Mipela i No Ken Lusim Wok!

“MIPELA NO KEN LUSIM WOK!” Yumi pilim tru dispela samting taim yumi go lukim wanpela famili long Tokyo, Japan, ol i sindaun wantaim long wanpela haus. Long dispela famili i gat 22 man na meri, krismas bilong ol i olsem 70 samting. Ol i no wanblut, tasol ol i gat wankain wok—em wok misineri, na dispela i mekim na ol i pas gut wantaim olsem wanpela famili. Ol i bin i stap planti yia pinis long wok bilong autim tok long olgeta de, na sapos yumi bungim ol yia olgeta wan wan i bin mekim dispela wok, em i kamap olsem 1,026 yia! Tripela bilong dispela famili, mama i bin karim ol long 1910, na krismas bilong ol i winim bilong ol narapela. Sevenpela i bin kirap autim tok long olgeta de taim ol i yangpela yet. Na 9-pela i bin insait long wok bilong autim tok bilong Kingdom taim dispela wok i kirap nupela long Japan bihain long Namba 2 Pait, na ol i lukim dispela wok i go bikpela.—Aisaia 60:22.

Dispela haus ol i sindaun long en i gat 6-pela plua, na bipo em i haus brens bilong Sosaiti Was Taua. Yumi pilim tru olsem dispela haus em i ples bilong strongim bel bilong man, long wanem, olgeta misineri long dispela famili i gat wankain tingting na laik. Ol i lapun, olsem na klostu olgeta i gat sampela sik samting bilong ol lapun na skin bilong ol i no strong tumas, tasol ol i no gat tingting long lusim wok misineri. Ol Witnes long Japan i bin mekim wok bilong stretim gut dispela haus, na ol i wokim wanpela Haus Kingdom daunbilo na ol i putim wanpela lift bilong karim ol man i go antap long ol narapela narapela plua.

Samting i Mekim Ol i Amamas

Ol dispela misineri i bin i stap long dispela ples wok bilong ol inap planti planti yia, olsem na em i olsem ples tru bilong ol. Wanpela long dispela famili i gat bikpela krismas tru em i tok: “Long yia i go pinis mi go bek long Ostrelia bilong lukim kibung distrik, tasol taim mi stap tupela wik pinis mi laik i kam bek!” Ol i save laikim tru ol manmeri ol i autim tok long ol na skulim ol, na dispela laik i kamap strong tru long bel bilong ol. Olgeta misineri i save laik tru long kisim pas bilong sampela ol i bin skulim ol, na sampela i save telefon long ol, na dispela i kirapim tingting bilong ol na ol i tingim ol wok ol i bin mekim bipo.

Dispela i kamap, long wanem, ol i bin wok strong tru long wok bilong ol. Ol i laikim tumas Jehova, na dispela i kirapim ol misineri long wok strong long autim tok long kain kain taim—long gutpela taim na taim bilong hevi tu. (Skelim wantaim 2 Timoti 4:2.) Wanpela misineri i bin wok long Japan inap 37 yia, em Vera MacKay, em i tok: “Mipela i bin lainim skin bilong mipela olsem mipela mas amamas tasol, long wanem, mipela i mekim wok bilong Jehova. Maski i no gat wanpela man i kam opim dua, mipela i stap bilong autim tok bilong Jehova long ol.”

Twelpela misineri i no bin marit, tasol ol i amamas long ol inap mekim wok bilong Bikpela na i no gat wanpela samting bilong pulim nabaut tingting bilong ol. (1 Korin 7:35) Wanpela em Gladys Gregory, em i bin mekim wok misineri inap 43 yia pinis. Em i tok: “Mi laik lusim bikpela hap taim moa long mekim wok bilong Jehova, olsem na mi go insait long wok painia, na bihain mi go long Gileat [Wastaua Baibel Skul Bilong Gileat], na bihain mi kirap mekim wok misineri. Mi no bin mekim tok promis long i stap singel, tasol mi stap olsem i kam inap long nau, na mi wantaim sampela Witnes moa, mipela i no bel hevi long dispela samting.”

Ol i Orait Long Senisim Sindaun

Sampela manmeri, taim ol i go lapun ol i no laik senisim sindaun bilong ol—ol i strong long i stap olsem tasol. Tasol ol dispela misineri ol i orait long mekim. Lois Dyer, Molly Heron, Lena na Margrit Winteler, ol i bin i stap long wanpela liklik haus misineri long narapela hap bilong Tokyo. Ol i sindaun long dispela hap inap 20 yia samting na ol i save gut long ol manmeri i sindaun long dispela hap. Long hap ol i autim tok long en, Lena na Margrit Winteler i gat 40 manmeri ol i save kisim ol nupela nupela nius long olgeta taim, na Molly wantaim Lois i gat 74 i save kisim ol nupela nupela nius. Orait, bihain Sosaiti i tok ol i laik bai ol misineri i go sindaun long haus misineri i gat 6-pela plua long en na i stap namel tru long Tokyo. Lena i tok: “Pastaim mi bel hevi stret.” Tasol ol i lain long mekim wok na sindaun long dispela nupela hap. Orait nau ol i ting olsem wanem long dispela? Lena i tok: “Mi amamas tru. Nau i gat tupela brata bilong Betel ol i save kukim kaikai bilong mipela na klinim haus. Sosaiti i save lukautim gut mipela.” Olgeta misineri long dispela famili i wanbel long tok bilong Lois, em i tok: “Long pasin sori oganaisesen bilong Jehova i save lukautim gut mipela, na dispela i helpim mipela long sanap strong na i no les.”

