wanem? Ating Pol i laik tok olsem em i orait long lusim laip bilong em bilong helpim ol wantok Juda?

Jisas em i nambawan gutpela piksa long laikim tru ol man. Em i orait long lusim laip bilong em bilong kisim bek ol sinman bilong graun. Taim em i autim tok, em i wok strong long helpim ol wantok Juda bambai planti ol i ken kisim ol gutpela samting bilong ofa bilong em. (Mak 6:​30-34) Tasol maski ol i no laik harim na ol i birua long tok bilong Jisas long kisim bek ol man, Jisas i tingim yet ol Juda na em i laikim yet ol. (Matyu 23:37) Em i ‘soim yumi pinis dispela pasin bilong em, bai yumi ken bihainim.’​—⁠1 Pita 2:⁠21.

Tasol olsem wanem? Ol sinman bilong graun inap bihainim pasin bilong Jisas long laikim tru ol man? Ol inap. Aposel Pol i olsem gutpela piksa long dispela samting. Em i tingim tumas ol wantok Juda, olsem na em i tok, “Sapos Krais inap bihainim laik bilong mi, mi ken [beten] . . . askim em long rausim mi long lain manmeri bilong en, bai ol brata bilong mi i ken kisim ples bilong mi.”

Pol i mekim kain tok olsem bambai ol i ken pilim tok bilong em. Jisas tu i bin bilasim wanpela tok bilong em long Matyu 5:​18, em i tok: “Inap long taim skai na graun i pinis, i no gat wanpela liklik hap tok bilong lo bai i lus. . . . Lo bai i stap olsem tasol inap long olgeta samting i kamap pinis.” Jisas i save, skai na graun i no ken pinis. Na Pol tu i save, Krais i no ken rausim em long lain bilong em, na i no olgeta Juda bai kam insait long lotu Kristen. Tasol Pol i laik tok, em bai mekim olgeta samting bilong helpim ol Juda bambai ol i ken bilip long Krais na God i ken kisim bek ol. Olsem na Pol inap tokim ol wanbilip Kristen: “Yupela i mas bihainim pasin bilong mi na wokabaut, olsem mi tu mi save bihainim pasin bilong Krais na wokabaut.”​—⁠1 Korin 11:⁠1.

Long nau tu ol Kristen i mas tingim tru ol man i no bilip, olsem Jisas na Pol i bin mekim. Maski ol man i no putim yau long tok yumi autim long ol, o ol i birua long yumi, yumi mas laikim yet ol na givim bel long helpim ol long kisim save long ol samting ol i mas mekim na bai God i ken kisim bek ol.​—⁠Matyu 22:39.