Ol i Painim Paradais i No Gat Hevi Long En
TUPELA marit bilong Briten i tok: “Mipela i laik kamapim wanpela ples ol man i ken stap bel isi long en na ating ol i ken bihainim sindaun bilong ol man bilong bipo em narapela i bin tingim tru narapela.” Olsem na tupela i pasim tok long raun long ol ples hat na painim wanpela ailan i olsem paradais na kamapim long dispela ailan wanpela ples ol man i ken sindaun gut wantaim long en. Ating yu inap pilim tru tingting bilong tupela. Sapos rot i op bilong sindaun long wanpela paradais i no gat hevi long en, ating olgeta man i laik mekim olsem, a?
Stap Longwe Long Ol Narapela Man?
Planti man i wok long painim paradais, ol i ting dispela tingting bilong sindaun long wanpela ailan em i gutpela tingting tru, long wanem, sapos ol i stap longwe long ol narapela man ol inap stap bel isi. Sampela i save go na sindaun long ol ailan klostu long nambis bilong Panama long hap bilong solwara Pasifik o ol ailan long hap bilong Karibian, olsem ol ailan klostu long nambis bilong Belis. Na sampela moa ol i go na sindaun long ol naispela ples long solwara India, olsem ol ailan Seisel samting.
Ating i hatwok tru long save olsem wanem ol man i ken kamapim wanpela ples i gat lain bilong en na i stap longwe tru long ol narapela ples. Na maski ol i gat mani bilong mekim olsem, ating lo bilong gavman i bosim dispela ples bai mekim na ol i no inap baim hariap graun. Tasol sapos i gat rot long kisim wanpela gutpela ailan, bai yu amamas long stap long en? Paradais bilong yu bai i no gat hevi long en?
Long nau planti man moa i wok long kamap long ol ailan i stap longwe tru long nambis bilong Briten. Ol man i kam sindaun nupela long ol dispela ailan ol i laik stap wanpis na stap bel isi. Wanpela man tasol i stap long ailan Eorsa, em wanpela liklik ailan (100 hekta) longwe long nambis bilong Skotlan long hap bilong wes. Dispela man i tok i no gat wanpela taim em i pilim olsem em i stap wanpis, long wanem, em i gat bikpela wok long lukautim 100 sipsip bilong em. Tasol sampela man em ol i laik sindaun wanpis long wanpela ailan, kwiktaim ol i bel hevi long i stap wanpis. Na ol ripot i tok, sampela i bin traim long kilim i dai skin bilong ol yet na ol man i mas go helpim ol na ol i no ken bagarap.
Planti man i ting paradais em wanpela naispela ailan long ples hat. Ol i laik sindaun long wanpela hap i no kol tumas o hat tumas. Tasol planti man i sindaun long ol ailan ol i tingting planti long dispela tok olsem graun i wok long kamap hat na mak bilong solwara bai go antap. Na ol man i sindaun long ol ailan i no antap tumas long mak bilong solwara—2 mita tasol long taim bilong haiwara—olsem ol ailan bilong Tokelau long hap bilong Westen Pasifik na ol ailan Moldaiv em ol i stap nabaut nabaut long solwara India, ol tu i pilim olsem bagarap inap painim ol.
Klostu 40 narapela narapela gavman i bin bung wantaim bilong kamapim wanpela lain (Small Island Developing States) bilong helpim ol dispela man. Planti man i sindaun long ol liklik ailan ol i save kisim bikpela krismas, na planti pikinini bilong ol i no save dai taim ol i bebi yet, tasol planti bikpela hevi i bagarapim graun i wok yet long painim ol. Wel nogut i trip nabaut nabaut long solwara, na pasin bilong tromoi ol pipia na marasin nogut samting i bagarapim solwara, olsem na wok bisnis bilong ol lain i sindaun long sampela ailan i bagarap. Na sampela ailan moa i kamap olsem ples pipia bilong ol bikpela kantri i laik tromoi pipia bilong ol marasin nogut.