Bikpela senis i kamap long sindaun bilong Norrine Thompson tu. Em i tok: “Inap 15 yia mi save raun wantaim man bilong mi [em bilong Nu Silan] long wok distrik taim olgeta hap bilong Japan em i wanpela distrik tasol.” Tasol sik i kisim man bilong em na bihain wanpela bikpela traim tru i painim em—man bilong em i dai. Dispela hevi i bin kamap 18 yia bipo. Norrine i tok: “Long dispela taim, samting i bin helpim mi long i stap long wok misineri, em bikpela pasin sori ol brata long olgeta hap bilong Japan i bin mekim long mi, na tu, mi save beten oltaim na wok strong long wok bilong autim tok.”

Karim Hevi Bilong Sik

Man bilong lukautim haus misineri, em Albert Pastor, em i tok: “Planti ol i gat sampela kain sik samting, tasol ol i amamas, na dispela laik bilong ol long mekim yet wok misineri em i wanpela gutpela pasin tru bilong ol.” Sosaiti i salim wanpela dokta na meri bilong em, em wanpela nes, ol i kam sindaun long dispela haus bilong lukautim ol misineri.

Tripela yia i go pinis, wanpela hevi i bin painim Elsie Tanigawa, em i bin i stap long namba 11 klas bilong Skul Gileat—ai bilong em long han kais i bagarap wantu tasol. Orait, 4-pela mun bihain ai bilong em long han sut em tu i go nogut. Em i tok: “Sampela taim mi save bel hevi liklik, long wanem, mi no inap mekim bikpela wok olsem bipo mi bin mekim. Tasol Sosaiti i helpim mi gut long planti samting, na poroman bilong mi long autim tok na ol narapela tu i save helpim mi, olsem na mi kisim amamas yet long mekim wok bilong Jehova.”

Na inap sampela yia, planti hevi bilong sik i bin painim Shinichi Tohara wantaim meri bilong em Masako, em ol i wanklas bilong Elsie long Gileat. Shinichi em i save gut tru long mekim ol tok, tasol nau ai bilong em i go nogut na em i no inap lukim ol rait bilong em long pepa. Nau long dispela taim ol dokta i bin katim em bilong stretim sampela bikpela na liklik sik, tasol ai bilong em i save lait taim em i stori long wanpela Baibel-stadi bilong em, em wanpela lapun i gat 90 krismas.

Maski ol dispela misineri i gat ‘wanpela nil i save sutim skin bilong ol,’ ol i gat wankain tingting olsem aposel Pol long dispela, em i bin tok: “Taim mi no gat strong, long dispela taim tasol mi gat strong tru.” (2 Korin 12:​7-10) Na tru tumas, ol dispela misineri i gat strong tru! Long olgeta de long 7 klok moningtaim, ol i redi long bung wantaim bilong mekim lotu. Taim ol i kaikai pinis, ol misineri i gat strongpela skin liklik ol i save go autim tok.

Richard na Myrtle Shiroma ol i save go autim tok long olgeta taim. Sampela taim sik strok i bin kisim Myrtle, as bilong dispela em wanpela sik (arteriosclerosis) i bin kamap long kru bilong em long 1978, tasol em i raun wantaim man bilong em, em wanpela wasman bilong raun, i kam inap long Novemba 1987. Nau Richard i gat 70 krismas, na em yet i save helpim Myrtle long olgeta samting. Em i save kirap long 5 klok moningtaim, kirapim Myrtle, wasim em, bilasim em, na givim kaikai long em long spun. Orait nau em i save putim meri long wilsia na subim i go autim tok long ol haus inap wanpela aua samting, na bihain tupela i go autim tok long ol manmeri i wetim bas. Tupela i mekim dispela wok long olgeta de. Nau Myrtle i no inap toktok moa, tasol laspela tok em i bin mekim, em Dendo, dendo, long tok Japan i olsem “Autim Tok, autim tok.”

Pikinini meri bilong em, em Sandra Sumida, em i kam i stap long haus misineri bilong helpim ol. I no longtaim na man bilong Sandra i bin dai long hat-atek. Sandra wantaim man bilong em i bin mekim wok misineri long Guam, na em i amamas long Sosaiti Was Taua i tingim em na i salim em i go bek long Japan na mekim wok misineri long dispela hap. Em i tok: “Oltaim mi bin tingting olsem mi stap long Guam na mi no mekim planti wok bilong helpim papamama. Susa bilong mi, Joanne, i bin lukautim tupela long dispela haus. Olsem na taim rot i op na mi inap i kam bek, bel bilong mi i gutpela. Man bilong mi i bin dai wantu tasol, na dispela wok bilong helpim tupela i daunim bel hevi bilong mi.”

