‘God i No Save Sindaun Insait Long Ol Haus Lotu Ol Man i Wokim’
APOSEL Pol i bin save long ol haus lotu bilong Atina, long wanem, planti taun em i raun long wok misineri bilong em, i gat ol dispela haus lotu. Buk The Encyclopædia Britannica i tok, Atina i no kisim nem olsem god meri bilong pait na gutpela tingting tasol, nogat, em i gat nem tu long wokim kain kain samting na save bilong kamapim taim bilong bel isi.
Nambawan haus lotu bilong Atina i gat nem, em Partenon, ol i sanapim long Atens, em taun i kisim nem bilong dispela god meri. Em wanpela haus lotu ol i tingim i nambawan tru long dispela taim bipo, insait long Partenon i gat imis bilong Atina ol bin wokim long gol na tit bilong elefan, longpela bilong en em 12 mita. Taim Pol i raun long Atens, dispela haus lotu ol i wokim long waitpela ston mabel i bin i stap pinis olsem nambawan samting bilong taun inap olsem 500 yia.
Pol i sanap klostu long Partenon taim em i autim tok long wanpela lain bilong Atens long dispela God i no save stap long ol haus lotu ol man i wokim. (Aposel 17:23, 24) Ating ol haus lotu bilong Atena i naispela tumas na ol imis bilong em i gutpela tru, na dispela i mekim ol man i harim tok bilong Pol i pilim olsem Atena i winim wanpela God ol i no save long en na ol i no inap lukim. Tasol olsem Pol i tok, ol i no ken ting Man Bilong Wokim ol man em i olsem “gol na silva na ston. . . . Samting yumi man i save wokim long han.”—Aposel 17:29.
Ol god na god meri olsem Atina—ol i save kisim biknem long ol haus lotu na imis tasol—ol i save kamap na bihain ol i pinis. Imis bilong Atina i bin lus long haus lotu Partenon long 400 C.E. samting, na liklik hap tasol bilong sampela bilong ol haus lotu bilong en i stap yet. Husat long nau i lukluk i go long Atina bilong kisim gutpela tingting na bilong Atina i stiaim em?
Jehova em i narapela kain, em i “God i save stap oltaim” na i no gat wanpela man i lukim em. (Rom 16:26; 1 Jon 4:12) Ol pikinini man bilong Kora i tok: “Dispela God i lukautim mipela, em i God bilong yumi oltaim oltaim. Na oltaim em bai i go pas na soim rot long yumi.” (Song 48:14) Wanpela rot bilong amamas long Jehova i soim rot long yumi em long stadi long Tok bilong em, em Baibel na bihainim ol tok bilong en long laip bilong yumi.