Bilong Kisim Gut As Bilong Ol Tok Bilong Baibel Yu Kaunim

BILONG kisim gut as bilong ol tok bilong Baibel yu kaunim, yu mas i gat stretpela tingting. Olsem wanem? Yu pilim olsem yu “no inap long ai bilong God” na yu laik kisim save long ol tok bilong God? (Matyu 5:3) Yu pilim olsem yu sot long ol samting bilong spirit na yu laik kisim ol kaikai bilong spirit? Gutpela tok bilong strongim bel na tingting bilong yu i stap long Baibel.

Tasol sapos yu kaunim Baibel olsem yu save kaunim ol narapela buk bai yu no kisim ol dispela gutpela kaikai bilong spirit. Taim yu kaunim Baibel yu mas save, dispela tok i no “tok bilong man”; em “tok tru bilong God.” (1 Tesalonaika 2:13) Taim yu kaunim ol tok bilong Baibel yu no kisim tingting bilong ol man, yu no kaunim stori bilong wanpela lain man; nogat; yu kisim tingting bilong God na yu kaunim stori bilong ol samting God i bin mekim long ol wokboi bilong em hia long graun. Na Baibel i gat ol tok profet long en yu bai kirap nogut long en. Sampela samting ol dispela tok profet i kolim i kamap tru pinis, na sampela i kamap tru long nau, na sampela bihain bai kamap tru bilong helpim gut ol man.

Baibel em i Tok bilong God, olsem na sapos yu laik kisim gut as bilong ol dispela tok, yu mas beten askim God long helpim yu. Olsem na taim yu laik kaunim Baibel, i stret sapos yu beten long God pastaim. Mekim liklik tok i kamapim tingting tru i stap long bel bilong yu na askim God long helpim yu long kisim gut as bilong ol dispela tok bambai yu ken bihainim. Sampela taim yumi kisim save, tasol yumi no save olsem wanem yumi ken mekim wok long dispela save. Yumi no save olsem wanem yumi ken bihainim. Yumi sot long gutpela tingting. Olsem na Baibel i tok: “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. God i save givim planti samting long olgeta man, na em i no save tok kros long man i sot long samting. Tasol dispela man i mas bilip tru na i beten long God. Em i no ken lusim bilip liklik na i ting olsem: ‘Ating bai God i givim dispela long mi, o nogat?”’—Jems 1:5, 6.

Yu Mas Bilip na Kaunim

Tasol ating bai yu tok: “Olsem wanem mi ken bilip na beten o bilip na kaunim sapos mi sot long bilip?” Sapos yu pilim olsem yu “no inap long ai bilong God” (Matyu 5:3), olsem yu save yu mas kisim ol samting bilong spirit, orait, taim yu kaunim Baibel na kisim save long God Jehova na ol gutpela samting em i laik mekim long rot bilong Krais, bai bilip bilong yu i kamap strong. Man i bilip tru, em i no bilip nating; i gat as bilong bilip bilong em. Baibel yet i stori long pasin bilong bilip, olsem: “Bel bilong yumi em i holimpas pinis ol samting yumi wet long God i givim yumi. Na ol samting ai bilong yumi i no lukim, em bel bilong yumi i save tru long dispela i stap.”—Hibru 11:1.

Man i bilip tru em i bin kisim save; save i as bilong bilip bilong em. Em i save long ol tok promis bilong God na i olsem em i lukim ol dispela samting i kamap tru. Em i bilip long en. Olsem na yumi inap kisim bilip. Ol tok yumi kaunim o harim em i stori long God na ol gutpela samting em i laik mekim bilong helpim ol man, dispela i kirapim bilip long bel bilong yumi. Aposel Pol i tok: “Yumi save, yumi harim tok bilong God na dispela i kirapim bilip. Na dispela tok yumi harim, em i kamap long maus bilong Krais.”—Rom 10:17.

