Tok i Tru Inap Senisim i Stap Bilong Ol Man

SORI tru! Planti man long nau i save karim bikpela hevi​—⁠i stap bilong ol i nogut tru. Olsem wanem? Kain man olsem inap painim rot bilong i stap amamas? Sampela ol i raskol na ol i save stil long ol man i stap klostu long ol. Yu ting ol inap kamap man i save bihainim stretpela pasin? Bekim bilong dispela tupela askim em yes. Ol man inap senisim pasin bilong ol. I stap bilong ol inap senis. Aposel Pol i kamapim rot bilong mekim olsem, em i tok: “Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.”​—⁠Rom 12:⁠2.

Ating dispela tok, “laik bilong God,” inap kirapim yumi long tingim ol tok Jisas i bin mekim long ol disaipel bilong em inap olsem 20 yia paslain long taim Pol i raitim dispela tok yumi lukim antap. Jisas i tok: “Yupela bai i save long tok tru, na tok tru bai i mekim yupela i kamap fri.” (Jon 8:​32) Dispela “tok tru” Jisas i stori long en, em i makim ol tok i givim save long yumi long laik bilong God, na ol narapela tok tu God i bin kirapim ol man long raitim na i stap long Baibel. (Jon 17:17) Olsem wanem? Tok i tru bilong Baibel inap helpim ol man long kamap fri? Taim wokabaut bilong ol man i stret wantaim laik bilong God, dispela i save senisim i stap bilong ol? Tru tumas em i mekim olsem. Tingim stori bilong sampela man.

I Gat As na Ol i Stap

I no longtaim i go pinis na Moisés long Jibrolta i stap bel hevi tru. Em i tok: “Mi man bilong dring spak na mi save slip ausait. Bel bilong mi i bagarap stret. Olgeta nait mi save beten askim God long marimari long mi na bai mi no ken stap laip moa. Mi krai taim mi beten long God olsem, mi no inap mekim wanpela gutpela wok na mi no gat wok mani o famili o wanpela man bilong helpim mi, olsem na i gat wanem as na mi bin kamap? I gat wanem as na mi mas stap laip yet?” Orait nau wanpela samting i kamap.

Moisés i tok moa: “Taim mi bungim Roberto, em wanpela Witnes Bilong Jehova, em nau, mi save pinis God i harim beten bilong mi. Roberto i givim wanpela Baibel long mi na wanpela buklet bilong helpim mi long stadi long Baibel, nem bilong dispela buklet, God i Laik Yumi Mas Mekim Wanem?a Olgeta de mitupela i sindaun long bang mi save slip long en long nait na mitupela i stadi long Baibel. Mi stadi wanpela mun pinis, na nau Roberto i kisim mi i go long wanpela miting long Haus Kingdom bilong ol Witnes Bilong Jehova. I no longtaim na ol tok i tru bilong Baibel i helpim mi long senisim tru tingting bilong mi. Nau mi no slip moa ausait, na mi no save dring o smok. I stap bilong mi i senis, na mi stap amamas. Mi tingting long kisim baptais liklik taim bihain na kamap wanpela Witnes Bilong Jehova na mekim wok bilong em.”

Olaman! Em bikpela senis tru! Taim ol man i no gat wanpela gutpela samting bilong wetim i kamap bihain, planti taim as bilong dispela i olsem ol i sot long save. Ol i no save long God o long ol gutpela samting em i laik mekim. Tasol taim Moisés i kisim dispela save, dispela i givim strong long em na i strongim bel bilong em long stretim pasin bilong em. Beten bilong man bilong raitim Song em i stret long Moisés olsem: “Salim tok tru na lait bilong yu i kam na soim rot long mi, bai mi go stret long Saion, em maunten bilong yu yet, na bai mi go long dispela haus yu save stap long en.”​—⁠Song 43:⁠3.

Long Belis, kain samting olsem i bin painim Daniel. Tru, Daniel i no slip ausait​—⁠em i holim wanpela wok mani i gat nem long en. Tasol inap 20 yia ol drak na dring i bin kalabusim em na em i man bilong pamuk. Maski em i go bikpela insait long lotu Katolik, Daniel i no save i gat wanem as na em i stap, na em i gat tupela tingting olsem God i stap o nogat. Em i go long ol narapela narapela misin bilong kisim helpim, tasol em i kisim save olsem planti pren bilong em, em ol i save go long lotu, na sampela pris pasto tu, ol i save kisim ol drak o dring planti tumas. Na meri bilong em i laik katim marit.

