Sapta 28

Taim Laik i Kamap Nating, Olsem Wanem Mi Ken Daunim?

WANPELA nius i tok, ‘Planti taim bel bilong ol yangpela i save kirap nating long laikim wanpela man o meri.’ Dispela i save painim planti yangpela, tasol i no bagarapim ol tumas. Bihain ol i go bikpela na ol i no sem long dispela samting i bin painim ol; taim ol i tingim ol i lap tasol. Tasol taim ol i yangpela yet na dispela samting i painim ol, ol i no lap na ting em i samting nating. Wanpela yangpela man i tok: ‘Taim dispela samting i painim mi, mi no inap mekim wanpela samting bilong daunim. Mi save, dispela meri mi gat laik long em, em i gat bikpela krismas tumas, tasol bel bilong mi i kirap nating na mi laikim em. Dispela laik i kamap nating long bel em i paulim tru tingting bilong mi.’

Pasin Bilong Bel i Kirap Nating

Sapos man i gat laik long meri (o meri i gat laik long man) i no gat rong long dispela sapos em i no gat laik nogut long em, na dispela meri (o man) i no marit. (Sindaun 5:​15-18) Tasol taim yu yangpela yet, “olgeta kain laik nogut i save kamap long bel bilong ol yangpela” i save bosim tingting bilong yu na ol samting yu mekim. (2 Timoti 2:22) Skin bilong yangpela i wok long i go bikpela na ol nupela strongpela laik i kamap long bel na em i no lain gut yet long bosim, olsem na bel bilong em i kirap nating long wanpela man o meri.

Na tu, wanpela nius i stori long ol meri na i tok, “taim ol i yangpela yet ol i lain kwik long mekim pasin olsem ol manmeri i bikpela pinis na taim ol i stap wantaim ol narapela manmeri ol i stap isi na toktok gut wantaim ol. Tasol ol yangpela man i no lain kwik long mekim olsem.” Olsem na sampela yangpela meri i no gat laik long ol yangpela man i skul wantaim ol. Ol i save kirap laikim nating tisa bilong ol o narapela man i bikpela pinis, long wanem long ai bilong ol, ol dispela wanskul bilong ol i olsem manki nating. (Nius Seventeen) Ating bel bilong yangpela meri i kirap nating na em i laikim tisa bilong em, o wanpela man i gat nem long singsing, o narapela man em i save long em na em i bikpela pinis, na long tingting bilong em dispela man i nambawan tru. Na sampela manki tu, bel bilong ol i kirap nating na ol i laikim wanpela tisa o meri bilong singsing o wanpela meri olsem. Tasol i no gat as bilong dispela; ol i ting tasol ol i laikim em.

Dispela Pasin Inap Nogutim Yangpela Olsem Wanem?

Tru, taim bel bilong yangpela i kirap nating na em i ting em i laikim wanpela man (o meri), dispela tingting i no save stap longtaim, tasol em inap nogutim yangpela. Long wanem ol dispela manmeri em ol yangpela i laikim na i ting ol i nambawan tru, pasin bilong planti i no stret tumas na ol i no gat gutpela nem. Wanpela saveman bilong bipo i tok, planti man i gat nem ol “i no gat gutpela tingting.” (Saveman 10:6) Planti yangpela i save litimapim nem bilong man o meri i gat biknem long mekim singsing o i gat gutpela skin. Tasol olsem wanem long pasin bilong em? Em i save bihainim stretpela pasin na bai yumi ken litimapim nem bilong em? Em i save “bilip long Bikpela” na i dediket pinis?​—1 Korin 7:39.