Taim bilip bilong yu i kamap strong, nau bai yu inap save moa long as bilong ol tok bilong Baibel yu kaunim, long wanem ‘bel bilong yu i holim strong moa ol samting yu wet long God i givim long yu.’ Yumi ken tok piksa long dispela samting, olsem: Sapos yu gat wanpela nupela pren o poroman bilong yu. Pastaim yu no save gut long em, a? Tasol yutupela i poroman wantaim na nau yu save long em na yu bilip long em. Em i sambai long yu long kain kain samting i painim yu, olsem na bihain bihain bai yu bilip tru long em, long wanem yu save em i no ken lusim yu o giamanim yu. Sapos em i raitim wanpela pas long yu, bai yu inap kisim gut as bilong ol tok em i raitim. Na maski sampela tok i no klia tumas, tasol yu no hatwok long kisim as bilong en, long wanem yu save gut long dispela pren bilong yu. Yu bilip na yu kaunim dispela pas; yu no tingting nogut liklik.

Na i olsem tasol taim yu kaunim dispela pas God Jehova i bin raitim long yumi, em Baibel. Sapos yu kaunim kaunim ol tok bilong Baibel na yu save gut long en, bai yu save gut long dispela Man em i as bilong ol dispela tok, em God Jehova, na bai yu bilip tru long em na long Tok bilong em. Maski yu no save gut long sampela stori bilong Baibel long ol samting i bin kamap long bipo, tasol bai yu bilip long en. Olsem: Sapos pastaim yu no save gut bilong wanem God i bin givim bikpela strafe long wanpela man o wanpela lain man, bai yu no kirap kwik na tok God i mekim pasin nogut. Nogat. Bai yu bilip olsem i stret God i bin mekim olsem, long wanem yu save long God. I olsem sapos wanpela gutpela pren bilong yu i mekim wanpela samting na yu no save bilong wanem em i mekim. Bai yu tok: “Em i mekim dispela samting na mi save i gat gutpela as na em i mekim.”

Sapos yu inap kisim save long as bilong dispela samting God i bin mekim, o yu inap save bilong wanem sampela taim i olsem God i no strafim kwik ol man nogut, orait dispela bai strongim bilip bilong yu long God. Tasol ating i mas i gat sampela man bilong helpim yu bambai yu inap kisim dispela save. Olsem na nau yumi ken stori long narapela samting em inap helpim yumi na bai yumi kisim gut as bilong ol tok yumi kaunim long Baibel.

I Mas i Gat Man Bilong Helpim Yumi

Gutpela tru sapos yu inap kaunim Baibel olgeta. Sapos yu kaunim wanpela sapta long olgeta de, insait long 3-pela yia samting bai yu inap kaunim Baibel olgeta—olgeta hap bilong Olpela Testamen na Nupela Testamen wantaim. Sapos yu kaunim 3-pela o 4-pela sapta long olgeta de, insait long wanpela yia bai yu inap kaunim Baibel olgeta. Tasol bilong kisim save long ol bikpela as tok bilong Baibel, yu ken kaunim Ol Sam na Provep pastaim, na kaunim hap bilong Jenesis na Eksodas na 1 Samuel. Na bihain yu ken kaunim sampela tok ol i bin raitim long taim bilong ol Kristen, olsem ol tok bilong Matyu na Wok Bilong Ol Aposel, na sampela pas ol Kristen bilong pastaim i bin raitim, olsem pas Pol i raitim long ol Filipai, na pas bilong Jems na tupela pas bilong Pita.

Taim yu kaunim ol dispela tok bilong Baibel bai yu kisim save olsem: Ol dispela sapta i stori long narapela narapela samting na yu mas save Baibel i tok wanem long wanpela samting bambai ol dispela tok yu kaunim inap helpim yu long skin na long spirit. Ating bai yu laikim sampela buk bilong Baibel bilong helpim yu long save Baibel i tok wanem long ol narapela narapela samting. Ol dispela kain buk i gutpela bilong helpim yumi long save wanem samting i kamap pastaim na wanem samting i kamap bihain, olsem Baibel i stori long en. Na sapos yumi save long ol ples Baibel i stori long en, na yumi save long ol samting i bin kamap em i as bilong ol samting Baibel i stori long en, orait dispela kain save inap helpim yumi long kisim gut as bilong ol tok bilong Baibel yumi kaunim.

