Baibel i Tok Wanem?
I Stret Ol Pris Pasto i Stap Narapela Kain Long Ol Man Nating Bilong Lotu?
Pop, Kadinal, Asbisop, Bisop, Pris, Pasto, Reveren, Rabai—em sampela biknem bilong ol bikman bilong ol lotu, em dispela i mekim ol i stap narapela kain long ol man nating bilong lotu. Dispela pasin i stap long planti lotu, tasol yu ting God i as bilong en o em wanpela pasin ol man i bin kamapim? Na bikpela samting moa, yu ting God i orait long en?
CLETUS Wessels, em wanpela profesa bilong lotu i tok: “Long Nupela Testamen na long taim bilong ol aposel i no gat stori long lain pris pasto i stap narapela kain long ol man nating bilong lotu.” Buk Encyclopedia of Christianity i tok: “Isi isi dispela pasin i bin kamap, olsem lain pris pasto i holim ol wok insait long lotu na i gat ol man nating bilong lotu . . . Ol i lukim ol man nating bilong lotu olsem ol man i no gat save long God na Baibel.” Inap 200 yia samting bihain long Jisas Krais, dispela pasin bilong ol pris pasto i holim biknem i go bikpela moa!
Sapos ol aposel bilong Jisas na ol Kristen long bipo i no as bilong dispela pasin bilong ol pris pasto i stap narapela kain long ol man nating bilong lotu, dispela i mekim na dispela pasin i gat rong o olsem wanem? Baibel i kamapim klia olsem dispela pasin i gat rong. Orait skelim as na yumi tok olsem.
“Yupela Olgeta i Stap Brata Brata”
Baibel i tokim yumi olsem olgeta Kristen i stap olsem wokman bilong God na i no gat wanpela i winim narapela o i stap aninit long narapela. (2 Korin 3:5, 6) Man bilong raitim stori bilong ol lotu, em Alexandre Faivre, em i tok: “Ol Kristen bilong pastaim i bin strong long olgeta i mas stap wankain.” Dispela tingting bilong ol i stret wantaim tok Jisas i mekim long ol disaipel bilong em olsem: “Yupela olgeta i stap brata brata.”—Matyu 23:8.
Ol man i strongpela Kristen ol i mekim wok olsem wasman na tisa insait long kongrigesen. (Aposel 20:28) Tasol ol i no kisim mani long dispela wok. Planti bilong ol i man nating i mekim wok mani—ol i maritman na papa. Na tu, ol i no go long wanpela skul bilong lotu na kamap wasman, nogat, ol i stadi gut long Baibel na kisim ol pasin em God i laikim olsem Baibel i stori long en. Em ol pasin olsem “sindaun gut na bihainim ol gutpela tingting tasol na mekim ol gutpela pasin. Em i mas lukautim gut ol man i kam long haus bilong en. Em i mas save gut long pasin bilong skulim ol manmeri long pasin God i laikim. . . . Em i no ken belhat kwik na pait long ol arapela man. Nogat. Em i mas isi long ol. Em i no ken laikim tumas long kisim mani. Em i mas bosim gut meri pikinini bilong em yet.”—1 Timoti 3:1-7.
Bilong Wanem Em i Savepasin Long Bihainim Tok Bilong Baibel?
Baibel i tok: “Bihainim pasin i stret olsem buk bilong God i tok long en, na yupela i no ken kalapim dispela tok.” (1 Korin 4:6) Sori tru, taim ol man i no bihainim dispela tok bilong God, ol i bagarapim pasin bilong ol long pas gut wantaim God, na dispela pasin bilong ol pris pasto long i stap narapela kain long ol man nating bilong lotu i kalapim tok bilong Baibel. Bilong wanem i olsem? Orait skelim dispela 6-pela samting.
1. Dispela pasin bilong ol pris pasto i holim biknem i makim olsem God i bin singautim ol tasol long mekim wok bilong God. Tasol Baibel i tok olgeta Kristen tru i mas mekim wok bilong God na litimapim nem bilong em. (Rom 10:9, 10) Bilong mekim wok insait long kongrigesen, Baibel i kirapim ol man Kristen long wok strong long winim dispela mak. Ol Witnes Bilong Jehova i save bihainim dispela pasin.—1 Timoti 3:1.
