Ol i Stap Olsem Lait Long Taun Bilong Lait
Fluctuat nec mergitur, olsem “Em i stap gut, maski si i sakim em i go i kam,” dispela tok i stap olsem bikpela tok bilong biktaun Paris.
KAIN olsem wanpela sip em biksi i sakim i go i kam, inap 2,000 yia, biktaun Paris i bin kisim planti hevi—ol ami bilong ol narapela kantri i bin kam pait long en na ol lain bilong kantri yet i bin pait bilong daunim gavman. Long nau lukluk bilong dispela taun em i naispela tru, winim planti narapela biktaun. Planti man i laikim tru dispela taun—ol i tingim gutpela stail bilong ol haus, na ol rot i gat diwai i stap arere arere, na ol haus tumbuna i gat nem long olgeta hap bilong graun. Sampela i tingim dispela taun olsem ples bilong ol man bilong raitim stori, na droim piksa, na painim save. Na sampela i amamas long ol gutpela gutpela kaikai ol inap kisim na ol klos i gat stail.
Lotu Katolik i bin stap strong long Paris. Tasol 200 yia bipo, Paris i kisim nem olsem Taun Bilong Lait long bikpela wok em i mekim bilong helpim wanpela lain saveman bilong Yurop ol i kolim Lain Bilong Lait. Save bilong ol man bilong dispela taim bipo em i stiaim tingting bilong planti man bilong Paris long nau. Ol samting bilong lotu i no stiaim planti man olsem.
Tasol save bilong man i no bin helpim ol olsem ol i bin ting em bai mekim. Planti man long nau i wok long painim gutpela tingting na save long narapela rot. Inap olsem 90 yia, ol Witnes Bilong Jehova long Paris i bin ‘stap olsem lait.’ (Filipai 2:15) Wankain olsem ol boskru i save wok oltaim long stretim stretim rot em sip i ron long en, ol Witnes i bin stretim stretim rot ol i mekim wok autim tok long en na bai ol inap painim “ol gutpela samting bilong olgeta lain.”—Hagai 2:7, NW.
Autim Tok Long Paris i Gat Hatwok
Long 1850, inap 600,000 manmeri i sindaun long Paris. Long nau i gat planti manmeri moa, winim 9 milion. Lain bilong Paris i bin go bikpela hariap na dispela i mekim na Paris i gat kain kain man i sindaun long en, winim olgeta narapela taun long Frans. Ol man long olgeta hap bilong graun i save kam long Paris bilong kisim bikpela skul, na i gat wanpela yunivesiti i olpela tru, na i gat 250,000 sumatin. Tasol samting i no gutpela tumas i olsem: Long sampela hap long Paris we i gat planti haus i go antap tru, planti man i no gat wok mani na i gat planti yangpela raskol. Olsem na ol Witnes Bilong Jehova i mas painim rot bilong autim gutnius long kain kain man na long pasin i kirapim ol long harim.—1 Timoti 4:10.
Planti turis, winim 20 milion, i save go long Paris long olgeta yia. Ol i amamas long go antap long taua Eiffel, o wokabaut long arere bilong wara Seine,
o sindaun long ol liklik haus kaikai na dring kofi. Tasol ol lain bilong Paris yet i save hariap hariap tumas. Christian, em i save autim tok fultaim, em i tok: “Ol i save mekim hariap hariap ol samting, na taim ol i lusim wok na kam bek long haus, skin i les pinis.” I hatwok tru long autim tok long kain man olsem.
Tasol wanpela bikpela hevi tru bilong ol Witnes Bilong Jehova long Paris i olsem: Ol i hatwok long painim ol man long haus. Sampela bikpela haus i gat masin intekom bilong toktok wantaim man. Na pasin raskol i go bikpela, olsem na planti bikpela haus i gat ol flet long en i gat samting olsem sekiuriti long get na ol Witnes i no inap i go insait. Ating dispela i mekim na long sampela hap long Paris i gat wanpela Witnes tasol long olgeta 1,400 man. Olsem na planti taim ol i autim tok long kain kain taim na ples, na long rot bilong telefon. Olsem wanem? I gat sampela rot moa ol Witnes i bin mekim wok long en bilong larim ‘lait bilong ol i lait’?—Matyu 5:16.
