Olsem Wanem Yu Inap Abrusim Bagarap Long Pinis Bilong Dispela Graun?
BAIBEL i stori long pinis bilong pasin nogut bilong nau, olsem: “Long dispela De, belhat bilong God bai i kamap ples klia, na bai ol manmeri i gat bikpela hevi na bel nogut, na bai ol samting i bagarap nabaut. Na ol klaut bai i karamapim san na bikpela tudak bai i kamap.” (Sefanaia 1:15) Tru, dispela i no wanpela kain de yu save amamas long wetim, a? Tasol aposel Pol i kirapim ol wanbilip Kristen long “wetim De bilong God i kamap, na [ol] i mas wok strong long hariapim dispela De, bai em i kamap kwiktaim. Long dispela De tasol skai bai i paia na i pinis, na hatpela paia moa bai i kukim olgeta liklik samting God i bin wokim graun long en, na ol bai i kamap wara nating. Tasol God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.”—2 Pita 3:12, 13.
Pita i no stori long heven na graun tru tru bai bagarap, nogat. Dispela “heven” na “graun” em Pita i stori long en long ol dispela ves i makim ol gavman nogut ol man i kamapim na ol manmeri i givim baksait long God. Long “dispela taim nogut tru,” Bikpela bai no bagarapim dispela graun tru tru, nogat; em bai “pinisim tru olgeta man na meri i save mekim sin.” (Aisaia 13:9) Ol manmeri i wok long “bel nogut na i wari long olgeta dispela pasin nogut” ol manmeri bilong nau i wok long mekim, de bilong Jehova bai kamap olsem de bilong God i kisim bek ol dispela manmeri.—Esekiel 9:4.
Long wanem rot ol manmeri i ken abrusim bagarap long “dispela bikpela De olgeta manmeri bai i pret nogut tru” long en? “Tok Bikpela i givim” long wanpela profet bilong em i bekim dispela askim. Em i tok: “Olgeta manmeri i singaut long nem bilong Jehova ol i no ken bagarap.” (Joel 1:1; 2:31, 32, NW ) Ol Witnes Bilong Jehova i amamas tru long helpim yu long save long yu mas mekim wanem bilong yu ken singaut long nem bilong Jehova.