Tasol yumi inap kisim we kain buk olsem bilong helpim yumi long save long ol tok bilong Baibel? Long dispela taim sampela Katolik i bin raitim sampela buk bilong helpim ol Katolik long kaunim Baibel na save long ol tok ol i kaunim. Tasol ol dispela man bilong raitim buk i hatwok, long wanem sapos ol i laik helpim ol Katolik bambai ol i ken save long ol tok tru bilong Baibel, ol i no inap helpim ol long save long ol tok bilong Misin Katolik, long wanem ol tok bilong Misin i no i stap long Baibel. Na sapos ol i laik helpim tok bilong Misin Katolik, bai ol i rabisim tok bilong Baibel. Ol man i kaunim buk bilong ol bai ol i no bilip long Baibel; bai ol i ting tok bilong Baibel i nambatu na tok bilong Misin i nambawan—Lukim Mak 7:13.

Olsem na long nau planti gutpela Katolik i orait long ol Witnes Bilong Jehova i helpim ol long kisim save long Baibel. Long planti kantri, planti tausen Katolik i wok strong long kaunim Baibel, tasol ol i hatwok long kisim save long en na ol pris i no helpim ol. Ol i kain olsem bikpela man bilong Itiopia em i kaunim tok bilong Aisaia long Baibel. Evanselis Filip i tokim em: “Ating yu save as bilong dispela tok yu ritim, o nogat?” Long pasin daun dispela man i bekim tok, olsem: “Sapos man i no soim rot long mi, bai mi inap save olsem wanem?” (Aposel 8:30, 31) Filip i helpim em na bihain em i kisim baptais na kamap Kristen. Olsem tasol long nau, taim ol Witnes Bilong Jehova i go long haus bilong ol man na autim tok na ol i bungim sampela Katolik, na ol dispela man i tok ol i gat Baibel, ol Witnes i save tokim ol: ‘Yu laik bai mipela helpim yu bambai yu ken save long as bilong ol tok bilong Baibel yu ritim?’

Bilong Kaunim Baibel na Kisim Gut As Bilong Ol Tok Bilong En

Ol Witnes Bilong Jehova i save lainim ol man long ol tok bilong Baibel na ol i save mekim wok long sampela buk bilong Baibel bilong helpim ol. Sampela buk ol i mekim wok long en, em olsem: Baibel Stori Buk Bilong Mi. Dispela buk i gat 116 stori bilong Baibel i stori long ol samting i kamap long nambawan taim tru na i stori i kam i kam inap long ol samting i kamap bihain, olsem na yumi inap save gut wanem samting i kamap pastaim na wanem samting i kamap bihain. Na buk Yu Inap i Stap Oltaim long Paradais long Graun. Dispela buk i bungim ol tok Baibel i mekim long 30 bikpela tok na i stori tu long gutpela samting Baibel i tok ol man i bilip na kaunim Baibel ol i ken wetim i kamap.

Ol dispela buk bilong helpim man long save long ol tok bilong Baibel na gutpela wok ol Witnes Bilong Jehova i mekim bilong helpim ol man long lainim tok bilong Baibel, dispela inap helpim yu. Ol Witnes Bilong Jehova i laik helpim yu bambai yu ken kaunim Baibel na kisim gut as bilong ol tok bilong en; no gat pe. Baibel i gat ol gutpela tok i stap long en bilong soim rot long yumi na helpim sindaun na wokabaut bilong yumi long nau, na Baibel i tokim yumi long ol gutpela samting yumi ken wetim i kamap—olsem yumi inap kisim laip i stap oltaim long Nupela Taim God i tok promis long kamapim taim ‘ol i bihainim laik bilong God long graun olsem ol i bihainim long heven.’—Matyu 6:10.

[Piksa long pes 7]

Man bilong Itiopia i save i mas i gat man bilong helpim em bambai em i ken save long as bilong ol tok bilong Baibel