Planti rot i op bilong autim tok long kain kain taim na ples. Martine i lukim wanpela meri i bel hevi em i sanap long ples bilong kisim bas. Nau tasol pikinini meri bilong em i bin i dai—em i gat dispela wanpela pikinini meri tasol. Martine i givim wanpela buklet long em i kamapim ol tok bilong Baibel i stori long kirap bek. Orait nau inap sampela mun em i no lukim em moa. Taim Martine i lukim gen dispela meri, em i kirapim Baibel-stadi wantaim em. Maski man bilong em i laik pasim em, meri ya i kamap wanpela Witnes.
Long Kain Kain Taim na Ples
Paris i gat planti bas na tren. Long olgeta de, inap 5,000,000 pasindia i raun long tren. Châtelet-Les-Halles, em ples bilong ol tren i save raun aninit long graun long Paris, em i bikpela tru na i gat planti man i go i kam long en. Rot i op long autim tok long planti man long dispela hap. Alexandra i save kisim tren olgeta de bilong go long wok. Wanpela taim em i toktok wantaim wanpela yangpela man em i gat sik lukimia na em i bilong i dai. Alexandra i givim wanpela liklik nius long em i stori long Paradais bai kamap. Long olgeta de em i toktok wantaim em long Baibel long wankain taim na ples i go inap 6-pela wik. Orait nau dispela man i no kam moa. Bihain liklik, meri bilong em i ringim Alexandra na tokim em long kam long haus sik, long wanem, man bilong em i laik dai. Sori tru, taim Alexandra i kamap long haus sik, em i kisim save olsem man ya i dai pinis. Bihain, meri i lusim Paris na i go stap long Bordeaux, long hap saut-wes bilong Frans, na ol Witnes long dispela hap ol i kam lukim em. Wanpela yia bihain, Alexandra i amamas tru long harim tok olsem meri bilong dispela man i dai pinis i bin kisim baptais na kamap wanpela Witnes Kristen bilong Jehova na i wet long lukim man bilong em i kirap bek!—Jon 5:28, 29.
Wanpela lapun meri Kristen i toktok wantaim Renata long tren i lusim Paris i go long Limoges long namel bilong Frans. Long as ples bilong em long Polan, inap 5-pela yia Renata i bin skul long ol tok bilong lotu, na tok Hibru na tok Grik, tasol em i lusim bilip long God. Tripela mun paslain long em i bungim dispela meri long tren, em i bin beten long God. Renata i no putim yau tumas long tok bilong lapun sista na em i ting bai em i no lukim em gen, olsem na em i givim telefon namba long sista. Tasol sista i no les na lusim em, nogat. Em i stretim rot na bihain liklik, tupela Witnes marit i go lukim Renata. Em i tingting, ‘Ol bai lainim mi long wanem samting?’ Tasol maski em i bin go long bikpela skul bilong lotu, em i gat pasin daun na em i pilim tru ol tok i tru bilong Baibel. Em i tok: “Wantu mi save olsem dispela em i tok i tru.” Nau em i amamas long helpim ol narapela long save long tok bilong Baibel.
Michèle i lain long draivim ka. Sampela sumatin long klas bilong dravim ka ol i kirap toktok long pasin bilong man na meri i slip wantaim na ol i no marit yet. Michèle i tokaut klia em i no orait long dispela pasin. Wanpela wik bihain, tisa bilong lainim em long draiv, Sylvie, i askim em: “Yu wanpela Witnes Bilong Jehova?” Sylvie i laikim ol tok Michèle i kamapim em Baibel i as bilong en. Michèle i kirapim Baibel-stadi wantaim Sylvie, na wanpela yia bihain, Sylvie i kisim baptais.
Ol planti pak na gaden long Paris ol i naispela ples bilong toktok wantaim ol man. Long taim bilong malolo, Josette i go long pak we wanpela lapun meri i wokabaut. Josette i stori wantaim em long ol gutpela tok promis i stap long Baibel. Ol i stretim rot bilong mekim stadi Baibel, na i no longtaim na Aline i winim mak bilong kisim baptais. Nau Aline, em i gat 74 krismas, em i mekim wok painia na i amamas long helpim ol narapela long kisim save long tok i tru bilong lotu Kristen.
Lait i Go Long Olgeta Lain
Bilong save long ol man bilong narapela lain, i no olsem ol Witnes long Paris i mas go long ol narapela kantri, nogat. Inap olsem 20 pesen bilong olgeta man long Paris ol i man bilong narapela lain. I gat ol kongrigesen na grup Kristen long 25 tok ples.
