Askim

Sampela Witnes Bilong Jehova i bin kisim wok mani na ol i mas mekim ol wok long wanpela haus lotu o banis bilong wanpela lotu. Baibel i tok wanem long kain wok olsem?

Dispela samting inap painim ol Kristen i laik bihainim tru tok bilong 1 Timoti 5:​8, em i kamapim olsem em bikpela samting long lukautim famili long ol samting bilong skin. Ol Kristen i mas bihainim dispela tok, tasol dispela i no makim olsem ol i mas orait long mekim olgeta kain wok. Ol Kristen i pilim tru olsem ol i gat wok long tingim gut ol narapela laik bilong God. Olsem: Man i mas lukautim famili bilong em, tasol dispela i no givim rot long em long kalapim lo bilong Baibel long pasin pamuk na kilim man i dai. (Skelim wantaim Stat 39:​4-9; Aisaia 2:4; Jon 17:​14, 16.) Na tu, i bikpela samting long Kristen i bihainim tok bilong Baibel long yumi mas lusim Bikpela Babilon, em olgeta lotu giaman bilong dispela graun.​—⁠KTH 18:​4, 5.

Long olgeta hap, ol wokboi bilong God i save kisim kain kain hevi long painim wok mani. I no gat wok long yumi wokim lista na lo bilong ol samting ol Kristen i mas bihainim na i no stret long mekim olsem. (2 Korin 1:​24) Tasol yumi ken kamapim sampela tok em bai helpim ol Kristen long tingim wanem kain wok mani ol i ken kisim. Taim Wastaua bilong Mas 1, 1983 i stori long olsem wanem maus bilong bel God i givim yumi em inap helpim yumi, em i stori liklik long ol dispela samting. Blok long Wastaua i kamapim tupela bikpela askim na bihain em i kamapim sampela narapela samting bilong helpim yumi.

Namba wan bikpela askim em dispela: Olsem wanem? Baibel i makim dispela wok em i wok nogut? Taim Wastaua i stori long dispela, em i tok pasin stil, na mekim wok long blut, na pasin bilong lotuim god giaman ol i wok nogut. Olsem na Kristen i no ken holim wanpela wok i litimapim ol samting God i no orait long en, kain olsem ol dispela samting mipela i kamapim.

Namba tu askim i olsem: Taim wanpela i mekim dispela wok, em i insait long dispela rong o nogat? Tru tumas, taim wanpela man i kisim wok long haus bilong pilai laki, o wanpela klinik bilong rausim bel, o wanpela haus pamuk, em i insait long ol dispela pasin nogut. Maski wok bilong em long olgeta de i bilong brumim plua tasol o bekim tok long telefon, em i mekim wok bilong helpim pasin em Baibel i tambuim.

Planti Kristen, taim ol i skelim dispela tupela askim, dispela i bin helpim ol long tingim wanem kain wok ol bai kisim.

Olsem: Taim man i skelim dispela tupela askim, em i ken save bilong wanem Kristen tru i no ken wok mani long wanpela lotu giaman o mekim wok insait long haus lotu bilong ol. Kamapim Tok Hait 18:​4 i tok: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim.” Sapos wanpela man i save wok mani oltaim long wanpela lotu i save skulim ol man long ol bilip i no stret long tok i tru, em i insait long ol wok na sin bilong Bikpela Babilon. Maski dispela man i mekim wok long gaden, o man bilong klinim ol ofis samting, o wanpela man i save stretim ol samting i bagarap, o man i save mekim wok long ol akaun, dispela wok em i mekim i helpim lotu em bilip bilong en i save pait wantaim lotu i tru. Na tu, taim ol manmeri i lukim em i mekim ol wok bilong lukautim banis bilong haus lotu, o stretim ol samting bilong en i bagarap, o mekim wok bilong dispela lotu, ol bai ting olsem em i bilong dispela lotu.

Olsem wanem long wanpela man em i no save wok mani oltaim long wanpela misin o lain lotu? Ating ol i singautim em long kam stretim wanpela paip wara i bruk long haus lotu. Dispela i narapela kain long pasin bilong winim wanpela kontrak samting bilong stretim ol samting long rup bilong haus lotu, a?

