I Gat Wanem As na Sampela Man i Senisim Lotu Bilong Ol?

Long planti man, lotu i olsem wanpela nem tasol. Ating em i makim ples man i go long en long sampela Sande, na ples em bai marit long en, na ples bilong planim em. Tasol lotu hia i no tokaut long pasin bilong em o long samting em i save long en na bilip long en. Olsem: Wanpela lain i askim sampela man i tok ol i Kristen olsem husat i bin kamapim Bikpela Tok Long Maunten, na wanpela long olgeta tupela tupela (50 pesen) ol i tok ol i no save. Tasol hetman bilong India, em Mohandas Gandhi, em i wanpela Hindu, em i bin save long bekim bilong dispela askim!

TRU tumas, planti man i no gat bikpela save long lotu bilong ol, olsem na yumi no kirap nogut long ol man i lusim lotu. Tasol i no olsem ol i no gat rot na ol i mas lusim lotu olgeta, nogat. Planti man i bin larim narapela i helpim ol long kisim save long ol tok bilong Baibel na ol i kirap nogut taim ol i save olsem ol dispela tok i helpim gut ol. Baibel yet i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”​—⁠Aisaia 48:⁠17.

Ol man i hangre long ol samting bilong spirit ol i mas mekim wanem? Ol i no ken lusim pasin bilong mekim wok bilong God! Ol i mas lukim Baibel na kisim save long ol tok God yet i laik givim long ol.

Ol Bekim Bilong Ol Strongpela Askim

Bernd i gat 7-pela krismas taim em i lukim mama bilong em i wok long dai.a I go inap long taim em i bikpela manki, em i save tingting, ‘Mama bilong mi i stap we? Bilong wanem em i no stap wantaim mi taim mi wok long go bikpela?’ Taim Bernd i kamap olsem yangpela man pinis, em i save go long lotu. Em i tingim ol man i karim bikpela pen na hevi, olsem na em i laik go long ol kantri i no gat planti wok bisnis na mekim wok bilong helpim ol man. Tasol em i gat sampela askim i stap yet em misin bilong em i no save gut long bekim bilong en.

Bihain Bernd i toktok wantaim wanpela wanskul em i wanpela Witnes Bilong Jehova. Dispela wanskul i kamapim sampela tok bilong Baibel bilong helpim Bernd long save olsem mama bilong em i no save long wanpela samting, em i olsem slip tasol. Bernd i kisim save long planti ves bilong Baibel i toktok long dispela samting, olsem Saveman 9:5: “Ol man i dai pinis, ol i no inap save long wanpela samting.” Em nau, i no gat as na Bernd i mas tingting planti olsem mama bilong em i kisim pen long wanpela kain klinpaia o bikpaia samting, nogat. Tru, klostu olgeta lotu i lainim ol man olsem yumi gat tewel i no inap i dai, tasol Bernd i lukim long Baibel olsem man i no gat tewel. Taim man i dai, em i dai tru. “Taim mipela i dai, mipela i save pinis olgeta.”​—⁠Jop 14:10.

Na tu, Bernd i kisim save olsem i gat gutpela samting tru bai painim ol man i dai pinis. Em yet i kaunim tok long buk Aposel long Baibel olsem: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Em i amamas nogut tru taim em i kisim save olsem ol man bai kirap bek long dispela graun, na God bai kamapim bek Paradais long en.​—⁠Song 37:29; KTH 21:​3, 4.

I no longtaim na stretpela save bilong Baibel inapim Bernd long ol samting bilong spirit em i sot long en. Em nau, Bernd i no lusim lotu olgeta. Em i lusim dispela lotu i no bin givim kaikai bilong spirit long em, na em i go insait long wanpela lotu em tok bilong Baibel i as bilong en. Em i tok: “Dispela samting i bin kamap 14 yia i go pinis, na i no gat wanpela taim na mi bel hevi olsem mi bin lusim lotu bilong mi bilong pastaim. Nau mi save, Man bilong wokim yumi em i no as bilong pen na hevi. Satan em i god bilong dispela pasin bilong nau, na em i as bilong ol pasin nogut na hevi yumi stap namel long en. Tasol liklik taim God bai stretim olgeta hevi ol lain bilong dispela graun bilong Satan i bin kamapim. Na mama bilong mi bai kirap bek na kamap laip gen. Bai mi amamas tru taim dispela samting i kamap!”