Sampela yet i bin kirap na tingim wanem rot i gutpela long autim tok long ol dispela lain. Wanpela Witnes Filipino i bin kamapim wanpela teritori bilong em yet. Taim em i raun baim ol samting long stua, em i save kirap toktok wantaim ol narapela Filipino long stua, na long dispela rot em i bin kirapim planti Baibel-stadi.
Tru tumas, pasin bilong autim tok long narapela kain rot inap kamapim gutpela samting. Long Disemba 1996, ol Witnes long wanpela kongrigesen bilong narapela tok ples ol i kisim save olsem wanpela lain bilong mekim ol pilai samting (circus) bai kam long Paris, olsem na ol i tingting long go toktok wantaim ol. Dispela lain i gat nem long olgeta hap bilong graun. Wanpela apinun, taim pilai i pinis na ol lain i laik go bek long hotel, rot i op na ol Witnes i toktok wantaim ol. Ol i tilim 28 Baibel, 59 buk Kristen, 131 buklet, na 290 magasin. Long pinis bilong 3-pela wik ol i bin stap, wanpela man bilong dispela pilai em i askim olsem: “Mi ken mekim wanem bilong kamap wanpela Witnes Bilong Jehova?” Narapela i tokaut: “Bai mi autim tok long kantri bilong mi!”
Ol Gutpela Samting Bilong Painim
Maski ol i lukluk we, ol turis long Paris inap lukim ol haus bilong bipo em stail bilong ol i gutpela tru. Na i gat ol gutpela samting i wet i stap bilong ol Witnes i ken painim. Aniza i kam i stap long Frans, wantaim ankol em i wanpela man bilong gavman. Oltaim Aniza i save ritim Baibel long haus. Wanpela taim em i hariap long lusim haus na wanpela painia i givim em liklik nius, “I Gat Wanem As na Yu Inap Bilip Tru Long Baibel?” Painia i stretim rot long go bek lukim em long wik antap, na em i kirapim Baibel-stadi wantaim em. Famili bilong Aniza i kirap birua long em. Tasol em i stadi i go na kisim baptais. Em i gat wanem tingting long em inap insait long wok bilong helpim ol narapela long kisim save long tok i tru? Em i tok: “Pastaim mi hatwok long autim tok, long wanem, mi meri bilong sem. Tasol taim mi ritim Baibel, dispela i save kirapim mi. Bel bilong mi i no stap isi sapos mi no autim tok.” Dispela kain tingting i stret long planti Witnes long Paris, em ol i save “wok strong long mekim wok bilong Bikpela.”—1 Korin 15:58.
Lait bilong tok i tru bilong Baibel i go tu long ol haus i stap long arere bilong Paris. Bruce i laik kisim sampela kaset, olsem na em i go lukim pren bilong em, em nau tasol dispela pren i bin kamap wanpela Witnes Bilong Jehova. Dispela pren i wok long toktok wantaim sampela poro bilong Bruce, olsem na Bruce i putim yau long toktok bilong ol. Bruce i orait long stadi long Baibel, tasol em i gat sampela hevi. Em i tok: “Planti man long dispela hap ol i save gut long mi. Oltaim bikbrata bilong mi i save pait, na mi save kamapim ol pati bilong danis i gat planti pairap long en. Ol narapela bai ting olsem wanem long mi kamap wanpela Witnes?” Ol i strong long em i mas wokim ol pati, tasol em i no mekim moa. Wanpela mun bihain em i kirap autim tok. Em i tok: “Olgeta long hap bilong mi i laik save i gat wanem as na mi kamap wanpela Witnes.” I no longtaim na em i kisim baptais. Bihain moa, rot i op long em i go long Ministerial Trening Skul.
I hatwok tru long painim ol gutpela samting. Tasol yumi save amamas tru taim gutpela samting i kamap long hatwok bilong yumi! Jacky, Bruno, na Damien, ol i stap long Paris na ol i man bilong wokim bret. Jacky i tok: “I hatwok tru long lukim mipela, long wanem, mipela i wok olgeta taim na mipela i no save stap long haus.” Patrick, wanpela painia, em i lukim olsem bikpela haus ol i stap long en i gat sampela liklik rum long antap, na em i ting i mas i gat sampela man i stap. Em i wok strong long painim ol, na dispela i kamapim gutpela samting. Wanpela apinun em i bungim Jacky, em i bin go sindaun long dispela haus bilong sotpela taim tasol. Wanem samting i kamap? Dispela tripela pren ol i kamap Witnes, na ol i kisim narapela wok we ol inap insait moa long wok tiokratik.