Yumi mas tingim narapela tok bilong Baibel tu, i tok: “Sapos man i laikim pasin bilong graun, em i mekim pasin birua long God.” (Jems 4:4) Sapos yu givim bel long wanpela man o meri em God i nolaik tru long pasin bilong em, yu ting yu inap i stap pren bilong God? Nogat, a? Na Baibel i givim narapela strongpela tok long yumi, olsem: “Yupela i mas i stap longwe long olgeta giaman god.” (1 Jon 5:21) Taim yangpela i save bilasim rum bilong em long piksa bilong ol man na meri i gat nem long singsing samting, yu ting dispela yangpela i mekim wanem? Yumi ken tok, em i lotuim “giaman god,” a? Yu ting God i laikim dispela pasin? Nogat tru.

Taim bel bilong yangpela i kirap nating na em i laikim wanpela man (o meri) olsem, sampela i save giamanim bel bilong ol yet na ol i ting dispela man (o meri) i save laikim ol tu. Wanpela yangpela meri i stori long yangpela man em i laikim na meri i tok: “Taim mi save askim em, ‘Yu laikim mi?’ em i save tok, Nogat. Tasol mi lukim ol samting em i mekim na mi save em i laikim mi.” Dispela yangpela man i no laik bagarapim bel bilong yangpela meri ya na em i tok isi olsem em i no gat tingting long em, tasol meri ya i no bilipim tok bilong em.

Wanpela yangpela meri i laikim wanpela man i gat nem long singsing na meri i stori olsem: ‘Mi laik bai em i kamap boipren bilong mi, na mi bin beten askim God long mekim dispela samting i kamap tru! Taim mi slip mi save holim karamap bilong plet singsing bilong em na i olsem mi stap klostu long em. Sapos em i no inap kamap boipren bilong mi, bai mi kilim i dai skin bilong mi! Bel bilong mi i bagarap stret!’ Orait taim yangpela i mekim pasin longlong olsem yangpela meri hia, yu ting God inap amamas long dispela pasin bilong em? Nogat, a? God i tok, ol man i mekim wok bilong em ol i mas “tingting stret.”​—Rom 12:3.

Baibel i mekim wanpela gutpela tok long Sindaun 13:​12, i tok: “Sapos man i ting long kisim wanpela samting na i wet nating longpela taim, bai em i bel hevi moa yet.” Olsem na dispela pasin bilong bel i kirap nating long wanpela man o meri em i no gat tingting liklik long yu o em i no save long yu, dispela inap nogutim yu tru. Ol dokta i tok, dispela inap mekim na bai yu bel hevi na tingting planti na tingting i stap nogut, o ating bai yu no inap slip o skin i les, o ating bai bros i pen o yu sotwin. (Lukim 2 Samuel 13:​1, 2.) Wanpela yangpela meri em bel bilong em i kirap nating long wanpela man na em i tok, “Mi no inap kaikai. . . . Mi no inap stadi moa long skul. Mi . . . save tingting oltaim long em. . . . Mi bel hevi stret.”

Taim bel bilong yu i kirap nating long wanpela man (o meri) na dispela i bosim ol wok o i stap bilong yu, em inap bagarapim yu tru, a? Wanpela dokta, em Lawrence Bauman, i tok, ‘Taim bel bilong yangpela i kirap nating long laikim wanpela man (o meri), wanpela mak bilong en i olsem: Em i no givim bel moa long mekim ol wok bilong em long skul.’ Na narapela mak i olsem: Em i laik i stap wanpis na em i no laik toktok moa wantaim ol poroman o famili bilong em. Na sampela ol i save sem long dispela pasin bilong ol. Wanpela man bilong raitim buk (Gil Schwartz) em i stori long taim dispela samting i bin painim em na em i tok, ‘Mi ting mi laikim tumas Judi, na mi mekim pasin longlong tru long dispela taim, na bihain mi sem long dispela.’ Taim yu lusim tingting pinis long dispela man (o meri) em pastaim yu ting yu laikim em tumas, bai yu wok long tingim yet ol pasin longlong yu bin mekim, olsem yu save bihainim em i go i kam, na sapos em i no mekim gut long yu, yu save kros o krai, na mekim ol narapela pasin longlong. Yu no inap lusim tingting kwik long dispela samting.

