Helpim Ol Narapela Long Kamap Pren Bilong God
1 Long nau, ol manmeri bilong olgeta lain man i wok long kisim save long ol pasin Jehova i laikim. (Ais. 2: 2, 3) Tasol bilong ol i ken ‘stap strong na karim kaikai i stap,’ ol i mas laikim tru Jehova. (Lu. 8:15; Mk. 12:30) Sapos ol i no laikim Jehova, ol bai no gat strong long sakim ol samting nogut i laik pulim ol na ol bai no gat strongpela bel bilong mekim pasin i stret. Wanpela rot bilong helpim ol narapela long pas gut wantaim Jehova, em long rot bilong helpim ol long laikim tru ol pasin bilong em. Kirapim ol long tingim gut ol tok i stap long buk Go Klostu Long Jehova.
2 Pasin Bilong Yu: Ol samting yu mekim inap stiaim tru bel bilong ol Baibel sumatin. Taim ol i lukim olsem em i bikpela samting long yu long pas gut wantaim Jehova na ol i lukim olsem wanem dispela i stiaim wokabaut bilong yu, orait dispela inap kirapim ol tu long pas gut wantaim em. (Lu. 6:40) Tru tumas, planti taim pasin bilong yumi inap kirapim ol narapela, winim ol tok yumi mekim.
3 Pasin bilong ol papamama em wanpela bikpela rot bilong ol long skulim pikinini bilong ol long laikim Jehova. (Lo 6:4-9) Tupela marit i laik bai pikinini bilong ol i kamap bikpela insait long tok i tru, na ol i askim ol narapela papamama husat i bin mekim gut wok bilong ol long givim sampela gutpela tingting long ol. Brata i tok: “Olgeta papamama mi toktok wantaim ol, ol i kamapim wankain tok olsem papamama i mas i stap gutpela piksa.” Olsem na long olgeta samting ol i mekim long laip bilong ol, ol papamama i ken i stap gutpela piksa long pasin bilong i stap ‘pren bilong God.’—Jem. 2:23.
4 Beten: Yu ken helpim tu ol narapela long pas gut wantaim Jehova long rot bilong lainim ol long kamapim tingting i stap long bel bilong ol taim ol i beten. Yu ken kirapim ol long tingim beten Jisas i lainim ol man long en, na ol narapela beten i stap long Baibel. (Mt. 6:9, 10) Taim ol pikinini na Baibel sumatin bilong yu i harim beten bilong yu, dispela inap lainim ol long pasin bilong beten. Taim ol i harim yu kamapim tingting bilong yu i stap long bel, ol inap pilim tingting bilong yu, olsem yu gat wanem tingting long Jehova. Taim ol traim i painim ol, strongim ol long “beten long olgeta taim.” (Ro. 12:12) Taim ol i luksave olsem Jehova i helpim ol long taim bilong hevi, ol bai kirap bilip long em na laikim em olsem pren tru bilong ol.—Sng. 34:8; Fl. 4:6, 7.