Sampela Tingting Kranki Planti Man i Gat Long Baibel
LONG Desemba 1983, long London, mausman bilong gavman bilong Jemani em i givim bikpela mani tru, inap olsem 11 milion kina, bilong baim wanpela buk. Em bikpela pe tru! Wanem buk i gutpela buk tru inap long ol i givim bikpela pe olsem bilong kisim? Dispela buk em hap tok bilong Baibel, olsem Gutnius Matyu na Mak na Luk na Jon i raitim. Em olpela buk ol i bin wokim samting olsem 800 yia bipo. Ol man bilong wokim dispela buk ol i bin bilasim rait bilong en long gol na kain kain kala.
Maski wanem wanem samting ol man i tingim na ol i redi long tromoi bikpela mani olsem bilong kisim dispela buk, tasol yumi tingim dispela samting, long wanem dispela buk em hap tok bilong Baibel. Ol i redi long tromoi bikpela mani tru bilong baim dispela Baibel na dispela samting i kamapim long ples klia olsem planti man i laikim tru Baibel. Ol i tingim Baibel em i gutpela buk tru. Tasol sampela man ol i no laikim Baibel; ol i tingting nogut long en o birua long en. Bilong wanem ol i mekim olsem?
Sampela Tingting Kranki
Planti man long ol kantri i gat planti Talatala long en ol i save tok, Baibel em i olsem wanpela olpela gita yu ken kamapim kain kain musik long en. Ol i ting yumi ken kolim sampela tok bilong Baibel bilong helpim ol narapela narapela kain tingting i pait wantaim. Ol i ting ol tok bilong Baibel i gat kain kain insait o mining bilong en na yumi ken kamapim long laik bilong yumi wan wan. Tasol yu ting dispela i stret?
Tru ol man inap kolim tok bilong Baibel bilong helpim ol narapela narapela kain tingting bilong ol. Tasol sapos ol i kolim wanpela liklik hap tok tasol, ol inap paulim na bai yumi ting narapela tok bilong Baibel i pait wantaim narapela tok. I olsem tasol long ol narapela buk tu. Sapos yumi kisim nabaut sampela tok long ol narapela narapela hap bilong wanpela buk na i no stap moa wantaim ol tok klostu long en i kamapim insait tru bilong en, orait yumi inap giamanim ol man na bai ol i ting narapela tok bilong dispela buk i pait wantaim narapela tok bilong en. Tasol i no stret yumi mekim olsem, a? Ol Witnes Bilong Jehova i strong long tok olsem sapos yumi kaunim stret ol tok bilong Baibel bai yumi save, ol bikpela tok bilong en i no gat narapela narapela insait bilong en.
Baibel yet i tok: “Yupela i mas save long dispela pastaim. Yumi no ken bihainim tingting bilong yumi yet na autim as bilong wanpela tok profet i stap long Baibel.” (2 Pita 1:20) Olsem na strong i kirapim ol man long raitim ol tok profet bilong Baibel em i no strong bilong wanpela man; nogat; em strong bilong God, olsem spirit holi bilong em. God em i namba wan Profet bilong olgeta profet na em i As bilong olgeta tok profet tru bilong Baibel. Spirit holi bilong em i givim tingting long ol man na ol i raitim ol dispela tok.
Narapela tingting kranki planti man i gat long Baibel, em olsem: Ol i ting God bilong Nupela Testamen em i God bilong sori na em i save mekim gutpela pasin long ol man, tasol God bilong Olpela Testamen em i hatpela God na em i save bekim pe nogut long ol man. Wanpela man bilong Frans em i save raitim ol stori, nem bilong em Stendhal, em i stori long God olsem: ‘God em i bos nogut; em i tingting tasol long bekim nogut long ol man; Baibel bilong em i stori tasol long strafe nogut bai painim ol man.’ Yumi no ken kirap nogut long dispela tingting bilong dispela man, long wanem dispela man i no bilip long God na em i man bilong mekim pasin doti na olkain hambak pasin. Tasol sori tru! Planti man i tok ol i Kristen na sampela pris pasto tu ol i gat wankain tingting olsem bilong dispela man long God bilong Baibel.