No Ken Larim Bel i Giamanim Yu

King Solomon em i wanpela saveman tru bilong bipo, ating em i winim olgeta narapela saveman bilong dispela graun. Em i laikim tumas wanpela yangpela meri, tasol dispela meri i no gat laik long em. Solomon i givim ol gutpela switpela tok long em, na i tok pes bilong meri “i lait olsem biksan, na pes bilong en i klia tru olsem lait bilong mun.” Solomon i mekim ol dispela gutpela gutpela tok, tasol yangpela meri i no givim bel liklik long em!​—Solomon 6:10.

Bihain Solomon i save, em i no inap mekim wanpela samting na bai yangpela meri i ken laikim em, olsem na Solomon i no wok moa long kirapim meri long laikim em​—Solomon i lusim tingting long em. Sapos kain samting olsem i painim yu, orait yu ken mekim wanem na bai yu ken bosim bel bilong yu? Baibel i tok: “Sapos man i ting, save bilong em yet inap helpim em long mekim olgeta samting, orait em i no gat gutpela tingting.” (Sindaun 28:26) Sapos bel bilong yu i bin kirap nating long wanpela man (o meri) na em yet i no laikim yu, tasol yu wok long tingim tingim em, orait yu no bihainim gutpela tingting, a? Baibel i tok, “Sapos man i bihainim pasin bilong gutpela tingting, em bai i stap gut.” Olsem na yu mas bihainim gutpela tingting​—yu mas skelim gut dispela samting i painim yu na taim yu save, dispela man (o meri) yu bin laikim em, em i no inap givim bel long yu, orait yu mas lusim tingting long em.

Wanpela dokta (Howard Halpern) em i tok, ‘Olsem wanem yu inap save, samting yu tingting na wet long en i gat as bilong en o nogat? Yu mas skelim gut na no ken larim bel i giamanim yu.’ Yu mas askim skin bilong yu, ‘Mi inap kirapim em long laikim mi, o nogat?’ Na sapos dispela man (o meri) i gat nem long singsing samting, ating yu no inap bungim em liklik long wanpela taim, a? Orait olsem wanem em inap laikim yu sapos em i no save long yu? Na i wankain tu sapos yu ting yu gat laik long tisa o kain man o meri olsem.

Na i gat narapela samting tu yu mas tingim: Dispela man (o meri) i bin kamapim bel bilong em liklik olsem em i laikim yu o nogat? Sapos em i no bin mekim olsem, orait i no gat as na yu ting bihain bai em i senisim tingting na kirap laikim yu, a? Na nogut em i mekim sampela liklik tok o pasin na yu tingting nating tasol olsem em i laikim yu. Long planti hap, man yet i save tokim meri, ‘Mi laikim yu.’ Olsem na sapos yangpela meri i kirap mekim olsem long man na em i strong long subim man, tasol man yet i no laik, dispela pasin inap bagarapim nem bilong meri na semim em.

Na sapos tru dispela man (o meri) i laikim yu, bai yu mekim wanem? Yu bikpela pinis inap long yu ken maritim em? Sapos nogat, orait yu no ken wok long tingim em​—yu mas rausim dispela tingting long bel bilong yu. Baibel i tok, i gat taim bilong “laikim tru narapela man” na ating dispela taim em i bihain bihain, taim yu bikpela pinis.​—Saveman 3:​8; 11:10.

Skelim Gut Bel Bilong Yu

Dokta Charles Zastrow i tok, ‘Bel i save kirap nating long wanpela man o meri taim yu ting olsem em i stret olgeta long yu, olsem yu ting em i gat olgeta gutpela pasin yu laik bai poroman marit bilong yu i gat.’ Tasol i no gat wanpela man o meri i “stret olgeta,” long wanem “yumi olgeta man yumi bin mekim sin.”​—Rom 3:23.

