Ol Gutpela Famili i Helpim Wok i Go Bikpela Long Sri Lanka

INAP long yia 1972 ol i kolim kantri Sri Lanka olsem Silon. Em naispela ailan i gat ol gutpela nambis na ol diwai pam i stap arere long nambis, na i gat ol ples maunten, na ol liklik ples wesan nating. Wanpela maunten ol i kolim Maunten Bilong Adam, em i go antap inap 2243 mita, na em i wanpela ples holi bilong fopela bikpela lotu.a Klostu i gat wanpela ples nogut i go daun inap 1500 mita na ol i kolim Pinis Bilong Graun. Man i sanap long dispela ples antap em inap lukim planti gutpela hap bilong kantri.

I gat 18 milion manmeri i stap long Sri Lanka na tumbuna bilong ol i bilong narapela narapela lain. Kirap long yia 450 samting paslain long Krais ol Indo-Yuropin bilong hap not long India ol i kam sindaun long dispela ailan. Em ol Sinalis, ol i bikpela hap lain (75 pesen) bilong kantri. Na kirap long yia 200 samting bihain long Krais inap long yia 1150 samting, planti Tamil bilong hap saut bilong India ol i kam sindaun; nau planti Tamil i stap long hap not na hap is bilong ailan. Ol Potugal, na Holan, na Briten i bin bosim ples na ol i as bilong sampela senis i kamap long kantri. Na ol bisnisman bilong lain Arap na Malesia ol i raun long ol sip na ol i kam sindaun namel long ol asples. Na long sampela hap i gat ol Yurop, ol Pasi, ol Saina, na ol narapela lain.

Long Sri Lanka i gat ol man bilong kain kain lain, na tok ples, na lotu. Ol bikpela tok ples em tok Sinalis, na tok Tamil, na tok Inglis. Planti manmeri bilong Sri Lanka ol i save long tupela bilong dispela 3-pela tok ples. Lotu tu em i samting bilong lain bilong man. Planti Sinalis ol i bihainim lotu Buda, tasol planti Tamil ol i Hindu. Ol Arap na Malai ol i Muslim, na ol Yurop ol i bilong ol misin i gat nem Kristen, olsem Katolik na Talatala.

Maski Em i Hatwok, Ol i Winim

Dispela olgeta samting i givim bikpela hatwok long ol Witnes Bilong Jehova long Sri Lanka. Ol i wok strong long bihainim tok bilong Jisas na “autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Taim ol i autim tok, insait long wanpela o tupela aua tasol bai ol i bungim ol man bilong kain kain tok ples na lotu, ol Buda, na Hindu, na Katolik, na Talatala, o ol man i no bilip long God.

Bilong mekim gut wok bilong ol long autim tok, ol i mas holim Wastaua na Kirap! na ol narapela buk na nius bilong Baibel long kain kain tok ples, olsem tok Tamil, na tok Sinalis, na tok Inglis. Sapos ol i gat strong inap long karim hevipela samting, ol i holim ol Baibel tu long ol dispela tok ples. I no longtaim i go pinis ol i amamas tru long kisim sampela buk moa long dispela 3-pela tok ples, em buklet Tru God i Save Tingim Yumi?, na buklet Our Problems​—⁠Who Will Help Us Solve Them?, na liklik nius Ol Man Bilong Graun Bai Abrusim Bagarap o Nogat? Em ol gutpela samting bilong helpim wok bilong ol.

Long yia 1912 Charles Taze Russell i stap presiden bilong Intenesenel Baibel Stiudens Asosiesen na em i kam long Silon inap sampela de. Kirap long dispela taim i kam inap long nau ol Witnes i bin wok strong long Silon. Tasol lain bilong ol i no go bikpela hariap. Taim sampela misineri bilong Skul Gileat i kam long yia 1947, nau lain i go bikpela. Kirap long dispela taim wok autim tok long Sri Lanka i karim planti kaikai. Long yia 1994 i gat 1,866 manmeri ol i autim tok bilong Kingdom, na ol i mekim inap 2,551 Baibel-stadi long olgeta mun. Na 6,930 manmeri i bung long taim bilong Memorial, em bikpela lain winim lain bilong autim tok inap 4-pela taim. Em gutpela blesing tru!

Wok i no kamap gutpela kwiktaim long Sri Lanka, olsem long sampela kantri. Wanpela as bilong dispela i olsem ol famili long Sri Lanka i pas strong wantaim. Tasol dispela samting inap helpim wok tu. Taim kepten bilong ami bilong Rom, em Kornilius, i kamap Kristen, olgeta wanhaus bilong em tu i kamap Kristen. (Aposel 10:​1, 2, 24, 44) Buk Aposel i stori long planti famili olsem, em famili olgeta i kamap strongpela Kristen, olsem famili bilong Lidia, na Krispus, na woda bilong Pol tupela Sailas.​—⁠Aposel 16:​14, 15, 32-34; 18:⁠8.

