Pasin Wanbel i No Stap Namel Long Ol Pris Pasto na Ol Man Nating
ROBERT K. JOHNSTON, em saveman bilong lotu na ol pasin bilong ol man bilong ples, em i tok, “insait long ol misin evanjelikal bilong Amerika, i olsem i gat bikpela baret i stap namel long ol pris pasto na ol man nating.” Long nius Ministerial Formation bilong ol lain World Council of Churches, Johnston i kolim sampela samting i olsem as na ol i no wanbel: Ol hevi bilong famili i go bikpela, olsem na ol pasto i laik makim taim bilong wok long “Sarere Sande wankain long ol dokta.” Sapos pasto i lusim sampela aua moa long wok, em i laik bai ol i baim hatwok bilong em. Na dispela Profesa i tok moa olsem, ‘long nau i gat planti tok i kamap long olkain nupela pasin em sampela manmeri i strong long bihainim, olsem i stret o nogat, na long ol lo bilong gavman samting,’ olsem na ol bikpela skul bilong lotu i givim tok lukaut long ol sumatin i winim pinis skul olsem ol inap abrusim ol dispela hevi sapos ol i ‘poroman wantaim ol narapela pasto tasol’ na ol i mas tingim ol wanlotu bilong ol olsem ol man i baim pasto bilong helpim ol. Yumi no kirap nogut, planti manmeri bilong lotu bilong ol i tingim ol pasto olsem ol i bilong wanpela lain i gat bikpela namba na ol i no inap save long laik na ol hevi bilong ol lain i save go long lotu.
Pasto i mas i gat wanem kain pasin bambai em inap kamapim pasin wanbel insait long lotu, olsem pasim dispela baret? Wanpela lain i skelim as na ol pasto i pundaun long wok bilong ol na ol i kisim save olsem ol manmeri bilong lotu ol i no tingim olsem bikpela skul na save bilong ol pasto i bikpela samting. Ol manmeri bilong lotu i no laikim wanpela man i gat bikpela save, na em inap kamapim gut ol tok, na em i gat save long stretim gut ol wok bilong lotu. Bikpela samting em olsem: Ol i laikim pasto bilong ol em i wanpela “man bilong God” na em i save bihainim ol tok em i autim. Profesa Johnston i tok, sapos em i slek long mekim dispela pasin “i no gat wanpela tok em i autim o wok em i mekim” inap kamapim pasin wanbel insait long lotu.
Tasol Baibel i tok wanem long ol pasin ol elda insait long kongrigesen i mas bihainim? “Man i kamap wasman em i mas bihainim ol stretpela pasin tasol, bai ol man i no inap lukim wanpela rong long em. Em i mas i stap man bilong wanpela meri tasol. Em i mas sindaun gut na bihainim ol gutpela tingting tasol na mekim ol gutpela pasin. Em i mas lukautim gut ol man i kam long haus bilong en. Em i mas save gut long pasin bilong skulim ol manmeri long pasin God i laikim. Em i no ken spak. Em i no ken belhat kwik na pait long ol arapela man. Nogat. Em i mas isi long ol. Em i no ken laikim tumas long kisim mani. Em i mas bosim gut meri pikinini bilong em yet, na mekim ol pikinini i harim gut tok bilong em na i bihainim. Man i gat gutpela nem namel long ol man i stap ausait long sios, em tasol inap i stap wasman. Sapos em i no gat gutpela nem, orait inap ol man i tok nogut long em na bai umben bilong Satan i kisim em.”—1 Timoti 3:2-4, 7.