“Mi No Laik Harim”
1 Long sampela hap, planti man i save mekim dispela tok taim yumi autim tok. Wanem samting bai helpim yumi na yumi no bel hevi taim ol man i no laik harim tok? Olsem wanem yumi ken kirapim laik bilong ol man long harim gutnius?
2 Holimpas Amamas: Sapos yumi tingim as na ol man i les long harim tok, dispela bai helpim yumi long holimpas pasin bilong amamas. Ol man em ol i bilip long tok bilong evolusen na ol man i kamap bikpela insait long lain i no bilip long God, ating ol i no bin skelim tok bilong Baibel olsem em i gutpela o nogat. Sampela narapela ol i bel hevi long pasin giaman i stap insait long ol lotu. Sampela ol i les long harim tok, long wanem, ol i bel hevi na ol i pilim olsem i no gat wanpela gutpela samting inap kamap. (Ef. 2:12) Sampela ol i no laik harim, long wanem, ol hevi i daunim ol.—Mt. 24:37-39.
3 Maski sampela i no laik harim tok, yumi inap kisim amamas long wok autim tok, long wanem, yumi save olsem wok bilong yumi i givim biknem long Jehova. (1 Pi. 4:11) Na tu, taim yumi toktok wantaim ol man long tok i tru, maski ol i no pilim yet dispela tok, dispela i strongim bilip bilong yumi yet. Yumi mas i gat wankain tingting olsem Jehova long ol man long teritori. Em i sori long ol manmeri bilong Ninive em “ol i no save long wanem samting i stret na wanem samting i no stret.” (Jna. 4:11, NW ) Ol man long teritori bilong yumi i mas harim gutnius! Olsem na yumi no ken givap, yumi mas wok strong long painim rot bilong kirapim laik bilong ol long harim tok bilong Baibel.
4 Toktok Long Sampela Hevi Long Hap Bilong Yu: Taim yu kirapim tok, pastaim yu ken kolim wanpela samting ol man long hap bilong yu i tingting planti long en na askim man bilong haus long kamapim tingting bilong em long dispela samting. Putim gut yau long tok em i mekim, na kamapim gutpela tok bilong Baibel long dispela samting. Bihain long wanpela hevi i kamap long hap bilong wanpela Witnes, em i tokaut long ol man long olgeta wan wan haus olsem em i sori tru long dispela hevi i bin kamap. Em i tok: “Wantu ol manmeri i kirap long toktok. Long dispela de, mi toktok gut wantaim planti man, long wanem, mi soim olsem mi tingim ol.”
5 Kingdom Bilong God bai pinisim olgeta hevi i painim ol man. Traim long luksave long samting em man bilong haus i tingting planti long en. Ating em bai orait long yu kamapim tok bilong Baibel long ol gutpela samting bai kamap. Sapos em i no laik mekim olsem, orait ating long narapela taim em bai i gat laik long harim yu “toktok gen long dispela samting.”—Ap. 17:32.