Tru tumas, sapos famili i pas strong wantaim na ol i stretim gut wok na wok strong, dispela inap helpim tru wok bilong Kingdom. Wanpela brata i stap misineri longtaim, em Ray Matthews, em i tingim tok bilong Aisaia 60:22 na em i tok: “I olsem Jehova i hariapim wok long taim em i makim pinis, na i no ol wan wan man tasol i kam insait, sampela famili olgeta ol i kam.”

Famili i Stretim Gut Wok Ol i Litimapim Nem Bilong Jehova

I gat planti gutpela famili olsem long Sri Lanka long nau. Tingim famili Sinnappa ol i stap long Kotahena, em wanpela hap bilong nambawan biktaun Kalambo. I no longtaim i go pinis na papa bilong famili, em Marian, em i dai. Meri bilong em Annamma na 12-pela bilong ol 15-pela pikinini bilong famili, em ol i gat 13 inap 33 krismas, ol i mekim yet wok bilong Jehova olsem wanpela famili. Long taim bilong raitim dispela stori, 8-pela pikinini i baptais pinis, na 3-pela ol i save mekim wok bilong God oltaim, ol i painia oltaim. Tripela moa i save mekim wok painia haptaim long sampela taim. Long ol yangpela bilong famili, i gat 4-pela ol i pablisa i no baptais yet. Na i gat 4-pela tumbuna pikinini, ol i liklik yet, tasol ol i save lainim tok bilong Baibel na go long ol miting Kristen bilong kongrigesen bilong ol Witnes Bilong Jehova ol i kolim Kalambo Not.

Yia 1978 em namba wan taim bilong Annamma long harim tok bilong Kingdom. Long dispela taim em i kisim wanpela Wastaua. Em i kirap long stadi long buk Tok i Tru i Bringim Man Long Laip Oltaim na lainim ol tok bilong Baibel. Taim Annamma i stadi pinis long dispela buk em i dediket long God Jehova na kisim baptais. Em i namba wan long famili bilong mekim olsem.

Olsem kepten Kornilius, Annamma i stretim gut ol wok bilong famili. Em i tok: ‘Mipela mas stretim gut ol wok bambai mipela inap go long ol miting Kristen na ol kibung​—⁠na bilong helpim ol pikinini long i go long skul tu. Mipela i bikpela famili na i hatwok long kisim ol klos, tasol Jehova i mekim gut long mipela na mipela inap wokim sampela nupela klos bilong go long olgeta kibung. Taim famili i kamap long kibung, ol i gat klos na kaikai​—⁠na pes i lait.’

Ol pikinini i amamas long tingim ol wok em olgeta long famili i bin mekim. Bilong helpim famili olgeta long i go long ol miting Kristen, ol bikpela pikinini i gat sampela wok ol i mas mekim. Olsem: Mangala i wasim ol laplap, na Winnifreda i ainim. Winnifreda i mekim narapela wok tu, em i helpim ol liklik long pasim klos na em i tok: “Taim mipela i lusim haus, famili olgeta i bilas gut.”

Ol i stretim gut ol wok bilong kisim kaikai bilong spirit tu. Pikinini meri Pushpam, nau em i mekim wok painia oltaim, na em i stori olsem: “Long olgeta de famili i amamas long kaunim Baibel wantaim na mekim teks.” Annamma i tok: “Olgeta wan wan pikinini i gat Baibel bilong ol yet, na Wastaua na ol narapela buk. Mi save putim gut yau long tok ol i bekim long miting. Na taim mipela i go bek long haus, mi save tokim ol, ol i bekim gutpela tok o mi stretim tok ol i bekim, sapos i gat wok long mekim. Long nait mipela i save bung wantaim na mekim beten bilong famili.”

Ol bikpela pikinini i helpim gut Annamma long givim gutpela skul Kristen long olgeta long famili. Ol i gat planti wok bilong famili ol i mas mekim, tasol dispela i no pasim laik bilong ol long i go autim tok bilong Kingdom long ol narapela man. Ol narapela narapela long famili i gat Baibel-stadi, na ol i save mekim 57 Baibel-stadi olgeta long hap bilong ol. Tambu Rajan i tok: “Famili i save mekim ol gutpela Baibel-stadi. Meri bilong mi Pushpam em i kisim gutpela blesing​—⁠em i lukim wanpela Baibel-stadi bilong em i dediket long Jehova.”

Planti manmeri long Kotahena i kirap nogut long lukim bikpela famili olsem ol i lusim lotu Katolik. Pris yet i no i go lukim ol bilong save, i gat wanem as na ol i lusim, tasol em i askim sampela lain bilong misin long painimaut. Ol i kam toktok wantaim famili, na planti taim toktok i kamap long God Triwan. Annamma i bilip long Jehova na mekim wok long Baibel bilong bekim tok long ol. Planti taim em i kamapim tok bilong Jon 17:⁠3.

Famili Sinnappa i kamapim klia olsem sapos famili i stretim gut wok na wok strong, gutpela samting inap kamap. Ol i givim bel long mekim wok bilong Jehova na nau nupela lain bilong autim tok bilong Kingdom ol i wok long kamap​—⁠em ol pikinini i wok long go bikpela, na dispela i litimapim nem bilong Jehova!