I gat planti narapela narapela samting yumi ken tingim. Olsem na yumi ken skelim faipela samting moa em Wastaua i stori long en:

1. Olsem wanem? Dispela wok em wok bilong helpim ol man na Baibel i no tambuim? Tingim wok bilong man i save bringim ol pas i go long haus bilong ol man i stap long wanpela hap. Sapos em i kisim wanpela pas i go long wanpela haus lotu o wanpela klinik bilong helpim ol meri long rausim bel, dispela i no makim olsem em i helpim dispela wok nogut. God i save mekim na san i save lait antap long olgeta haus, ol haus lotu na ol klinik bilong helpim ol meri long rausim bel tu. (Aposel 14:​16, 17) Wanpela Kristen, wok bilong em i bilong kisim ol pas i go long haus bilong ol man, ating em inap tingim wok bilong em long olgeta wan wan de i bilong helpim olgeta man. Dispela i wankain long wanpela Kristen em ol i tokim em long mekim wok long taim bilong wanpela hevi​—⁠em i wanpela plama na em i mas i go long wanpela haus lotu bilong stretim wanpela paip wara i bruk na wara i wok long karamapim olgeta hap; o em wanpela man bilong wok long ambulens na em i mas helpim man i airaun na pundaun long taim bilong lotu. Ating em inap tingim ol dispela wok i olsem wok bilong helpim ol man long taim bilong hevi.

2. Olsem wanem? Dispela man i wanpela papa bilong kampani, o em i wanpela wokman tasol? Sapos wanpela Kristen i papa bilong stua, em bai i no inap putim oda bilong ol imis, ol paspas bilong mekim wok bilong spirit nogut, smok, o sosis ol i wokim long blut na salim long stua. Em i papa bilong stua na em i bosim olgeta samting bilong dispela stua. Ol man inap strong long em i salim smok o ol imis na kisim winmani, tasol em i mas bihainim ol lo bilong Baibel long olgeta taim. Tasol ating wanpela Kristen i wok long wanpela bikpela stua bilong salim ol kain kain samting, na wok bilong em i bilong kisim mani taim ol man i baim ol samting, o klinim plua, o mekim wok long ofis samting. Em i no bosim wok bilong putim oda long ol samting bilong salim long stua, maski sampela samting i no stret long lo bilong Baibel, kain olsem smok na sampela samting bilong Krismas o Ista samting.a (Skelim wantaim Luk 7:8; 17:​7, 8.) Namba 3 askim i stori long dispela samting.

3. Olsem wanem? Man i insait tru long dispela wok? Yumi ken tingim gen man i wok long wanpela stua. Ating wok bilong em i bilong kisim mani taim ol man i baim ol samting, o em i putim ol nupela samting long ples bilong ol na wan wan taim em i save holim ol smok na sampela samting bilong lotu; dispela em liklik hap tasol bilong wok em i save mekim. Dispela i narapela kain tru long wanpela wokman i save wok long hap bilong salim ol smok! Dispela em wok bilong em, na long olgeta de em i wok long dispela samting i no stret wantaim bilip Kristen. (2 Korin 7:⁠1) Dispela i kamapim klia bilong wanem yumi mas skelim hamas taim yumi lusim bilong mekim wanpela wok, na dispela i ken helpim yumi long skelim wanem kain wok yumi mas kisim.

4. Husat i save baim ol wokman o wanem hap dispela wok i kamap? Yumi ken skelim tupela kain wok. Bilong kisim gutnem, wanpela klinik bilong helpim ol meri long rausim bel i tingting long baim wanpela man long klinim ol strit long hap bilong ol. Lain long klinik i save baim em long fotnait, tasol em i no save wok long dispela klinik, na olgeta de i no gat wanpela man i save lukim em long klinik. Ol manmeri i save lukim em i mekim dispela wok em Baibel i no tambuim, maski wanem lain i baim em long fotnait. Orait nau yumi ken tingim narapela kain wok. Long ol kantri em lo bilong gavman i orait long wok pamuk, dipatmen bilong helt i save baim wanpela nes long wok long haus pamuk, na em i save sekim ol meri pamuk na givim marasin samting long ol bambai sik bilong pamuk i no ken i go bikpela. Maski dipatmen bilong helt i baim em, em i save wok olgeta de long ol haus pamuk, na em i mekim wok bilong helpim pasin pamuk. Dispela tupela kain wok i kamapim klia bilong wanem yumi mas skelim wanem lain i save baim ol wokman na skelim ples bilong mekim dispela wok.

