Askim

◼ Tok promis God i bin mekim long Ebraham, olsem kontrak bilong Ebraham, olsem wanem dispela i insait long ol tok Jisas i mekim long ol banis bilong sipsip long Jon sapta 10?

Tok promis God Jehova i mekim long Ebraham i makim ol gutpela samting Jehova i laik mekim bilong blesim ol manmeri bilong olgeta lain. Em bai blesim ol long rot bilong “pikinini” bilong Ebraham. Ol banis bilong sipsip, em Jisas i toktok long en long Jon sapta 10 ol i olsem truim bilong ol samting God i bin tok promis long en long Ebraham.

God i mekim kontrak o tok promis long Jenesis 12:1-3 na bihain em i skruim sampela tok moa long en. Em i tokim Ebraham: “Mi promis olsem: Bai mi mekim ol lain tumbuna pikinini bilong yu ol i kamap planti olsem sta long skai na wesan long nambis. Na bai ol lain tumbuna pikinini bilong yu ol i daunim ol birua bilong ol. Na olgeta lain pipel long graun bai ol i askim mi long blesim ol olsem mi blesim ol lain tumbuna pikinini bilong yu. Long wanem, yu bin bihainim tok bilong mi.”—Jenesis 22:17, 18.

Tasol olsem wanem bai God i lukautim ol lain tumbuna pikinini bilong Ebraham na bai dispela lain i stap klin na dispela “pikinini” em i bin tok promis long em, em i ken kamap? Na olsem wanem bai ol inap save long dispela “pikinini taim em i kamap? God i givim Lo long ol na wokim kontrak wantaim ol; Moses i namelman bilong en. Dispela kontrak i no pinisim kontrak bilong Ebraham. Nogat. “Dispela lo i kamap bihain, em i no inap sakim kontrak bipo God i mekim. Em i no inap rausim dispela promis bilong bipo [em God i bin mekim long Ebraham].” (Galesia 3:16-18) Dispela Lo i helpim ol Isrel long i stap klin long spirit na long pasin bilong ol na long skin bilong ol. Ol i klia long ol pasin nogut bilong ol narapela lain i stap klostu long ol. Olsem na ol Isrel i kamap olsem wanpela lain sipsip i stap insait long wanpela banis na dispela i lukautim ol. Na Galesia 3:24 i tok, dispela Lo i olsem waspapa bilong bringim ol long Krais, na taim dispela “pikinini i kamap bai ol i save ol i gat sin na em i mas helpim ol.

Krais Jisas em i nambawan “pikinini” bilong dispela promis o kontrak God i mekim long Ebraham. Tasol God i laik kisim sampela manmeri moa bilong kamap olsem ol nambatu “pikinini” bilong Ebraham. Olsem na aposel Pol i tok, ‘olgeta man bilong Krais ol i pikinini bilong Ebraham tu na ol i man bilong kisim ol dispela samting bipo God i makim long Ebraham.’ (Galesia 3:29) Olsem wanem ol dispela samting i kamap bilong truim tok promis God i bin mekim long Ebraham?

Krais i kam long “ol sipsip bilong lain Isrel, ol i lus pinis,” na em i kisim sampela sip, em ol i stap long banis sipsip bilong Lo bilong Moses, na ol i bihainim em. (Matyu 10:6) Ol Juda i bilip olsem Jisas em i Krais na em i wasman bilong helpim ol, ol dispela Juda em Jisas i bringim ol i go insait long nupela banis bilong sipsip, em dispela “nupela kontrak Jisas i namelman bilong en. Ol Isrel bilong spirit i stap insait long dispela banis. (Hibru 8:7-13; Galesia 6:16) Bihain ol Sameria, em ol i katim skin na ol manmeri bilong ol narapela lain, em ol i no katim skin, ol i kam insait long dispela banis bilong sipsip. Ol i kamap ol nambatu pikinini bilong Ebraham. Long Jon 10:11 Jisas i tok: “Mi gutpela wasman bilong sipsip.” Em i gutpela wasman bilong ol Juda na ol manmeri bilong ol narapela spirit i makim ol na ol i go insait long nupela banis sipsip, em nupela kontrak.

Olgeta dispela samting i soim yumi olsem wanem banis sipsip bilong pastaim, em Lo bilong Moses, em banis sipsip bilong ol Isrel bilong skin, na nupela banis sipsip, em nupela kontrak, bilong ol Isrel bilong spirit, ol dispela banis bilong sipsip i wok wantaim kontrak bilong Ebraham.

Tasol olsem wanem long ol “arapela sipsip,” em ol i no bilong “dispela banis,” em banis bilong ol Isrel bilong spirit, ol nambatu pikinini bilong Ebraham? (Jon 10:16) Dispela tok promis o kontrak God i mekim long Ebraham i helpim ol tu, long wanem God i tok, long rot bilong “pikinini” bilong Ebraham bai olgeta lain man i kisim blesing. (Jenesis 22:18) Ol dispela “arapela sipsip” i stap long narapela banis aninit long Gutpela Wasman. Ol i no bilong dispela banis bilong ol manmeri ol i bilong kisim ol samting God i makim long Ebraham. Tasol ol i wok gut wantaim dispela lain pikinini bilong Ebraham na ol i kamap wanpela lain sipsip tasol aninit long dispela wanpela wasman bilong sipsip tasol, em i nambawan “pikinini” bilong Ebraham Ol dispela “arapela sipsip” i ken amamas na wet long kisim laip i stap oltaim long paradais hia long graun. Olsem na tru tumas, ol i kisim blesing long rot bilong “pikinini” bilong Ebraham.

Olsem na olgeta banis bilong sipsip, em Jon sapta 10 i stori long ol—em Lo bilong Moses, banis sipsip bilong ol Isrel bilong skin, na nupela kontrak, banis sipsip bilong ol Isrel bilong spirit, na narapela banis em ol “arapela sipsip” bilong olgeta lain ol i insait long en—dispela olgeta i truim ol samting God i laik mekim olsem em i bin tok long en taim em i mekim tok promis o kontrak wantaim Ebraham.