MI SAVE raun lukim ol kongrigesen Kristen, na taim mi mekim olsem, i olsem mi raun long ol kantri kirap long Potugal i go inap long Saina. Tasol mitupela meri bilong mi, Olive, i no save lusim Briten.

Mipela save raun lukim ol kongrigesen bilong narapela narapela tok ples em planti i wok long kamap long olgeta hap bilong Briten. Long ailan Jesi, longwe long nambis Nomandi long kantri Frans inap 20 kilomita, mipela save go lukim wanpela grup bilong tok ples Potugal. Raun bilong mipela i kirap long dispela longwe hap na i go inap long taun Sandelan long hap not bilong Inglan, na long dispela taun mipela save go lukim ol man bilong tok ples Saina em ol i gat bikpela laik long harim tok bilong Baibel. Yes, planti man bilong narapela narapela tok ples ol i wok long kamap strong long ol samting bilong spirit. Olsem wanem mipela i bin kisim dispela narapela kain wok? Na wanem samting i kamap long dispela wok em i olsem wanpela wok misineri mipela mekim long ples yet bilong mipela? Bai mi stori.

Inap 20 yia olgeta mitupela Olive i bin mekim wok bilong raun na lukim narapela narapela kongrigesen long olgeta wik. Mipela i bin raun long olgeta hap bilong Briten​—⁠not i go inap saut, is i go inap wes. Na i no longtaim i go pinis na mipela bin raun long ailan Malta long solwara Mediterenian na lukim ol brata Kristen bilong mipela ol i bin bihainim gutpela pasin Kristen na mekim gut tru long mipela. (Skelim wantaim Aposel 28:⁠1, 2.) Mipela i stap 3-pela yia pinis long Malta, na nau mipela kirap na tingting: Wanem nupela ples wok bai mipela i go long en? Mipela i ting ol bai salim mipela i go long wanpela hap long Inglan i stap longwe long ol taun, na mipela kirap redim tingting bilong mipela long dispela samting. Olsem na mipela i kirap nogut tru taim mipela i kisim pas i tok ol i laik salim mipela i go mekim wok long wanpela nupela sekit i gat ol grup na kongrigesen insait long en i save mekim 23 narapela narapela tok ples!

Mipela i tingting planti​—⁠bai mipela inap o olsem wanem? Tru, mitupela i bin mekim wok long Malta, tasol i no gat narapela taim bipo na mipela i bin mekim bikpela wok wantaim ol man i gat ol narapela kain pasin na sindaun. Mipela i tingting: Tru mipela inap strongim bel bilong ol man i no save gut long tok Inglis? Olsem wanem mipela inap toktok wantaim ol man sapos mipela i no save long tok ples bilong ol? Olsem wanem long kaikai na kain kain pasin bilong ples ol i save bihainim? Mipela inap lain long ol dispela nupela samting? Mipela i wok long tingim ol dispela askim taim mipela i beten na tingting long bihainim dispela singaut em i kain olsem singaut bilong ol Masedonia long bipo.​—⁠Aposel 16:​9, 10; 1 Korin 9:​19-22.

Daunim Hevi Bilong Tok Ples

Olive i tok: “Pastaim mi pilim olsem mi no inap, long wanem, mi no save liklik long ol narapela tok ples. Na mi no save olsem wanem mi inap helpim ol sista. Orait nau mi tingim tupela marit i bin stadi wantaim mipela pastaim​—⁠ol i bin tokim mipela long mekim olgeta wok God i makim mipela long mekim. Ol i bin skulim mipela olsem, Jehova i no save askim yumi ol man long mekim wanpela samting yumi no inap mekim.” Olsem na mitupela i amamas long kisim dispela wok.

Tru, mipela i no gat save long mekim ol narapela tok ples, tasol mipela i pilim olsem dispela samting i bin helpim mipela long mekim wankain pasin long olgeta manmeri. Mipela i no gat save long ol narapela tok ples. Olsem na taim mipela i go long ol miting ol i save mekim long narapela narapela tok ples long olgeta wik, dispela i helpim mipela long pilim hevi bilong ol brata i go long ol miting long tok Inglis na ol i no kisim gut ol tok i kamap. Bilong kisim gut ol tok, pastaim mipela mas redim gut ol tok em bai kamap long miting. Olive i save bekim wanpela bilong ol askim i kamap long miting. Tok em i laik bekim, pastaim em i redim long tok Inglis, na bihain wanpela sista i tanim dispela tok na raitim long ol leta i no hatwok long kaunim. Olive i tokaut olsem taim em i laik bekim tok, em i pret liklik long putim han i go antap. Sampela taim ol tok em i bekim i kirapim ol narapela long lap. Tasol em i no larim dispela i pasim em. Em i tok: “Mi save ol brata i amamas olsem mi traim long bekim sampela tok. Na taim mi bekim tok, dispela i kirapim ol narapela i save gut long dispela tok ples long ol tu i ken bekim sampela tok.”

