Ripablik Dominika—Ol Inap Painim Yet Ol Gutpela Samting

TAIM Kristofa Kolambas i yangpela yet, em i kirap raun long sip long biksolwara. Bihain em i painim sampela ailan nau ol i kolim Wes Indis. Long Disemba 1492, namba wan bilong lain sip bilong em, em Santa Maria, i pas long rip klostu long nambis bilong ailan Espaniola long hap bilong not, nau ol i kolim Hispaniola, em Haiti wantaim Ripablik Dominika. Kolambas i wokim namba wan setelmen bilong ol lain bilong Yurop long dispela hap, na em i wokim hariap strongpela banis bilong en na em i kolim La Navidat. Em i save kirap long dispela ailan na i go painim ol narapela kantri.

Kolambas i lukim wanpela gutpela lain Indian bilong dispela ailan, ol i kolim Taino; ol i gat gutpela skin na ol i save bilip long ol man na mekim gut long ol. Long dispela taim bipo i gat olsem 100,000 Taino i stap. Tasol ol dispela lain i bin kam kisim ailan, ol i tingting tasol long painim gol na ol i mekim nogut long ol Taino, olsem na i no longtaim na lain bilong ol i go liklik. Long yia 1570 ol i tok i gat 500 tasol bilong lain Taino ol i stap.

Long nau i gat kain kain lain na skin ol i sindaun long Ripablik Dominika, em ol tumbuna bilong ol i bin kam sindaun long dispela hap. Tasol ol i gat planti gutpela pasin kain olsem bilong ol Taino​—⁠ol i save mekim pasin pren na ol i no man bilong kros kwik. Na tu, ol i save bilip tru long God na ol i litimapim tok bilong Baibel, olsem na wok bilong ol Witnes Bilong Jehova long autim tok na skulim ol man i kamap gutpela tru long dispela kantri.

Ol i Painim Narapela Kain Samting

Namba wan lain misineri bilong Sosaiti Was Taua, em Lennart na Virginia Johnson, ol i bin kam long Ripablik Dominika long taim bilong gavman dikteta, Trujillo. Planti manmeri ol i laikim tru tok bilong Baibel tupela i autim long ol, na tupela i amamas. Tasol gavman wantaim ol lain i save stiaim tingting bilong gavman, em ol bikman bilong misin, ol i no amamas long wok bilong ol Witnes. Em nau, ol i kirap mekim nogut long ol Witnes, na dispela i traim bilip bilong ol dispela namba wan lain Witnes bilong Dominika. Tasol ol i sanap strong, na inap long nau planti man i save stori long strongpela bilip bilong ol​—⁠maski ol i mas i dai bilong holimpas bilip, ol i sanap strong na stap gut long God.

Long nau i gat olsem 16,000 Witnes Bilong Jehova long dispela kantri, na planti man i save long ol. Bipo liklik, 5-pela stesin bilong televisen long dispela kantri i kamapim video bilong ol Witnes, nem bilong en, Jehovah’s Witnesses​—⁠The Organization Behind the Name.a

Planti man i lukim dispela video na ol i kisim save long wok ol Witnes i mekim long ol bikpela na liklik taun na ol ples long bus. Orait bihain long dispela, ol Witnes i stretim wok bilong kisim gutnius bilong Kingdom i go long ol dispela hap bilong bus samting.

Ol i Kisim Gutpela Samting

Planti yangpela Witnes i gat strongpela skin na ol i givim bel long wok autim tok, ol i orait long go sampela sampela taim long ol dispela longwe hap na i stap tupela mun na autim tok. Gutpela samting tru i kamap long dispela wok. Long wanpela hap, tupela Witnes i painim planti manmeri ol i laik harim gutnius. Em i taim bilong mekim Memorial bilong tingim i dai bilong Jisas, olsem na ol Witnes i stretim rot bilong mekim dispela miting na ol i singautim ol man i kam. Planti ol i kam na haus bung i pulap, na ol i mekim miting. Taim miting i pinis, ol i kirap nogut long lukim narapela bikpela lain i sanap ausait na ol i wet long kam insait long haus. Orait, ol Witnes i singautim ol i kam insait na ol i mekim gen dispela miting. Nau i gat wanpela kongrigesen long dispela hap.