Tasol Olpela Testamen, em dispela hap bilong Baibel ol i bin raitim pastaim long tok Hibru, na Nupela Testamen, em dispela hap bilong Baibel ol i bin raitim pastaim long tok Grik, dispela tupela hap wantaim i tok i gat “wanpela God tasol.” (1 Korin 8:6; Diuteronomi 6:4) Olpela Testamen na Nupela Testamen tu wantaim i tok God i save marimari long ol man na mekim stretpela kot, na em i God bilong sori, tasol em i strong long bihainim stretpela pasin. (Eksodas 34:6, 7; Sam 103:6-8; 1 Jon 4:8; Hibru 12:28, 29) Planti tok long Olpela Testamen, olsem long hap bilong Ol Sam, i kamapim gutpela pasin isi na pasin sori bilong God. Na planti tok long Nupela Testamen i stori long bikpela strafe God bai givim long ol man nogut. (2 Tesalonaika 1:6-9; Revelesen, sapta 18 na 19) Olgeta hap bilong Baibel i stori long gutpela samting ol stretpela man i ken wetim i kamap. (Jenesis 22:17, 18; Sam 37:10, 11, 29; Revelesen 21:3, 4) Olsem na olgeta tok bilong Baibel, long kirap i go inap long pinis, i stret wantaim; narapela tok i no pait wantaim narapela tok.
Em “Buk Bilong Ol Talatala” o Olsem Wanem?
Planti milion milion Katolik i gat tingting kranki long Baibel, olsem: Ol i ting Baibel em i “buk bilong ol Talatala.” Yumi no ken sutim tok long ol gutpela Katolik i gat dispela tingting. Nogat. Long wanem, inap planti handet yia Misin Roman Katolik i tambuim ol man long kaunim Baibel long narapela tok ples; ol i ken kaunim long tok Latin tasol. Olsem na planti Katolik ol i no inap long kaunim Baibel. Tru, kirap long 1897 na bihain long namba tu Bikpela Bung Bilong Vatiken (1962-1965), ol Katolik i ken kaunim Baibel long tok ples bilong ol yet, tasol ol i mas kaunim tasol ol Baibel ol bos bilong Misin long Rom i orait long en. Tasol inap planti handet yia ol i no bin kaunim Baibel na i hatwok long ol i senisim dispela pasin na ol i kirap long kaunim. Olsem na long ol kantri i gat planti Katolik long en, ol i holim yet dispela tingting olsem Baibel em i buk bilong ol Talatala na ol Talatala tasol i save kaunim.
Planti Katolik long nau, em ol i save go long lotu na ol i bin kisim wanpela Baibel, ol i pret yet long kaunim. Bilong wanem ol i pret? Long wanem Misin bilong ol i save tok, pasin bilong kaunim Baibel inap paulim tingting bilong ol. Bilong wanem Misin i tok olsem? Long wanem Misin Roman Katolik i no bilip tasol long Baibel; ol i bilip tu long tok bilong Misin. Wanpela profesa bilong lotu Katolik, em Georges Auzou, em i tok: ‘Tok bilong Misin i paslain long tok bilong Baibel. Tok bilong Misin . . . i winim Baibel. . . . Dispela samting i helpim yumi long save bilong wanem Misin i no bin tokim lain bilong en ol i mas kaunim Baibel na stadi na lainim tok bilong Baibel.’—Buk La Parole de Dieu (Tok Bilong God).
Bilong Wanem Yumi Mas Kaunim Baibel?
Tasol planti gutpela Katolik long olgeta hap ol i wok long kaunim Baibel long nau, na ol i laik bai sampela man i ken helpim ol long save long as bilong ol tok ol i kaunim. Na i wankain tu long planti Talatala na sampela man em bipo ol i ting olsem pasin komyunis o wok saiens samting inap helpim ol man.
Long nau planti man i kirap tingim ol samting bilong spirit na wanpela man bilong raitim ol tok bilong lotu long ol nius, em Alain Woodrow, em i wok long painim as bilong dispela samting. Em i tok: “Ol i no bilip moa long ol samting ol man i gat bikpela tingting long mekim, na long ol wok politik na wok saiens samting, long wanem ol dispela samting i no bin helpim ol.” Na em i tok: “Ol i no bilip moa long ol misin tu, long wanem ol misin i insait long ol wok politik na wok bisnis bilong dispela graun.” Na em i tok, ol man i kirap tingim ol samting bilong God long nau, long wanem ol i lukim olsem ol samting Revelesen i tok long en i laik kamap tru na ol i pret.
Ating yu wanpela bilong ol dispela man i bin kirap long kaunim Baibel. Sapos olsem, orait yu no laik kaunim nating, a? Yu laik kisim gut as bilong ol tok yu kaunim. Orait, yu mas mekim wanem na bai yu inap kisim gut as bilong ol tok yu kaunim?