Baibel Bilong Ol Got—Wanpela Gutpela Wok Tru
OL GOT em sampela lain Jeman ol i bung wantaim na ating ol tumbuna i bilong Skandinevia. Bihain liklik long taim bilong ol aposel, ol i lusim ples na ol i go sindaun long ol longwe ples Rom i bosim long hap saut, klostu long solwara Blaksi na wara Danyub.
Namba wan buk ol man i wokim long wanpela tok ples bilong ol Jeman, em Baibel Got. Wan wan liklik hap tasol i stap yet. Tasol em wanpela Baibel i helpim gut ol man. Em i helpim ol olsem wanem?
Yulfilas—Misineri na Man Bilong Tanim Tok Bilong Baibel
Yulfilas (tok Got, Wulfila) em i tanim tok na wokim Baibel Got. Wanpela man bilong raitim stori bilong bipo (Filostorgias) em i tok, Yulfilas em i kamap long lain bilong ol kalabus ol Got i kisim long pait long Kapadosia, nau em i hap bilong Is Turki. Em i kamap long yia 311 samting, na 30 yia bihain Yusibias bilong Nikomidia i makim em i kamap pris, na em i lain long kamap misineri bilong skulim ol Got.
Wanpela man (Will Durant) i stori long Yulfilas, olsem: “Bilong skulim ol man na kirapim ol long bihainim lotu bilong em, em i wok strong long tanim Baibel Grik long tok Got. Em i tanim olgeta tok bilong Baibel; 1 na 2 King tasol, nogat.” (The Age of Faith) Long nau wanpela hap bilong buk Nehemia na sampela hap bilong Nupela Testamen i stap yet, na ol narapela hap rait bilong Baibel Got, nogat.
Ol i no save raitim tok ples Got; ol i kolim long maus tasol; olsem na Yulfilas i mas i gat save moa yet long mekim dispela wok. Em i mas tanim tok na painim rot bilong raitim ol dispela tok. Ol man bilong lotu long bipo i tok, em yet i kamapim ol 27 leta bilong raitim tok Got, na as bilong en em ol leta bilong raitim tok Grik na tok Rom. Na wanpela buk i tok, “em i tingim sampela tok Jeman bilong kamapim bilip Kristen na ol man i save kolim yet.”—The New Encyclopædia Britannica.
Baibel Got Long Pastaim
Yulfilas i pinisim wok bilong em paslain long yia 381, na em i dai tupela o 3-pela yia bihain. Ol man i laikim tru Baibel em i wokim. Wanpela buk i tok: “Ol Got i go sindaun long Spen na Itali ol i save mekim wok long dispela Baibel.” (The Encyclopedia Americana) Ol i bin wokim planti bilong dispela Baibel, olsem na planti liklik hap rait bilong en i stap yet. Yumi ken save, ol i bin raitim sampela long ol ples bilong raitim buk long ol haus bruder long taun Ravena na Verona long hap ol Got i bosim.
Lain Got i pinis long yia 555 samting, long taim King Jastinian Namba Wan i daunim gen Itali. Taim lain Got i pinis, “tok ples Got na ol pasin bilong ol Got i pinis long Itali; wan wan samting tasol i stap bilong givim save long ol man long ol Got. Ol man i no tingim moa ol buk bilong ol Got; ol i brukim na wok long rausim rait long ol pes bilong en bambai ol i ken raitim narapela tok long dispela kain pepa i gat bikpela pe.”—Tönnes Kleberg i tok olsem.
Olpela Rait i Stap Yet
Sampela rait bilong pastaim ol i no rausim gut long pepa na maski em i no klia tumas, ol man inap lukim yet. Ol i painim pinis sampela olpela rait olsem na ol i kisim save pinis long ol dispela rait bilong pastaim. Wanpela olpela rait olsem (Codex Argenteus) i stap gutpela yet na i gat rait bilong fopela Gutnius long en, em Gutnius bilong Matyu pastaim na bihain Gutnius bilong Jon na Luk na Mak.
Ol i ting ol i bin wokim dispela gutpela olpela rait long haus bruder long taun Ravena long yia 500 samting. Insait bilong nem bilong en (Codex Argenteus) i olsem: “Buk Silva,” long wanem, ol i bin raitim long ing silva. Pepa i retpela na dispela i makim olsem ol i wokim dispela buk bilong wanpela king. Daunbilo long olgeta pes i gat 4-pela liklik blok na antap long en ol i raitim long gol nem bilong ol wan wan man bilong raitim Gutnius. Ol dispela liklik blok daunbilo i kamapim ol skripsa i gat wankain tok i stap long ol narapela Gutnius.
Wokim Gen Ol Tok Bilong Baibel Got
Taim lain Got i pinis, dispela “Buk Silva” i lus. Ol man i no lukim gen inap long yia 1650 samting, na long dispela taim ol i kisim save olsem em i stap long haus bruder Verden, klostu long biktaun Kolon, long Jemani.
Long yia 1569, ol i wokim Beten Bilong Bikpela long tok Got na ol man i tingim gen dispela Baibel ol i kisim beten long en. Long yia 1597, long namba wan taim, nem bilong dispela olpela rait (Codex Argenteus) i kamap long wanpela buk. Ol i kisim dispela rait long Verden na putim wantaim ol buk na piksa bilong king long Prak. Taim Pait Bilong Teti Yia i pinis long yia 1648, ol Swiden i winim pait na ol i kisim dispela olpela rait wantaim ol narapela gutpela samting na karim i go. Kirap long yia 1669 em i stap long haus buk bilong Yunivesiti Apsala, long Swiden.
Dispela olpela rait i gat 336 pes long pastaim, na 187 i stap long Apsala. Long yia 1970, long Speya, long Jemani, ol i painim wanpela pes moa—em laspela pes bilong Gutnius Mak i raitim.
Taim dispela olpela rait i kamap ples klia gen, ol saveman i wok long skelim ol rait bilong en bambai ol inap save long tok ples Got, em ol man i no mekim moa. Wanpela saveman bilong Jemani (Wilhelm Streitberg) i skelim olgeta olpela rait Got na ol rait ol man i bin wokim gen, na long yia 1908 em i bungim ol dispela hap rait na kamapim Baibel Got, em i gat ol tok bilong Baibel long tok Grik long wanpela pes na long tok Got long narapela pes.
Long nau dispela Baibel Got i helpim tasol ol saveman. Tasol taim wok bilong tanim Baibel long ol narapela tok ples i kamap nupela, Yulfilas i bin wokim dispela Baibel na ol man i laikim tru. Dispela wok Yulfilas i mekim i kamapim strongpela laik bilong em long tanim ol tok bilong God long wanpela tok ples ol man long taim bilong em i save long en. Em i ting, long dispela rot tasol ol Got inap save long tok i tru bilong ol Kristen, na tingting bilong em i stret.
[Piksa Kredit Lain long pes 9]
Courtesy of the Uppsala University Library, Sweden