Daniel i bel hevi nogut tru, olsem na em i go slip long wanpela klinik em i bilong helpim ol man long lusim pasin bilong kisim drak. Tasol em i save olsem taim em i lusim pinis dispela klinik, liklik taim em bai kirap gen na kisim ol drak sapos em i no gat helpim. Tasol em i mas kisim wanem kain helpim? Long Me 1996, tupela de bihain long em i lusim klinik, Daniel i go bungim wanpela Witnes Bilong Jehova na askim em, “Plis stadi wantaim mi long Baibel.” Witnes i stretim rot bilong stadi wantaim Daniel long Baibel tupela taim long wik, na i no longtaim na Daniel i kirap na stretim pasin bilong em na bai i stret wantaim laik bilong God​—⁠em i lusim ol pren bilong em na kisim ol nupela pren Kristen em ol i no save pamuk o kisim drak o dring planti tumas. Long dispela rot Daniel i kisim save olsem dispela tok bilong Baibel em i stret: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Bihain liklik em i tok: “Dispela i namba wan taim long i stap bilong mi na mi pilim olsem bel bilong mi i no gat tok long wanpela samting.” Em nau, i stap bilong Daniel tu em i senis.

Long Pueto Riko, narapela man i senisim tru pasin bilong em. Em i stap long kalabus na ol man i pret long em, long wanem, em i bin kilim i dai sampela man. Olsem wanem? Tok i tru bilong Baibel inap helpim em long senisim pasin bilong em? Yes, em inap. Wanpela Witnes Bilong Jehova i bin givim sampela Wastaua na Kirap! long em, na kwiktaim em i tok em i laikim sampela moa. Witnes i kirapim Baibel-stadi wantaim em, na taim bel bilong em i wok long pilim tru ol tok i tru bilong Baibel, em i mekim sampela senis long i stap bilong em, em ol narapela inap lukim. Namba wan samting i makim dispela senis, em i katim longpela gras bilong em na rausim mausgras.

Baibel i tok God i save lusim rong bilong ol man i tanim bel na senisim tru pasin bilong ol. Pol i tok: “Ol man i save mekim pasin nogut, ol bai i no inap i go insait long kingdom bilong God. Ating yupela i no save long dispela, a? . . . Bipo sampela bilong yupela i stap kain man olsem. Tasol God i wasim yupela pinis.” (1 Korin 6:​9, 11) Yumi ken ting ol dispela tok i bin mekim gut bel bilong dispela man, olsem tok long Aposel 24:15 i bin mekim, em i tok: “God bai i kirapim bek ol man i dai pinis, em ol stretpela man na ol man nogut wantaim.” Dispela man i tok: “Mi laik stap long dispela taim ol man i dai pinis i kirap bek na bai mi ken askim ol man mi bin kilim ol i dai long ol i ken lusim dispela bikpela rong mi bin mekim long ol.”

Nupela Famili

Luis em wanpela Witnes Bilong Jehova long Ajentina na em i save autim tok long olgeta de, na wanpela taim em i bungim wanpela yangpela man em planti samting nogut i bin painim em. Taim em i bebi yet, papamama i lusim em, olsem na em i go bikpela insait long ol narapela narapela lain bilong lukautim pikinini. Taim em i gat 20 krismas samting, em i kisim save long mama bilong em i stap we, na em i tingting long go sindaun klostu long em. Em i wok strong, na bungim planti mani, na nau em i go long taun em mama i stap long en. Pastaim mama i larim em i stap wantaim em, tasol taim mani bilong em i pinis, mama i rausim em long haus. Mama i givim baksait tru long em, na dispela pasin i mekim na em i laik kilim i dai skin bilong em yet.

Tasol Luis inap toktok wantaim dispela yangpela man long ol tok i tru bilong Baibel. Wanpela tok i tru i strongim bel bilong em i olsem: “Maski papa na mama i givim baksait long mi, Bikpela bai i lukautim mi.” (Song 27:10) Dispela yangpela man i kisim save olsem em i gat wanpela Papa long heven na dispela papa i no inap lusim em. Nau em i amamas long stap insait long wanpela nupela famili, em famili bilong Jehova.