Winim Hevi
I no longtaim i go pinis na ol nius samting long Frans i bin kamapim ol Witnes Bilong Jehova olsem wanpela lotu nogut. Long 1996 ol Witnes i givim bel long tilim 9 milion liklik nius, nem bilong en Jehovah’s Witnesses—What You Need to Know. Dispela i kamapim gutpela samting.
Ol i laik bai olgeta man i kisim dispela nius. Planti bikman i kamapim klia olsem ol i laikim ol Witnes. Wanpela kaunsil i raitim pas na i tok: “Em i gutpela samting tru ol Witnes Bilong Jehova i bin tilim dispela nius. Nius i daunim ol tok giaman ol man i bin sutim long ol.” Wanpela dokta i tok: “Inap longtaim pinis mi bin wet long dispela!” Wanpela man long Paris i raitim pas i tok: “Mi ritim pinis nius Jehovah’s Witnesses—What You Need to Know. Mi laik kisim sampela save moa na mekim stadi Baibel i no gat pe.” Narapela i raitim pas na tok: “Tenkyu tru yu bin tokaut klia long dispela samting.” Wanpela meri Katolik i tokim ol Witnes: “A! Yu bekim tok pinis long tok giaman bilong ol.”
Long 1997, ol Witnes i stretim rot bilong autim tok long taim bilong wanpela bikpela bung bilong ol yangpela Katolik (Catholic World Youth Days), na planti yangpela Witnes long Paris ol i amamas tru long mekim. San i hat nogut tru (35° Selsias), tasol 2,500 Witnes i insait long dispela wok. Insait long sampela de tasol, ol i tilim 18,000 buklet (A Book for All People) long ol yangpela ol i bin kam long olgeta hap bilong graun. Dispela wok i kamapim gut nem bilong Jehova na i planim pikinini kaikai, olsem tok i tru, long bel bilong planti man. Na tu, dispela wok i strongim ol dispela yangpela Witnes yet. Wanpela yangpela sista i sotim taim bilong holide bilong em bambai em inap insait long dispela wok, na em i tok: “Jehova i gat wanpela lain long graun ol i amamas tru em ol i save mekim wok long strong bilong ol bilong litimapim nem bilong em. Bikpela amamas mi bin kisim long dispela tupela de em i winim tru olgeta malolo mi inap kisim! (Song 84:10)”
Februeri 28, 1998, dispela det i makim olsem 65 yia i go pinis Hitler i putim wanpela lo i tambuim wok bilong ol Witnes Bilong Jehova long Jemani. Ol Witnes long Frans i tingim dispela det na ol i rentim ol bikpela haus bilong soim video Jehovah’s Witnesses Stand Firm Against Nazi Assault. Dispela video i kamapim ol pasin nogut em lain bilong Hitler i bin mekim long lain bilong Jehova. Ol i tilim 7 milion tanget i singautim ol man i kam long dispela bung. Sampela saveman bilong raitim stori bilong ol samting i bin kamap bipo, na sampela Witnes bipo ol i bin stap long ol banis kalabus nogut, ol i kamapim sampela tok em ol man i kam long dispela bung ol i pilim tru. Long hap bilong Paris, klostu 5,000 ol i kam, em planti ol i no Witnes.
Planti man long Paris ol i laikim tru lait bilong spirit, na ol i amamas olsem ol man bilong autim tok bilong Kingdom ol i stap olsem lait. I olsem Jisas i tok: “Planti kaikai tumas i mau pinis long gaden, tasol i no gat planti wokman i stap bilong kisim.” (Matyu 9:37) Tru, wok autim tok long biktaun Paris i gat hatwok long en, tasol ol Witnes Bilong Jehova i bin wok strong long winim ol hevi, olsem na yumi ken tok Paris i stap olsem Taun Bilong Lait na dispela i litimapim nem bilong Jehova.
[Piksa long pes 9]
Haus Kaunsil
[Piksa long pes 9]
Haus Opera Garnier
[Piksa long pes 9]
Haus Tumbuna Louvre
[Ol Piksa long pes 10]
Autim tok bilong Baibel long olgeta hap i gat man i stap