Maski Ol i Ranaweman, Ol i Amamas Long Mekim Wok Bilong God

BIKPELA pait, hangre, bagarap, birua​—⁠sampela i lukim stori bilong dispela long ol nius tasol. Tasol planti i karim hevi bilong ol dispela samting long olgeta de. Ol Witnes Bilong Jehova i stap olsem bikpela lain brata long olgeta hap na ol i save, taim pait o bikpela bagarap i kamap, dispela inap givim hevi long sampela brata bilong ol tu. Na taim ol man i ranawe bilong abrusim bagarap, ating ol brata tu i mas ranawe.

Ol Witnes long sampela kantri long Afrika i bin karim ol kain hevi olsem inap planti yia. Planti ol i mas ranawe wantaim liklik hap kago ol inap karim. Wan wan inap kalap long wilwil samting na ranawe, tasol planti tru ol i mas wokabaut long lek i go i go inap planti de o wik bilong kamap long ples ol i laik i go long en.

Sampela i go long liklik taun Emboki, long Ripablik Sentral Afrika. Insait long sampela yia planti tausen man na meri​—⁠ol lapun wantaim ol yangpela​—⁠ol i kam long dispela taun. Sampela em ol brata sista Kristen bilong yumi, wantaim sampela man i laikim tok bilong ol Witnes. Ol Witnes long brens-ofis bilong Sosaiti Was Taua long nambawan biktaun Bangui, ol i laik tru long bungim ol dispela brata. Faipela taim ol i salim wanpela brata i go, na em i kisim mani na kaikai na klos na marasin i go long ol, em ol Witnes long Bangui i givim. Em longwe inap 1,130 kilomita. Ol Witnes i salim ol samting i go, ol i no gat planti mani, tasol ol i amamas long mekim ol samting ol inap mekim bilong helpim ol brata.

Go Long Emboki

Ol brata long brens-ofis i laik save wanem samting moa ol i ken mekim bilong helpim ol dispela ranaweman long skin na long spirit. Olsem na mi wantaim meri bilong mi i kalap long ka Lankrusa. Wanpela painia salim, em Symphorien, na meri bilong em i go wantaim mipela. Symphorien i save gut long rot, na em i save mekim tok ples Sande, em wanpela tok ples bilong ol ranaweman long Emboki. Mipela i raun inap 4-pela de olgeta na skin i les tru na mipela i kamap long Emboki.

Taim mipela i stap longwe yet inap 400 kilomita, mipela i kirap long brukim gutpela hap bilong bus i gat ol traipela diwai baubab. Mipela i lukim wan wan liklik ples i stap. Long dispela hap bilong rot meri bilong mi i kaunim 50 bris olgeta​—⁠planti ol i nogut, na mipela i no inap brukim sampela. Mipela i kisim ol hap diwai na plang i stap nabaut na stretim sampela bris; bihain mipela i redim ka bilong pulim, na beten, na go isi isi. Sapos i gat liklik ples i stap klostu, ol manki i save ran i kam bilong helpim mipela​—⁠na kisim liklik pe. Mipela i kirap nogut long ol inap painim kwik ol hap plang samting bilong bris insait long kunai na aninit long ol liklik diwai klostu. Mipela i ting olsem ol i save rausim ol plang long bris na haitim bambai ol man i kam long rot ol i mas singautim ol bilong helpim ol.

Tripela taim mipela i no larim ol manki i helpim mipela; mipela i lukim bris i nogut olgeta na mipela i no laik bagarap. Mipela i draivim ka i go lusim rot na i go daun brukim wara na ol ston na i go bek antap long rot gen long hapsait. Em taim bilong san na mipela i amamas; sapos em i taim bilong ren bai mipela i no inap i go, o ating bai mipela inap i go long helikopta tasol!

Emboki em wanem kain ples? Mipela i wok long tingim dispela samting taim mipela i raun long dispela longwe “piste,” em hap tok Frans bilong Ripablik Sentral Afrika i makim rot i gat wesan na bikpela ston na ol hap pipia ston​—⁠na planti tausen hul!