Taim mi mekim ol tok, dispela tu i narapela kain liklik, long wanem, long pinis bilong olgeta wan wan sentens, mi mas larim hap taim bilong brata i ken tanim tok. Dispela i mekim na mi hatwok long tingim gut ol tok mi laik kamapim. Mi mas strong moa long tingim ol tok mi laik kamapim na mi mas sotim tru tok bilong mi. Tasol mi amamas long mekim ol tok.

Mipela i Mekim Kain Kain Wok

Long planti taun long Briten, ol man bilong narapela narapela tok ples ol i stap nabaut nabaut​—⁠long wanpela rot, sampela taim i gat tupela man tasol i stap, na bilong painim sampela moa, mipela mas i go longwe liklik. Tasol taim mipela tok gude long ol long tok ples bilong ol yet na mipela lukim ol i kirap nogut tru, mipela amamas long mipela i bin kisim dispela wok. Sapos brata mi go wantaim em i kamapim tok bilong Kingdom long tok ples bilong man bilong haus, planti taim dispela i mekim na man i amamas tru.

Tru tumas, dispela wok bilong autim tok long ol man bilong narapela narapela tok ples em i winim planti narapela wok bilong Kingdom mipela i bin mekim insait long 40 yia i go pinis. I gat rot bilong planti man moa i ken kisim save long tok bilong Baibel. Taim ol man i lain long tok i tru long tok ples bilong ol yet, ol i kisim kwik save na ol i pilim tru ol tok ol i lainim. (Aposel 2:⁠8, 14, 41) Taim miting i pinis na mipela i lukim aiwara bilong amamas i pundaun long pes bilong ol brata sista, bel bilong mipela i amamas tru​—⁠sampela taim em namba wan taim ol i bin harim na kisim gut olgeta tok i bin kamap long miting.

Taim mipela i go long ol haus na autim tok, mipela wok long kirapim tok long tok ples bilong man bilong haus, maski sampela taim hevi i kamap long dispela. Olsem: Long tok ples Gujarati, tok Kemcho i olsem “Gude.” Tasol wanpela taim bipo mi bin popaia, na taim mi tok gude i olsem mi mekim toksave bilong ol i ken baim wanpela kain kopi em planti man i save long en. Tasol long wanpela haus, tupela marit i lap taim mi mekim dispela tok long tok Gujarati. Wantu ol i singautim mipela i kam insait na ol i laik givim kap kopi long mipela​—⁠tasol i no olsem mi kolim kranki dispela tok na ol i laik givim kopi long mipela, nogat. Mipela kisim save olsem ol i wanblut bilong sampela Witnes Bilong Jehova long dispela grup mipela go lukim, na ol i gat bikpela laik long tok i tru.

Long planti taim inap sampela yia, wanpela sista bilong tok Inglis i bin givim ol nius long wanpela meri bilong tok Saina. Sampela taim em i bin tokim meri olsem em i laik stadi wantaim em long Baibel, no gat pe, tasol meri i no laik. Wanpela taim, wanpela sista i wok long lainim tok Saina, em i go wantaim dispela sista na em i tokim dispela meri long kisim buk Yu Inap i Stap Oltaim Long Paradais Long Graun, na em i amamas long kisim.a Nau em i gat buk long tok ples bilong em yet, na em i orait long stadi long Baibel. Samting i bin kirapim dispela meri long stadi, em dispela sotpela tok sista i bin mekim long tok ples bilong dispela meri yet.

Kain Kain Pasin

Mipela i no bin save olsem long sampela lain, ol man i no laikim meri bilong ol i ken raun wanpela tasol long nait. Dispela i mekim na planti sista i hatwok long kam long ol miting i kamap long nait. Sampela lain Esia i ting sapos ol yangpela meri i no gat laik long marit na ol i stap yet long haus bilong papamama, dispela i semim famili. Papa bilong wanpela yangpela sista i laik dring marasin nogut taim sista hia i sakim man em papa i bin makim bilong maritim em. Tru tumas, ol dispela sista i save karim bikpela hevi! Tasol taim mi lukim ol gutpela samting em tok i tru i bin mekim long i stap bilong famili bilong ol na papamama i pilim pasin bilong ol sista long stap gut long Jehova, mi amamas tru.