Taim ol manmeri bilong dispela kantri i kisim sampela save long tok i tru bilong Baibel, gutpela pasin na pasin pren bilong ol i save kirapim ol long givim dispela tok i tru long ol famili bilong ol na ol narapela man. Wanpela i stadi long Baibel na em i amamas tru taim em i winim mak bilong i go long ol haus na autim tok. Maski em i mekim 5-pela Baibel-stadi wantaim ol man long hap bilong em, em i amamas tru long em inap i go long ol haus na autim tok.

I gat planti hap ol Witnes i no save autim tok planti taim long en, olsem na ol i wok strong long autim tok long ol man long bas na ol man i save kam long taun bilong mekim wok bisnis o baim ol samting. Gutpela samting i kamap long dispela wok, na dispela i kamap klia long wanpela pas em brens-ofis i kisim. Em i pas bilong tupela man i stap long hap bilong bus na tupela i laik stadi long Baibel. Orait taim wanpela Witnes i go lukim tupela, em i lukim ol i manki tasol, i gat 10-pela na 11-pela krismas. Tasol olsem wanem ol i save, ol Witnes i save stadi wantaim ol man long Baibel? Ol i bin harim long wanpela man i bin go long taun bilong mekim wok bisnis. Em i bungim wanpela Witnes long rot na Witnes i givim wanpela liklik nius long em na i tok long stadi wantaim em long Baibel, no gat pe. Man i go bek long ples na em i givim dispela nius long wanpela yangpela meri i gat 12-pela krismas na i tokim em long pasin bilong ol Witnes long stadi wantaim ol man long Baibel. Orait meri i givim dispela tok long tupela manki hia, na kwiktaim tupela i raitim dispela pas. Ol Witnes i kirapim stadi wantaim tupela manki, na yangpela meri, na dispela man wantaim tupela pikinini bilong em.

Ol Yangpela i Givim Bel

Ol yangpela i go bikpela insait long tok i tru na ol narapela tu, ol i givim bel long lotuim God. Tamar na sista bilong em Keila i kisim baptais taim ol i gat 10-pela krismas, na tupela i kirap mekim wok painia taim ol i gat 11-pela krismas. Wendy Carolina i gat 12-pela krismas taim em i kisim baptais, na tupela yia bihain, long 1985, em i kirap mekim wok painia oltaim. Nau em i save gut long skulim ol man long Baibel, na em i mekim yet wok painia. Wanpela manki, em Jovanny, i kisim baptais taim em i gat 10-pela krismas, na taim em i gat 11-pela krismas em i kirap mekim wok painia oltaim, na nau em i gat 4-pela Baibel-stadi. Narapela manki i gat 10-pela krismas, em Rey, em i lukim wanpela buk ol Witnes Bilong Jehova i wokim, i stap namel long ol olpela buk wanpela man i oksenim. Rey i strong long mama i mas baim dispela buk bilong em. Em i kaunim olgeta, na em i laik painim sampela buk moa bilong Baibel. Em i mekim mekim na bihain em i painim brens-ofis. Nau em i mekim wok painia, na mama tu i mekim wok bilong God.

Wanem samting i bin helpim ol dispela yangpela na ol narapela yangpela tu long laikim tru ol samting bilong spirit? Planti yangpela, em papamama yet i bin stiaim tingting bilong ol. Yumi ken tingim Josué, em papamama Kristen i mekim wok tisa long skul. Wanpela wasman bilong raun i tokim papamama, i gutpela sapos ol inap helpim wanpela pikinini bilong ol long go insait long wok painia, na papamama i tingim Josué. Em i wanpela smatpela sumatin, olsem na ol i makim em long go long skul yunivesiti bilong lain long wok ensinia, na gavman bai baim skul. Em i stap wanpela yia hap long yunivesiti, na nau brens-ofis i singautim em i go wok wantaim wanpela lain i wokim sampela haus samting long brens-ofis bilong ol Witnes Bilong Jehova long Ripablik Dominika. Papamama i tok, ol i amamas tru long ol i bin givim pikinini bilong ol long mekim wok bilong Jehova.

Sampela Moa Ol i Kam

Jisas i bin tok: “Planti kaikai tumas i mau pinis long gaden, tasol i no gat planti wokman i stap bilong kisim.” Long dispela hap tu i wankain. (Matyu 9:37) Planti man i laik harim gutnius, olsem na sampela Witnes bilong ol narapela kantri ol i kam bilong helpim wok bilong painim ol gutpela gutpela samting bilong dispela kantri​—⁠em ol man i gat laik long painim tok i tru.