Na ol dispela naispela ailan em planti man i save go long ol bilong painim paradais, ol yet i kamapim hevi. Olsem wanem? Planti turis i save go long ol dispela ailan i gat gutpela san ol i mekim na ol man i pas pas, na ol dispela ailan i no gat planti samting tasol ol turis i wok long pinisim ol dispela samting. Na ol dispela turis i mekim dispela hevi long bagarapim ol samting bilong graun i go bikpela moa. Yumi ken tingim samting i save kamap long Karibian, olsem: Long olgeta yia, 20 milion turis i save go long dispela hap, tasol bikpela hap pekpek samting ol dispela turis i save kamapim, ol lain bilong bosim ol dispela ailan i mekim liklik samting tasol bilong kilim ol binatang nogut bilong en paslain long ol i tromoi.
Na wankain samting i save kamap long ol narapela naispela ples. Tingim Goa long nambis bilong India long hap bilong wes. Nius Independent on Sunday bilong Landon i tok: “Planti turis ‘i bagarapim wanpela paradais.’ ” Sampela lain bilong gavman i tok, long 1972 inap 10,000 turis i bin raun long dispela hap, tasol lain turis i wok long go bikpela moa, olsem na long 1993 samting, winim wan milion ol i raun. Wanpela lain i tok, ol samting bilong graun long Goa na pasin bilong ples ol man i save bihainim na i narapela kain, dispela ol samting inap bagarap, long wanem, ol papa bilong ol hotel i gat pasin mangal na ol i laikim bikpela lain turis. Wanpela ripot bilong gavman bilong India i tok, ol man i sanapim nating sampela hotel long nambis. Na ol i bin rausim wesan bilong mekim wok long en, na katim ol diwai, na stretim ol liklik maunten wesan. Na ol samting bilong toilet i ran i go long nambis o i save kamap long ol gaden rais na dispela i save bagarapim planti samting long Goa.
I Gat Pasin Raskol?
Maski ol man i ting sampela ples i stap bel isi tru, pasin raskol i wok long kamap long ol na gutpela nem bilong ol dispela ples i bagarap. Wanpela ripot i bin kam long liklik ailan Babuda long hap bilong Karibian i gat het-tok olsem: “Ol i Bagarap Long Paradais.” Ripot i stori long sampela lain i bin kilim i dai 4-pela man i sindaun long wanpela bot i gat bikpela pe na bot i anka klostu long nambis bilong dispela ailan. Kain samting olsem i mekim na ol man i tingting planti long pasin raskol i go bikpela moa long dispela hap.
Nius The Sunday Times bilong Landon i stori long wanpela kantri bilong Sentral Amerika na het-tok bilong nius i olsem: “Ol Drak i As na Ol Lain Raskol i Pait Long ‘Paradais.’ ” Long dispela hap, pasin bilong ol man long sindaun gut wantaim i pinis, olsem na wanpela niusman bilong dispela hap em i bel hevi na em i tok: “Taim mipela i kirap long moningtaim long nau, i no nupela samting long painim manki i gat 16 krismas i slip long rot long blut bilong em yet.”
Ol man i laik sindaun wantaim long ples i olsem paradais, ol i laik painim ol man i orait long stap isi wantaim ol narapela man. Tasol tru dispela samting inap kamap? I no longtaim na hevi i painim tupela marit bilong Briten em yumi stori pinis long ol. Sampela man i laik insait long dispela samting bilong ol long kamapim paradais, ol i laik kisim mani tasol long en. Dispela man bilong Briten i tok: ‘Yumi no laik kisim ol bikman. Yumi mas putim olgeta mani samting bilong yumi bilong kirapim dispela samting yumi tingting long en. Mi kolim dispela samting olsem wanpela samting bilong kamapim paradais.’ Planti kain samting olsem i bin kamap bipo.—Lukim blok “Ol Samting Bilong Kamapim Ples Olsem Paradais.”