Ol i Wok Yet

Ol dispela misineri i pilim hevi bilong ol lapun, tasol ol i no lusim strongpela tingting bilong mekim wok misineri. (Song 90:10; Rom 5:12) Jerry na Yoshi Toma ol i insait long namba wan lain misineri bilong Skul Gileat long i kam long Japan, na long nau tupela i save autim tok yet long hap bilong ol bisnis samting long Sibuya, long biktaun Tokyo. Yoshi i tok: “Taim mitupela i kam long dispela haus i gat tupela plua em i bin sanap long dispela hap long 1949, mipela i save go autim tok long olgeta wan wan hul ol i bin wokim insait long maunten bilong hait long en. Tasol nau Tokyo em i wanpela traipela biktaun tru. Nau mitupela i lapun pinis, na mipela i no inap mekim bikpela wok olsem bipo mipela i bin mekim, tasol taim mipela i autim tok pinis na kam bek long haus, bel bilong mipela i gutpela.”

Lillian Samson em i mekim wok misineri long Japan inap 40 yia pinis na em i save amamas tru long mekim wok autim tok. Em i tok: “Nau mi save helpim wanpela lapun meri i gat 80 krismas, em poroman bilong mi, Adeline Nako, i bin stadi wantaim em. Nau poroman bilong mi i go bek long Hawaii bilong lukautim mama bilong em i gat sik. Dispela meri i lusim pinis pasin bilong lotuim ol tumbuna, na nau em i kamap wanpela pablisa bilong Kingdom. Em i go long haus lotu na tokim meri bilong pris, ‘Mi tanim bel pinis na kamap Kristen!’ ” Lillian i bin kisim ol dispela kain amamas, olsem na em i no bel hevi long samting em i bin mekim taim em i gat 19 krismas—em i bin lusim wok mani bilong em na em i kirap mekim wok painia.

Ruth Ulrich na Martha Hess, tupela i bin poroman wantaim long wok misineri inap 45 yia pinis, na ol i stap long dispela haus misineri inap 35 yia. Ol manmeri i sindaun long hap tupela i autim tok long en ol i save gut tru long tupela. Wanpela wasman sekit i bin askim Martha: “Mi laik kisim pes bilong yu pastaim na bai mi go long ol haus na autim tok!” Ol man i save gut long pes bilong Martha na taim ol i lukim em ol i putim han kwik bilong kisim nius, tasol wasman sekit i hatwok long kirapim tok wantaim ol man.

Wanpela meri Ruth i save tilim nius long em, em i gat wanpela sik na em i no inap kaunim buk. Tasol oltaim em i save kisim ol nius long Ruth, na em i kisim buk Mankind’s Search for God. Ruth i tingting planti—em bai go yet long dispela meri na bringim nius long em o nogat, long wanem, i olsem i no gat wanpela man i kaunim. Orait, wanpela taim man bilong meri i holim dispela buk long han bilong em na em i kam long Ruth na i tokim em: “Dispela em i wanpela gutpela buk tru! Mi kaunim tupela taim pinis.” Ruth i kirapim Baibel-stadi wantaim em na meri bilong em.

Dispela haus misineri yet i save pulim ol man i kam. Wanpela taim long apinun wanpela yangpela man i kam long haus na em i tok: “Mi harim olsem sapos mi kam long dispela haus, ol inap helpim mi long kisim save long Baibel.” Ol i kirapim Baibel-stadi wantaim em. Em i save kukim kaikai long wanpela haus kaikai bilong ol Saina, na em i wok wantaim wanpela meri em kongrigesen i bin rausim em na em i stap olsem inap planti yia. Wanpela pablisa i bin kam long dispela haus kaikai na em i tilim sampela nius, na bihain wanpela i putim long haus kuk. Dispela yangpela man bilong kukim kaikai em i laikim ol dispela nius, na em i givim sampela askim long dispela meri bipo em i wanpela Witnes. Meri i no inap bekim ol dispela askim, na em i tokim yangpela man long i go long haus misineri na lukim sampela misineri. Orait, nau dispela man em i wanpela wokman bilong kongrigesen na em i wanpela painia. Bihain kongrigesen i kisim bek dispela rauspela meri, na bihain moa em tu i kamap painia oltaim.

Olgeta misineri long dispela haus ol i pilim tru ol gutpela pasin Jehova i bin mekim long ol. Ol i bilong Hawaii, Kanada, Ostrelia, Swiselan, Yunaitet Stets, na 11-pela ol i bin insait long namba 11 klas bilong Skul Gileat o ol klas paslain long en. Ol i bin lukim wok bilong Kingdom i go bikpela tru long Japan, na ol i gat wankain tingting olsem bilong King Devit, em i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai.” (Song 37:25) Ol dispela misineri i pilim tru sori bilong God, em i bin lukautim gut ol, olsem na ol i tingting pinis long ol i no ken lusim wok—ol bai wok yet long mekim wok bilong Jehova.