Long de namba 4, long belo, Symphorien i makim sampela haus kunai i stap namel long ol popo na ol gaden tapiok na em i tok: “Lukim! Em kirap bilong taun Emboki.” Mipela kirap nogut na tokim em: “Em Emboki? Tasol kem we?” Mipela i no lukim kem; mipela i lukim ol wan wan haus tasol i stap. Ol i liklik haus i gat rup morota, tasol ol i klinpela. Na i gat planti diwai na ol liklik diwai i stap. Ol man i save planim kaikai klostu long haus. Emboki i no olsem kem, olsem mipela i ting bai mipela i lukim; em i olsem wanpela bikpela ples, i go inap 22 mail.

Bungim Ol Brata

Ol brata long Emboki i save bai mipela i kam, tasol ol i ting bai mipela i lusim 5-pela de long rot. Taim ol i harim ka i kam, ol i ran i kam. Ol man meri pikinini i lusim kwik haus na banis na gaden na ran i kam gude long mipela. Pes bilong ol i lait, na ol i lap na sekanim mipela tupela o tripela taim sapos ol inap. Ol i holim ol bebi i kam klostu long mipela. Olgeta i laik tok gude long mipela; ol i amamas tru long lukim mipela i kam.

Mitupela meri i no save long tok ples, olsem na mipela i stap nating. Mipela traim kolim sampela tok Frans, na tok Sango, na tok Inglis, na tok Arap, tasol planti bilong ol dispela brata bilong yumi i save mekim, na kaunim, na raitim tok ples Sande tasol. Symphorien i mas tanim tok na stori long ol samting mipela i kam bilong mekim.

Mipela i go inap sampela mail moa na kamap long Haus Kingdom. Ol ranaweman long Emboki i gat kain kain lotu, tasol dispela em i namba wan “haus lotu” sampela ranaweman i bin wokim. Sampela brata moa wantaim pikinini bilong ol na sampela man i laikim tok bilong ol Witnes ol i kam sekanim mipela.

Ol brata i redim pinis tupela liklik haus morota bilong mipela. Haus i klin tru. Na i gat klinpela wara long ol baket i redi i stap. Mipela bin kisim wara na kaikai bilong mipela yet i kam, long wanem, mipela i ting bai ol i sot tru long kem na mipela i no laik putim hevi long ol brata. Mipela wok long rausim ol samting long ka na wanpela yangpela meri i kam askim mipela, mipela i laik bai ol i kukim kakaruk long paia o long sup. Mipela i no ting bai i gat kaikai olsem, na mipela i askim em, ol bai kaikai wanem samting wantaim kakaruk. Em i tok, tapiok o maniok. Olsem na mipela i tok, mipela i laik kaikai kakaruk ol i kukim long sup i gat kari. Dispela kaikai em inapim tru hangre bilong mipela long apinun. Tasol long olgeta de​—⁠long belo na apinun​—⁠ol i kam givim kaikai long mipela. Mipela i kirap nogut​—⁠ol i ranaweman, tasol ol i lukautim mipela, maski ol i no gat planti samting.

Liklik Kongrigesen i Stap Amamas

Mipela i stap long longwe ples, tasol mipela i stap wantaim ol 21 brata bilong mipela. Tupela tasol i baptais pinis taim ol i kam hia. Ol narapela i nupela man na ol i kam, na ol i stadi i go na kisim baptais insait long tupela yia i go pinis. Fopela moa i baptais long bikpela wara long dispela hap long taim mipela i stap.

