Wanem Taim i Gutpela Long Ranawe?

PASIN bilong mekim tasol ol samting na i no pret, na kros, na inapim ol laik nogut bilong skin, em pasin bilong planti manmeri long nau. Ol i ting man i ranawe long hevi samting em i no gat bun. Ating sampela bai tok bilas long em tu.

Tasol Baibel i tokaut stret olsem i gat sampela taim na pasin bilong ranawe em i gutpela na man i ranawe em i gat strongpela bel. Samting i strongim dispela tok i olsem: Taim Krais Jisas i salim ol disaipel i go autim tok, em i tokim ol: “Sapos ol manmeri bilong wanpela taun i mekim nogut long yupela, orait yupela i mas ranawe i go long narapela taun.” (Matyu 10:23) Yes, ol disaipel bilong Jisas i mas traim long ranawe long ol man i laik mekim nogut long ol. Ol i no ken subim ol man long kamap Kristen. Ol i karim gutpela tok bilong bel isi i go long ol. (Matyu 10:​11-⁠14; Aposel 10:​34-​37) Em nau, ol Kristen i mas ranawe lusim ol samting i laik kirapim ol long kros. Long dispela rot, bel bilong ol i no gat tok na ol i holim strong pasin bilong pas gut wantaim Jehova.​​—⁠2 Korin 4:​1, 2.

Buk Sindaun long Baibel i stori long wanpela yangpela man, em i no ranawe long pasin bilong inapim laik nogut bilong skin. Em i bihainim pamukmeri ‘olsem bulmakau i go long ples bilong kilim i dai.’ Wanem samting i kamap long dispela? Samting nogut​—⁠em i lusim laip bilong em​—⁠long wanem, em i larim dispela laik nogut i pulim em.​​—⁠Sindaun 7:​5-8, 21-​23.

Orait olsem wanem sapos wanpela samting i kamap na i laik pulim yu long mekim pasin pamuk o sampela narapela rong? Olsem Baibel i tok, i gutpela sapos yu ranawe, olsem wantu tasol.​​—⁠Sindaun 4:​14, 15; 1 Korin 6:​18; 2 Timoti 2:​22.