Na tu, Bernd i winim pinis dispela mak em i bin putim bilong i go long narapela kantri na helpim ol man. Em i bin go long wanpela kantri na em i helpim ol man long kisim save long Kingdom bilong God​—⁠dispela Kingdom tasol em i rot tru bilong stretim ol hevi bilong ol. Olsem Bernd, planti milion manmeri i bin kisim save olsem klostu nau God bai pinisim ol pen na hevi. Ol i amamas tru long painim wanpela lotu i save inapim ol long ol samting bilong spirit ol i sot long en.​—⁠Matyu 5:⁠3.

I Stap Bilong Yumi i Gat Wanem As Bilong En?

Planti man long hap bilong Wes ol i tingim ol samting bilong graun tasol na ol i no tingim lotu, olsem na planti man i laik save, ‘I stap bilong mi i gat wanem as bilong en?’ Bekim bilong dispela askim i stap long Baibel, olsem Maikel i kisim save pinis. Long 1975 samting Maikel i laik insait long wanpela lain i bilong mekim pasin birua na pretim man. I stap bilong em i gat wanpela as tasol​—⁠em i laik givim hevi long ol man em i ting ol i gat asua long ol pasin i no stret ol lain i gat ol bikpela wok bisnis i as bilong en. Em i tok: “Taim mi lusim haus, mi save karim gan. Mi gat tingting long kilim i dai planti bikman bilong politik na wok bisnis. Mi redi long lusim laip bilong mi bilong helpim dispela wok.”

Maikel i save go long lotu, tasol i no gat wanpela man long misin bilong em inap tokim em olsem i gat wanem as na yumi stap. Olsem na taim ol Witnes Bilong Jehova i kam long haus bilong em na kamapim ol tok bilong Baibel bilong bekim ol askim bilong em, Maikel i putim gut yau. Em i kirap long go long ol miting bilong lotu long Haus Kingdom bilong ol Witnes Bilong Jehova.

Ol pren bilong Maikel i laik save long dispela nupela laik bilong em long kisim save long Baibel. Maikel i tokim ol: “Kam long miting long dispela Sande, na stap liklik. Sapos yu no amamas long ol tok yu harim, orait yu ken lusim miting na go bek long haus.” Tru tumas, taim ol i mekim pinis wanpela tok bilong Baibel em inap olsem 45 minit, klostu olgeta pren bilong em i lusim Haus Kingdom. Tasol wanpela i stap, em Susan. Dispela yangpela meri i kirap nogut long ol tok em i harim. Bihain, Maikel i maritim Susan na ol i kisim baptais na kamap Witnes Bilong Jehova. Maikel i tok: “Nau mi save long as na yumi stap long graun. Jehova i wokim yumi. Yumi stap bilong kisim save long em na long mekim laik bilong em. Dispela samting tasol inap givim amamas tru long man!”

Planti milion manmeri i wanbel long dispela tok bilong Maikel. Ol i tingim na bihainim tok bilong Baibel, olsem: “Namba wan samting long laip bilong yumi man i olsem. Yumi mas aninit long God tasol na bihainim ol lo bilong em.”​—⁠Saveman 12:⁠13.

Rot Bilong Karim Ol Hevi

Ol samting 2 Timoti 3:1 i tok profet long en i save painim yumi olgeta. Em i tok: “Yu mas save olsem, long taim bilong las de planti hevi nogut tru bai i kamap.” I no gat wanpela man inap abrusim ol dispela “hevi nogut tru.” Tasol tok bilong Baibel inap helpim yumi long karim ol dispela hevi.