Wanpela em Faustino. Taim em i no kam yet long Emboki, wanpela poroman i bin lainim em long ol as tok bilong Baibel. Faustino i laikim tru ol tok em i lainim. I no longtaim na em wantaim dispela poroman i kirap long autim tok, tasol ol man i birua long ol na putim ol long kalabus, long wanem, ol i autim tok bilong lotu bilong ol na “mekim ol manmeri i kirap nogut.” Long kalabus, poroman i pret na surik na em i lusim kalabus. Tupela mun bihain, ol i putim Faustino long kot na i klia ol man i bin sutim tok nating long em, olsem na em i lusim kalabus. Taim pait i kamap long ples bilong em, em i ranawe i go long Ripablik Sentral Afrika, na em i bungim ol brata na kirap gen long stadi. Em i baptais long Julai 1991, na long 1992 em i kamap painia oltaim.

Ol brata sista long liklik kongrigesen long Emboki ol i stap amamas na pren gut wantaim. Nau i gat wanpela painia salim na 21 pablisa. Tupela brata i save long tok Inglis i mekim wok elda na ol i save salim ripot long brens-ofis long Bangui. Mipela i ting bai mipela i lukim ol brata ranaweman ol i stap nogut tru, tasol nogat. Tru, ol i no gat planti samting bilong skin, tasol ol i no toktok planti o tingting planti long dispela. Ol i wokim pinis ol haus, na wokim gaden, na lukautim kakaruk. Ol i no stap gutpela olsem bipo, tasol ol i stap laip na bung wantaim ol brata Kristen.

I gat 17,000 inap 20,000 ranaweman ol i stap long Emboki, na long olgeta mun sampela moa i kam, olsem na i gat planti man ol brata i ken autim tok long ol. Mipela i go autim tok wantaim ol, na mipela i amamas long mekim. Planti taim ol i kaunim ol tok long Baibel Sande, em nem bilong God i stap planti taim long Olpela Testamen na sampela taim long Nupela Testamen. Ol dispela manmeri i no save kolim God olsem “Mboli” tasol (em “God” long tok Sande), nogat; ol i save kolim em “Yekova.” Planti taim ol i kolim em “Mboli Yekova,” olsem God Jehova. Long ol Baibel Talatala long planti narapela tok ples bilong ol Afrika ol i no bihainim dispela pasin. Ol i senisim nem “Jehova” na raitim ol narapela nem ol Afrika i save kolim long God, olsem “Nzapa” o “Nzambe.”

Ol Witnes i autim tok bilong Kingdom long Emboki na long olgeta hap bilong graun, olsem Jisas i tok profet pinis. (Matyu 24:14) Nau kongrigesen long Emboki i gat planti Baibel na buk na magasin na buklet na liklik nius long ol tok ples ol i laikim. Ating bihain bai i gat sampela buk moa long tok ples Sande.

Wet Long Kisim Gutpela Sindaun

Taim mipela i kamap pinis, long apinun mipela i putim ol piksa slait bilong Sosaiti long ol kibung long Isten Yurop, nem bilong en “Ol i Amamas Long Bung Wantaim Long Is Yurop na Litimapim Nem Bilong Jehova,” na long de bihain, long apinun, mipela i putim ol piksa slait “Ol i Helpim Planti Man Long Bihainim Stretpela Pasin Long Taim Bilong Pinis.” Mipela i sindaun ausait klostu long Haus Kingdom, na lukim ol dispela piksa. Skai i klia na mun i lait. Em gutpela tru! Planti handet ol i kam lukim, na mipela i amamas long soim long ol.

Long Mande mipela i redi bilong i go bek. Mipela bai raun 4-pela de gen long ol dispela rot nogut na brukim ol dispela 50 samting bris. Wanpela sista i strong long redim sampela kaikai bilong rot​—⁠tupela kakaruk moa, em i bin rapim galik long en na kukim long paia. Smel bilong en i gutpela tru na i pulap long ka taim mipela i raun i go long moningtaim. Long belo mipela i pasim ka long bus na amamas long kisim dispela kaikai, na mipela i tingim ol brata bilong mipela long Emboki. Ol i stap ranaweman, tasol ol i stap gut long wok bilong Jehova, na ol i wet long kisim gutpela sindaun long gutaim em bai kamap long nupela graun God i tok promis long en. (2 Pita 3:13)​—⁠Wanpela man i salim dispela stori i kam.