“Ating Bai Yu Pilim Pen Long Dispela”
YU BIN harim dispela kain tok? Ating wanpela dokta o nes i mekim dispela tok taim ol i laik givim yu wanpela sut samting ol i tok yu mas kisim.
Ating yu no sakim dispela sut samting na bai yu no ken kisim pen, nogat. Tasol yu karim dispela pen, long wanem, yu laik bai skin bilong yu i kamap gutpela bihain. Taim man i gat bikpela sik tru, wanem wanem marasin samting man i orait long kisim o em i sakim, dispela inap helpim em long i stap laip o em inap dai.
Ating i no long olgeta taim yumi mas i go lukim dokta samting, tasol oltaim yumi ol sinman i mas kisim tok bilong stretim yumi, maski sampela taim dispela tok i givim pen long yumi. (Jeremaia 10:23) Baibel i strongim dispela tok olsem yumi mas stretim ol pikinini, na i tok: “Ol pikinini i save mekim olkain longlong pasin. Tasol sapos yu givim kanda long ol, bai ol i lusim dispela pasin.”—Sindaun 22:15.
Long dispela tok, kanda i makim namba em papamama i holim bilong mekim wok bos. Tru, ol pikinini i no laik bai papamama i stretim ol. Na sapos papamama i mas givim sampela kain strafe long ol, ating ol pikinini i save bel hevi long dispela. Tasol ol papamama i save laikim ol pikinini na ol i gat gutpela tingting, ol i no tingim bel hevi nau pikinini i kisim, ol i tingim ol gutpela samting bihain pikinini bai kisim long dispela. Ol papamama Kristen i save Baibel i tok tru taim em i tok: “Taim Papa i givim hevi long yumi bilong stretim yumi, yumi no save amamas. Nogat. Bel bilong yumi i pilim hevi tasol. Tasol taim em i stretim yumi pinis, yumi bai kisim gutpela pasin tru. Yumi bai mekim ol stretpela pasin, na bel bilong yumi bai i stap isi.”—Hibru 12:11; Sindaun 13:24.
Tru, i no ol pikinini tasol i mas kisim tok bilong stretim ol—ol bikpela manmeri tu. Baibel i tokim ol manmeri i bikpela pinis olsem: “Oltaim yu mas holimpas dispela gutpela tok bilong mi. Em i olsem as bilong laip bilong yu, olsem na yu mas lukautim gut.” (Sindaun 4:13) Em nau, ol man i gat gutpela tingting—ol yangpela na lapun—bai kisim ol tok bilong stretim ol em Baibel i as bilong en, long wanem, bihain dispela tok bai helpim ol long kisim laip i stap oltaim.