Mipela kisim dispela wok na mipela mas senisim sampela pasin bilong kaikai na kain samting olsem. Taim mipela i no kirap yet long mekim wok bilong raun, mi save kaikai ol kaikai bilong Inglan tasol, em ol kaikai i no gat kawawar lombo samting long en, tasol nau mi laikim tru ol dispela kain kaikai. Mipela bel hevi liklik long ol planti yia i go pinis na mipela i no bin traim ol narapela kain kaikai, olsem pis ol i no bin kukim na ol kari samting.

Dispela Wok Inap Go Bikpela

Ol samting i kamapim klia olsem nau long dispela taim i gat planti manmeri bilong ol narapela narapela tok ples bai ol i gat laik long harim tok bilong Baibel. Long nau i gat planti buk long kain kain tok ples. Taim ol nupela kongrigesen i kamap, mi inap pilim olsem Jehova i mekim gut long dispela wok. Planti brata em ol i save long ol narapela tok ples ol i bin lusim ol longwe hap na kam helpim ol.

Olsem: Planti brata i bin kam autim gutnius bilong Kingdom long tok Frans. Nau long dispela taim, planti refyuji bilong tok Frans ol i bin lusim Saier na sampela narapela kantri long Afrika na ol i kam long Briten. Taim ol i kamapim namba wan kongrigesen bilong tok Frans long Landon, i gat 65 pablisa bilong Kingdom long en. Wanpela yia bihain, dispela lain i go bikpela inap 117, na 48 bilong ol i mekim wok long olgeta de, olsem painia oltaim. I no longtaim na ol i kamapim namba tu kongrigesen bilong lukautim planti manmeri moa i laik harim tok, em 345 bilong ol i bin kam long bung bilong Memorial bilong 1995. Sampela brata sista i bin winim Skul Gileat na mekim wok misineri long Benin, Kot Diwa, Moroko, na Saier, nau ol i no misineri moa, tasol ol i mekim wok long save ol i bin kisim long wok misineri na helpim ol man bilong narapela narapela tok ples, na planti ol i bilip.

Wanpela taim mi go lukim kongrigesen bilong tok Frans, na wanpela Witnes i kisim mi i go wantaim em long wanpela Baibel-stadi em i mekim wantaim wanpela yangpela meri Afrika. Taim mipela i mas lusim em, dispela yangpela meri i krai long mipela olsem: “Yupela i no ken go. Stap liklik taim moa.” Em i strong long kisim sampela save moa. Dispela i kirapim mi long tingim Lidia long taim bilong ol aposel.​—⁠Aposel 16:​14, 15.

Pastaim wok bilong mipela i bilong helpim ol liklik grup bilong narapela narapela tok ples long kamap kongrigesen. Long ol grup ol brata i mekim Buk-Stadi Bilong Kongrigesen long en long olgeta wik, mipela kamapim sotpela Skul Bilong Wok Autim Tok bilong mekim wanpela taim long olgeta mun. Dispela Skul i save lainim ol long pasin bilong toktok gut taim ol i autim tok. Isi isi ol i wok long mekim olgeta faipela miting bilong kongrigesen long olgeta wik. Nau i gat ol nupela kongrigesen bilong tok ples Saina (Kantonis), Frans, Gujarati, Japan, Potugal, Punjabi, Tamil, na Wels.

Na tu, mipela bin go long ol miting bilong ol brata i yaupas. Taim mipela i lukim ol brata i mekim singsing long han bilong ol, dispela i kirapim tru bel bilong mipela. Taim ol i mekim wok autim tok, ol i mekim tok long han, na mipela pilim tru hatwok bilong ol long autim tok bilong Kingdom. I gat sampela Witnes i makim tok long han bilong helpim ol man i yaupas na aipas wantaim. Tru tumas, Jehova i save wokim rot bilong kain kain man i ken kisim save long Baibel.

Sapos mipela i mas askim yupela long mekim wanpela samting, em bai wankain long dispela samting Jisas i tokim ol disaipel long mekim: “Yupela i mas beten long Papa bilong gaden, bai em i salim ol wokman i go bungim kaikai bilong en.” (Matyu 9:38) Planti brata bilong mipela i wok long lainim tok ples bilong ol man i stap long teritori bilong kongrigesen bilong ol. Tru, i no gat wanpela mirakel i bin inapim mipela long mekim tok long kain kain tok ples, tasol Jehova i wok long opim rot bilong helpim olgeta man bilong narapela narapela tok ples i stap long ples bilong mipela​—⁠dispela ples i olsem wanpela gaden em kaikai i redi pinis long kisim. (Jon 4:​35, 36)​—⁠Em stori bilong Colin Seymour.

[Futnot]