Tingim tupela marit, em Stiven na Oliv. Taim ol i kirap na stadi long Baibel wantaim ol Witnes Bilong Jehova, ol i gat planti hevi insait long marit bilong ol. Stiven i tok: “Mipela i no poroman gut wantaim. Samting mitupela gat laik long en na samting mipela laik putim olsem mak bilong winim, em i narapela narapela kain.” Wanem samting i helpim tupela na narapela i no lusim narapela? Stiven i tok moa: “Ol Witnes Bilong Jehova i lainim mipela long rot bilong bihainim ol lo bilong Baibel long i stap bilong mipela. Em namba wan taim mipela i kisim save long pasin bilong tingim narapela na helpim em. Pasin bilong bihainim ol lo bilong Baibel i helpim mipela long pas gut wantaim. Nau mipela i stap amamas na stap gut wantaim insait long marit bilong mipela.”

Pas Gut Wantaim God

Nau tasol wanpela lain (Galup) bilong skelim ol samting ol i kisim save olsem klostu olgeta man long Amerika ol i bilip long God, na planti bilong dispela lain ol i save beten long em. Tasol narapela lain bilong skelim ol samting ol i tok, ol man i go long lotu, namba bilong ol i go daun tru​—⁠insait long 50 yia i go pinis namba i no bin go daun olsem. Wanpela long olgeta tupela tupela man long Amerika ol i tok ol i no go planti taim long lotu​—⁠ating wanpela taim tasol long olgeta mun. Em nau, lotu i no bin pulim ol man i kam klostu long God. Tasol dispela pasin i no kamap long Amerika tasol.

Linda i go bikpela long Bavaria. Em i wanpela Katolik na em i save beten oltaim. Tasol em i pret long ol samting bihain bai kamap. Em i no save liklik long laik bilong God long ol man. Taim em i gat 14 krismas tasol, em i bungim ol Witnes Bilong Jehova, na em i tok: “Mi amamas long ol samting ol i toktok long en, olsem na mi kisim tupela buk long ol i kamapim ol tok bilong Baibel na wantu mi kirap long kaunim.” Tupela yia bihain, Linda i kirap na stadi long Baibel wantaim ol Witnes Bilong Jehova. Em i tok: “Long tingting bilong mi, olgeta tok bilong God mi kisim save long en, em i stret.” Linda i lusim lotu bilong em na taim em i gat 18 krismas em i kisim baptais na i kamap wanpela Witnes Bilong Jehova.

Wanem samting i kirapim Linda long senisim lotu bilong em? Em i tok: “Misin bilong mi i bin helpim mi long save olsem i gat wanpela God i stap, na mi kirap na bilip long em. Tasol God i stap longwe long mi​—⁠em i no stap olsem wanpela pren i tingim mi. Mi stadi long Baibel na dispela i strongim bilip bilong mi olsem God i stap, na i helpim mi long kisim save long em na long laikim tru em. Nau mi pas gut wantaim God, na dispela em wanpela gutpela samting tru, winim ol narapela samting.”

Trupela Lotu Inap Helpim Tru Yumi!

Olsem wanem? Lotu bilong yu i save soim rot long yu long ol samting bilong spirit na long olsem wanem Baibel inap helpim yu long karim ol hevi bilong yu? Em i lainim yu long tok bilong Baibel long ol gutpela samting bai kamap bihain? Em i helpim yu long kisim stretpela save bilong Baibel na bai yu ken go klostu long Man bilong wokim yu na pas gut wantaim em? Sapos nogat, yu no ken les na lusim lotu olgeta. Wok long painim lotu em Baibel i as tru bilong en. Sapos yu mekim olsem, bai yu kamap olsem ol man em buk Aisaia long Baibel i tok profet long en olsem: “Mi God, Bikpela, mi tok olsem. Ol wokman bilong mi bai ol i gat planti kaikai na wara. . . . Ol lain bilong mi, ol bai i amamas . . . Bel bilong ol wokman bilong mi bai i pulap long amamas.”​—⁠Aisaia 65:​13, 14.

[Futnot]

[Ol Piksa long pes 4, 5]

Baibel i helpim yumi long kisim save long God na long laikim em tru