Na sampela narapela man i wok long painim paradais, ol i bilip olsem ol bai kisim dispela samting sapos laki-tiket bilong ol i win. Tasol wan wan man tasol i save kisim amamas long rot bilong bikpela winmani. Long Februeri 1995, nius The Sunday Times i tok, inap long nau i no gat wanpela man i winim bikpela mani tru long rot bilong laki-tiket olsem wanpela man bilong wanpela famili long Briten. Tasol dispela winmani i kirapim ol long pait namel long ol yet, na pasin bilong “bel nogut i kamap namel long ol, na ol i kros na tingting long bekim long narapela, na ol i no amamas liklik.” Planti taim kain samting olsem i save kamap taim man i kisim winmani.
Niusman Bernard Levin, em i skelim dispela laik bilong ol man long kisim gutpela sindaun tru i olsem paradais, em i tok: ‘Driman bilong ol man long kisim bikpela mani wantu tasol i olsem planti driman—bihain ol i kamap driman nogut. I gat planti trupela stori long ol man i kisim bikpela mani wantu tasol na bihain ol bikpela hevi i painim ol (sampela i kilim i dai skin bilong ol tu), olsem na yumi no ken sakim ol dispela stori na ting ol i no gat as.’
Ol Lotu i Stori Long Las De Bilong Graun
Sampela narapela wok bilong kamapim paradais i olsem ol wok nogut. Long 1993, ol polis bilong gavman long Weko, Teksas, ol i banisim wanpela lotu (Branch Davidians) long kompaun bilong ol, na wanpela nius i tok, ‘planti samting nogut i bin wok wantaim bilong kamapim bagarap long dispela ples, olsem ol gan, na pasin bilong bosim tingting bilong ol man, na wanpela man i wok olsem profet na tokaut olsem las de bilong dispela graun i klostu tru.’ Sori tru, planti taim dispela kain samting i save kamap.
Bhagwan Shree Rajneesh, em wanpela man bilong India i dai pinis. Em i bin stap olsem bikman bilong wanpela lotu na lain bilong em ol i go sindaun long wanpela hap bilong Origen, tasol bel bilong ol man i sindaun klostu long ol i gat tok long ol pasin nogut bilong ol. Bikpela mani kago bilong bikman bilong ol na pasin bilong ol yet long mekim ol samting i gat pasin sem i daunim tru tok bilong ol olsem ol i kamapim pinis “wanpela gutpela ples.”
Planti liklik lotu nating em bikman bilong ol i tingting long kamapim paradais, ol i strong long lain bilong ol i mas mekim sampela pasin i narapela kain, na sampela taim ol dispela kain pasin i save kamapim bikpela kros. Niusman Ian Brodie i tok: “Ol man i pilim olsem ol i stap wanpis o ol i no inap karim ol hevi i save kamap long dispela graun, ol i save go insait long ol liklik lotu i save mekim hait wok bilong ol, long wanem, ol dispela kain lotu i save kamap olsem ples hait bilong ol na i wanpela lain i gat ol lo bilong en na olgeta wan wan i gat wok bilong ol.” Tasol tok bilong Ian Brodie i kamapim klia olsem planti man i gat bikpela laik long i stap long wanpela paradais.
Paradais i No Gat Hevi Long En
I gat planti hevi nogut tru i kamap: graun na win na wara i bagarap, pasin raskol, mekim nabaut long ol drak, ol man i pas pas, sampela lain i pait na ol i laik bagarapim na pinisim wanpela lain olgeta, pait bilong gavman samting, na tu, ol hevi i save painim yumi olgeta, olsem ol bikpela sik na indai. Olsem na long dispela yumi ken save, long dispela graun i no gat wanpela paradais i no gat sampela hevi long en. Olsem Bernard Levin i tok: ‘Kirap long taim man i kamap long dispela graun i kam inap nau i olsem man i gat nem nogut long kamapim planti hevi long graun, long wanem, ol i no inap sindaun klostu long planti man na i stap amamas wantaim ol.’