Sampela famili Witnes i lusim ailan Pueto Riko i stap klostu na ol i kam. Ol i kisim bikpela amamas long autim tok long ol narapela narapela hap bilong Ripablik Dominika. Wanpela papa i tok: “Taim yumi inap kamapim bilip bilong yumi long ol man i laik harim, yumi pilim olsem tok i tru i gat bikpela strong!” Tupela meri, em Cecilia bilong Swiden na Nia bilong Amerika, ol i kam wantaim sampela yangpela painia moa. Ol i wok long ol ples long hap bilong bus long ples maunten na i no hat tumas. Na long narapela hap long ples maunten i gat ol diwai pain long en, tupela famili bilong Kanada i wok wantaim wanpela famili bilong Ripablik Dominika ol i bin lusim Amerika na kam bek long ples. Ol i insait long wanpela liklik kongrigesen na ol inap i go autim tok long ol man em ol Witnes Bilong Jehova i no bin go lukim ol inap 10-pela yia samting.

Alfredo na Lourdes wantaim 5-pela pikinini bilong ol i lusim Nu Yok Siti na kam bek long ples na ol i insait long wanpela liklik kongrigesen long wanpela naispela taun tru long nambis, em ol turis i save kam long en. Ol i amamas long mekim wok bilong painim ol man i gat gutpela bel na helpim kongrigesen long i go bikpela. Roland em i bilong Ostria na em i man bilong wok long kompyuta, na em wantaim meri bilong em Yuta i go sindaun long hap bilong saut long dispela kantri, long ples i hat na i no gat bikpela ren. Ol i amamas long lukim wanpela nupela kongrigesen i kamap long dispela hap. Long wanpela taun klostu, 3-pela sista painia na tupela marit bilong Kalifonia i salim tok olsem planti man tru i laik stadi long Baibel, tasol ol i no inap stadi long olgeta. Olsem na ol i tokim ol dispela man long kam long ol miting long Haus Kingdom na putim nem bilong ol long lista bilong ol man i laik stadi long Baibel. Brata bilong Yuta, em Stefan, em i wok wantaim wanpela liklik kongrigesen long naispela taun Samana long hap bilong not-is. Insait long tupela yia, namba bilong ol man bilong autim tok i go bikpela tru, inap dabol.

Ol dispela lain na ol narapela i bin kam bilong helpim wok autim tok ol i kamapim klia pasin sori bilong ol na pasin bilong givim bel long dispela wok. Ol i bin lusim kantri bilong ol na i kam long nupela kantri em ol man i gat ol narapela kain pasin na sindaun; na tu, planti ol i mas lainim nupela tok ples bambai ol i ken givim kaikai bilong spirit long ol man i olsem sipsip. Ol i mekim olsem na ol man bilong dispela hap i harim gut tok ol i autim long ol.

Sampela famili bilong Dominika ol i bin lusim gutpela sindaun bilong ol long ol biktaun na ol i go sindaun long hap bilong bus. Ol i bin kisim bikpela amamas long en​—⁠ol i painim pinis ol gutpela gutpela samting, em ol man i gat laik long painim tok i tru.

Ol lain i bin kam olsem 500 yia bipo bilong painim ol gutpela gol samting, ol i no givim ol gutpela samting long ol man bilong dispela hap​—⁠ol i givim bikpela pen na hevi long ol lain Taino na kalabusim ol. Na ol dispela gutpela gol samting ol i painim pinis i no bin helpim Kolambas tu. Bihain ol polis i holim em na pasim sen long han lek bilong em na rausim em i go bek long Spen olsem wanpela kalabus.

Long nau sampela i wok long painim ol gutpela gutpela samting bilong dispela ailan, i winim tru ol samting lain bilong Kolambas i bin painim. Ol Witnes Bilong Jehova i wok long painim ol man i gat gutpela bel na i laik harim gutnius bilong Kingdom. Olsem na long nau planti manmeri i amamas long i stap fri, em Baibel tasol inap helpim ol long mekim olsem; na dispela lain i wok long go bikpela bikpela. (Jon 8:32) Dispela kantri i gat ol gutpela maunten na wara i kalap na ol gutpela nambis samting, tasol ol i wetim taim em bai kamap wanpela ailan paradais long nupela taim em bai kamap long olgeta hap bilong graun.​—⁠2 Pita 3:⁠13.

[Ol Futnot]

[Mep long pes 24]

(Bilong save ol dispela rait i stap we long pes, lukim buk o magasin)

Ripablik Dominika

[Ol Piksa long pes 24, 25]

Ol yangpela i mekim wok bilong autim tok long olgeta de na ol i painim ol gutpela samting bilong spirit