Narapela man bilong dispela kantri em i tokim wanpela Witnes Bilong Jehova olsem em i bin kaunim nius Wastaua na em i laikim. Bilong wanem em i laikim Wastaua? Long wanem, dispela nius i bin helpim marit bilong em. Dispela samting i bin kamap olsem: Wanpela taim em i lusim ples wok na wokabaut i go na long dram pipia em i lukim wanpela Wastaua i gat het-tok, “Katim Marit,” long bikpela rait. Marit bilong em i laik bruk na em wantaim meri bilong em i bin askim kot long tok orait long narapela i ken lusim narapela, olsem na em i kisim dispela nius na em i kirap long kaunim. Em i kisim nius i go long haus na em wantaim meri bilong em i kaunim. Tupela marit hia i wok long bihainim ol tok i stap long dispela nius em Baibel i as bilong en. (Efesus 5:⁠21–​6:⁠4) I no longtaim na tupela i kirap na sindaun gut wantaim. Ol i tokim kot long lusim dispela wok bilong narapela i ken lusim narapela na nau tupela wantaim i stadi long Baibel na stap wanbel wantaim.

Long Yurugwai, narapela man, em tu nem bilong em Luis, em i no amamas. Pasin bilong kisim drak, mekim wok bilong ol spirit nogut, lotuim piksa bilong ol god giaman, dring planti tumas​—⁠em sampela pasin i bin paulim i stap bilong em. Luis i bel hevi tru na bihain em i no bilip moa olsem God i stap. Wanpela pren i givim wanpela buk long em, Life​—⁠How Did It Get Here? By Evolution or by Creation?b Luis i bung wantaim sampela Witnes Bilong Jehova inap sotpela taim, tasol i no longtaim na em kisim gen ol drak na dring. Wanpela taim em i sindaun long ples bilong putim pipia, na em i beten. Em i no save gut long nem bilong God, olsem na em i beten long “papa bilong Krais Jisas.”

Em i beten long God olsem sapos i gat as na em i stap, orait em i laik save long dispela samting. Luis i tok, long de bihain, wanpela man mi save long en, em i givim mi wanpela buk em i no gat wok moa long en. Nem bilong buk, “Kamapim Tok Hait​—⁠Bikpela Samting Bilong En i Laik Kamap!”c Dispela buk i kamapim klia dispela samting em i laik save long en. Luis i beten gen na askim God long helpim em long painim lotu em inap soim rot long em long mekim wok bilong God. Nau samting i kamap em i kirap nogut tru long en! Belo bilong dua i pairap, na em i lukim tupela Witnes Bilong Jehova i sanap i stap. Kwiktaim Luis i kirap na stadi Baibel wantaim ol. Em i kamap strong hariap na nau em i amamas em i stap wanpela Witnes i baptais pinis. Em i save bihainim stretpela pasin na em i helpim ol narapela tu long kisim save olsem i gat wanem as na ol i stap. Tok bilong Song 65:2 i bin kamap stret long em olsem: “Yu save harim beten bilong mipela. Olsem na mipela olgeta manmeri i mas i go long yu.”

Long Filipin, wanpela sumatin, nem bilong em Allan, em i bin insait long wanpela lain bilong “bagarapim gavman, na long dispela rot ol lain i kamap bihain i ken kisim wankain gutpela sindaun​—⁠olsem i no gat sampela lain i stap rabis na sampela i gat gutpela sindaun.” Tasol wanpela taim ol Witnes Bilong Jehova i toktok wantaim em long Baibel na em i kisim save long ol samting God i laik mekim bilong helpim ol man. Wanpela samting God i tok promis long mekim i olsem: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:​10, 11) Allan i tok: “I no longtaim na mi kisim save olsem, God i tok promis pinis long Baibel olsem em bai kamapim dispela samting em lain bilong mipela i wok strong long kamapim. Olgeta samting mipela laik tru long kisim, ol dispela samting bai kamap taim Kingdom bilong God i bosim graun.” Nau Allan i helpim wok bilong Kingdom bilong God na em i helpim ol narapela long bilip long ol tok i tru bilong Baibel.

Tru tumas, taim ol man i bihainim ol tok i tru bilong Baibel, em Tok Bilong God, i stap bilong ol i save senis. Klostu nau wanpela taim bai kamap na olgeta man i stap laip em ol man i stretim pinis pasin bilong ol na i stret wantaim laik bilong God. Man! Em bikpela senis tru! Long dispela taim tok profet bai kamap tru, olsem: “Long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”​—⁠Aisaia 11:⁠9.

[Ol Futnot]