“Jehova Em i Helpim Bilong Mi”
Save Long Ol Samting Bilong God i Strongim Famili
“BANIS BERLIN.” Em tok tupela marit long Ajentina i kolim long banis tru tru ol i bin wokim bilong brukim haus bilong ol i kamap tupela haus! Tupela i gat narapela narapela tingting; narapela i nolaikim tru narapela.
Sori tru, samting i painim tupela marit i save painim planti ol narapela marit tu. Ol hevi bilong kros pait, pamuk, na pasin birua i painim planti famili. Dispela i no gutpela samting, long wanem, famili em i samting God yet i bin kamapim. (Stat 1:27, 28; 2:23, 24) Famili em i presen yumi kisim long God na em i gutpela ples bilong kamapim pasin laikim. (Rut 1:9) Taim famili i inapim ol wok God i givim ol, olgeta wan wan i givim biknem long Jehova na narapela i stap olsem gutpela samting bilong amamasim narapela.a
God i as bilong famili, olsem na yumi mas larim tingting bilong em i stiaim tingting bilong yumi long ol samting famili i mas mekim. Baibel i gat planti ol gutpela tok bilong helpim famili long kamap strong, moa yet long taim ol hevi i kamap. Baibel i tok long wok bilong maritman olsem: “Yupela man, yupela i mas laikim tru ol meri bilong yupela, olsem yupela i save laikim bodi bilong yupela yet.” Taim maritman i inapim dispela wok, meri i amamas long i ‘stap aninit long em na mekim gutpela pasin long em.’—Efesus 5:25-29, 33.
Pol i stori long pasin namel long ol papamama na ol pikinini, na em i tok: “Yupela papa, yupela i no ken bagarapim tingting bilong ol pikinini bilong yupela na mekim ol i belhat long yupela. Nogat. Yupela i mas mekim gutpela pasin long ai bilong Bikpela, na stretim gut ol pikinini bilong yupela na skulim ol long tok bilong Bikpela.” (Efesus 6:4) Taim ol i mekim olsem, gutpela pasin amamas i kamap insait long famili, na ol pikinini i no hatwok long bihainim tok bilong papamama.—Efesus 6:1.
Ol dispela tok em sampela bilong ol gutpela tok bilong Baibel bilong helpim famili. Taim ol famili i bihainim ol stiatok bilong Baibel, planti i stap amamas insait long famili. Olsem tupela marit bilong Ajentina yumi stori pinis long ol. Taim ol i stadi wantaim ol Witnes Bilong Jehova inap tripela mun pinis, tupela wantaim i kirap long bihainim ol gutpela tok bilong marit long Baibel. Ol i wok strong long stretim pasin bilong ol long toktok gut wantaim, na pilim tingting na laik bilong arapela, na lusim rong bilong arapela. (Sindaun 15:22; 1 Pita 3:7; 4:8) Ol i lain long daunim kros na long kisim helpim long God taim kros i laik go bikpela. (Kolosi 3:19) I no longtaim na ol inap daunim kros, olsem rausim dispela “Banis Berlin”!
God Inap Strongim Famili
Taim famili i save long ol lo bilong God na ol i bihainim, dispela i strongim ol long sanap strong long taim bilong hevi. Dispela i bikpela samting, long wanem, Baibel i tok profet olsem long taim bilong yumi ol bikpela hevi bai painim ol famili. Pol i tok profet olsem long nau ol man bai lusim stretpela pasin na pasin bilong ol i go nogut tru. Em i tok, ol samting i makim “taim bilong las de” em ol man bai no stap gut long narapela, “ol bai i no save long pasin bilong i stap pren bilong ol arapela,” na sakim tok bilong papamama, dispela pasin bai kamap tu namel long ol man “i bihainim pasin bilong God long skin tasol.”—2 Timoti 3:1-5.
Pasin bilong amamasim God bai helpim yumi long daunim ol kain pasin i wok long bagarapim famili. Planti famili i kisim save olsem bilong winim ol planti hevi i painim ol, ol i mas kisim ol samting bilong spirit. Sapos wan wan long famili i laik lukautim gut pasin pren bilong ol wantaim God, nambawan samting ol i mas mekim em ol i mas bihainim ol stiatok bilong Baibel na ol i mas save olsem “sapos Bikpela i no wokim haus, ol kamda i wok nating.” (Song 127:1) Bilong famili i stap amamas tru, ol i mas putim God i stap namba wan long laip bilong ol.—Efesus 3:14, 15.
Dennis, em wanpela man bilong Hawaii i bin kisim save olsem dispela tok em i tru. Maski em i tok em i Kristen, em i gat pasin bilong tok nogut na pait. Bihain long em i pinis wok ami, em i kamap man bilong belhat na birua tru long ol narapela. Em i tok: “Olgeta taim mi save pait wantaim ol narapela. Mi no wari long samting i painim mi, na mi no pret long indai. Mi wok yet long tok nogutim ol narapela na pait. Meri bilong mi em i wanpela Witnes Bilong Jehova, em i strongim mi long stadi long Baibel.”
Dennis i sakim tok bilong meri bilong em. Tasol pasin Kristen bilong meri i wok long senisim tingting kranki bilong em. Bihain, Dennis i go long miting Kristen wantaim meri pikinini bilong em. Bihain long dispela, Dennis i kirap stadi long Baibel, na em wok long kamap strong. Em i lusim pasin bilong smok—inap 28 yia olgeta em i bin smok—na em i lusim ol poroman bilong em ol i save mekim ol pasin em i traim long lusim. Dennis i amamas long Jehova na tok: “Laip bilong famili bilong mi i senis. Mipela famili i save go long ol miting na insait long wok autim tok wantaim. Tupela pikinini bilong mi i no pret moa long mi, long wanem, mi lain long daunim belhat bilong mi na mi no tok nogut moa. Mipela i save toktok na stori gut wantaim long ol tok bilong Baibel. Sapos mi no bin stadi long tok i tru bilong Baibel, mi no inap i stap long nau, long wanem, bipo mi man bilong belhat nogut tru.”
Ol famili inap kisim amamas taim ol i wok strong long mekim laik bilong Jehova. Ol ekspiriens i bin kamapim olsem maski sapos wanpela tasol long famili i bihainim ol stiatok bilong Baibel, i stap bilong ol bai gutpela, winim famili i no gat wanpela i bihainim tok bilong Baibel. Bilong kamapim wanpela strongpela famili Kristen em i gat hatwok, man i mas i gat gutpela save na taim bilong mekim. Tasol ol kain famili olsem i ken bilip olsem Jehova bai givim gutpela pe long hatwok ol i mekim. Ol i ken mekim wankain tok olsem man bilong raitim song: “Jehova em i helpim bilong mi.”—Song 121:2, NW.
[Futnot]
a Lukim 2005 Calendar of Jehovah’s Witnesses, Me/Jun.
[Rait long pes 9]
“Em i Papa bilong olgeta lain i stap long heven na long graun, na em yet i givim nem long olgeta dispela lain.”—EFESUS 3:15
[Blok long pes 8]
JEHOVA I SAVE TINGIM GUT FAMILI
“God i mekim gutpela tok bilong givim strong long ol. Em i tokim ol olsem, ‘Yupela i mas kamap planti na i go sindaun long olgeta hap bilong graun.’ ”—Stat 1:28.
“Yu wanem man o meri i save pret long Bikpela . . . , yu ken amamas. Meri bilong yu bai i stap olsem diwai oliv i karim planti kaikai.”—Song 128:1, 3.