“Nek Bilong Ol i Go Pinis Long Olgeta Graun”
LONG Sam 19 Devit i stori long ol gutpela gutpela samting God i bin wokim na em i tok, ol dispela samting i litimapim nem bilong God. Na Devit i tok, em i pilim tru ol lo bilong Jehova, na ol tok bilong Em i save givim gutpela tingting long yumi, na stretpela kot bilong Em. Aposel Pol tu i pilim tru ol dispela samting. Pol i kamapim sampela tok bilong dispela Sam na em i stori long bikpela wok ol kristen tru i mas wok strong long mekim. Em i stori long ol Kristen tru na em i tok: “Nek bilong ol i go pinis long olgeta graun. Na tok bilong ol i go inap long olgeta ples.”−Rom 10:18.
Dispela “tok” em i bikpela samting tru long olgeta manmeri long nau, em ol i laik abrusim bagarap na i stap laip, long wanem Jehova i wokim kot na nau em i laik pinisim pasin nogut i stap long dispela graun. (Sefanaia 2:2, 3; 3:8) Olgeta man i mas save long gutpela tok bilong Kingdom bilong Jehova. Long olgeta hap bilong graun long nau ol man i no stap wanbel, na ol i brukim lo, na pasin raskol i go bikpela, na ol i mekim pasin sem na pasin pamuk, na ol famili i bruk. Tru, ol i toktok long kamapim gutaim, tasol ol bikpela gavman i wok yet long hipim ol samting bilong pait i moa nogut, na planti kantri moa long nau ol i gat ol bom nogut bilong nuklia. Ol samting i kamap long graun long nau i stret wantaim tok bilong Pol long 2 Timoti 3:1-5, em i kolim ol samting i mas kamap long “las taim.”
Orait, husat inap abrusim bagarap taim dispela pasin nogut bilong nau i pinis? Na ol i mas mekim wanem bambai ol inap abrusim bagarap? Pol i bekim stret tok. Em i kamapim tok profet bilong Joel 2:32 na em i tok: “Olgeta man i kolim nem bilong Bikpela na i singaut long em, bai em i kisim bek ol.” (Rom 10:13) Olsem wanem ol lain man bilong graun i ken ‘singaut long nem bilong Jehova’? Planti ol i no save Jehova em i nem bilong God! I mas i gat wanem samting bilong helpim ol dispela manmeri? Pol i tok, i mas i gat man bilong autim tok long ol.−Rom 10:14-16.
Gutpela tru Jehova i bin salim ol Witnes bilong em i go tokim ol man Kingdom bilong God i klostu pinis na ol man i kisim save long God na Pikinini bilong em, Krais Jisas, bai ol inap kisim laip i stap oltaim. (Aisaia 43:10, 12; Luk 21:25, 26, 31; Jon 17:3) Nau ol i autim dispela gutpela tok ‘long olgeta hap bilong graun.’
Milion milion manmeri ol i bin harim dispela tok na ol i bilip, olsem na long miting bilong tingim i dai bilong Jisas, long Epril 1, 1988, inap olsem 9,201,071 i kam bung. Na long olgeta hap graun, long yia 1988, inap olsem 3,592,654 manmeri i bin autim tok bilong Kingdom. Na 239,268 nupela man i bin kisim baptais na kamap wokman bilong God. Em bikpela lain, winim yia bipo inap 3.6 pesen. Ol gutpela misineri i bin mekim bikpela wok bilong helpim lain bilong Jehova i go bikpela olsem. Tasol long dispela taim planti handet tausen Witnes long ol dispela kantri ol i bin salim ol misineri i go long en, em ol i ‘bilip long tok ol i harim,’ ol yet i kirap mekim bikpela wok, olsem wok painia, na long olgeta de ol i ‘autim dispela gutpela tok.’ Long 1988 inap olsem 455,561 Witnes ol i mekim wok painia. Dispela lain i go bikpela na i winim bilong yia bipo inap olsem 4.4 pesen. Olsem na ol brata sista i bin lusim planti aua tru long autim tok, inap olsem 785,521,697. Dispela i winim ol aua bilong 6-pela yia bipo inap dabol.
Lukim sat long fopela pes bihain long dispela i kamapim long ples klia bikpela wok bilong autim tok ol Witnes i bin mekim. Mipela laik bai yu lukim gut dispela ripot bilong wok Kristen ol i bin mekim long yia 1988.
[Sat long pes 28-31]
RIPOT BILONG WOK BILONG OL WITNES BILONG JEHOVA LONG 1988
(Lukim Wastaua Jun 1,1989 volume)