2. Pasin bilong ol pris pasto long i stap narapela kain long ol man nating bilong lotu i litimapim ol pris pasto, na dispela i kamap ples klia long ol biknem ol i holim na i kirapim ol man long litimapim nem bilong ol. Tasol Jisas i tok: “Man i no gat nem na i stap liklik tru namel long yupela olgeta, em i stap namba wan.” (Luk 9:48) Olsem i stret wantaim dispela tok, em i tokim ol disaipel bilong em long no ken kisim biknem insait long lotu.—Matyu 23:8-12.
3. Pris pasto i kisim pe long wok bilong ol, na dispela inap putim bikpela hevi bilong mani long ol man nating bilong lotu, na moa yet sapos ol pris pasto i laikim tumas long kisim ol gutpela samting bilong skin. Tasol ol wasman Kristen i save mekim wok mani bilong lukautim ol yet long ol samting bilong skin, olsem na ol i stap gutpela piksa bilong ol arapela i ken bihainim.a—Aposel 18:1-3; 20:33, 34; 2 Tesalonaika 3:7-10.
4. Sapos ol narapela i mas helpim wanpela pris o pasto long ol samting bilong mani, orait ating em bai autim tasol ol tok ol manmeri i laik harim. Baibel i tok dispela samting bai kamap. “Bihain ol man bai i no laik harim moa ol stretpela tok. Nogat. Yau bilong ol bai i skrap long harim ol narakain narakain tok, na ol bai i kisim planti man bilong skulim ol long kain tok ol i save laik long harim.”—2 Timoti 4:3.
5. Dispela pasin bilong ol pris pasto long holim biknem i mekim na ol man nating bilong lotu i ting olsem ol bikman bilong lotu tasol i mas mekim ol wok bilong lotu, na ol man nating i bilong go tasol long lotu long olgeta wik. Tasol olgeta Kristen i mas mekim ol samting bilong ol i ken pas gut wantaim God na ol i mas stadi gut long Baibel.—Matyu 4:4; 5:3.
6. Taim ol man nating bilong lotu i no save long ol tok bilong Baibel, em i isi moa long ol pris pasto long giamanim ol o mekim pasin i no stret long ol. Tru tumas, ol samting i bin kamap bipo i soim olsem dispela samting i bin kamap.b—Aposel 20:29, 30.
Bilong bihainim stret tok Baibel i mekim, ol Witnes Bilong Jehova i gat ol wasman na ol tisa, em ol i no kisim pe long wok ol i mekim, nogat, ol i amamas long helpim ol manmeri bilong God. Sapos yu laik lukim tru dispela samting, orait yu ken go long wanpela Haus Kingdom bilong ol Witnes Bilong Jehova long hap bilong yu.
[Ol Futnot]
a Long taim bilong ol aposel, sampela taim sampela wasman bilong raun i “kisim ol samting bilong helpim bodi long ol manmeri i kisim gutnius,” em ol manmeri i gat laik long givim samting long ol.—1 Korin 9:14.
b Sampela eksampel long dispela em pasin bilong tromoi mani bilong baim sin bilong ol man, Kot Bilong Misin Katolik, na pasin bilong ol bikman bilong lotu long kukim ol Baibel em ol i no laik bai ol man nating i kisim.—Lukim poroman bilong dispela magasin, em Wastaua bilong Novemba 15, 2002, pes 27.
YU LAIK SAVE?
◼ Olgeta insait long lain bilong God i mas i gat wanem tingting long narapela narapela?—Matyu 23:8.
◼ Olsem wanem ol man Kristen i ken winim mak bilong kamap wanpela wasman long kongrigesen?—1 Timoti 3:1-7.
◼ Bilong wanem God i no orait long dispela pasin bilong ol pris pasto i stap narapela kain long ol man nating bilong lotu?—1 Korin 4:6.
[Rait long pes 15]
Jisas i no bihainim pasin bilong ol bikman bilong lotu, nogat, em i stap olsem “man i no gat nem”