5. Dispela wok bai mekim wanem; dispela bai mekim na bel bilong man yet bai i gat tok, o em bai pundaunim ol narapela? Yumi mas tingim maus bilong bel​—⁠bilong yumi yet na bilong ol narapela. Maski sapos wanpela wok (na ples bilong wok na wanem lain i baim em) i orait long ai bilong planti Kristen, wanpela inap pilim olsem bel bilong em yet i gat tok long dispela wok. Aposel Pol, em i bin stap olsem gutpela piksa, em i tok: “Mipela i pilim olsem bel bilong mipela i stap stret long ai bilong God. Na mipela i laik wokabaut stret long olgeta taim.” (Hibru 13:18) Yumi no ken mekim ol wok yumi bai tingting planti long en; na tu, yumi no ken skelim ol narapela em maus bilong bel i narapela narapela. Ating Kristen i pilim olsem Baibel i no tambuim wanpela wok em i mekim, tasol em i save dispela bai givim hevi long planti insait long kongrigesen na ol manmeri bilong dispela hap olsem ol bai tingting planti long en. Pol i kamapim gutpela tingting olsem: “Mipela i no laik bai ol man i tok nogut long dispela wok bilong mipela, olsem na mipela i no save mekim wanpela samting i save sutim lek bilong ol dispela man na ol i pundaun. Nogat. Mipela i stap wokman bilong God, olsem na oltaim mipela i save soim gutpela pasin bilong mipela long olgeta manmeri.”​—⁠2 Korin 6:​3, 4.

Nau yumi ken tingim bek bikpela samting yumi laik save long en, em wok long wanpela haus lotu, olsem putim ol nupela windo, klinim plua, o stretim ples bilong wokim paia. Ol tok yumi kamapim hia inap helpim yumi olsem wanem long skelim dispela bikpela samting?

Tingim gen ol samting yumi stori long en long husat i papa bilong kampani. Olsem wanem? Kristen em papa o maneja na em i mas skelim olsem em inap mekim kain wok olsem long haus lotu o nogat? Sapos wanpela Kristen em i bos, em i laik pas wantaim Bikpela Babilon na winim wanpela kontrak bilong mekim wok bilong helpim sampela lotu i kamapim ol bilip giaman? Dispela i wankain long Kristen i pasim tok long salim smok o ol imis samting long stua bilong em yet, a?​—⁠2 Korin 6:​14-​16.

Sapos Kristen i wanpela wokman nating na em i no gat wok long tingim wanem wanem wok kampani i mas mekim, i gat ol narapela samting em i mas skelim. Olsem: Wanem ples na hamas taim em bai lusim bilong mekim dispela wok. Olsem wanem? Ol i tokim wokman long bringim tasol ol sia i go o mekim wanpela wok bilong helpim ol man, olsem wanpela paiaman i kilim i dai paia long haus lotu na bai paia i no kisim olgeta hap? Planti bai tingim dispela i narapela kain long wanpela wokman bilong wanpela kampani i lusim bikpela hap taim bilong penim haus lotu o oltaim em i stretim ol plaua samting long gaden bilong mekim ples i luk gutpela. Taim man i mekim wok oltaim o longpela taim olsem, planti man inap ting olsem dispela Kristen i insait long wanpela lotu em tok em i no orait long en, na dispela inap pundaunim ol.​—⁠Matyu 13:41; 18:​6, 7.

Mipela i bin kamapim sampela bikpela samting bilong helpim ol Kristen taim ol i painim wok mani. Mipela i kamapim tasol ol tok i stret bilong bekim askim long ol lotu giaman. Tasol Kristen i ken bihainim tu ol dispela tok taim yumi painim ol narapela wok. Long olgeta dispela samting, em i mas beten na skelim gut ol samting, na tingim ol wan wan samting bilong dispela wok yet. Ol tok mipela i kamapim i helpim pinis planti Kristen long tingim wanem kain wok mani ol i laik kisim na dispela i kamapim klia laik bilong ol olsem ol i laik wokabaut stret long ai bilong Jehova.​—⁠Sindaun 3:​5, 6; Aisaia 2:3; Hibru 12:​12-​14.

[Futnot]