Nau Famili i Wanbel Long Lotu i Tru

Famili Ratnam ol i stap klostu long famili Sinnappa. Ol i stap long Narhenpitya, em narapela hap bilong biktaun Kalambo. Ol tu i Katolik bipo. Long 1982 ol Witnes Bilong Jehova i go long ol haus na autim tok na ol i bungim Balendran, em man bilong namba wan pikinini meri bilong famili, nem bilong em Fatima. Ol Witnes i kirap mekim Baibel-stadi long Balendran na Fatima na ol pikinini. I no longtaim na 3-pela pikinini bilong tupela i kirap askim bubu meri, em Ignasiamal, long nem bilong God. Taim ol pikinini i tokim bubu, “Jehova” em i nem bilong God, tingting bilong bubu i kirap, na em tu i stadi. Bihain, tupela pikinini meri bilong em, em Jeevakala na Stella, ol i insait long stadi bilong em, na i kam inap long 1988 tripela wantaim i baptais pinis.

Balendran na Fatima i autim tok i tru long wanpela sista bilong Fatima, em Mallika, na man bilong em Yoganathan. I kam inap long 1987 na tupela i baptais pinis, na ol i skulim gut tupela pikinini bilong ol long laikim tumas Jehova. Pushpa, em narapela sista bilong Fatima, em tu i kam insait long lain bilong Jehova. Em i dediket na kisim baptais long 1990. Taim man bilong em Eka i stap long Tokio, em i wok wantaim wanpela kongrigesen tok Inglis, na Pushpa i helpim liklik pikinini man bilong tupela, em Alfred, long bihainim pasin Jehova i laikim.

Long dispela taim, fopela bilong ol 10-pela pikinini bilong famili Ratnam i bihainim lotu i tru. Na gutpela tru, i gat 3-pela moa ol i stadi long Baibel na kamap strong. I gat 11-pela tumbuna pikinini bilong famili, na wanpela pikinini meri, nem bilong em Pradeepa, em i baptais pinis. Sevenpela pikinini moa ol i kisim save long Jehova long rot bilong famili-stadi. Dispela famili i mekim 24 Baibel-stadi wantaim ol manmeri long hap bilong ol.

Rot bilong ol long kamap Witnes Bilong Jehova i gat planti hevi long en. Pastaim famili bilong ol i birua long ol. Papa, em Muthupillai, na ol bikpela brata ol i birua tru long ol wan wan bilong famili i laik i go long ol miting long Haus Kingdom o autim tok. Tru, ol i tingting long lukautim ol dispela wanhaus bilong ol, nogut bagarap i painim ol, tasol papa i kamapim samting tru i kirapim em long mekim pasin birua taim em i tok: “Mi givim bel olgeta long ol ‘santu’ na mi nolaik tru bai famili bilong mi i lusim lotu Katolik.” Tasol nau em i bilip olsem ol i lotuim trupela God, long wanem, em i lukim lotu bilong ol i helpim ol tru.

Olsem: Ol i rentim haus na wanpela taim papa bilong haus, em bilong lotu Buda, em i laik rausim ol, olsem na em i mekim ol wok marila. Wanpela nait em i kam putim ol muli klostu long haus, em i “wailisim” ol pinis. Ol manmeri i stap klostu ol i save pret long olkain marila na ol i ting nau bai samting nogut i kamap long famili Ratnam. Taim Ignasiamal i kisim save long dispela samting, em wantaim ol pikinini i rausim tasol ol dispela muli na ol i no pret liklik o tingting planti​—⁠na i no gat wanpela samting nogut i kamap long ol. Samting ol i mekim i kirapim planti man long hap bilong ol long harim tok, na Stella i kirapim tupela Baibel-stadi long ol man i stap klostu. Dispela i strongim bel bilong tambu meri Nazeera na em tu i kirap long stadi.

Ignasiamal i tingim ol planti blesing famili bilong em i bin kisim na em i tok: “Mi amamas tru long lukim famili i kamap strong long spirit. Jehova i mekim gut long mipela, long wanem, pasin birua i dai, na nau famili i stap wanbel tru, winim bilong bipo.”

Ol dispela bikpela famili i bin helpim tru wok. Ol i wok wantaim ol liklik famili, na ol famili i gat papa o mama wanpela tasol bilong lukautim ol pikinini, na ol Kristen i stap singel, na olgeta wantaim i wok strong long autim gutpela tok bilong Kingdom long dispela “gutpela ples tru,” em insait bilong nem Sri Lanka. Ol Witnes long Sri Lanka wantaim ol brata Kristen bilong ol long olgeta hap ol i wetim Paradais i kamap bek long graun, em yumi inap lukim long tingting taim yumi lukim ol nambis na maunten bilong gutpela ples Sri Lanka.

[Ol Futnot]

[Ol Piksa long pes 24, 25]

Planti manmeri long Sri Lanka ol i wok long bilipim na bihainim ol tok ol Kristen i autim na skulim ol long en