Tasol wanpela paradais i no gat hevi long en bai kamap long olgeta hap bilong graun. Paradais bai stap longtaim, long wanem, wanpela bikpela man antap i tok promis olsem. Na winim 5 milion manmeri long nau ol i wok strong long kisim dispela samting long bihain, na ol i amamas long stap wanbel na namel long ol i no gat planti hevi i kamap. Yu ken painim we dispela lain? Olsem wanem yu ken kisim wankain bilip na ol gutpela samting ol i save amamas long en long nau? Na dispela paradais bai stap longpela taim o olsem wanem?
[Blok long pes 6]
Ol Samting Bilong Kamapim Ples Olsem Paradais
Long yia 1800 samting, wanpela saveman bilong Frans, em Étienne Cabet (1788-1856) na 280 poroman bilong em, ol i go sindaun long wanpela ples ol i kamapim long Novu, Ilinoi, na long dispela hap ol i ken mekim ol samting tingting bilong Cabet i as bilong en. Tasol 8-pela yia bihain, ol bikpela hevi i kamap namel long ol na kwiktaim dispela lain i pinis, na ol narapela lain i kain olsem dispela, ol tu i pinis long Aiowa na Kalifonia.
Narapela man bilong Frans em Charles Fourier (1772-1837), em i kisim tingting long kirapim wanpela lain long sindaun wantaim na wok gaden samting na ol i ken senisim senisim wok bilong ol. Na sapos wok bilong lain olgeta i kamap gutpela, orait wan wan man bai kisim pe. Tasol ol lain i gat dispela kain tingting ol i pinis kwiktaim long Frans na long Yunaitet Stets.
Long wankain taim, saveman Robert Owen (1771-1858) bilong Wels, em i tingting long kamapim sampela liklik ples em planti handet man i ken sindaun wantaim long ol na mekim wok long wanpela haus kuk na wanpela rum kaikai. Tasol wan wan famili bai sindaun long rum bilong ol yet na lukautim ol pikinini bilong ol i go inap long taim ol i kisim 3-pela krismas. Bihain, lain olgeta bai lukautim ol dispela pikinini. Tasol wok bilong Owen i pundaun, na klostu olgeta mani bilong em i pinis.
John Noyes (1811-1886), em yet i man bilong kamapim “wanpela lain i stap olsem long paradais na ol i sindaun gut wantaim na winim ol narapela lain long Yunaitet Stets i kain olsem dispela.” (Buk The New Encyclopædia Britannica) Orait taim lain bilong em i lusim pasin bilong pas wantaim wanpela poroman marit tasol, na ol i orait long mekim maritpasin namel long ol yet sapos olgeta i wanbel long en, em nau ol polis i holim Noyes, long wanem, em i man bilong pamuk na bagarapim marit.
Nius The Sunday Times bilong Landon i tok, long nau ol i laik kamapim wanpela ples (Laissez Faire City) long Sentral Amerika i olsem wanpela “paradais bilong wok bisnis,” na ol man i ken sindaun gut wantaim long en. Ol i kirap painim sampela man bilong putim mani bilong helpim dispela wok. Ol i grisim ol man i wok long painim paradais long kisim laik bilong sindaun long “wanpela narapela kain ples bilong yia 2000,” olsem na wan wan i salim 5,000 dola na ol i askim ol long painim sampela man moa i gat wankain laik na ol tu i orait long putim mani bilong ol bilong skruim hap mani moa i go long dispela wok. Wanpela ripot i tok, dispela mani i save mekim wanpela samting tasol—baim tiket bilong balus bilong ol i ken go lukim wok ol i laik kamapim “sapos ol inap kirapim wanpela kantri long larim ol i kisim hap graun, na ol i ken wokim wanpela liklik hotel long en.” Wanpela “paradais“ i no ken tru kamap long dispela hap.
[Piksa long pes 7]
Planti man i painim paradais ol i laik sindaun long wanpela ailan. Tasol maski wanpela ples i stap bel isi tru, pasin raskol i save bagarapim