Yu mas askim yu yet: Mi save gut long ol pasin bilong em o mi ting tasol em i gat ol gutpela pasin na mi laikim em? Olsem wanem? Mi giamanim bel bilong mi na mi no lukim ol liklik pasin kranki bilong em? Sapos yu skelim gut pasin bilong em, ating bai yu no laikim em moa! Na yu mas skelim gut dispela laik bilong yu. Wanpela meri bilong raitim buk (Kathy McCoy) em i tok: “Laik bilong ol yangpela i save kamap kwik long bel na i pinis kwik . . . yangpela i amamas nating long laikim wanpela man (o meri) . . . [na] em i laik bai dispela man (o meri) i mas laikim em tasol. . . . [na] em i laik bai olgeta pasin bilong dispela man (o meri) i mas gutpela tasol.”​—Skelim 1 Korin 13:​4, 5.

Lusim Tingting long Em

Maski yu skelim gut dispela samting, ating dispela i no inap pinisim kwik dispela laik i stap long bel bilong yu. Tasol yu mas was gut, nogut yu mekim dispela laik i kamap strong moa. Olsem na i gat sampela samting yu mas abrusim. Yu no ken kaunim ol buk i stori nogut long man i laikim meri, na yu no ken lukim ol piksa long televisen samting i stori long dispela kain samting. Na i gat sampela musik tu inap mekim na bai yu bel hevi long wanem yu no stap wantaim dispela man (o meri) yu laikim em tumas. Tasol no ken tingim tingim em oltaim. Baibel i tok: “Sapos ol i no putim paiawut long paia, bai paia i dai.”​—Sindaun 26:20.

Sapos yu laik i stap wanpis na yu driman nabaut long dispela man (o meri) em bel bilong yu i kirap nating long em, dispela i no inap helpim yu. Yu mas tingim ol manmeri ol i save laikim yu tru na ol i save tingim yu. Yu no ken “stap wanpis.” (Sindaun 18:1) Ating papamama inap helpim yu. Tru yu wok long haitim bel bilong yu, tasol ating tupela i save pinis. Gutpela sapos yu go long tupela na yu kamapim bel bilong yu long tupela. (Lukim Sindaun 23:26.) O ating i gat wanpela strongpela Kristen yu ken i go toktok wantaim em.

Wanpela meri bilong raitim tok long nius bilong ol yangpela (Esther Davidowitz) em i tok, ‘Yu no ken sindaun nating; yu mas kirap mekim sampela wok samting.’ Mekim wanpela wok yu amamas long mekim, o eksasais, o lain long mekim wanpela samting, o wok long painim bekim bilong sampela askim bilong ol man long Baibel. Sapos yu mekim kain wok olsem, dispela bai helpim yu long lusim tingting long dispela man (o meri).

Tru i hatwok long lusim tingting long wanpela man (o meri) em bel bilong yu i kirap nating long em. Tasol isi isi bai yu lusim tingting long em na yu no bel hevi moa. Nau yu save pinis bel bilong yu i bin kirap nating, olsem na bihain, taim yu bikpela pinis, sapos yu kirap laikim wanpela man (o meri) bai yu inap save, yu givim bel tru long em o nogat. Tasol olsem wanem yu inap save? Orait, lukim sampela sapta i kam bihain long dispela.

Toktok Wantaim long Ol Dispela Askim

◻ Olsem wanem na bel bilong planti yangpela i save kirap nating long wanpela man (o meri)?

◻ Bel bilong planti yangpela i save kirap nating long laikim husat? Bilong wanem i olsem?

◻ Dispela pasin inap nogutim ol yangpela olsem wanem?

◻ Yangpela i ken mekim wanem bilong lusim tingting long man (o meri) em bel bilong em i kirap nating long em?

◻ Yangpela i mas abrusim wanem ol samting na bai dispela laik i no ken kamap strong long bel bilong em?

[Piksa long pes 220]

Bel bilong planti yangpela i save kirap nating long man (o meri) i bikpela pinis

[Piksa long pes 221]

Sapos yu skelim gut pasin bilong em, ating bai yu no laikim em moa