“Wanpela Bikpela Wok Ensinia”
INAP olsem 3,000 yia i go pinis, taim ol i bin wokim tempel bilong Jehova long Jerusalem long taim Solomon i stap king, ol i bin yusim bras bilong wokim wanpela naispela tang na putim ausait long dua bilong tempel. Hevi bilong en i winim 30 ton na em inap holim 40,000 lita wara long en. Ol i kolim dispela tang olsem bikpela tang wara. (1 King 7:23-26) Long buk Biblical Archeologist, Albert Zuidhof, bipo em i wanpela teknikol ofisa long National Council of Canada, em i tok: “Tru tumas, dispela em i wanpela bikpela wok ensinia em lain Hibru i bin mekim.”
Olsem wanem ol i bin wokim dispela bikpela tang wara? Baibel i tok: “Long distrik Jordan king i tromoi [ol samting ol i wokim long bras] insait long tupela tang ol i wokim long graun.” (1 King 7:45, 46, NW ) Zuidhof i tok: ‘Ating pasin ol i bin bihainim bilong wokim dispela tang wara i kain olsem pasin ol i bihainim bilong wokim ol traipela bras belo. Ol i wokim tupela tang long graun, wanpela tang i stap insait na narapela i bikpela liklik long en na i raunim em, na taim ol i kukim pinis bras na em i kamap malumalum, ol i save kapsaitim i go insait long spes i stap namel long tupela tang. Laspela samting ol i mekim em ol i brukim dispela tupela tang ol i bin wokim long graun.’
Dispela tang wara i bikpela tru na hevi bilong en i moa yet, olsem na ol man bilong wokim dispela samting ol i mas i gat bikpela save. Dispela tupela tang ol i wokim long graun, ol i mas strongpela na bai hevi bilong bras ol i kukim na i kamap malumalum, em inap olsem 30 ton, i no ken brukim ol. Taim ol i kapsaitim kopa, ol i no ken malolo, long wanem, dispela inap mekim na bai sampela hap bilong tang i bruk o sampela popaia inap kamap. Olsem na ol hap bilong laitim paia i mas i stap klostu na bai ol inap kukim bras na kapsaitim. Man! Em wanpela bikpela wok tru!
Long beten em i bin mekim long taim ol i dediketim tempel, King Solomon i givim biknem long God Jehova long wok bilong sanapim tempel, na em i tok: ‘Yu bin mekim dispela promis, na nau yu inapim pinis dispela promis.’—1 King 8:24.